.jpg)
ពលករខ្មែរមកពីថៃតាមច្រកព្រំដែនអូរស្មាច់ឡើងជិះរថយន្តយោធា។ រូបថត រដ្ឋបាលខេត្តឧត្តរមានជ័យ
ភ្នំពេញៈ បន្ទាប់ពីប្រទេសថៃបានប្រកាសពីការផ្ទុះឡើងជំងឺកូវីដ ១៩ នៅខេត្តសាមុតសាខនកាលពីថ្ងៃទី ២០ ខែធ្នូ ធ្វើឲ្យពលរដ្ឋខ្មែរជាង ២ ០០០ នាក់ បានវិលមកកម្ពុជាវិញ និងកំពុងស្ថិតក្នុងវិធានការចត្តាឡីស័កនៅតាមព្រំដែន ប៉ុន្តែមិនមានករណីវិជ្ជមានជំងឺនេះទេ។ នេះបើតាមការបញ្ជាក់របស់លោកនាយករដ្ឋមន្ត្រី ហ៊ុន សែន។
ថ្លែងទៅកាន់ជនរួមជាតិកាលពីថ្ងៃទី ២៩ ធ្នូ ក្នុងព្រឹត្តិការណ៍បិទបញ្ចប់ការឆ្លងជំងឺកូវីដ ១៩ ក្នុងសហគមន៍ ២៨ វិច្ឆិកា លោក ហ៊ុន សែន បានថ្លែងអំណរគុណដល់អាជ្ញាធរនានាដែលបានចូលរួមទប់ស្កាត់ការនាំចូលជំងឺនេះពីថៃ។ លោកបញ្ជាក់ថា ចាប់ពីថ្ងៃទី ២០ ធ្នូ មិនមានជំងឺនេះត្រូវបានរកឃើញនាំចូលមកកម្ពុជាពីប្រទេសថៃ ទេ។
លោកមានប្រសាសន៍ដូច្នេះថា៖ «ដោយសារតែរាជរដ្ឋាភិបាលថៃ និងអាជ្ញាធរថៃក៏បានចាត់វិធានការក្នុងល្បឿនមួយយ៉ាងលឿនដែលអាចគ្រប់គ្រងបានសភាពការណ៍។ បន្ថែមពីលើនេះ អាជ្ញាធរតាមខេត្តរបស់យើងក៏បានធ្វើការបន្ទាន់តាមរយៈការចង្អុលបង្ហាញពីរាជរដ្ឋាភិបាលក្រសួងសុខាភិបាល ហើយផ្ដល់លទ្ធភាពគ្រប់បែបយ៉ាងតាមបណ្ដាខេត្តនៅតាមព្រំដែន»។ ភាពជោគជ័យនេះក៏មានការចូលរួមពីកម្លាំងប្រដាប់អាវុធក្នុងការដឹកជញ្ចូនពលករដោយមិនឲ្យពួកគេធ្វើដំណើរតាមឡាន ឬតាក់ស៊ី ដែលអាចចម្លងជំងឺនេះពីថៃមកកម្ពុជា។ នាយករដ្ឋមន្ត្រីថៃក៏បានយកចិត្តទុកដាក់ថែរក្សាពលករកម្ពុជាដែលកំពុងបម្រើការនៅថៃផងដែរ។ នេះបើតាមលោក ហ៊ុន សែន។
លោកថ្លែងថា៖ «នេះជាចំណុចដ៏ល្អនៅក្នុងទំនាក់ទំនងជិតខាងរបស់យើង ហើយមិនមានការរើសអើងចំពោះពលករកម្ពុជា។ បន្ថែមលើនោះ បើតាមព័ត៌មាន អ្នកដែលមិនមានកាតធ្វើការខុសច្បាប់ហើយទៅដោយខុសច្បាប់ក៏ត្រូវបានអាជ្ញាធរថៃរៀបចំឲ្យមានការកាន់កាតបណ្ដោះអាសន្ន»។
លោកបន្តថា នេះជាផ្នែកមួយនៃការដោះស្រាយបញ្ហារួមគ្នាទប់ស្កាត់ជំងឺកូវីដផង និងដោះស្រាយការងារជូនពលករកម្ពុជាផងដែលវាជាផ្នែកមួយនៃការរីកចម្រើននៃសេដ្ឋកិច្ចផង ហើយជាផ្នែកមួយនៃប្រាក់ចំណូលរបស់ពលករកម្ពុជាផងដែរ។
បើតាមលោក ហ៊ុន សែន រាជរដ្ឋាភិបាលបានផ្គត់ផ្គង់គ្រប់គ្រាន់ដល់ពលករ ដែលមកពីថៃ និងកំពុងស្ថិតក្នុងការធ្វើចត្តាឡីស័ក។ លោកប្រាប់ដល់អាជ្ញាធរ ឲ្យរៀបចំការធ្វើចត្តាឡីស័កឲ្យបានល្អ ហើយប្រសិនបើថវិកាដែលរដ្ឋាភិបាលទម្លាក់ជូនជិតអស់អាជ្ញាធរខេត្តអាចស្នើសុំបន្ថែមទៀត។ លោកក៏អំពាវនាវជាថ្មីឲ្យពលករ និងពលការិនី ដែលកំពុងធ្វើការនៅប្រទេសថៃ ឲ្យបន្តរស់នៅប្រទេសថៃតទៅទៀត។
លោកបញ្ជាក់ថា៖ «ខ្ញុំបានទទួលលិខិតរបស់ឯកឧត្តម ប្រាយុធ ចានអូចា សុំឲ្យទប់ស្កាត់ចំពោះពលរដ្ឋកម្ពុជាកុំឲ្យចូលទៅក្នុងប្រទេសថៃក្នុងពេលដែលថៃកំពុងតែប្រយុទ្ធទៅលើជំងឺនេះ»។ លោកបានអំពាវនាវតាំងពីថ្ងៃដំបូងនៃការផ្ទុះឡើងជំងឺនេះ នៅថៃដោយស្នើឲ្យពលរដ្ឋកម្ពុជាផ្អាកចូលទៅប្រទេសថៃ។
លោក មឿន តុលា នាយកប្រតិបត្តិនៃមជ្ឈមណ្ឌលសម្ព័ន្ធភាពការងារបានស្វាគមន៍ចំពោះវិធានការជួយសម្រួលរបស់រដ្ឋាភិបាលចំពោះពលករដែលវិលត្រឡប់ពីថៃដោយលោកសង្កេតឃើញរដ្ឋាភិបាលបានរៀបចំទទួលដឹកជញ្ជូនគាត់ផង និងពិនិត្យតាមដានសុខភាពដើម្បីការពារការឆ្លងរាលដាលកូវីដ ១៩ ផង។
លោកថ្លែងថា៖ «អ៊ីចឹងការរៀបចំកន្លែងទទួលពួកគាត់ ការរៀបចំពិនិត្យសុខភាពជារឿងមួយល្អ ជារឿងត្រឹមត្រូវ។ លើសពីនេះ មានការអប់រំដល់ពលករ ពេលគាត់ត្រឡប់មកវិញ ដើម្បីឲ្យគាត់ចេះការពារខ្លួន រក្សាអនាម័យ និងដាក់ខ្លួននៅដាច់ដោយឡែកពេលទៅដល់សហគមន៍។ ថ្មីៗនេះក៏មានការយករថយន្តទៅដឹកគាត់ និងយកទៅធ្វើចត្តាឡីស័កនេះជារឿងត្រឹមត្រូវ ខ្ញុំសាទរ»។
លោក តុលា យល់ថា៖ «ការធ្វើចត្តាឡីស័កគួរតែពង្រឹង ព្រោះដើម្បីឲ្យមនុស្សមកធ្វើចត្តាឡីស័កបានទាល់តែពង្រឹងសេវានៅកន្លែងធ្វើចត្តាឡីស័កទាល់តែមានបាយម្ហូបគ្រប់គ្រាន់ទើបមនុស្សនៅ ព្រោះមនុស្សមកពីស្រុកក្រៅ ហើយបែកក្រុមគ្រួសាររាប់ឆ្នាំហើយ ដំបូងគាត់ចង់ជួបក្រុមគ្រួសារ។ អ៊ីចឹងទាល់តែយើងពិនិត្យមើលសេវារបស់យើងឲ្យបានល្អទើបឲ្យគាត់ទប់ចិត្តបាន និងធ្វើចត្តាឡីស័ករហូត ១៤ ថ្ងៃ»៕
វីដេអូ៖
