បន្ទាយមានជ័យៈ យ៉ាងហោចណាស់ក៏មានពលករខ្មែរដែលយោធាថៃចាប់បញ្ជូនមកវិញដោយបង្ខំចំនួន ៦ នាក់បានស្លាប់ និង ១៣ នាក់ផ្សេងទៀតបានរងរបួសធ្ងន់និងស្រាលក្នុងឧបទ្ទវហេតុរថយន្តដឹកពលករខ្មែរពី ប្រទេសថៃ មក កម្ពុជា បានបែកកង់ក្រឡាប់នៅលើទឹកដីថៃ ស្ថិតក្នុង ខេត្តឆាក់ឆឺនសៅ កាលពីយប់ថ្ងៃ ទី១៤ មិថុនា ស្របពេលរដ្ឋមន្ត្រីក្រសួងមហាផ្ទៃ បានចេញលិខិតទៅដល់អភិបាលខេត្តជាប់ព្រំដែនជាមួយនឹង ប្រទេសថៃ ត្រូវស្នើសុំកិច្ចសហការ និងការសម្របសម្រួលពីអាជ្ញាធរខេត្តនៃ ប្រទេសថៃ ដើម្បីសុំឲ្យជួយសម្រួលដល់ការដឹកជញ្ជូនពលករខ្មែរឲ្យវិលត្រឡប់មកប្រទេសកម្ពុជាវិញ។
លោ ជិន ពិសិដ្ឋ អនុប្រធានទំនាក់ទំនងព្រំដែន កម្ពុជា-ថៃ បានថ្លែងឲ្យដឹងថា ព័ត៌មានដែលលោកទទួលបានបឋមគឺមានកម្មករខ្មែរចំនួន ៦ នាក់បានស្លាប់ភ្លាមៗនៅកន្លែងកើតហេតុនិង ១៣ នាក់បានរងរបួសធ្ងន់និងស្រាលកាលពីវេលាយប់ថ្ងៃ ទី១៤ មិថុនា នៅត្រង់ចំណុចគីឡូម៉ែត្រលេខ ៣ ក្នុង ស្រុកខាវសារ៉ាខាម ខេត្តឆាក់ឈើងសៅ ខាងត្បូងរាជធានីបាងកក។
លោកថា៖ «នេះគឺជាគ្រោះថ្នាក់ជាយថាហេតុដោយសារតែការធ្វេសប្រហែស គាត់ដឹកធ្ងន់ហើយបើកលឿនដូច្នេះនៅពេលបែកកង់ក៏ក្រឡាប់តែម្តង។ រថយន្តនោះពុំមែនជារបស់កងទ័ពទេគឺជារថយន្តមេខ្យល់ដែលជួយដឹកពលករ»។
លោក គោ ស៊ុំសារឿត អភិបាល ខេត្តបន្ទាយមានជ័យ បានថ្លែងថា នៅក្នុងគ្រោះថ្នាក់ចរាចរណ៍ក្រឡាប់រថយន្តនោះគឺស្លាប់មនុស្ស ៧នាក់ ម្នាក់ជាជនជាតិថៃជាអ្នកបើករថយន្ត និងពលករខ្មែរ ៦ នាក់ដែលជាស្ត្រីបានស្លាប់ ចំណែកឯអ្នករបួស ១៣ នាក់កំពុងបញ្ជូនទៅសម្រាកព្យាបាលនៅមន្ទីរពេទ្យ ខ្មែរសូវៀត មង្គលបុរី។ លោកថា៖ «នៅក្នុងរថយន្តនោះមានគ្នា ២០នាក់ ដែលពួកគាត់ជួលជិះផ្ទាល់ខ្លួនយើងកំពុងស្វែងរកអត្តសញ្ញាណស្ត្រីពលករ ៦ នាក់ដែលបានស្លាប់នោះដើម្បីបញ្ជូនសពទៅខេត្តរបស់គេដើម្បីធ្វើបុណ្យ»។
លោកបានថ្លែងថា រហូតមកដល់ថ្ងៃអាទិត្យ ទី១៥ ខែមិថុនា នេះចំនួនពលករខ្មែរដែលរបបយោធាថៃចាប់បញ្ជូនមាតុភូមិនិវត្តន៍ដោយបង្ខំមកកម្ពុជាវិញមានចំនួនកើនឡើងរហូតដល់ ១២ ម៉ឺននាក់ហើយ។ លោកថា៖ «យើងកំពុងតែសស្រោកសស្រាំជួយពួកគាត់ដើម្បីដឹកជញ្ជូនទៅស្រុករបស់ពួកគាត់វិញ»។
ទន្ទឹមនឹងនោះដែរ គេហទំព័ររបស់អគ្គស្នងការដ្ឋាននគរបាលជាតិបានឲ្យដឹងថា មានពលករខ្មែរដែលទាហានថៃដឹកបញ្ជូនតាមច្រកតំបន់ ភ្នំដី ស្រុកសំពៅលូន ខេត្តបាត់ដំបង ជិត ៣០នាក់ ត្រូវបានតម្រួតថៃ ចាប់ឲ្យកាប់ឆ្ការព្រៃនៅក្បែរកន្លែងប៉ុស្ថិ៍ត្រួតពិនិត្យរបស់គេដោយសារតែពួកគេគ្មានប្រាក់បង់ឲ្យតម្រួត ថៃ ពីព្រោះតម្រួតថៃតម្រូវឲ្យបង់ប្រាក់ក្នុងម្នាក់ៗ ៣០០ បាតពួកគាត់ត្រូវឲ្យចូលទឹកដី កម្ពុជា ក្រោយពីកាប់ឆ្ការព្រៃរួចរាល់។
ចំណែកឯលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញលិខិត ចុះថ្ងៃ ទី១៤ ខែមិថុនា ជម្រាបទៅកាន់លោកអភិបាលរាជធានី-ខេត្ត លើករណីពលករខ្មែរ ដែលភាគីថៃបានចាប់ និងដឹកជញ្ជូនតាមរថយន្តឲ្យវិលត្រឡប់មក ប្រទេសកម្ពុជាវិញ។ ក្នុងនោះ អភិបាលខេត្តជាប់ព្រំដែនជាមួយ ប្រទេសថៃ ត្រូវស្នើសុំកិច្ចសហការ និងការសម្របសម្រួលពីអាជ្ញាធរខេត្ត នៃ ប្រទេសថៃ ដើម្បីសុំឲ្យអាជ្ញាធរថៃ ជួយសម្រួលដល់ការដឹកជញ្ជូនពលករខ្មែរ ឲ្យវិលត្រឡប់មក ប្រទេសកម្ពុជា វិញ ដោយគិតគូរពីសុវត្ថិភាព លក្ខណៈមនុស្សធម៌ និងសិទ្ធិរស់រានមានជីវិតរបស់ប្រជាពលរដ្ឋ។
នៅក្នុងលិខិតនោះបានលើកឡើងថា៖ «ត្រូវទំនាក់ទំនង និងចូលរួមសហការជាមួយអាជ្ញាធរខេត្តជាប់ព្រំដែនជាមួយ ប្រទេសថៃ ដើម្បីជួយឧបត្ថម្ភដោះស្រាយដល់ការដឹកជញ្ជូនពលករខ្មែរ ដែលមានទីលំនៅក្នុងដែនសមត្ថកិច្ចរបស់ខ្លួន ពីព្រំដែនទៅកាន់លំនៅឋានរបស់ពួកគេ។ អាជ្ញាធរខេត្តជាប់ព្រំដែនថៃទាំងអស់ ក៏ត្រូវចាត់ឲ្យមានមន្ត្រីប្រចាំការសម្រាប់ទំនាក់ទំនងជាមួយអាជ្ញាធរ ខេត្តនៃ ប្រទេសថៃ ដើម្បីក្តាប់ឲ្យបានច្បាស់លាស់នូវស្ថិតិ និងស្ថានភាពពលករខ្មែរ ដែលអាជ្ញាធរថៃ ចាប់បញ្ជូនមកកម្ពុជាវិញ។ ក្នុងនោះ អាជ្ញាធរខេត្តទាំងអស់ ក៏ត្រូវរាយការណ៍ប្រចាំថ្ងៃ ទៅកាន់ក្រសួងមហាផ្ទៃផងដែរ»។
រីឯ ក្រសួងការងារ និងបណ្តុះបណ្តាលវិជ្ជាជីវៈកាលពី ថ្ងៃ១៣ ខែមិថុនា បានចេញលិខិតជូនដំណឹងថា បានរៀបចំស្តង់ព័ត៌មានចល័តចំនួន ៣៨ គ្រឹះស្ថាននៅតាមបណ្តារាជធានីខេត្ត សម្រាប់បណ្តុះបណ្តាលបច្ចេកទេស និងវិជ្ជាជីវៈជូនដល់កម្មករ-កម្មការិនីខ្មែរ ដែលទើបនឹងត្រឡប់មកពី ប្រទេសថៃ ដើមសប្តាហ៍នេះ ឲ្យទទួលបានជំនាញពិតប្រាកដ។
សេចក្តីជូនដំណឹងនោះថា៖ «វគ្គបណ្តុះបណ្តាលបច្ចេកទេស និងវិជ្ជាជីវៈនេះ មានរយៈពេលចាប់ពី ១ សប្តាហ៍ ដល់ ៤ខែ លើជំនាញផ្នែក ឧស្សាហកម្ម បច្ចេកទេស សិប្បកម្ម សេវាកម្ម ទេសចរណ៍ និងកសិកម្មជាដើម។ សម្រាប់កម្មករ-កម្មការិនីដែលមានបំណងចូលរៀនវគ្គបណ្តុះបណ្តាលនេះ សូមទាក់ទងមជ្ឈមណ្ឌលបណ្តុះបណ្តាលបច្ចេកទេស និងវិជ្ជាជីវៈទាំង ៣៨ គ្រឹះស្ថាន នៅក្នុង ២៤ រាជធានី-ខេត្ត ដែលស្ថិតនៅក្បែរលំនៅឋានរបស់កម្មករ-កម្មការិនីទាំងនោះ»។
រយៈពេល ១ សប្តាហ៍ហើយ ដែលរដ្ឋាភិបាលយោធាថៃដឹកនាំដោយលោក ប្រាយុធ ចាប់ផ្តើមដឹកបញ្ជូនពលករខ្មែរមកកម្ពុជាវិញទាំងថ្ងៃទាំងយប់។ ទោះមន្ត្រីរដ្ឋាភិបាល គណបក្សប្រឆាំង និងមន្ត្រីអង្គការសង្គមស៊ីវិល អំពាវនាវជាបន្តបន្ទាប់ឲ្យមានការអត់ឱន ឬ អនុវត្តតាមគោលការណ៍សិទ្ធិមនុស្សក៏ដោយ ក៏មិនមានការឆ្លើយតបពីរដ្ឋាភិបាលយោធាថៃ ហើយការចាប់បញ្ជូននៅតែបន្ត។
លោក ស៊ុំ ចាន់គា មន្ត្រីសម្របសម្រួលសមាគម អាដហុក ប្រចាំ ខេត្តបន្ទាយមានជ័យ បានថ្លែងឲ្យដឹងថា ចំនួនពលករដែលបញ្ជូនមកគឺនៅតែមានកំណើនកើនឡើង ហើយនេះក៏ជាបញ្ហាមួយដែលរដ្ឋាភិបាលត្រូវតែគិតគូរឡើងវិញដល់ប្រជាពលរដ្ឋរបស់ខ្លួន ហេតុអ្វីបានជាពលរដ្ឋរបស់ខ្លួនធ្វើចំណាកស្រុកនៅប្រទេសគេច្រើនម៉្លេះ។
លោកថា៖ «នេះគឺជាការទទួលខុសត្រូវរបស់រដ្ឋាភិបាលឬមួយក៏រដ្ឋាភិបាលចង់ឃើញខ្មែរយើងត្រូវតែធ្វើជាកម្មករបរទេសអ៊ីចឹងឬមួយយ៉ាងណា?»៕
