The Phnom Penh Post Search

Search form




Logo of Phnom Penh Post newspaper Phnom Penh Post - ផ្អាក​សាលារៀន​ទាំងអស់​នៅ​ភ្នំពេញ​ និង​ខេត្តកណ្ដាល​ ដើម្បី​បញ្ចៀស​ការរីក​រាលដាល​កូវីដ




ផ្អាក​សាលារៀន​ទាំងអស់​នៅ​ភ្នំពេញ​ និង​ខេត្តកណ្ដាល​ ដើម្បី​បញ្ចៀស​ការរីក​រាលដាល​កូវីដ

Content image - Phnom Penh Post
សាលារៀនដែលត្រូវបានផ្អាក ដើម្បីចូលរួមទប់ស្កាត់ជំងឺកូវីដ ១៩។ ហេង ជីវ័ន

ផ្អាក​សាលារៀន​ទាំងអស់​នៅ​ភ្នំពេញ​ និង​ខេត្តកណ្ដាល​ ដើម្បី​បញ្ចៀស​ការរីក​រាលដាល​កូវីដ

ភ្នំពេញៈ លោកនាយក​រដ្ឋមន្ត្រី​ ហ៊ុន សែន បានប្រកាស​នូវ​សារ​ជា​សំឡេង​បន្ទាន់​មួយ​កាលពី​យប់មិញ ដោយ​លោក​បាន​សម្រេច​ឱ្យមាន​ការបិទសាលារៀន​ទាំងអស់ ទាំង​រដ្ឋ​ និង​ឯកជន​ក្នុង​រាជធានី​ភ្នំពេញ និង​ខេត្តកណ្តាល​ចំនួន ​២ ​សប្តាហ៍ ដោយសារ​ស្ថានភាព​នៃ​ការឆ្លង​ជំងឺ​កូវីដ​ ១៩​ ក្នុង​សហគមន៍​នៅតែ​បន្ត​កើនឡើង​។

លោក​បាន​លើកឡើងថា ក្នុង​រយៈពេល​ ៣ ​ថ្ងៃ​កន្លង​មក​នេះ​ចំនួន​អ្នក​ឆ្លង​នៅមាន​បន្ត ចំនួន​ទីកន្លែង​ដែល​ត្រូវ​បិទ​ និង​ស្រាវជ្រាវ​កាន់តែ​មាន​ការលំបាក បូករួម​នឹង​ភាព​រាយប៉ាយ​នៃ​បញ្ហា ដែល​តម្រូវ​ឱ្យ​យើង​ប្រកាន់​យក​នូវ​វិធានការណ៍​ចាំបាច់​មួយចំនួន​ទៀត​។

លោក​ ហ៊ុន សែន បាន​ថ្លែងថា​៖ «​រដ្ឋមន្ត្រីក្រសួង​អប់រំ យុវជន និង​កីឡា​បានស្នើ​សុំ​បិទ​នូវ​សាលារៀន​ទាំង​ក្នុង​ទីក្រុង​ភ្នំពេញ​ និង​ខេត្តកណ្តាល​ចំនួន​ ២ ​សប្តាហ៍​យ៉ាងតិច​ទាំង​សាលារដ្ឋ​ និង​ឯកជន​។ នេះ​ជា​វិធានការ​ដើម្បី​ឆ្លើយតប​ជាមួយ​នឹង​កិច្ចការពារ​សម្រាប់​គ្រូបង្រៀន​ និង​សិស្សានុសិស្ស​»​។

លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ យុវជន និង​កីឡា​កាលពី​យប់មិញ​បានចេញ​នូវ​សេចក្តី​ជូនដំណឹង​ពី​ការផ្អាក​ដំណើរការ​គ្រឹះស្ថានសិក្សា​សាធារណៈ​ និង​ឯកជន ជា​បណ្ដោះអាសន្ន​រយៈពេល ២ ​សប្ដាហ៍​នៅ​រាជធានី​ភ្នំពេញ​ និង​ខេត្តកណ្ដាល​។

នៅក្នុង​សេចក្ដី​ជូនដំណឹង​បាន​ឲ្យ​ដឹងថា​៖ «​ដោយសារ​ស្ថានភាព​នៃ​ការចម្លង​ក្នុង​សហគមន៍​ក្នុង​ព្រឹត្តិការណ៍​សហគមន៍​ ២០ ​កុម្ភៈ​ មាន​លក្ខណៈ​ធំ​ជាង​ និង​សាំញ៉ាំ​ជាង​ព្រឹត្តិការណ៍​សហគមន៍​ ២៨ ​វិច្ឆិកា និង​ដើម្បី​ចៀសវាង​ការឆ្លង​ជំងឺ​កូវីដ ​១៩ ចូលក្នុង​សាលារៀន និង​រីករាលដាល​ក្នុង​សហគមន៍​ទ្រង់ទ្រាយ​ធំ ព្រមទាំង​យោងតាម​អនុសាសន៍​ដ៏ខ្ពង់ខ្ពស់​របស់​សម្ដេច​អគ្គមហាសេនាបតី​តេជោ ហ៊ុន សែន នាយករដ្ឋមន្ត្រី​នៃ​ព្រះរាជា​ណាចក្រ​កម្ពុជា ក្រសួង​អប់រំ យុវជន​ និង​កីឡា សម្រេច​ផ្អាក​ដំណើរការ​គ្រឹះស្ថានសិក្សា​សាធារណៈ​ និង​ឯកជន​ជា​បណ្ដោះអាសន្ន​រយៈពេល​ ២ ​សប្ដាហ៍​នៅ​រាជធានី​ភ្នំពេញ និង​ខេត្តកណ្ដាល​ចាប់​ពីថ្ងៃ​ជូនដំណឹង​នេះ​តទៅ​»​។

សេចក្ដី​ជូនដំណឹង​បន្តទៀត​ថា​៖ «​គ្រឹះស្ថានសិក្សា​ទាំងអស់​ត្រូវ​បន្តដំណើរ​ការបង្រៀន​ និង​រៀន​តាម​ប្រព័ន្ធ​អេឡិចត្រូនិក​»​។

នៅ​ថ្ងៃ​ម្សិលមិញ​ដែរ ក្រសួង​អប់រំ យុវជន និង​កីឡា​បាន​បន្ត​ឱ្យ​គ្រប់​គ្រឹះស្ថានសិក្សា​រដ្ឋ និង​ឯកជន​រឹតបន្តឹង​ការអនុវត្ត​វិធានការ​សុវត្ថិភាព​សុខភាព​សិក្សា និង​អនុវត្ត​ឱ្យបាន​ម៉ឺងម៉ាត់​នូវ​វិធានការ «៣ ​ការពារ និង​ ៣ ​កុំ​»​។

ក្រសួង​នេះ​បាន​រឹតបន្តឹង​ក្នុង​ការអនុវត្ត​ឱ្យបាន​យ៉ាង​ម៉ឺងម៉ាត់​​នូវ​គោលការណ៍​ប្រតិបត្តិ​ស្តង់ដា​ (SOP) ​សម្រាប់​ដំណើរការ​​គ្រឹះស្ថានសិក្សា​ឡើងវិញ​ក្នុង​បរិបទ​នៃ​ជំងឺ​កូវីដ​ ១៩​ របស់​ក្រសួង​អប់រំ យុវជន និង​កីឡា​។ បុគ្គលិក​អប់រំ និង​សិស្សានុសិស្ស​ត្រូវ​ចៀសវាង​ទៅកាន់​ទីកន្លែង​ដែល​មាន​ហានិភ័យ​ខ្ពស់​ឆ្លង​កូវីដ ​១៩​។

លោក ហង់ជួន ណារ៉ុន បាន​តម្រូវ​ឱ្យ​ផ្អាក​ការជួបជុំ និង​សកម្មភាព​កីឡា ដែល​មាន​អ្នកចូលរួម​លើសពី​ ២០ ​នាក់ ហើយ​គណៈគ្រប់គ្រង​គ្រឹះស្ថានសិក្សា​ត្រូវ​រាយការណ៍​ជាបន្ទាន់​ទៅ​អាជ្ញាធរ​មាន​សមត្ថកិច្ច​អំពី​វត្តមាន​នៃ​ការជួប​ប្រាស្រ័យ​ទាក់ទង​ជាមួយ​បុគ្គល​ដែល​បាន​ប៉ះពាល់​ក្នុង​ព្រឹត្តិការណ៍​សហគមន៍​ ២០ ​កុម្ភៈ​។

លោក​បាន​បញ្ជាក់ថា គណៈគ្រប់គ្រង​គ្រឹះស្ថានសិក្សា​ត្រូវ​បូកសរុប​របាយការណ៍​ស្ដីពី​ចំនួន​បុគ្គលិក​អប់រំ​ដែល​សង្ស័យថា​មាន​ទំនាក់ទំនង​នឹង​ព្រឹត្តិការណ៍​សហគមន៍​ ២០ ​កុម្ភៈ ហើយ​បុគ្គលិក​អប់រំ​ដែល​ប៉ះពាល់​ត្រូវ​រាយការណ៍​ជាបន្ទាន់​ទៅ​អាជ្ញាធរ​អប់រំ​តាម​ឋានានុក្រម​ និង​អនុវត្ត​វិធាន​ចត្តាឡីស័ក​ឱ្យបាន​ត្រឹមត្រូវ​បំផុត​។

ដោយឡែក រដ្ឋមន្ត្រី​ក្រសួង​ទេសចរណ៍ លោក ថោង ខុន បានប្រកាស​ឱ្យ​បន្ត​ផ្អាក​អាជីវកម្ម KTV ក្លិប​កម្សាន្ត និង​ស្នើ​​ដល់​រដ្ឋបាល​រាជធានី​-​ខេត្ត​ត្រួតពិនិត្យ​ការងារ​នេះ​ឱ្យបាន​ជាប់​ជាប្រចាំ​។

លោក​បានឱ្យដឹងថា​៖ «​ដើម្បី​បន្ត​យ៉ាងសកម្ម​ក្នុង​ការចូលរួម​បង្ការ និង​ទប់ស្កាត់​ការឆ្លង​រីករាលដាល​នៃ​ជំងឺ​កូវីដ​ ១៩ ពិសេស​ព្រឹត្តិការណ៍​សហគមន៍​ ២០ ​កុម្ភៈ​ ក្រសួងទេសចរណ៍​សូម​បន្ត​ការផ្អាក​សកម្មភាព​អាជីវកម្ម​ KTV ​ក្លិប​កម្សាន្ត​ (​ខារ៉ាអូខេ រង្គសាល ឌីស្តូតែក និង​បៀរហ្គាឌិន​) រហូតដល់​មាន​ការសម្រេច និង​ជូន​ដំណឹង​ជាថ្មី​»​។

លោក ថោង ខុន បន្តថា​​គណៈ​អភិបាល​រាជធានី-ខេត្ត​ត្រូវ​បន្ត​ជំរុញ​ការបិទ និង​ត្រួតពិនិត្យ​មូលដ្ឋាន​អាជីវកម្ម​ KTV ក្លិប​កម្សាន្ត​ទាំងនេះ​ឱ្យបាន​ម៉ឺងម៉ាត់​ជាប់​ជាប្រចាំ​ដោយ​អនុវត្តតាម​ការណែនាំ​របស់​រាជរដ្ឋាភិបាល​ឱ្យមាន​ប្រសិទ្ធភាព​។

កាលពី​ថ្ងៃទី​ ២១ ខែកុម្ភៈ​​ អាជ្ញាធរ​ខេត្តកណ្តាល​បានសម្រេច​បិទ​ក្លិប​ខារ៉ាអូខេ​ (​ឡូហ្សិក​ ២) ​នៅ​ក្រុង​តាខ្មៅ និង​បាន​បញ្ជូន​បុគ្គលិក​ចំនួន​ ៧៤ ​នាក់​ ក្នុង​នោះ​មាន​បុរស​ ១១ ​នាក់​ ឱ្យទៅ​ធ្វើ​ចត្តាឡីស័ក​នៅ​សាលា​បឋមសិក្សា​ព្រែក​តាពៅ បន្ទាប់ពី​បុគ្គលិក​ប្រុស​ម្នាក់​មាន​វិជ្ជមាន​កូវីដ ​១៩ ហើយ​ភរិយា​របស់គាត់​ធ្វើការ​នៅ​ក្លិប​កម្សាន្ត​អិន​ ៨ (N8) ​ដែល​ជា​កន្លែង​ឆ្លង​កូវីដ​ ១៩​ ក្នុង​សហគមន៍​នៅ​ក្រុងភ្នំពេញ​៕

វីដេអូ៖

អត្ថបទគួរចាប់អារម្មណ៍