.jpg)
ទិដ្ឋភាពឆ្នេរសមុទ្រនៅខេត្តកែបកាលពីដើមឆ្នាំនេះ។ គម្រោងកសាងផ្លូវជាប់មាត់សមុទ្រ ៧ គីឡូម៉ែត្រក្នុងខេត្តនេះនឹងត្រូវបញ្ចប់ក្នុងឆ្នាំ ២០២០ នេះ។ មិនា
កែបៈ អាជ្ញាធរខេត្តកែបបានអះអាងថា គម្រោងកសាងផ្លូវជាប់មាត់សមុទ្រ ៧ គីឡូម៉ែត្រក្នុងខេត្តនេះនឹងត្រូវបញ្ចប់ក្នុងឆ្នាំ ២០២០ នេះហើយការអភិវឌ្ឍនេះនឹងជួយទាក់ទាញភ្ញៀវទេសចរបន្ថែមទៀត ខណៈខេត្តនេះមានគម្រោងពង្រីកឆ្នេរសមុទ្រឲ្យបានច្រើនកន្លែង ដើម្បីបង្វែរការមកលេងកម្សាន្តកន្លែងតែមួយ។
លោក កែន សត្ថា អភិបាលខេត្តកែបបានថ្លែងនៅទីស្តីការគណៈរដ្ឋមន្ត្រីនៅក្នុងសន្និសីទកាសែតកាលពីថ្ងៃអង្គារថា គម្រោងថ្នាក់ខេត្តដែលបានការអនុញ្ញាតពីរដ្ឋាភិបាលកំពុងកសាងផ្លូវជាប់មាត់សមុទ្រ ១ ខ្សែដែលអាចតភ្ជាប់ជាមួយបណ្តាខេត្តដទៃទៀតនៅជាប់មាត់សមុទ្រ ហើយផ្លូវនេះក៏នឹងភ្ជាប់ពីប្រទេសថៃទៅកាន់ប្រទេសវៀតណាមផងដែរ។
លោក សត្ថា បានថ្លែងថា រដ្ឋបាលខេត្តកែបនឹងបញ្ចប់ការសាងសង់ផ្លូវប្រវែង ៧ គីឡូម៉ែត្រសិននៅតាមឆ្នេរសមុទ្រក្នុងខេត្តកែបនៅឆ្នាំ ២០២០ ដោយចំណាយថវិការបស់រដ្ឋាភិបាល ខណៈគម្រោងនេះសម្រេចបាន ៤០ ភាគរយហើយ។ ចំពោះគម្រោងបន្តពីគម្រោងសាងសង់ផ្លូវ ៧ គីឡូម៉ែត្រនេះលោករំពឹងថា ធនាគារ ADB នឹងផ្តល់ការគាំទ្របន្ត ដើម្បីធ្វើឲ្យការសាងសង់ផ្លូវតាមបណ្តាយមាត់សមុទ្រនេះអាចទទួលជោគជ័យក្នុងពេលឆាប់ៗ។
លោកបញ្ជាក់ថា៖ «ផ្លូវនេះ យើងចាក់បេតុង គ្រឹះវាសិនដែលយើងអាចសម្រេច ១ កំណាត់សិនក្នុងឆ្នាំនេះ យើងអាចធ្វើបាន ៧ គីឡូម៉ែត្រ ហើយបន្តពីនេះទៅ យើងបន្តសហការជាមួយ ADB ជាមួយក្រសួងសាធារណការនឹងបន្តពីគម្រោងការរបស់ខេត្តនេះអាចបន្តឆ្ពោះទៅព្រំដែន កាត់តាមខេត្តកំពតតាមច្រកទ្វារអន្តរជាតិព្រែកចាកនេះ»។
លោកថ្លែងថា៖ «ឥឡូវយើងកំពុងតែធ្វើផ្លូវដែលគំនិតផ្តួចផ្តើមរបស់លោកនាយករដ្ឋមន្ត្រី ហ៊ុន សែន ឲ្យយើងធ្វើផ្លូវតាមប្របមាត់សមុទ្រដែលយើងបានចាក់ជាផ្លូវបេតុងទទឹង ១៨ ម៉ែត្រចេញទៅឆ្នេរកោនតែម្តង ហើយចេញពីឆ្នេរកោននេះ បុកទៅភ្ជាប់ជាមួយច្រកព្រំដែនព្រែកចាករបស់យើង ទៅដល់ប្រទេសវៀតណាមតែម្តង។
លោកអះអាងថា ការអភិវឌ្ឍផ្លូវជាប់មាត់សមុទ្រនេះគឺនឹងអាចទាក់ទាញភ្ញៀវទេសចរឲ្យមកលេងកម្សាន្តក្នុងប្រទេសកម្ពុជាកាន់តែច្រើន ជាពិសេសគឺខេត្តកែបដែលរដ្ឋាភិបាល បានប្រសិទ្ធនាមឲ្យថា ជាតំបន់ទេសចរណ៍ធម្មជាតិកម្រិតខ្ពស់នៅក្នុងតំបន់។
លោកបានបន្តថា៖ «នេះជាយុទ្ធសាស្ត្រសម្រាប់ភ្ញៀវទេសចរនៅតំបន់ឆ្នេរ ហើយផ្លូវនេះក៏មានភ្ជាប់ជាមួយខេត្តជាប់មាត់សមុទ្រទាំងអស់រហូតដល់ព្រំដែនថៃភាគខាងត្បូង។ យើងមានផែនការមួយទៀតថា ទេសចរណ៍សមុទ្រនេះទៅថ្ងៃខាងមុខនេះជាមួយវៀតណាម កម្ពុជា ថៃ ហើយថាទេសចរណ៍តាមផ្លូវទឹកដែលយើងអាចភ្ជាប់ទំនាក់ទំនងគ្នា ដែលចេញពីខេត្តព្រះសីហនុ ទៅខេត្តកំពត និងខេត្តកែប»។
លោក កែន សត្ថា ថ្លែងនៅក្នុងសន្នសីទម្សិលមិញ។ រូបថត ហុង មិនា
លោក ម៉ម ទូច ប្រធានមន្ទីរសាធារណការ និងដឹកជញ្ជូនខេត្តកែបបានប្រាប់ភ្នំពេញប៉ុស្តិ៍ពីម្សិលមិញថា នៅក្នុងខេត្តកែប រដ្ឋាភិបាលមានគម្រោងធ្វើផ្លូវជាប់មាត់សមុទ្រប្រវែងជាង ១៤ គីឡូម៉ែត្រ ហើយក្នុងនោះក្រុមការងារបច្ចេកទេសបានបុកគ្រឹះ និងចាក់ជាខឿននៅតាមមាត់សមុទ្របានជិត ៩ គីឡូម៉ែត្រដែលជាគម្រោងសហការថ្នាក់ជាតិ ប៉ុន្តែគម្រោងនេះមិនទាន់ចេញជាផ្លូវអាចធ្វើដំណើរបាននោះទេ។
លោកបន្តថា ចំណែកផ្លូវដែលសាងសង់ប្រវែង ៧ គីឡូម៉ែត្រដែលគ្រោងនឹងបញ្ចប់ក្នុងឆ្នាំនេះគឺជាគម្រោងថ្នាក់ខេត្ត ដែលអាចឲ្យពលរដ្ឋធ្វើចរាចរណ៍បាន។
លោកបញ្ជាក់ថា៖ «ជាង ១៤ គីឡូ ប៉ុន្តែយើងបានធ្វើគ្រឹះបុកជាតួថ្មហ្នឹង ១២៥ ម៉ែត្រពីមាត់សមុទ្រធ្វើជាគ្រឹះ ជាតួផ្លូវសិន ហើយឯកឧត្តមអភិបាលខេត្ត មានប្រសាសន៍នេះ គឺការងារចាក់បេតុងធ្វើផ្លូវដែលជាកញ្ចប់ថ្នាក់រដ្ឋបាលថ្នាក់ក្រោមជាតិ។ វាជាផ្លូវជាប់មាត់សមុទ្រលើកទី ១ ដែលមាននៅក្នុងខេត្ត ចាកចេញពីផែកោះទន្សាយសសៀរប្របៗមាត់សមុទ្ររហូតទៅដល់ឆ្នេរកោន»។
យ៉ាងណាលោក ម៉ម ទូច មិនបានបញ្ជាក់ទេថា គម្រោងសាងសង់ផ្លូវជាប់មាត់សមុទ្រប្រមាណ ១៤ គីឡូម៉ែត្រនេះចំណាយអស់ទឹកប្រាក់ប៉ុន្មាន ដោយគ្រាន់តែបញ្ជាក់ថា ទឹកប្រាក់នៃការសាងសង់នេះមានមកពីប្រភព ២ គឺថ្នាក់ជាតិ និងថ្នាក់ក្រោមជាតិ៕
