.jpg)
អ្នកជាប់ឃុំនៅពន្ធនាគារព្រៃសចូលរួមនៅក្នុងពិធីមួយកាលពីពេលកន្លងមក។ ហេង ជីវ័ន
ភ្នំពេញៈ អគ្គនាយកដ្ឋានពន្ធនាគារចាប់ពីដើមខែមករានេះបានផ្អាកការឃុំឃាំងជនជាប់ចោទដែលតុលាការសម្រេចឃុំខ្លួនបណ្ដោះអាសន្ននៅពន្ធនាគារព្រៃស ដោយសារតែស្ថានភាពចង្អៀតណែននៃពន្ធនាគារនេះ ហើយត្រូវផ្ទេរអ្នកទាំងនោះទៅពន្ធនាគារប៉េហ្ស៊ីថ្មីដែលនៅក្បែរនោះ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារបានថ្លែងប្រាប់កាលពីថ្ងៃចន្ទថា ការឈប់ទទួលដាក់ឃុំឃាំងជនជាប់ចោទនេះ ដោយសារតែពន្ធនាគារប៉េហ្ស៊ី ត្រូវបានរើទៅក្បែរពន្ធនាគារព្រៃស និងមានកន្លែងសម្រាប់ដាក់ឃុំឃាំងទំនេរអាចទទួលជនជាប់ឃុំបាន។
លោកថ្លែងថា៖ «ដើម្បីសម្រួលបន្ទុកដល់ព្រៃសកុំឲ្យចង្អៀតពេក អ្នកដែលចូលថ្មីៗដែលត្រូវជាប់ចោទថ្មីគឺបញ្ជូនទៅប៉េហ្ស៊ីហើយ។ អ៊ីចឹងព្រៃសមានប៉ុនណា (ប៉ុន្មាន) ទុកប៉ុណ្ណឹង រហូតដល់គាត់ផុតទោសហើយបញ្ចេញឲ្យវាធ្លាក់តួលេខ។ ឥឡូវតួលេខហ្នឹងវាខ្ពស់ពេកដែលប៉ះពាល់ដល់ការងារគ្រប់គ្រងដែរ»។
លោកថា វិធានការដែលអាចធ្វើទៅបាន គឺមានតែតុលាការទេ ដែលសម្រេចបញ្ជូនទៅឃុំនៅក្រោមយុត្តាធិការរបស់សាលាដំបូងរាជធានីភ្នំពេញនោះគឺត្រូវបញ្ជូនទៅពន្ធនាគាររាជធានីគឺប៉េហ្ស៊ីទាំងអស់។ លោកបញ្ជាក់ថា មណ្ឌលអប់រំកែប្រែ បើបំពេញមុខឲ្យចំ គឺទទួលតែជនដែលត្រូវបានកាត់ទោសមានសាលក្រមស្ថាពរប៉ុណ្ណោះ។
លោក បេ ទាឡេង អគ្គនាយករងនៃអគ្គនាយកដ្ឋានពន្ធនាគារ ក្រសួងមហាផ្ទៃបានប្រាប់ឲ្យដឹងថា ការសម្រេចឈប់ឃុំជនជាប់ឃុំថ្មីនៅព្រៃស ធ្វើឡើងចាប់ពីដើមខែមករានេះ។ រហូតមកដល់ពេលនេះមានជនជាប់ឃុំនៅប៉េហ្ស៊ីប្រមាណ ៤០០ នាក់ហើយដោយបូកទាំងអ្នកចាស់មកពីប៉េហ្ស៊ីចាស់ដែលកាត់ទោសរួចហើយ និងមិនទាន់កាត់ទោស និងអ្នកចាប់មកថ្មី។ លោកបញ្ជាក់ថា ប៉េហ្ស៊ីថ្មី អាចដាក់ជនជាប់ឃុំចន្លោះពី ១០០០ នាក់ ទៅ ១៥០០ នាក់។
បើតាមការបញ្ជាក់របស់លោក បេ ទាឡេង បច្ចុប្បន្នមានអ្នកជាប់ឃុំនៅពន្ធនាគារព្រៃស ម ១ (ផ្នែកបុរស) ចំនួន ៩៥០០ នាក់ ចំណែក ម ២ (ផ្នែកស្ត្រី) មានចំនួនជិត ២០០០ នាក់។ លោកបញ្ជាក់ថា ដើម្បីកាត់បន្ថយភាពចង្អៀតណែន អ្នកដែលត្រូវបានកាត់ទោសហើយអាចត្រូវបញ្ជូនទៅមណ្ឌលអប់រំកែប្រែផ្សេងទៀតដែលមាននៅខេត្តមួយចំនួន។
លោក អំ សំអាត នាយករងផ្នែកឃ្លាំមើល និងការពារសិទ្ធិមនុស្សនៃអង្គការលីកាដូបានថ្លែងថា ទោះបីជាមានការផ្ទេរការឃុំឃាំងពីព្រៃសទៅប៉េហ្ស៊ីក៏ដោយ មិនយូរមិនឆាប់ វានឹងរងការចង្អៀតណែនដូចគ្នា។
លោកថា កន្លងមកសង្គមស៊ីវិលបានផ្ដល់ជាអនុសាសន៍ ហើយរដ្ឋាភិបាលក៏បានប្រជុំគណៈកម្មធិការថ្នាក់ជាតិជាបន្តបន្ទាប់។ លោកថ្លែងថា៖ «ទី១ ការឃុំខ្លួនបណ្ដោះអាសន្នគឺតុលាការគួរពិនិត្យពិចារណាថា បទល្មើសណាគួរទុកក្នុងពន្ធនាគារ បទល្មើសណា គួរអនុញ្ញាតឲ្យនៅក្រៅឃុំបណ្ដោះអាសន្ន នៅពន្ធនាគារ។ ទី២ ការចោទប្រកាន់គួរតែពិនិត្យមើលហើយត្រូវមានភ័ស្តុតាងគ្រប់គ្រាន់មុននឹងធ្វើការចោទប្រកាន់ និងធ្វើការឃុំខ្លួន។ ទី៣ យើងមើលលើការអនុវត្តទោសដោយឲ្យអនុវត្តទោសទៅធ្វើការងារសហគមន៍ជាដើម»។
លោកបន្តថា វិធីម្យ៉ាងទៀតនោះគឺការអនុវត្តទោសពាក់កណ្ដាលទោសតាមក្រមព្រហ្មទណ្ឌ។ បើទោះបីជាវិធីខាងលើអាចធ្វើបានក៏ដោយ ប៉ុន្តែអ្វីដែលសំខាន់បំផុតនោះគឺការទប់ស្កាត់បទល្មើសកុំឲ្យកើតឡើង នោះទើបអាចបញ្ឈប់ការចង្អៀតណែននៅតាមពន្ធនាគារបានជាពិសេសបទល្មើសគ្រឿងញៀន។
លោក អំ សំអាត បានថ្លែងទៀតថា៖ «ស្ថាប័នពាក់ព័ន្ធគួររកវិធីយ៉ាងម៉េច ដើម្បីទប់ស្កាត់កុំឲ្យបទល្មើសគ្រឿងញៀនវាបន្តកើតឡើង។ កាលណាបទល្មើសគ្រឿងញៀននៅតែបន្តកើតឡើង អ៊ីចឹងការចង្អៀតណែនច្បាស់ជាចៀសមិនផុត ព្រោះពន្ធនាគារបច្ចុប្បន្នទូទាំងប្រទេស បទល្មើសគ្រឿងញៀនមានច្រើន»៕
