.jpg)
ផ្សារទួលសង្កែ និងផ្សារបឹងត្របែកផ្លាហ្សា ត្រូវបានផ្អាកដំណើរការជាបណ្តោះអាសន្នរយៈពេល ១៤ ថ្ងៃ ដោយសារតែរកឃើញមានអ្នកឆ្លងកូវីដ។ រូបថត ក្រសួងព័ត៌មាន
ភ្នំពេញ៖ ផ្សារចំនួន ២ ត្រូវបានផ្អាកដំណើរការជាបណ្តោះអាសន្នរយៈពេល ១៤ ថ្ងៃ ចាប់ពីថ្ងៃចន្ទ ទី ១៩ ខែមេសានេះ ដល់ថ្ងៃទី ០២ ខែឧសភា ក្នុងមូលដ្ឋានផ្សារធំទួលសង្កែ (ផ្សារសាំហាន់) និងផ្សារបឹងត្របែកផ្លាហ្សា ដោយសារតែរកឃើញមានអ្នកឆ្លងកូវីដ ១៩។
លោក ជា ពិសី អភិបាលខណ្ឌឫស្សីកែវ បានឱ្យដឹងថា ដោយស្ថានភាពនៃការរីករាលដាលនៃជំងឺកូវីដ ១៩ ក្នុងរយៈពេលប៉ុន្មានថ្ងៃចុងក្រោយនេះ មានអាជីវករ និងប្រជាពលរដ្ឋ បានឆ្លងវីរុសកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ ២០២១ ដែលស្ថានភាពនេះបានឆ្លងរាលដាលយ៉ាងឆាប់រហ័ស គួរឲ្យព្រួយបារម្ភ និងចាំបាច់ត្រូវមានវិធានការសុខាភិបាល ដើម្បីទប់ស្កាត់ជាបន្ទាន់។
លោកមានប្រសាសន៍ថា៖ «ចំពោះមុខរដ្ឋបាលខណ្ឌឫស្សីកែវ សម្រេចផ្អាកដំណើរការជាបណ្តោះអាសន្នមូលដ្ឋានផ្សារធំទួលសង្កែ (ផ្សារសាំហាន់) ក្នុងសង្កាត់ទួលសង្កែទី១ រយៈពេល ១៤ ថ្ងៃ ពីថ្ងៃទី ១៩ ដល់ថ្ងៃទី ០២ ខែ ឧសភា ឆ្នាំ ២០២១»។
លោក ជា ពិសី ថា ការផ្អាកនេះធ្វើឡើងដើម្បីបង្ការ និងទប់ស្កាត់ការឆ្លងរីករាលដាលវីរុសកូវីដ ១៩ ទៅដល់អាជីវករ អតិថិជន ក៏ដូចជាប្រជាពលរដ្ឋដែលចេញ-ចូលផ្សារនេះ។
ជាមួយគ្នានេះដែរ លោក ថេង សុថុល អភិបាលខណ្ឌចំការមន ក៏បានសម្រេចផ្អាកដំណើរការបណ្តោះអាសន្នផ្សារបឹងត្របែកផ្លាហ្សាចំនួន ១៤ ថ្ងៃដូចគ្នាផងដែរ ដើម្បីទប់ស្កាត់ការរីករាលដាលនៃវីរុសកូវីដ ១៩ ជាបន្ទាន់។
លោក ថេង សុថុល បានអំពាវនាវដល់បងប្អូនអាជីវករ សន្តិសុខ បុគ្គលិក-កម្មករបម្រើការងារក្នុងផ្សារ និងក្រុមគ្រួសារអាជីវករពាក់ព័ន្ធ ព្រមទាំងប្រជាពលរដ្ឋដែលបានចេញ-ចូលផ្សារនេះ គិតចាប់ពីថ្ងៃទី ០៣ ខែ មេសា ឆ្នាំ ២០២១ មក ត្រូវរួសរាន់ទៅយកសំណាកតេស្តរកមេរោគកូវីដ ១៩ ជាបន្ទាន់នៅក្នុងបរិវេណវិទ្យាល័យបឹងត្របែក ព្រមទាំងត្រូវអនុវត្តវិធានចត្តាឡីស័ក ស្របតាមការណែនាំរបស់ក្រសួងសុខាភិបាលឱ្យបានត្រឹមត្រូវបំផុត។
គួរបញ្ជាក់ថា កាលពីថ្ងៃម្សិលមិញ រដ្ឋបាលរាជធានីភ្នំពេញបានប្រកាសផ្អាកជាបណ្តោះអាសន្ននូវផ្សារដើមគរ និងផ្សារបន្លែដែលស្ថិតនៅជុំវិញតំបន់ប្រជុំជនផ្សារដើមគ បន្ទាប់ពីមានអាជីវករ និងកម្លាំងសន្តិសុខផ្សារដើមគប្រមាណជា ១០០ នាក់ បានឆ្លងវីរុសកូវីដ ១៩។
គិតត្រឹមថ្ងៃទី ១៨ ខែមេសា ការផ្ទុះឆ្លងនៅផ្សារអូឫស្សីមានអ្នកពាក់ព័ន្ធសរុបចំនួន ៤១៣ នាក់ ត្រូវបានរកឃើញវិជ្ជមានកូវីដ ១៩ ឯករណីនៅផ្សារចាស់ រកឃើញអ្នកឆ្លងចំនួន ២៨ នាក់៕
