The Phnom Penh Post Search

Search form

Logo of Phnom Penh Post newspaper Phnom Penh Post - ពន្យារ​ការ​សាក​សួរ​កម្មករ​តេ​យ៉ុង ខណៈ​Cambo​បន្ត​តវ៉ា




ពន្យារ​ការ​សាក​សួរ​កម្មករ​តេ​យ៉ុង ខណៈ​Cambo​បន្ត​តវ៉ា

ពន្យារ​ការ​សាក​សួរ​កម្មករ​តេ​យ៉ុង ខណៈ​Cambo​បន្ត​តវ៉ា

121005_8
កម្មកររោងចក្រកាត់ដេរ Cambo Kotop ដុតកង់ឡានធ្វើកូដកម្មទាមទារលក្ខខណ្ឌ៨ចំណុច

កណ្តាលៈ សាលា​ដំបូង​ខេត្ត​កណ្តាល បាន​ពន្យារ​ការ​សាក​សួរ​​តំណាង​កម្មករ​រោង​ចក្រ​តេយ៉ុង​ក្នុង​ស្រុក​អង្គ ស្នួល ៨ នាក់ ដែល​ថៅកែ​ប្តឹង​ចោទ​ពី​បទ​ញុះ​ញង់​ឲ្យ​មាន​ការ​ធ្វើ​កូដកម្ម​តវ៉ា​ខុស ច្បាប់ រហូត​កម្មករ​ជាង​៦០០​នាក់​នៅ​តែ​បន្ត​ធ្វើ​ការ​តវ៉ា​ដល់​សព្វ​ថ្ងៃ។

លោក អ៊ុន ប៊ុនគា សមាជិក​សហជីព​ការ​ងារ​នៅ​ក្នុង​រោងចក្រ​តេយ៉ុង ដែល​រង​ការ​បណ្តេញ​ចេញ​ពី​ការ​ងារ និង​ត្រូវ​រោងចក្រ​ប្តឹង​ទៅ​តុលាការ​កាល​ពី​ម្សិល​មិញ​ប្រាប់​ថា កម្មករ​បាន​ទៅ​តុលាការ​ទាន់​ពេល​តាម​ដីកា​កោះ ប៉ុន្តែ​មន្ត្រី​តុលាការ​បាន​ពន្យារ​ពេល​ការ​សាកសួរ។

លោក​ថា៖ «​ខ្ញុំ​មិន​ដឹង​ថា ពេល​ណា​ទើប​តុលាការ​កោះ​ហៅ​ពួក​យើង​ទៀត​ទេ ប៉ុន្តែ​កម្មករ​នៅ​តែ​បន្ត​ធ្វើ​ការ​តវ៉ា ដើម្បី​ទាមទារ​ឲ្យ​ខាង​រោងចក្រ​ដក​ពាក្យ​បណ្តឹង និង​អនុញ្ញាត​ឲ្យ​កម្មករ​ទាំង​១៦​នាក់​ដែល​ត្រូវ​បាន​បញ្ឈប់​ពី​ការងារ នោះ​វិល​ត្រឡប់​មក​ធ្វើ​ការងារ​វិញ»។

កម្មករ​រោងចក្រ​កាត់​ដេរ តេយ៉ុង បាន​ធ្វើ​ការ​តវ៉ា​តំាង​ពី​ថ្ងៃ​ចន្ទ​រហូត​មក​ដល់​ពេល​នេះ មិន​ព្រម​បញ្ឈប់​ទេ ដោយ​សារ​ថា ពួកគេ​នៅ​តែ​ធ្វើ​ការ​តវ៉ា​រហូត​ដល់​រោង​ចក្រ​ទទួល​យក​លក្ខ​ខណ្ឌ​ពួកគេ។

លោក ព្រាប ឡេន ប្រធាន​រដ្ឋបាល​រោង​ចក្រ​កាត់​ដេរ​តេយ៉ុង បាន​ប្រាប់​ភ្នំពេញ​ប៉ុស្តិ៍ ពី​ថ្ងៃ​ចន្ទ​ថា រោងចក្រ​មិន​អាច​ទទួល​យក​ពួកគេ​ឲ្យ​ចូល​ធ្វើ​ការ​វិញ​បាន​ឡើយ។

ទន្ទឹម ជាមួយ​គ្នា កម្មករ​ប្រហែល​ជា​១ពាន់​នាក់ ពី​រោង​ចក្រ Cambo Kotop នៅ​ខណ្ឌ​ពោធិ៍​សែន​ជ័យ រាជធានី​ភ្នំពេញ ក៏​បាន​បន្ត​កូដកម្ម​តវ៉ា ជាង​មួយ​អាទិត្យ​មក​ហើយ​ដោយ​មាន​ទាំង​ដុត​កង់ឡាន​នៅ​ពី​មុខ​រោងចក្រ ដើម្បី​ទាមទារ​លក្ខខណ្ឌ​ការងារ​មួយ​ចំនួន ស្រប​ពេល​កម្មករ​រាប់​រយ​នាក់​នៅ​រោង​ចក្រ តេយ៉ុង នៅ​ស្រុក​អង្គ​ស្នួល ខេត្ត​កណ្តាល នៅ​បន្ត​ការ​តវ៉ា។

កម្មការិនី វ៉ាន់ វណ្ណ តំណាង​ឲ្យ​កម្មករ​រោង​ចក្រនេះ កាល​ពី​ម្សិលមិញ បាន​និយាយ​ថា ពួកគេ​បាន​ដុត​កង់ឡាន​អស់​ជាង​១០០​ហើយ​នៅ​ពី​មុខ​ទ្វារ​រោង​ចក្រ ដើម្បី​បិទ​ផ្លូវ​ចូល ដើម្បី​កុំ​ឲ្យ​ពួកគេ​ដឹក​ជញ្ជូន​ផលិត​ផល​ចេញ​ចូល​រោង​ចក្រ​បាន ហើយ​នៅ​តែ​រក្សា​ធ្វើ​ការ​តវ៉ា​ដរាប​ណា​ខាង​រោងចក្រ​មិន​ទទួល​យក​តាម ការ​ស្នើ​សុំ​របស់​ពួកគេ។

នាងនិយាយថា ៖«យើង​ត្រូវ​ការ​តែ​៨ចំណុច​ប៉ុណ្ណោះ ពី​រោងចក្រ ប៉ុន្តែ ហេតុអ្វី​បាន​ជា​ពួកគេ​មិន​ដោះ​ស្រាយ​ឲ្យ​យើង»។

ការទាមទារ​របស់​កម្មករ​គឺ​ប្រាក់​ខែ​ពី​៦៦​ទៅ​៧៥​ដុល្លារ​ក្នុង​មួយ​ខែ ប្រាក់​រង្វាន់​ការងារ​ទៀង​ទាត់​១៥​ដុល្លារ ប្រាក់​មធ្យោបាយ​ធ្វើ​ដំណើរ ប្រាក់​អាហារ​ថ្ងៃ​ត្រង់ និង​ប្រាក់​ទ្រទ្រង់​សុខ​ភាព ដប់ៗ​ដុល្លារ។

កាល​ពី​ម្សិល​មិញ​មន្ត្រី​រោង​ចក្រ​កាត់​ដេរ Cambo Kotop មិន​អាច​ទាក់​ទង​ធ្វើ​ការ​អត្ថាធិប្បាយ​បានទេ​ជុំ​វិញ​បញ្ហា​នេះ៕CC

អត្ថបទគួរចាប់អារម្មណ៍