.jpg)
ភ្នំពេញៈ ពលករខ្មែរចំនួន ៦ នាក់ ដែលបានវិលត្រលប់មកពីប្រទេសថៃកាលពីថ្ងៃទី ១០ និងទី ១១ ខែមករា បានធ្វើតេស្តមានវិជ្ជមានវីរុសកូវីដ ១៩ ដែលធ្វើឱ្យពលករដែលមានជំងឺនេះសរុបទាំងអស់ចំនួន ៣៣ នាក់។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានឱ្យដឹងថា កាលពីថ្ងៃទី ១២ ខែមករា ថា លោកនាយករដ្ឋមន្ត្រី ហ៊ុន សែន បានបន្ថែមការឧបត្ថម្ភថវិកាចំនួន ៥០០ លានរៀល និងជំនួយមួយចំនួនបន្ថែមទៀតដល់ខេត្តបន្ទាយមានជ័យ ដើម្បីរៀបចំការ ធ្វើចត្តាឡីស័កសម្រាប់ពលករខ្មែរដែលត្រឡប់មកពីប្រទេសថៃ។
យោងតាមសេចក្តីប្រកាសព័ត៌មានរបស់ក្រសួងសុខាភិបាលនៅថ្ងៃទី ១៣ ខែមករា បានឱ្យដឹងថា ស្ត្រីខ្មែរចំនួន ៦ នាក់ ដែល ៤ នាក់ មានស្រុកកំណើតនៅខេត្តបាត់ដំបង និង ២ នាក់នៅខេត្តព្រៃវែង ត្រូវបានធ្វើតេស្តមានវីរុសកូវីដ ១៩ បន្ទាប់ពីពួកគាត់បានត្រលប់មកពីប្រទេសថៃវិញកាលពីថ្ងៃទី ១០ និងទី ១១ ខែមករា។
គិតត្រឹមថ្ងៃទី ១៣ ខែមករា កម្ពុជាមានអ្នកមានវីរុសកូវីដ ១៩ ចំនួន ៣៩៨ នាក់ ក្នុងនោះព្យាបាលជាសះស្បើយចំនួន ៣៧៦ នាក់ និងកំពុងសម្រាកព្យាបាលចំនួន ២២ នាក់ ដែលក្នុងចំណោមនេះមានអ្នកជំងឺចំនួន ២១ នាក់ជាពលករខ្មែរមកពីប្រទេសថៃ។
ទន្ទឹមនឹងនេះ ស្ថានទូតកម្ពុជាប្រចាំទីក្រុងគូឡាឡាំពួ ប្រទេសម៉ាឡេស៊ី បានជូនដំណឹងទៅដល់ប្រជាពលរដ្ឋ សិស្សនិស្សិត ពលករ-ពលការិនី ដែលកំពុងស្នាក់នៅ សិក្សា និងធ្វើការនៅប្រទេសម៉ាឡេស៊ីកាលពីថ្ងៃទី ១២ ខែមករា ពីការប្រកាសដាក់ប្រទេសក្នុងភាពអាសន្នរបស់រដ្ឋាភិបាលម៉ាឡេស៊ីរហូតដល់ថ្ងៃទី ១ ខែ សីហា ឆ្នាំ ២០២១។
យោងតាមសេចក្តីជូនដំណឹងបានឱ្យដឹងថា ស្របពេលជាមួយគ្នានេះដែរ រដ្ឋាភិបាលម៉ាឡេស៊ីបានប្រកាសដាក់រដ្ឋនិងទីក្រុងចំនួន ៨ ឱ្យស្ថិតនៅក្រោមវិធានការនៃការរឹតបន្តឹងការធ្វើដំណើរក្នុងរយៈពេល ២ សប្តាហ៍ផងដែរ គិតចាប់ពីថ្ងៃទី ១៣ ខែមករាដល់ថ្ងៃទី ២៦ ខែមករា ដើម្បីទប់ស្កាត់ស្ថានភាពនៃការរីករាតត្បាតនៃជំងឺកូវីដ ១៩ ដែលអត្រាឆ្លងកំពុងស្ថិតក្នុងកម្រិតខ្ពស់គួរឱ្យព្រួយបារម្ភ។
ការរឹតបន្តឹងនោះមានដូចជាការធ្វើដំណើរចេញចូលពីតំបន់មួយទៅតំបន់មួយ អនុញ្ញាតតែសមាជិកគ្រួសារ ២ នាក់ប៉ុណ្ណោះ អាចចេញទៅទិញម្ហូប និងសម្ភារៈ អនុញ្ញាតឱ្យគណៈកម្មការវិហារឥស្លាមចូលធ្វើពិធីបានក្រោម ៥ នាក់ និងអនុញ្ញាតឱ្យចេញពីផ្ទះបន្ធូរអារម្មណ៍តែ ២ នាក់ក្នុងគ្រួសារ និងត្រូវរក្សាគម្លាត..ជាដើម។
ស្ថានទូតបានបញ្ជាក់បន្ថែមថា ៖ «ជនណាដែលល្មើសនឹងបទបញ្ជានេះត្រូវផាកពិន័យ ២៥០ ដុល្លារអាមេរិក»។
នៅថ្ងៃទី ១៣ ខែមករា ស្ថានទូតកម្ពុជាប្រចាំប្រទេសម៉ាឡេស៊ី បានចេញសេចក្តីប្រកាសព័ត៌មានពីសមិទ្ធិផលការងារស្តីពីកិច្ចការពារផលប្រយោជន៍ពលរដ្ឋខ្មែរនៅបរទេសឆ្នាំ ២០២០ របស់ស្ថានទូតមួយនេះ។
ស្ថានទូតកម្ពុជាបានជួយសម្របសម្រួលដល់ប្រជាពលរដ្ឋ សិស្ស និស្សិត និងពលករ-ពលការិនីបានត្រលប់មកប្រទេសកម្ពុជាចំនួន ១ ០៧៤ នាក់ ពិសេស្សបានសម្របសម្រួលរៀបចំជើងយន្តហោះចំនួន ៨ លើក និងសហការបញ្ជូនអ្នកទោស និងអ្នកជាប់ឃុំឃាំងដោយការស្នាក់នៅខុសច្បាប់ចំនួន ១៣២ នាក់ តាមជើងហោះហើរពិសេសរបស់រាជរដ្ឋាភិបាលម៉ាឡេស៊ី។
សេចក្តីប្រកាសព័ត៌មានបានឱ្យដឹងថា៖ «ជាមួយគ្នានេះដែរ ស្ថានទូតបានចែកជំនួយសង្គ្រោះជាស្បៀងអាហាររបស់រដ្ឋាភិបាលកម្ពុជាដល់ពលករពលការិនីនិងប្រជាពលរដ្ឋខ្មែរដែលជួបប្រទះការខ្វះខាតខ្លាំងក្នុងអំឡុងពេលនៃការរាតត្បាតជំងឺកូវីដ ១៩ នេះ សរុបចំនួន ៣ ៨៩៤ គ្រួសារ នៅក្នុងរដ្ឋចំនួន ១០ ក្នុងប្រទេសម៉ាឡេស៊ី»។
នៅថ្ងៃដដែលនេះដែរ ដោយមានកិច្ចអន្តរាគមន៍របស់ស្ថានទូតកម្ពុជាប្រចាំប្រទេសម៉ាឡេស៊ី ពលករ ពលការិនីខ្មែរចំនួន ០៣ រូប បានធ្វើដំណើរមកដល់អាកាសយានដ្ឋានអន្តរជាតិភ្នំពេញដោយដោយសុវត្ថិភាព។
ចំណែកឯប្រជាពលរដ្ឋខ្មែរចំនួន ១៤ នាក់ ក៏បានវិលត្រលប់មកពីប្រទេសមីយ៉ាន់ម៉ាមកប្រទេសកម្ពុជា ផងដែរនៅថ្ងៃទី ១៣ ខែមករា៕
