កណ្ដាលៈ លោក ស្រេង សុខា ស្នងការរងនគរបាលខេត្តកណ្ដាលត្រូវបានអគ្គស្នងការនគរបាលជាតិសម្រេចផ្អាកការងារបណ្ដោះអាសន្នដោយមន្ត្រីនគរបាលបានអះអាងថា គឺដោយសារមានជាប់ពាក់ព័ន្ធនឹងការកាន់កាប់ដីធ្លីរដ្ឋនៅក្រុងតាខ្មៅ។
លោក ឈឿន សុចិត្រ ស្នងការនគរបាលខេត្តកណ្ដាលបានប្រាប់ភ្នំពេញប៉ុស្ដិ៍កាលពីថ្ងៃពុធថា មូលហេតុដែលលោក ស្រេង សុខា ត្រូវបានអគ្គស្នងការនគរបាលជាតិសម្រេចឱ្យផ្អាកពីការងារបណ្ដោះអាសន្នគឺផ្ដើមចេញពីរឿងកាន់កាប់ដីធ្លីរដ្ឋដែលធ្វើឱ្យប៉ះពាល់ដល់សមត្ថកិច្ចនៃស្នងការដ្ឋានខេត្ត និងអគ្គស្នងការនគរបាលជាតិ។
លោកបានបញ្ជាក់ថា៖ «កន្លងមករឿងគាត់គ្មានរឿងអីក្រៅពីរឿងដីធ្លីហ្នឹងទេ គឺពាក់ព័ន្ធនឹងដីធ្លីនៅបឹងទទឹងថ្ងៃនៅសង្កាត់រកាខ្ពស់នៅក្រុងតាខ្មៅ (ដែលត្រូវកាត់ចេញពីស្រុកស្អាង)។ ដីហ្នឹងមានទំហំប្រហែល ៤០ ហិកតា ហើយកាលពីថ្ងៃទី ១១ ខែ ១ ឆ្នាំ ២០១៨ ដីហ្នឹងត្រូវបានចុះជាទ្រព្យសម្បត្តិរដ្ឋស្ថិតក្រោមការគ្រប់គ្រងរបស់រដ្ឋបាលខេត្តកណ្ដាល ហើយមានប្លង់អីចេញអស់ហើយ»។
លោកបន្តថា៖ «កន្លងមកលោក ស្រេង សុខា ទៅទិញដីនៅក្បែរហ្នឹង ហើយបានសុំប័ណ្ណកម្មសិទ្ធិដោយបានទៅស៊ីញ៉េជាមួយភូមិ និងឃុំពាក់ព័ន្ធនឹងដីបឹងហ្នឹងដែលត្រូវបានគេចុះបញ្ជីរួចហើយ។ អ៊ីចឹងគឺផ្ដើមចេញពីរឿងហ្នឹង»។
លោក ឈឿន សុចិត្រ បន្តទៀតថាមិនដឹងថា តើរដ្ឋបាលខេត្តនឹងមានវិធានការយ៉ាងណាចំពោះលោក ស្រេង សុខា នោះឡើយដោយលោកបានជំរុញឱ្យទៅសួរលោក ម៉ៅ ភិរុណ ប្រធានក្រុមប្រឹក្សាខេត្ត និងលោក គង់ សោភ័ណ្ឌ អភិបាលខេត្តកណ្ដាលវិញ។
ប៉ុន្តែកាលពីថ្ងៃពុធលោក ម៉ៅភិរុណ មិនអាចសុំការអត្ថាធិប្បាយបានទេ ដោយសារទូរស័ព្ទរបស់លោកមិនមានអ្នកទទួល។ រីឯលោក គង់ សោភ័ណ្ឌ បានបញ្ជាក់ថាលោកកំពុងជាប់ប្រជុំ។ ចំណែកលោក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិបានបញ្ជាក់ដែរថា លោកមិនបានដឹងពីការផ្អាកការងារលោក ស្រេង សុខា ទេ។
ទាក់ទិននឹងករណីនេះ សារព័ត៌មានមួយឈ្មោះ នគរ ដ្រេហ្គន បានចុះផ្សាយនៅថ្ងៃពុធថា យោងតាមសេចក្តីសម្រេចស្តីពីការផ្អាកការងារបណ្តោះអាសន្នមន្ត្រីនគរបាលជាតិនៃអគ្គស្នងការដ្ឋាននគរបាលជាតិគឺលោក ស្រេង សុខា ត្រូវបានបង្គាប់ឱ្យបង្ហាញខ្លួននៅរៀងរាល់ម៉ោងការងារនៅការិយាល័យបុគ្គលិកនៃស្នងការដ្ឋាននគរបាលខេត្តកណ្ដាល។ សារព័ត៌មាននេះបានបន្តថា មន្ត្រីជាន់ខ្ពស់ក្រសួងមហាផ្ទៃម្នាក់បញ្ជាក់ថា លោក ស្រេង សុខា នឹងអាចត្រូវអគ្គស្នងការនគរបាលជាតិដកតំណែង និងបណ្ដេញចេញពីក្របខ័ណ្ឌថែមទៀត។
កាលពីខែមីនាលោក គង់ សោភ័ណ្ឌ អភិបាលខេត្តកណ្ដាលធ្លាប់បានប្រាប់ភ្នំពេញប៉ុស្ដិ៍ថា លោកបានស្រាវជ្រាវករណីរំលោភយកដីរដ្ឋ ១ កន្លែងនៅក្រុងតាខ្មៅដែលជាប្រភេទដីលិចទឹក ខណៈមានសារព័ត៌មានបានចុះផ្សាយថា ដីនោះត្រូវបានលោក ស្រេង សុខា ប្រើប្រាស់តួនាទីរបស់ថ្នាក់ដឹកនាំខេត្តដើម្បីគាបសង្កត់ឱ្យអាជ្ញាធរមូលដ្ឋានចុះហត្ថលេខាប្រគល់ដីឱ្យគាត់។
លោក គង់ សោភ័ណ្ឌ ធ្លាប់បានបញ្ជាក់ថា លោកមិនអនុញ្ញាតឱ្យមានការរំលោភយកដីរដ្ឋឡើយ ហើយលោកនឹងចាត់វិធានការទៅតាមច្បាប់ចំពោះករណីរំលោភដីរដ្ឋ ប៉ុន្តែមិនបានបញ្ជាក់ថា ជាលោក ស្រេង សុខា នោះទេ៕