The Phnom Penh Post Search

Search form




Logo of Phnom Penh Post newspaper Phnom Penh Post - ពលករ​ខ្មែរ​រាប់​សែន​នាក់​ប្រឈម​ការ​ដេញ​ចេញ​ពី​ថៃ

ពលករ​ខ្មែរ​រាប់​សែន​នាក់​ប្រឈម​ការ​ដេញ​ចេញ​ពី​ថៃ

ពលករ​ខ្មែរ​ចំណាក​ស្រុក ត្រូវ​ថៃ​ចាប់​បញ្ជូន​ត្រឡប់​មក​វិញ កាល​ពី​ឆ្នាំ​មុន។
ពលករ​ខ្មែរ​ចំណាក​ស្រុក ត្រូវ​ថៃ​ចាប់​បញ្ជូន​ត្រឡប់​មក​វិញ កាល​ពី​ឆ្នាំ​មុន។ ម៉ៃ វីរៈ

ពលករ​ខ្មែរ​រាប់​សែន​នាក់​ប្រឈម​ការ​ដេញ​ចេញ​ពី​ថៃ

ភ្នំពេញៈ ពលករ​ចំណាក​ស្រុក​កម្ពុជា រាប់​សែន​នាក់​នៅ​ថៃ មាន​រយៈ​ពេល​រហូត​ដល់ ថ្ងៃទី៣០ ខែ​មិថុនា ដើម្បី​ទទួល​បាន​លិខិត​អនុញ្ញាត​ការងារ​ថ្មី ពី​អាជ្ញាធរ​ថៃ បើ​មិន​ដូច្នោះ​ទេ​នឹង​ប្រឈម​ការ​និរទេស​ចេញពី​ប្រទេស​នេះ។

រដ្ឋាភិបាល​ថៃ បាន​អនុម័ត​នីតិវិធី​ថ្មី​នៅ ថ្ងៃទី០៣ ខែ​មីនា សម្រាប់​ពលករ​ចំណាក​ស្រុក​ចំនួន ១,៦ លាន​នាក់ និង​អ្នក​ក្នុង​បន្ទុក ដែល​កំពុង​ប្រើ​ប្រាស់​លិខិត​អនុញ្ញាត​ការងារ​បណ្តោះ​អាសន្ន ដែល​ផុត​កំណត់​នៅ​ចុង​ខែ​នេះ។

ការិយាល័យ​ព័ត៌មាន​ជាតិ​ថៃ (NNT) បាន​រាយការណ៍​កាលពី​ថ្ងៃ​អាទិត្យ​ថា ពលករ​ពី​កម្ពុជា ឡាវ និង​មីយ៉ាន់ម៉ារ ដែល​បាន​បំពេញ​ដំណើរ​ការ​ផ្ទៀង​ផ្ទាត់​សញ្ជាតិ​ដោយ​ជោគជ័យ​នៅ ថ្ងៃទី៣១ ខែ​មីនា នឹង​ទទួល​បាន​ទិដ្ឋាការ​ការងារ​រយៈ​ពេល ២ ឆ្នាំ។ អ្នក​ទាំង​ឡាយ ដែល​មិន​បាន​ផ្ទៀង​ផ្ទាត់​នៅ​ចុង ខែ​មីនា នឹង​ត្រូវ​បង្ហាញ​ខ្លួន​នៅ​ចំពោះ​មុខ​អាជ្ញាធរ នៅ​មុន ថ្ងៃទី៣០ ខែ​មិថុនា ដើម្បី​ទទួល​បាន​លិខិត​អនុញ្ញាត​ការងារ​រយៈ​ពេល ១ ឆ្នាំ ដែល​នឹង​ទុក​ពេល​វេលា​ច្រើន​ថែម​ទៀត​ដល់​ពួកគេ។

NNT រាយការណ៍​ថា៖ «ពលករ​មិន​បាន​បង្ហាញ​ខ្លួន​និង​មិន​បាន​ចុះ​បញ្ជី​ទាំង​អស់​នឹង​ត្រូវ​ចាប់​ខ្លួន​ដើម្បី​និរទេស​តាម​ច្បាប់ និង​បទបញ្ជា​របស់​ក្រុម​ប្រឹក្សា​ជាតិ​ដើម្បី​សន្តិភាព និង​សណ្តាប់​ធ្នាប់»។

រដ្ឋ​ប្រហារ​នៅ​ថៃ កាលពី ខែ​ឧសភា​ឆ្នាំ​មុន បាន​បណ្តាល​ឲ្យ​ពលករ​ជាច្រើន​នាក់ វិល​ត្រឡប់​មក​កម្ពុជា​វិញ បន្ទាប់ពី​មាន​ពាក្យ​ចចាម​អារ៉ាម​ថា កងទ័ព​ថៃ​កំពុង​ចាប់​ផ្តើម​ការ​បង្ក្រាប​លើ​ពលករ​ខុស​ច្បាប់​នៅ​ពេល​នោះ។ បន្ទាប់ពី​ការ​ធ្វើ​ចំណាក​ស្រុក​ដ៏​ធំ​នោះ​មក មជ្ឈមណ្ឌល​ច្រក​ចេញ​ចូល​តែ​មួយ ត្រូវ​បាន​បើក​នៅ​កម្ពុជា​ដើម្បី​ផ្តល់​លិខិត​ឆ្លង​ដែន​តម្លៃ​ថោក​ដល់​ពលករ ដែល​អាច​បញ្ជាក់​ថា ពួក​គេ​ធ្លាប់​មាន​ការងារ​នៅ​ថៃ។

ប៉ុន្តែ ពលករ​ភាគច្រើន​វាង​ពី​ប្រព័ន្ធ​នេះ ដោយ​ពលករ​និង​អ្នក​ក្នុង​បន្ទុក​ប្រហែល ៧៣៨ ពាន់​នាក់​បាន​លិខិត​អនុញ្ញាត​ការងារ​បណ្តោះ​អាសន្ន នៅ​ការិយាល័យ​ច្រក​ចេញ​ចូល​តែ​មួយ​នៅ​ថៃ នៅ​ត្រឹម ថ្ងៃទី២៩ ខែ​វិច្ឆិកា ឆ្នាំ​មុន។ នេះ​បើ​យោង​តាម​ស្ថិតិ​របស់​រដ្ឋាភិបាល​ថៃ។

ទោះ​ជា​យ៉ាង​ណា​ ការ​ផុត​កំណត់​លិខិត​អនុញ្ញាត​ទាំង​នោះ នៅ​ខែ​នេះ បាន​ធ្វើ​ឲ្យ​មាន​ការ​ភ័យ​ខ្លាច​ថា នឹង​មាន​ការ​និរទេស​ពលករ​ច្រើន​នាក់។ បើ​ទោះ​បី​ជា​មាន​សេចក្តី​ប្រកាស​ក៏​ដោយ​ក៏​ប៉ុន្តែ​ក្រុម​គាំទ្រ​ពលករ​ចំណាក​ស្រុក បាន​ថ្លែង​ថា ដំណើរ​ការ​ចុះបញ្ជី​ប្រព្រឹត្ត​ទៅ​យឺត​ណាស់។

លោក Omsin Boonlert មន្ត្រី​ស្រាវជ្រាវ និង​តស៊ូ​មតិ​នៅ​បណ្តាញ​ចំណាក​ស្រុក​មេគង្គ បាន​ឲ្យ​ដឹង​ថា៖ «កិច្ច​សហ​ប្រតិបតិ្ត​ការ និង​កិច្ច​សម្រប​សម្រួល [មិន​ល្អ] រវាង​ប្រទេស​ទាំង​ពីរ នៅ​តែ​ធ្វើ​ឲ្យ​ដំណើរការ​ស្នើ​សុំ​ឯកសារ ចំណាយ​ពេល​យូរ»។

លោក​ស្រី Sara Piazzano ប្រធាន​ក្រុម​នៃ​កម្មវិធី​ប្រឆាំង​ការ​ជួញ​ដូរ​មនុស្ស​នៅ​អង្គការ Winrock International បាន​ថ្លែង​ថា សេចក្តី​ប្រកាស​របស់​ថៃ​គឺជា​ការ​រំពឹង​ទុក​បើ​គិត​ថា ពលករ​ចំណាក​ស្រុក​កម្ពុជា​ប្រហែល ១ ម៉ឺន​នាក់​ប៉ុណ្ណោះ អាច​បំពេញ​នូវ​ដំណើរ​ការ​ផ្ទៀង​ផ្ទាត់​សញ្ជាតិ​បាន។

មន្ត្រី​ជាច្រើន​នៅ​ក្រសួង​ការងារ​មិន​អាច​ទាក់​ទង​សុំ​ការ​ធ្វើ​អត្ថាធិប្បាយ​បាន​ទេ៕

អត្ថបទគួរចាប់អារម្មណ៍