ភ្នំពេញៈ អាជ្ញាធរប្រកាសបិទផ្លូវចំនួន ១៣ ខ្សែ ក្នុងរាជធានីភ្នំពេញ ដោយហាមម៉ូតូ រ៉ឺម៉ក ឬរថយន្ត បើកចេញចូលក្នុងឱកាសពិធីបុណ្យអុំទូកនាសប្តាហ៍ក្រោយនេះ ដើម្បីកាត់បន្ថយការកកស្ទះចរាចរណ៍ និងជួយបង្កភាពងាយស្រួលដល់ប្រជាពលរដ្ឋក្នុងការដើរចូលទៅទស្សនាកម្មវិធីកម្សាន្តផ្សេងៗក៏ដូចជាពិធីប្រណាំងទូក។
យោងតាមសេចក្តីជូនដំណឹងរបស់ស្នងការដ្ឋាននគរបាលរាជធានីភ្នំពេញ កាលពីចុងសប្តាហ៍ប្រកាសថាទាក់ទងទៅនឹងទីតាំងដែលត្រូវបិទមិនឱ្យម៉ូតូ រ៉ឺម៉ក ឬរថយន្តបើកចេញចូលក្នុងឱកាសពិធីបុណ្យអុំទូក អាជ្ញាធរនឹងបិទផ្លូវចំនួន ១៣ ខ្សែដែលមានផ្លូវ ២៩៤ កែងផ្លូវនរោត្តម ផ្លូវសុរាម្រឹតកែងនាគបាញ់ទឹក ផ្លូវ ២៤០ កែងផ្លូវព្រះស៊ីសុវត្ថិ ផ្លូវ ២៤០ កែងផ្លូវសុធារស និងផ្លូវប៉ាស្ទ័រ ៥១ កែងវត្តលង្កា និងផ្លូវ ២៤០ កែងផ្លូវប៉ាស្ទ័រ ៥១ ។
បន្ថែមពីនេះផ្លូវ ២២២ កែងផ្លូវប៉ាស្ទ័រ ៥១ និងផ្លូវ ១៨៤ កែងផ្លូវនរោត្តម ផ្លូវ២៤០ កែងផ្លូវនរោត្តម រោងកុនលុច្យកែងផ្លូវនរោត្តម និងផ្លូវព្រះស៊ីសុវត្ថិកែងវត្តបទុម រួមទាំងផ្លូវលេខ ១៩ កែងផ្លូវលេខ ១៣ និងផ្លូវ ១៩ កែងផ្លូវ ១៨៤ ក៏ត្រូវបិទមិនឲ្យធ្វើចរាចរណ៍ផងដែរ។
សេចក្តីជូនដំណឹងនេះបានបញ្ជាក់ថា៖ «សូមបងប្អូនប្រជាពលរដ្ឋទទួលជ្រាបជាព័ត៌មាន និងចូលរួមគោរពតាមសេចក្តីណែនាំនេះ ដើម្បីងាយស្រួលដល់កម្លាំងសមត្ថកិច្ចក្នុងការអនុវត្តការងាររបស់ខ្លួន ជាពិសេសដើម្បីកុំឱ្យមានការកកស្ទះ និងងាយស្រួលដល់អ្នកថ្មើរជើង ដើម្បីដើរចូលទស្សនាកម្មវិធីកម្សាន្តនានា»។
លោក ស ថេត ស្នងការនគរបាលរាជធានីភ្នំពេញប្រាប់ភ្នំពេញប៉ុស្តិ៍ពីម្សិលមិញថា អាជ្ញាធរនឹងបិទចរាចរណ៍ជាប់គ្នារយៈពេល ៤ ថ្ងៃចាប់ពីថ្ងៃទី ៩ ដល់ថ្ងៃទី ១២។ ក្នុងនោះតំបន់ជាយក្រុងមួយចំនួនក៏នឹងត្រូវបិទហាមធ្វើចរាចរណ៍ផងដែរ គឺនៅថ្ងៃទី ៩ វិច្ឆិកា ដើម្បីហាមឡានធំៗចូលក្រុង។
លោកបន្តថា៖ «គោលដៅខ្លះយើងបិទពេលថ្ងៃ ចំណែកគោលដៅខ្លះ យើងបិទរហូតដល់យប់ជាអចិន្រៃ្តយ៍តែម្តងរហូតដល់ចប់កម្មវិធីបុណ្យអុំទូក។ កន្លែងដែលបិទនេះគឺឲ្យតែអ្នកថ្មើរជើងដើរទេ ចំណែកម៉ូតូ ឡានអី គឺហាមឃាត់មិនឱ្យចូល»។
លោក ស ថេត ក៏បានឲ្យដឹងដែរថា នៅក្នុងឱកាសព្រះរាជពិធីបុណ្យអុំទូកនេះនឹងប្រើប្រាស់កងកម្លាំងចម្រុះរាប់ពាន់នាក់ ដើម្បីការពារសន្តិសុខ សណ្តាប់ធ្នាប់ សុវត្ថិភាព។ ជាពិសេសការពារកុំឱ្យកើតមាននូវបាតុភាពផ្សេងៗ ខណៈនៅថ្ងៃទី ៩ វិច្ឆិកា ដែលប្រមុខរដ្ឋាភិបាលប្រកាសហូបអំបុកជុំគ្នានោះគឺនឹងមានការដាក់ពង្រាយកម្លាំងជាង ៩០០ គោលដៅក្នុងរាជធានីភ្នំពេញ ដើម្បីការពារសណ្តាប់ធ្នាប់ដល់ប្រជាពលរដ្ឋផងដែរ។
លោកបញ្ជាក់ថា៖ «ទោះប្រើប្រាស់កម្លាំងច្រើន តែសូមកុំឱ្យបងប្អូនប្រជាពលរដ្ឋយើងមានការភ័យខ្លាចពេលចូលមកទស្សនាបុណ្យនេះឲ្យសោះ។ សូមឱ្យគាត់ចូលរួមក្នុងការគោរពច្បាប់នានា ហើយឲ្យមានអ្នកចូលរួមមកទស្សនាពិធីបុណ្យអុំទូករយៈពេលប៉ុន្មានថ្ងៃនេះ។ បើសិនជាឃើញមានក្រុម ឬមុខសញ្ញាដែលគួរឱ្យសង្ស័យ សូមទាក់ទងមកសមត្ថកិច្ចគ្រប់ទីកន្លែងភ្លាមៗ»។
ជាមួយគ្នានេះរដ្ឋបាលរាជធានីភ្នំពេញក៏បានប្រកាសដែរថា ដើម្បីចូលរួមអបអរសាទរក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលនឹងប្រព្រឹត្តទៅនៅថ្ងៃទី ១០-១១-១២ ខែវិច្ឆិកានេះអាជ្ញាធររាជធានី សហការជាមួយមន្ទីរអប់រំ យុវជន និងកីឡា រាជធានីភ្នំពេញ នឹងរៀបចំពិធីប្រណាំងទូកសាកល្បងក្នុងក្របខ័ណ្ឌរាជធានីភ្នំពេញនាថ្ងៃទី ៨ វិច្ឆិកាចាប់ពីម៉ោង ១ រសៀលនៅសួនមាត់ទន្លេរហូតដល់ក្បែររូបសំណាកតេជោមាស។
បុណ្យអុំទូកជាពិធីបុណ្យជាតិធំមួយក្នុងចំណោមពិធីបុណ្យជាតិធំៗជាច្រើននៅប្រទេសកម្ពុជាដែលកម្ពុជាប្រារព្ធធ្វើឡើងរៀងរាល់ខែវិច្ឆិការយៈពេល ៣ ថ្ងៃ ដើម្បីរំឭកដល់គំរូវីរភាពដ៏អង់អាចក្លាហានរបស់កងទ័ពជើងទឹកខ្មែរ ដែលបានរំដោះទឹកដីរួចផុតពីការជិះជាន់របស់ពួកខ្មាំងសត្រូវ ។
លោក ឈិន កេតនា អនុប្រធានអចិន្រៃ្តយ៍នៃគណៈកម្មាធិការជាតិរៀបចំបុណ្យជាតិ បដិសេធធ្វើអត្ថាធិប្បាយដោយអះអាងថា លោកជាប់រវល់៕