ភ្នំពេញៈ ពលករខ្មែរចំនួន ៣៣នាក់ ដែលរងគ្រោះដោយសារការជួញដូរមនុស្ស និងការបង្ខិតបង្ខំឲ្យធ្វើការនៅលើទូកនេសាទ ត្រូវបានជួយសង្រ្គោះពីកោះ Tarempa, Tanjung Pinang និង Riau Island ប្រទេសឥណ្ឌូណេស៊ី និងបានមកដល់ប្រទេសកម្ពុជាវិញកាលពីល្ងាចម្សិលមិញ។
លោក ជុំ សុន្ទរី អ្នកនាំពាក្យក្រសួងការបរទេសកម្ពុជាបានបញ្ជាក់ឲ្យដឹងដែរថា ពួកគេបានមកដល់អាកាសយានដ្ឋានអន្តរជាតិភ្នំពេញកាលពីម្សិលមិញ តាមជើងយន្តហោះ MH 762 វេលាម៉ោង ១៦: ១០ នាទី ដោយមានការរៀបចំ ដោយស្ថានឯកអគ្គរាជទូតកម្ពុជាប្រចាំប្រទេសឥណ្ឌូណេស៊ី បានសហការជាមួយអង្គការអន្តោប្រវេសន៍ (IOM)។
ក្រសួងការបរទេស និងសហប្រតិបត្តិការអន្តរជាតិ បានអំពាវនាវដល់ពលរដ្ឋខ្មែរត្រូវធ្វើការ ប្រុងប្រយ័ត្នចំពោះការឆបោក ការសន្យាភូតកុហក អូសទាញ បញ្ចុះបញ្ចូលពីសំណាក់មេខ្យល់ ដែលមានគំនិតទុច្ចរិតបម្រើផលប្រយោជន៍ផ្ទាល់ខ្លួន ក្នុងការនាំបងប្អូនទៅធ្វើការដោយខុសច្បាប់នៅក្រៅប្រទេស។
សូមបញ្ជាក់ថា រហូតមកដល់ពេលនេះ មានពលករខ្មែរជាង ៣០០នាក់ដែលរងគ្រោះដោយការជួញដូរធ្វើជាទាសករនេសាទ ត្រូវបានជួយសង្រ្គោះ និងនាំត្រលប់មកកម្ពុជាវិញ៕
