ភ្នំពេញៈ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា ផ្លូវជាតិលេខ ៣ នឹងត្រូវសាងសង់បញ្ចប់មុនគម្រោងប្រមាណ ១ ឆ្នាំ ខណៈរហូតមកទល់ពេលនេះការសាងសង់សម្រេចបាន ៩០ ភាគរយនៃបណ្ដោយផ្លូវដែលមានចម្ងាយ ១៣៤ គីឡូម៉ែត្រពីភ្នំពេញទៅខេត្តកំពត។
នៅក្នុងដំណើរដឹកនាំក្រុមការងារបច្ចេកទេសត្រួតពិនិត្យការដ្ឋានសាងសង់ផ្លូវលេខ ៣ នៅថ្ងៃទី ៤ មករា ឆ្នាំ ២០២១ លោករដ្ឋមន្ត្រីបានថ្លែងថា៖ «ការងារនេះចប់ ១ ឆ្នាំមុនតាមការគ្រោងទុក ដែលនឹងបញ្ចប់នៅឆ្នាំក្រោយឯណោះ ឆ្នាំ ២០២២»។
លោក ចាន់ថុល ក៏បានឱ្យដឹងផងដែរថា ដើម្បីកាត់បន្ថយគ្រោះថ្នាក់ដែលបណ្ដាលមកពីការបើកបរ និងកាត់បន្ថយការបំផ្លាញផ្លូវថ្នល់ដោយការដឹកលើសទម្ងន់កំណត់ ក្រសួងគ្រោងនឹងបង្កប់ជញ្ជីងថ្លឹងទម្ងន់រថយន្តនៅក្រោមដីចំនួន ២ កន្លែងបន្ថែមទីតាំងជញ្ជីងថ្លឹង និងបំពាក់កាមេរ៉ាចាប់ល្បឿនចំនួន ១១ កន្លែងសម្រាប់ត្រួតពិនិត្យការបើកបរលើសល្បឿននៃច្បាប់កំណត់។
លោកបានថ្លែងថា៖ «ការធ្វើយ៉ាងដូច្នេះគឺដើម្បីត្រួតពិនិត្យលើរថយន្តដែលបើកបរល្មើសច្បាប់ក៏ដូចជាដើម្បីរក្សាគុណភាពផ្លូវឲ្យបានល្អ»។
លោកបញ្ជាក់ថា៖ «ពីដើម ផ្លូវនេះគឺកន្លែងជញ្ជីងថ្លឹងរថយន្ត គឺមានតែម្ខាងទេ ដោយមានម្ខាងអត់ម្ខាង។ ដូច្នេះយើងនឹងសាងសង់ស្ថានីយថ្លឹងរថយន្តទាំងអស់សងខាងផ្លូវ។ យើងកំពុងពិភាក្សាគ្នា ស្វែងរកថវិកាធ្វើការ ប៉ុន្តែមិនមែនថវិការបស់គម្រោងទេ។ យើងបានដាក់សាកល្បងជញ្ជីងក្រោមដីចំនួន ២ កន្លែងដែលវាជិតនឹងដំណើរការហើយ ដោយបំពាក់កាមេរ៉ាចាប់ល្បឿនផង»។
លោកបន្តថា ការដែលគម្រោងបានចប់មុនការគ្រោងទុកយ៉ាងដូច្នេះ ដោយសារតែក្រសួងបានជំរុញឲ្យការសាងសង់ ប្រព្រឹត្តទៅឲ្យបានលឿន ដើម្បីផ្តល់ឲ្យប្រជាពលរដ្ឋបានប្រើប្រាស់ផ្លូវនេះឆាប់រហ័ស ថែមទាំងធានាបាននូវគុណភាពផ្លូវនៅល្អដូចការព្រមព្រៀង បើទោះបីជាការសាងសង់នឹងបញ្ចប់មុនផែនការក៏ដោយ។
ការស្ថាបនាផ្លូវជាតិលេខ ៣ គឺមានចម្ងាយ ១៣៤ គីឡូម៉ែត្រដោយភ្ជាប់ពីភ្នំពេញទៅខេត្តកំពត ហើយផ្លូវនេះមាន ៤ គន្លងដែលត្រូវចំណាយទឹកប្រាក់អស់ប្រមាណជាង ២១៩ លានដុល្លារអាមេរិក។ គម្រោងនេះត្រូវបានសាងសង់ដោយក្រុមហ៊ុនសាជីវកម្មស្ពានថ្នល់ចិន និងត្រូវបានត្រួតពិនិត្យបច្ចេកទេសដោយក្រុមហ៊ុនបច្ចេកទេសសំណង់ក្វាងចូវវ៉ានអាន ដែលនឹងចំណាយរយៈពេលសាងសង់ ៤៨ ខែ បន្ទាប់ពីបើកការដ្ឋានសាងសង់កាលពីថ្ងៃទី ៧ ខែឧសភា ឆ្នាំ ២០១៨ ។ នេះបើតាមការប្រកាសរបស់ក្រសួងសាធារណការ និងដឹកជញ្ជូន។
លោក គង់ សុវណ្ណ ជាទីប្រឹក្សាជំនាញ និងជាអនុប្រធានក្រុមកម្មវិធីសុវត្ថិភាពចរាចរណ៍សហគមន៍នៃគម្រោងអភិវឌ្ឍន៍ផ្លូវជនបទជំហានទី ២ របស់ក្រសួងអភិវឌ្ឍន៍ជនបទបានប្រាប់ភ្នំពេញប៉ុស្តិ៍ថា បើក្នុងករណីដែលការសាងសង់ បានមុនផែនការគ្រោងទុកនោះគឺជារឿងមួយដែលត្រូវសាទរ ហើយរំពឹងថា ក្រុមបច្ចេកទេសក្រសួងនឹងធ្វើការត្រួតពិនិត្យឲ្យបានហ្មត់ចត់ ពី ១ ដំណាក់កាលទៅ ១ ដំណាក់កាល ជុំវិញបញ្ហាបច្ចេកទេស ស្តង់ដាគុណភាព និងបរិក្ខារសុវត្ថិភាពផ្លូវ។
ការរៀបចំដាក់កាមេរ៉ា និងជញ្ជីងថ្លឹងលើផ្លូវនេះ គឺល្អណាស់ដោយទាមទារឲ្យមានចំណាត់ការពីក្រសួងស្ថាប័នពាក់ព័ន្ធចូលរួមអនុវត្តថែមទៀត ព្រោះថា ការដឹកទំនិញលើសទម្ងន់នឹងបង្កើតឱ្យមានជង្ហុកនៅលើដងផ្លូវ គឺប្រឈមនឹងគ្រោះថ្នាក់ដែលបង្កឲ្យរបួស និងស្លាប់ជីវិតមនុស្សស្លូតត្រង់។
លោកបញ្ជាក់ថា៖ «ប្រព័ន្ធបច្ចេកវិទ្យាជួយមនុស្សបានច្រើន ហើយបើការរៀបចំរបស់ក្រសួង វិវឌ្ឍន៍ទៅរកបែបនោះគឺជួយបានច្រើនណាស់ ដោយជួយទប់ស្កាត់កុំឲ្យយានយន្តដែលឈ្មួញមួយចំនួន គាត់នៅតែបន្តដាក់លើសទម្ងន់។ បើកាលណាលើសទម្ងន់ វាធ្វើឲ្យមិនមានលំនឹងគ្រប់គ្រាន់ ងាយនឹងបង្កគ្រោះថ្នាក់។ យើងដឹងហើយផ្លូវនីមួយៗមិនមែនរដ្ឋចំណាយលុយអស់តិចទេ បើធ្វើឲ្យខូច គឺខាតថវិកាច្រើនណាស់»៕