.jpg)
ពងមាន់ពងទា និងពងក្រួចខូចគុណភាពជាង ៤ ម៉ឺនគ្រាប់ នាំចូលពីវៀតណាមត្រូវមន្រ្តីដុតចោល កាលពីថ្ងៃទី ១០ មីនា។ រូបថត សហការី
តាកែវៈ មន្ទីរកសិកម្មខេត្តតាកែវ កាលពីថ្ងៃទី ១០ ខែមីនា បានដុតកម្ទេចចោលពងមាន់ ពងទា និងពងក្រួចខូចគុណភាពជាង ៤ ម៉ឺនគ្រាប់ ដែលបានរឹបអូសពីក្រុមឈ្មួញ ដែលលួចបន្លំនាំចូលពីប្រទេសវៀតណាម ដោយខុសច្បាប់។
លោក ថៃ លី ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់ និងនេសាទខេត្តតាកែវ ប្រាប់ ភ្នំពេញ ប៉ុស្តិ៍ ពីម្សិលមិញថា ឈ្មួញបាននាំចូលនូវពងសត្វទាំងអស់នេះមិនមានច្បាប់អនុញ្ញាតត្រឹមត្រូវ និងបានលួចបន្លំដាក់នៅក្រោមទំនិញផ្សេង។ នៅពេលដែលកម្លាំងសមត្ថកិច្ចស្ទាក់រថយន្ត និងឆែកឆេរក៏បានឃើញ និងរឹបអូសយកមករក្សាទុក ហើយបានដុតកម្ទេចចោលកាលពីថ្ងៃ ទី ១០ ខែ មីនា ឆ្នាំ ២០២១ ព្រោះពងទាំងនេះខូចគុណភាព។
បើតាមលោក ថៃ លី ការដុតកម្ទេចចោលនេះក្នុងគោលបំណង ដើម្បីទប់ស្កាត់កុំឱ្យមានការនាំចូលដោយគ្មានច្បាប់បន្តទៀត និងជួយសម្រួលដល់ប្រជាពលរដ្ឋ ដែលចិញ្ចឹមសត្វយកពងនៅក្នុងស្រុកឱ្យពួកគាត់មានលទ្ធភាពក្នុងការលក់នៅលើទីផ្សារមានតម្លៃខ្ពស់ ជាពិសេសក្នុងអំឡុងពេលនៃជំងឺកូវីដ ១៩ នេះ។
លោកថា៖ «យើងកុំឱ្យគាត់ (កសិករខ្មែរ) ផលិតបានហើយ មានតម្លៃថោក»។ ចំណែកឈ្មួញដែលនាំចូលពងទា និងពងក្រួចខុសច្បាប់ត្រូវបានអាជ្ញាធរមានសមត្ថកិច្ចឱ្យធ្វើកិច្ចសន្យាកុំឱ្យមានការនាំចូលដោយខុសច្បាប់បន្តទៀត។
លោក ភី ទី ម្ចាស់កសិដ្ឋានចិញ្ចឹមទាបានស្វាគមន៍ចំពោះចំណាត់ការទប់ស្កាត់របស់អាជ្ញាធដែលបង្ក្រាបនូវការនាំចូល ពងមាន់ពងទាចូលកម្ពុជាដោយខុសច្បាប់នេះ។ នៅពេលដែលសមត្ថកិច្ចទប់ស្កាត់បានបែបនេះនឹងធ្វើឱ្យទីផ្សារពងមាន់ និងពងទាកសិករខ្មែរមានភាពល្អប្រសើរ។ «នៅពេលដែលគ្មានការនាំចូល កសិករនៅក្នុងស្រុករបស់យើង លក់ដាច់ និងមានចំណូលគ្រប់គ្រាន់ »។
លោក ភី ទី ក៏បានសំណូមពរដល់ប្រជាពលរដ្ឋដែលមានលទ្ធភាពគួរតែនាំគ្នាចិញ្ចឹមទាយកពងឱ្យបានច្រើន ដើម្បីផ្គត់ផ្គង់ទីផ្សារនៅក្នុងស្រុកឱ្យបានគ្រប់គ្រាន់ដើម្បីកុំឱ្យមានការនាំចូលពីប្រទេសជិតខាងដែលមានសារធាតុគីមីធ្វើឱ្យប៉ះពាល់ដល់សុខភាព។
បើតាមរបាយការណ៍របស់មន្ទីរកសិកម្ម ខេត្តតាកែវ ដែលផ្ញើទៅអភិបាលខេត្តតាកែវលោក អ៊ួច ភា កាលពីថ្ងៃទី ៩ ខែមីនា ក្រុមអន្តរាគមន៍បង្ក្រាបបទល្មើសចលនាសត្តឃាតកាលពីថ្ងៃទី ៦ ខែ មីនា ឆ្នាំ ២០២១ ចាប់បានពងទាចំនួន ២ ម៉ឺន ៤ ពាន់គ្រាប់ ពងមាន់ ៨ ពាន់គ្រាប់ និងពងក្រួច ៧ ពាន់គ្រាប់ ដែលឈ្មួញនាំចូលពីប្រទេសវៀតណាម ដោយខុសច្បាប់។ ពងសត្វទាំងអស់នោះខូចគុណភាពមានក្លិនស្អុយដែលបង្កឱ្យមានមេរោគឆ្លងផ្សេងៗ៕
វីដេអូ៖
