The Phnom Penh Post Search

Search form




Logo of Phnom Penh Post newspaper Phnom Penh Post - ពលករ​ខ្មែរ​ជិត​ ២០ ​ម៉ឺន​នាក់​អាច​សុំ​ឯកសារ​ពី​អាជ្ញាធរ​ថៃ




ពលករ​ខ្មែរ​ជិត​ ២០ ​ម៉ឺន​នាក់​អាច​សុំ​ឯកសារ​ពី​អាជ្ញាធរ​ថៃ

ពលករ​ខ្មែរ​ត្រូវ​ថៃ​ចាប់​បញ្ជូន​ត្រឡប់​មក​វិញ​តាម​ច្រក​ព្រំដែន​ប៉ោយប៉ែត​កន្លង​មក​។
ពលករ​ខ្មែរ​ត្រូវ​ថៃ​ចាប់​បញ្ជូន​ត្រឡប់​មក​វិញ​តាម​ច្រក​ព្រំដែន​ប៉ោយប៉ែត​កន្លង​មក​។ ម៉ៃ វីរៈ

ពលករ​ខ្មែរ​ជិត​ ២០ ​ម៉ឺន​នាក់​អាច​សុំ​ឯកសារ​ពី​អាជ្ញាធរ​ថៃ

ភ្នំពេញៈ ក្រសួង​ការងារ​ និង​បណ្តុះ​បណ្តាល​វិជ្ជាជីវៈ​បាន​ជូន​ដំណឹង​​ដល់​ពលករ​កម្ពុជា​ដែល​កំពុង​ស្នាក់​នៅ និង​ធ្វើការ​នៅ​ប្រទេស​ថៃ​ជិត ​២០ ម៉ឺន​នាក់​ដែល​មិន​ទាន់​មាន​ឯកសារ​ស្រប​ច្បាប់​ឲ្យ​​ស្នើសុំ​ឯកសារ​បញ្ជាក់​ពី​ភាព​ស្រប​ច្បាប់​របស់​ខ្លួន​ពី​អាជ្ញាធរ​ថៃ​ចាប់ពី​ខែ​កញ្ញា​ខាង​មុខ​តទៅ​។

ក្នុង​លិខិត​ជូន​ដំណឹង​មួយ​ចុះ​ថ្ងៃ​ទី​ ១ ខែ​សីហា ឆ្នាំ​ ២០១៦​ ក្រសួង​ការងារ​បាន​​ឲ្យ​ដឹង​ថា​ក្រសួង​ការងារ​ថៃ​នឹង​ផ្សព្វផ្សាយ​ឈ្មោះ​ពលករ​កម្ពុជា​ដែល​មាន​លិខិត​ឆ្លង​ដែន ឬ ​លិខិត​ធ្វើ​ដំណើរ​ពលករ​កម្ពុជា​ធ្វើការ​នៅ​ក្រៅ​ប្រទេស​ ប័ណ្ណ​ពលករ​កម្ពុជា​ទៅ​ធ្វើការ​នៅ​បរទេស និង​ប័ណ្ណ​ពណ៌​ស៊ីជម្ពូ​ចំនួន​សរុប​ ១៩៨ ៩៣០ នាក់​នៅ​លើ​គេហទំព័រ​ក្រសួង​ការងារ និង​នាយកដ្ឋាន​មុខរបរ​ថៃ។

សេចក្តី​ជូន​ដំណឹង​សរសេរ​ថា​ពលករ​កម្ពុជា​ដែល​មិន​ទាន់​មាន​ឯកសារ​ស្រប​ច្បាប់ និង​និយោជក​ជនជាតិ​ថៃ​របស់​ពលករ​ទាំង​នោះ​អាច​ស្នើ​សុំ​ឯកសារ​របស់​ពលករ​ពី​ភាគី​កម្ពុជា​តាមរយៈ​នាយកដ្ឋាន​មុខរបរ​ថៃ ឬ​មន្ទីរ​ការងារ​ថៃ​ចាប់​ពី​ថ្ងៃ​ទី​ ១​ ខែ​កញ្ញា​តទៅ។

បើ​តាម​សេចក្តី​ជូន​ដំណឹង​ដដែល​ឯកសារ​ទាំង​នោះ​រួម​មាន​លិខិត​ឆ្លង​ដែន ឬ​លិខិត​ធ្វើ​ដំណើរ​ពលករ​កម្ពុជា​ទៅ​ធ្វើការ​ក្រៅ​ប្រទេស និង​ប័ណ្ណ​ពលករ​កម្ពុជា​ទៅ​ធ្វើការ​នៅ​ក្រៅ​ប្រទេស។

ក្រសួង​ការងារ​កម្ពុជា​ឲ្យ​ដឹង​ថា​ ក្រសួង​ការងារ​ថៃ​នឹង​ជូន​ដំណឹង​ថ្លៃ​សេវា​ដក​ឯកសារ​ទាំង​នេះ​ និង​ព័ត៌មាន​លម្អិត​បន្ថែម​ទៀត​នៅ​ចុង​ខែ​សីហា​នេះ។ បើ​តាម​ក្រសួង​ការងារ​កម្ពុជា​ថ្លៃ​សេវា​ដក​ឯកសារ​ទាំង​នេះ​មាន​តម្លៃ​ប្រហែល​ជា​ ៩៥០ ​បាត។

អ្នក​នាំ​ពាក្យ​ក្រសួង​ការងារ​លោក ហេង សួរ បាន​ប្រាប់​ភ្នំពេញ​ប៉ុស្តិ៍​​កាលពី​ម្សិលមិញ​តាម​សារ​អេឡិចត្រូនិក​ថា​សេចក្តី​ជូន​ដំណឹង​នេះ​មាន​គោល​បំណង​ជូន​ដំណឹង​ដល់​ពលករ​កម្ពុជា​ឲ្យ​​ទៅ​ទទួល​​ឯកសារ​ស្រប​ច្បាប់​។

លោក​សរសេរ​ថា៖ «គោល​បំណង​នៃ​សេចក្តី​ជូន​ដំណឹង​គឺ​ប្រាប់​ពលករ​ខ្មែរ​យើង​ដែល​មិន​ទាន់​មាន​ឯកសារ​ស្រប​ច្បាប់​ និង​កំពុង​កាន់​ប័ណ្ណ​ពណ៌​ស៊ីជំពូ​ឲ្យ​រង់ចាំ​ទទួល​ឯកសារ​ស្រប​ច្បាប់​ដែល​ក្រសួង​ការងារ​ថៃ​នឹង​ផ្តល់​ឲ្យ»។

នាយក​ប្រតិបត្តិ​មជ្ឈមណ្ឌល​​សម្ព័ន្ធភាព​ការងារ​ និង​សិទ្ធិ​មនុស្ស​ហៅ​កាត់​ថា​សង់ត្រាល់​លោក មឿន តុលា បាន​ឲ្យ​ដឹង​ថា​ពលករ​កម្ពុជា​ដែល​ធ្វើការ​ស្រប​ច្បាប់​នៅ​ប្រទេស​ថៃ​គឺជា​ពលករ​ដែល​ចេញ​ទៅ​ធ្វើការ​តាមរយៈ​ទីភ្នាក់ងារ​​នាំ​ពលករ​ទៅ​ធ្វើការ​ក្រៅ​ប្រទេស​ដោយ​ស្រប​ច្បាប់។ ដោយ​ឡែក​ពលករ​​មួយ​ចំនួន​ទៀត​បាន​លួច​ឆ្លង​ដែន​ទៅ​ប្រទេស​ថៃ​ដោយ​ខុស​ច្បាប់​តែ​ត្រូវ​បាន​អាជ្ញាធរ​ថៃ​ផ្តល់​នូវ​ប័ណ្ណ​ពណ៌​ស៊ីជំពូ​សម្រាប់​ឲ្យ​ធ្វើការ​តែ​នៅ​ក្នុង​ខេត្ត ឬ​តំបន់​ណា​មួយ​ជាក់លាក់​ដោយ​មិន​អាច​ធ្វើ​ដំណើរ​ដោយ​សេរី​បាន​ទេ។

លោក​បន្ត​ថា ​អ្នក​ទាំង​នោះ​ហើយ​ដែល​ត្រូវ​សុំ​ឯកសារ​មួយ​ចំនួន​ពី​រដ្ឋាភិបាល​កម្ពុជា​ដូច​ជា​លិខិត​ឆ្លង​ដែន ឬ​​លិខិត​ធ្វើ​ដំណើរ​ពលករ​កម្ពុជា​ទៅ​ធ្វើការ​នៅ​ក្រៅ​ប្រទេស និង​ប័ណ្ណ​ពលករ​​កម្ពុជា​ទៅ​ធ្វើការ​នៅ​ក្រៅ​ប្រទេស​ជាដើម។

លោក​ថា​ពលករ​ដែល​មាន​ឯកសារ​ទាំង​នេះ​ទើប​អាច​ធ្វើ​ដំណើរ​ក្នុង​ប្រទេស​ថៃ​បាន​ដោយ​ស្រប​ច្បាប់។ លោក តុលា សាទរ​ទៅ​នឹង​វិធានការ​របស់​ក្រសួង​នេះ​តែ​លោក​ថា​កន្លង​មក​ក៏​មាន​ពលករ​បាន​ត្អូញត្អែរ​ពី​ភាព​យឺតយ៉ាវ​របស់​មន្ត្រី​អន្តរ​ក្រសួង​ក្នុង​ការ​ចេញ​លិខិត​ឆ្លងដែន ឬ​ឯកសារ​ពាក់ព័ន្ធ​ផ្សេងៗ​ដល់​ពួកគាត់​ផង​ដែរ​។​

លោក​បន្ថែម​ថា៖ «ការ​ធ្វើ​លិខិត​ឆ្លងដែន​ហ្នឹង​មាន​រយៈពេល​យូរ​តម្លៃ​មិន​ច្បាស់​លាស់...ស្ថានទូត​ខ្មែរ​នៅ​ប្រទេស​ថៃ​ធ្វើការ​តែ​ពី​ម៉ោង​ ៩ ព្រឹក​ទៅ​ដល់​ម៉ោង​ ១២ ​ថ្ងៃត្រង់...វា​ពិបាក​សម្រាប់​ពលករ​ក្នុង​ការ​ស្នើសុំ​ធ្វើ​ឯកសារ​ផ្សេងៗ»។

កាលពី​ថ្ងៃ​ទី​ ២៦ ខែ​កក្កដា ឆ្នាំ ២០១៦ រដ្ឋមន្ត្រី​ក្រសួង​មហាផ្ទៃ​លោក​ ស ខេង បាន​ណែនាំ​ដល់​មន្ត្រី​​របស់​ខ្លួន​ឲ្យ​បិទ​ច្រក​របៀង​នៅ​តាម​ព្រំដែន​ដោយ​ថា​ដើម្បី​ទប់ស្កាត់​ពលករ​ឆ្លង​ដែន​ទៅ​ធ្វើការ​នៅ​ក្រៅ​ប្រទេស​ដោយ​ខុស​ច្បាប់។

លោក ស ខេង ចាត់​ទុក​ថា​ពលករ​ចំណាក​ស្រុក​​ដោយ​ខុស​ច្បាប់​នៅ​ក្រៅ​ប្រទេស​នាំ​ឲ្យ​​ពលករ​រង​នូវ​ការ​រំលោភ​បំពាន​ និង​កេងប្រវ័ញ្ច​កម្លាំង​ពលកម្ម។

ទោះ​យ៉ាង​ណា​ លោក​ថា ​ពលករ​ដែល​ធ្វើការ​ដោយ​ស្រប​ច្បាប់​នៅ​ក្រៅ​ប្រទេស​បាន​ទទួល​ប្រាក់​ចំណូល​សម្រាប់​ចិញ្ចឹម​ជីវិត និង​គ្រួសារ​។

គួរ​បញ្ជាក់​ថា​កាលពី​ពាក់​កណ្តាល​ឆ្នាំ​ ២០១៤​ ពលករ​ខ្មែរ​ដែល​កំពុង​ធ្វើការ​នៅ​ប្រទេស​ថៃ​ជាង​ ២ សែន​នាក់​ត្រូវ​បាន​អាជ្ញាធរ​យោធា​ថៃ​ចាប់​បញ្ជូន​មក​កាន់​កម្ពុជា​វិញ។

ទោះ​យ៉ាង​ណា ​ក្រោយ​ពី​មាន​ការ​បញ្ជូន​ពលករ​ដ៏ច្រើន​​ត្រឡប់​មក​វិញ​នេះ​រដ្ឋាភិបាល​កម្ពុជា ថៃ បាន​ឯកភាព​គ្នា​បញ្ជូន​ពលករ​ខ្មែរ​ត្រឡប់​ទៅ​ប្រទេស​ថៃ​វិញ​ ដោយ​​ភាគី​ទាំង​ពីរ​ព្យាយាម​ផ្តល់​ឯកសារ​ស្រប​ច្បាប់ ឬ​ឯកសារ​ការងារ​បណ្តោះ​អាសន្ន​ដល់​អ្នក​ទាំង​នោះ៕

អត្ថបទគួរចាប់អារម្មណ៍