The Phnom Penh Post Search

Search form

Logo of Phnom Penh Post newspaper Phnom Penh Post - ពលការិនី​ត្រៀម​បម្រើ​តាម​ផ្ទះ​នៅ សិង្ហបុរី ហ្វឹក​ហាត់​ការងារ

ពលការិនី​ត្រៀម​បម្រើ​តាម​ផ្ទះ​នៅ សិង្ហបុរី ហ្វឹក​ហាត់​ការងារ

ពលការិនី​ត្រៀម​បម្រើ​តាម​ផ្ទះ​នៅ សិង្ហបុរី ហ្វឹក​ហាត់​ការងារ

ភ្នំពេញៈ សិក្ខាកាម​នៅ​មជ្ឈមណ្ឌល​មួយ​កន្លែង​កំពុង​ហ្វឹក​ហាត់​ធ្វើ​កិច្ចការ​ផ្ទះ ក្រោម​ការ​ឃ្លាំ​មើល​យ៉ាង​តឹងរ៉ឹង​របស់​គ្រូ​បង្ហាត់ ដោយ​អ្នក​ខ្លះ​រៀបចំ​គ្រែ​នៅ​ក្នុង​បន្ទប់​គេង ហើយ​អ្នក​ខ្លះ​ទៀត​ហាត់​រៀបចំ​តុ​អាហារ និង​អ្នក​ផ្សេង​ទៀត​ហាត់​មើល​ថែ​កូន​តុក្កតា​ជ័រ។

មជ្ឈមណ្ឌល នេះ​ដែល​បង្កើត​ឡើង​ដោយ​ក្រុមហ៊ុន​ជ្រើសរើស​ពលករ​ក្នុង​ស្រុក Philimore Cambodia នៅ​ជាយ​រាជធានី​ភ្នំពេញ កំពុង​តែ​បណ្តុះ​បណ្តាល​អ្នក​បម្រើ​តាម​ផ្ទះ ដែល​នឹង​ត្រូវ​បញ្ជូន​ទៅ​ប្រទេស សិង្ហបុរី ក្នុង​ពេល​ឆាប់ៗ​នេះ។

ខណៈ​ដែល​ការ​បង្វឹក​នេះ​ដូច​ជា​មាន​លក្ខណៈ​ជ្រុល​ពេក អ្នក​បម្រើ​ស្រី​ជនជាតិ ឥណ្ឌូនេស៊ី ៩ នាក់ បាន​ធ្លាក់​ពី​លើ​អគារ​ខ្ពស់​នៅ សិង្ហបុរី ក្នុង​ឆមាស ទី១ ឆ្នាំ​មុន ហើយ​ម្ចាស់​ផ្ទះ​ជាតិ សិង្ហបុរី ត្រូវ​គេ​ស្គាល់​ថា​តឹងរ៉ឹង​បំផុត។

ក្រោម​គម្រោង​សាកល្បង​ដែល​ចុះ​ហត្ថលេខា​កាល​ពី ១០ ខែ​មុន​រវាង​រដ្ឋាភិបាល​កម្ពុជា និង​ក្រសួង​ពលកម្ម​របស់ សិង្ហបុរី អ្នក​បម្រើ​តាម​ផ្ទះ ៤០០ នាក់ នឹង​ចុះ​កិច្ច​សន្យា​សម្រាប់ ២ឆ្នាំ ដើម្បី​ទៅ​ធ្វើ​ការ​តាម​ផ្ទះ​នៅ​ប្រទេស សិង្ហបុរី នៅ​ខែ កុម្ភៈ។ ប្រសិន​ដំណើរការ​ល្អ ស្រ្តី​កម្ពុជា​រាប់​ម៉ឺន​នាក់​អាច​នឹង​បញ្ជូន​ទៅ​ទៀត។

ទីភ្នាក់ងារ​ជ្រើស​រើស​ពលករ​កម្ពុជា​ចំនួន ៣ កំពុង​ចូល​រួម​ក្នុង​គម្រោង​នេះ គឺ​ក្រុមហ៊ុន Philimore ក្រុមហ៊ុន អ៊ឹង រិទ្ធី គ្រុប និង​ក្រុមហ៊ុន សុខលាភ មេត្រី។

ទាំង​ក្រុមហ៊ុន អ៊ឹង រិទ្ធី គ្រុប របស់​លោក អ៊ឹង សៀងរិទ្ធី ប្រធាន​សមាគម​ទីភ្នាក់ងារ​ជ្រើស​រើស​ពលករ​កម្ពុជា និង​ក្រុមហ៊ុន Philimore ធ្លាប់​មាន​ប្រវតិ្ត​ជាប់​ពាក់​ព័ន្ធ​នឹង​ករណី​ជាច្រើន​ដែល​កេង​ប្រវ័ញ្ច អ្នក​បម្រើ​តាម​ផ្ទះ​ដែល​បញ្ជូន​ទៅ​ប្រទេស ម៉ាឡេស៊ី រាប់​ទាំង​ការ​រំលោភ​បំពាន ពលករ​មិន​គ្រប់​អាយុ និង​អ្នក​បម្រើ​តាម​ផ្ទះ​បាត់​ខ្លួន។

លោក លី ហុកឡៅ នាយក​គ្រប់​គ្រង​ក្រុមហ៊ុន Philimore បាន​ថ្លែង​កាល​ពី​ម្សិលមិញ​ថា លោក​ទទួល​ស្គាល់​ថា មាន​ពាក្យ​បណ្តឹង​កន្លង​មក ជា​ពិសេស​ទាក់​ទង​នឹង​អ្នក​បម្រើ​មិន​គ្រប់​អាយុ ប៉ុន្តែ ថ្នាក់​គ្រប់​គ្រង​ពេល​នេះ​កំពុង​តែ​គ្រប់​គ្រង។

លោក​បញ្ជាក់​ថា៖ «ខ្ញុំ​ប្រាប់​បាន​ថា ករណី​ខ្លះ​មិន​យុតិ្តធម៌​ចំពោះ​យើង​ទេ ហើយ​ករណី​ខ្លះ​មិន​ពិត​ទេ។ មាន​ករណី​ជា​ច្រើន ឪពុក​ម្តាយ និង​អ្នក​ជ្រើស​រើស​ខ្លះ​បាន​ផ្លាស់​ប្តូរ​អាយុ​លើ​ឯកសារ​។ យើង​ទទួល​ស្គាល់​រឿង​នេះ​ថា បាន​កើត​ឡើង​ពិត​មែន»។

លោក​បន្ថែម​ថា៖ «កាល​ពី​លើក​មុន យើង​ក៏​តឹងរ៉ឹង​ដែរ ប៉ុន្តែ​យើង​បញ្ជូន​អ្នក​បម្រើ​តាម​ផ្ទះ​រាប់​ម៉ឺន​នាក់ ដូច្នេះ រដ្ឋបាល​យើង​បាន​បាត់បង់​ការ​គ្រប់​គ្រង។ ប៉ុន្តែ ពេល​នេះ យើង​នឹង​ពុំ​មាន​បញ្ហា​ទៀត​ទេ បើ​ខ្ញុំ​ល្មើស​ច្បាប់ ខ្ញុំ​នឹង​ប្រឈម​ចំពោះ​មុខ​ច្បាប់»។

លោក ហុកឡៅ បញ្ជាក់​ថា បើ​ទោះ​ជា សិង្ហបុរី មាន​ច្បាប់​តឹងរ៉ឹង ទីភ្នាក់ងារ​ក៏​មិន​អាច​ធានា​ថា និយោជក​នឹង​គោរព​សិទិ្ធ​មនុស្ស​នោះ​ទេ។ «ប៉ុន្តែ ប្រសិន​បើ​យើង​បាន​ដឹង​ពី​ករណី​ទាំង​នេះ យើង​ត្រូវ​ឲ្យ​និយោជក​បញ្ជូន​អ្នក​បម្រើ​មក​ផ្ទះ​វិញ។ ខ្ញុំ​នឹង​មិន​អនុញ្ញាត​ឲ្យ​អ្នក​បម្រើ​ធ្វើ​ការ​នៅ​ទីនោះ​ត​ទៅ​ទៀត​ឡើយ»។

Content image - Phnom Penh Post
131018_07c
131018_07c

លោក អ៊ឹង សៀងរិទ្ធី ពុំ​អាច​ទាក់​ទង​សុំ​ការ​ពន្យល់​បាន​ទេ។

ភាព​ទាក់​ទាញ​ដោយ​សារ​តែ​ប្រាក់​ខែ​ខ្ពស់ ព្រម​ទាំង​ការ​យល់​ឃើញ​ថា ប្រទេស​អ្នក​មាន​និង​មាន​ប្រសិទ្ធភាព​នេះ មាន​ប្រព័ន្ធ​ច្បាប់​តឹងរ៉ឹង​ជាង​ប្រទេស ម៉ាឡេស៊ី ក្រុម​ពលករ​នៅ​ក្រុមហ៊ុន Philimore បាន​ថ្លែង​ថា ពួកគេ​ពុំ​មាន​ការ​ភ័យ​ខ្លាច​ទេ។

អ្នក​ស្រី គ្រឿន សុទ្ធី អាយុ ២៨ ឆ្នាំ បាន​ថ្លែង​ថា៖ «ខ្ញុំ​ពិត​ជា​ចង់​ទៅ​ធ្វើការ​នៅ សិង្ហបុរី ព្រោះ​វា​ជួយ​ខ្ញុំ​ឲ្យ​រក​ប្រាក់​បាន​ច្រើន​ដូច្នេះ ខ្ញុំ​អាច​ជួយ​ទំនុក​បម្រុង​គ្រួសារ​ខ្ញុំ​។ ខ្ញុំ​ពិត​ជា​ចង់​សន្សំ​ប្រាក់​ដើម្បី​ខ្ញុំ​អាច​ហាត់​រៀន​ដេរ​ប៉ាក់​បន្ថែម»។

អ្នក​ស្រី​បន្ត​ទៀត​ថា៖ «ខ្ញុំ​មិន​ព្រួយ​បារម្ភ​អំពី​ការ​រំលោភ​បំពាន​ដោយ​ម្ចាស់​ផ្ទះ​ជាតិ សិង្ហបុរី ទេ ព្រោះ​ខ្ញុំ​ដឹង​ថា រដ្ឋាភិបាល សិង្ហបុរី តឹងរ៉ឹង​ខ្លាំង​ណាស់​លើ​និយោជក ហើយ​គេ​នឹង​ការពារ​យើង​ដែល​ជា​អ្នក​បម្រើ​តាម​ផ្ទះ។ ប្រសិន​បើ​គេ​ធ្វើ​អ្វី​អាក្រក់ ខ្ញុំ​អាច​ប្តឹង​ពួក​គេ​បាន»។

លោក ហុកឡៅ បាន​ថ្លែង​ថា ប្រសិន​បើ​គម្រោង​ដំណើរការ​បាន​ល្អ កម្ពុជា​អាច​ក្លាយ​ជា​ប្រភព​ចម្បង​សម្រាប់​តម្រូវការ​អ្នក​បម្រើ​តាម ផ្ទះ​របស់ សិង្ហបុរី។

«យើង​ព្រួយ​បារម្ភ​ណាស់​អំពី​ស្តង់ដារ។ នោះ​ជា​មូលហេតុ​ដែល​យើង​កំពុង​តែ​ធ្វើ​គម្រោង​សាក​ល្បង»។

លោក​ថា៖ «ក្នុង​ចំណោម ៤០០ ករណី​នេះ យើង​នឹង​ឃើញ​ថា តើ​ប៉ុន្មាន​នាក់​អាច​ធ្វើ​ល្អ ប៉ុន្មាន​ឈឺ និង​ប៉ុន្មាន​នាក់​នឹក​ផ្ទះ និង​ចង់​ចាក​ចេញ​។ ប្រសិន​ទាំង ៤០០ នាក់ មាន​គុណភាព​មិន​ល្អ កម្ពុជា​មិន​អាច​ជា​ប្រភព​ផ្គត់​ផ្គង់​អ្នក​បម្រើ​តាម​ផ្ទះ​ឡើយ»។

ច្បាប់​តឹងរ៉ឹង?

ប៉ុន្តែ លោក​ស្រី Bridget Tan នាយក​ប្រតិបតិ្ត​នៅ​អង្គការ​មនុស្សធម៌​ដើម្បី​សេដ្ឋកិច្ច​អ្នក​ចំណាក​ស្រុក​នៅ សិង្ហបុរី ដែល​ប្រឆាំង​នឹង​ការ​ជួញ​ដូរ​មនុស្ស បាន​ថ្លែង​ថា ប៉ុន្តែ ច្បាប់ សិង្ហបុរី ដែល​ការពារ​កម្មករ​ពុំ​មាន​ទេ។ លោក​ស្រី​បាន​ថ្លែង​ថា៖ «ខ្ញុំ​គិត​ថា កម្ពុជា​គួរ​តែ​បារម្ភ។ ពលករ កម្ពុជា នឹង​ប្រើ​របស់​នៅ​លើ​ទីផ្សារ»។

លោក​ស្រី​បន្ត​ថា៖ «គេ​នឹង​បង់​តាម​កម្លាំង​ទីផ្សារ។ ស្រ្តី​នឹង​ក្លាយ​ដូច​ជា​ទំនិញ»។ គេ​អាច​ត្រូវ​បាន​បញ្ឈប់​ដោយ​គ្មាន​មូលហេតុ។ នេះ​ជា​រឿង​ត្រូវ​បារម្ភ វា​ដូច​ជា​ទាសករ​អ៊ីចឹង»។

ភាព​ប្រុង​ប្រយ័ត្ន​លោក ហូ វុទ្ធី អនុ​រដ្ឋ​លេខាធិការ​នៅ​ក្រសួង ការងារ បាន​ថ្លែង​ថា រដ្ឋាភិបាល​កំពុង​តែ​ប្រុង​ប្រយ័ត្ន​ដើម្បី​ចៀស​វាង​បញ្ហា​ដដែលៗ​ដែល​បាន​កើត​ឡើង​នៅ ម៉ាឡេស៊ី។ លោក​មាន​ប្រសាសន៍​ថា៖ «យើង​ដឹង​ថា សិង្ហបុរី មាន​ការ​គ្រប់​គ្រង​ល្អ​សម្រាប់​អ្នក​បម្រើ​តាម​ផ្ទះ ប៉ុន្តែ យើង​នៅ​តែ​បារម្ភ​ដោយ​សារ​បញ្ហា​កន្លង​មក​។ វា​ស្មុគ​ស្មាញ​ដូច្នេះ យើង​ត្រូវ​ប្រុង​ប្រយ័ត្ន»។

ក្រសួង ការងារ ពលកម្ម​របស់ សិង្ហបុរី ពុំ​អាច​ទាក់​ទង​សុំ​ការ​អត្ថាធិប្បាយ​បាន​ទេ​ម្សិលមិញ។

លោក មឿន តុលា ប្រធាន​កម្មវិធី​ការងារ​នៅ​មជ្ឈមណ្ឌល​អប់រំ​ច្បាប់​សហគមន៍ បាន​ថ្លែង​ថា កិច្ច​ព្រម​ព្រៀង​ទ្វេ​ភាគី​ដែល​គូស​បញ្ជាក់​នូវ​ការ​ការពារ​ច្បាប់ គួរ​ចុះ​ហត្ថលេខា​រវាង​កម្ពុជា និង​សិង្ហបុរី។

លោក​បញ្ជាក់​ថា៖ «ក្តី​បារម្ភ​ចំពោះ​យើង​គឺ កម្ពុជា​នឹង​មាន​កំហុស​ដូច​លើក​មុន គឺ​ប្រញាប់​បញ្ជូន​អ្នក​បម្រើ​ទៅ សិង្ហបុរី ដោយ​ពុំ​មាន​ការ​ពិភាក្សា​ឬ​កិច្ច​ព្រម​ព្រៀង​សមស្រប​ទាក់​ទង​នឹង​ការ​ការពារ​ពលករ​នៅ​ឡើយ»៕ TK

អត្ថបទគួរចាប់អារម្មណ៍