.jpg)
ក្រុមអ្នកតវ៉ាប្រមូលផ្ដុំគ្នានៅមុខសភាក្នុងក្រុងមែលប៊ន ប្រទេសអូស្ត្រាលីពីម្សិលមិញ។ រូបថត ហុង លីម
ភ្នំពេញៈ ពលរដ្ឋខ្មែរអូស្ត្រាលីនៃសហព័ន្ធខ្មែរអូស្ត្រាលីសាជីវកម្ម (CAF) ប្រមាណ ២០០ នាក់កាលពីថ្ងៃអង្គារម្សិលមិញបានប្រមូលផ្តុំគ្នានៅមុខក្រសួងការបរទេស និងពាណិជ្ជកម្មអូស្ត្រាលី ដើម្បីដាក់ញត្តិស្នើសុំឲ្យរដ្ឋាភិបាលអូស្ត្រាលីថ្កោលទោសរដ្ឋាភិបាលថ្មីរបស់កម្ពុជា ដែលពួកគេអះអាងថាកើតឡើងពីការបោះឆ្នោតក្លែងក្លាយ។
លោក ហុង លីម រដ្ឋលេខាធិការក្រសួងពហុវប្បធម៌ និងទំនាក់ទំនងអាស៊ី បានថ្លែងប្រាប់ឲ្យដឹងថា នេះជាការជួបគ្នាលើកដំបូងនៅថ្ងៃធ្វើការដោយអ្នកចូលរួមស្ម័គ្រចិត្តឈប់សម្រាកពីការងារមកចូលរួមសម្តែងមតិនេះ។
លោកថ្លែងថា៖ «គោលបំណងនៃការជួបជុំនេះគឺដើម្បីសុំឲ្យអូស្ត្រាលីច្រានចោលការបោះឆ្នោតអាម៉ាស់ និងក្លែងក្លាយរបស់លោក ហ៊ុន សែន។ ស្នើឲ្យធ្វើតាមសហរដ្ឋអាមេរិកក្នុងការដាក់ទណ្ឌកម្មទិដ្ឋាការ និងបង្កកទ្រព្យសម្បត្តិរបស់ក្រុមលោក ហ៊ុន សែន និងដោះលែង លោក កឹម សុខា»។
លោក ហុង លីម ថ្លែងដោយយោងតាមក្រសួងការបរទេសអូស្ត្រាលី ឯកអគ្គរដ្ឋទូតអូស្ត្រាលីប្រចាំព្រះរាជាណាចក្រកម្ពុជានឹងមិនចូលរួមក្នុងនាមជាភ្ញៀវអន្តរជាតិក្នុងការបើកសម័យប្រជុំដំបូងរបស់រដ្ឋសភានៅព្រឹកថ្ងៃពុធនេះទេ។
ការជួបជុំគ្នារបស់ CAF ដែលមានលោក ហុង លីម ជាប្រធានបានដាក់ញត្តិទៅលោកស្រី Jenny Bloomfield ប្រធាននាយកដ្ឋាននៃក្រសួងការបរទេសប្រចាំរដ្ឋវីកតូរៀ។
ដោយយោងលើរបាយការណ៍របស់សារព័ត៌មានលោក ហុង លីម ថ្លែងថាសាច់ញាតិរបស់លោកនាយករដ្ឋមន្ត្រី ហ៊ុន សែន និងអ្នកពាក់ព័ន្ធផ្នែកនយោបាយផ្សេងទៀតមានទ្រព្យសម្បត្តិនៅអូស្ត្រាលីជាង ២០ លានដុល្លារ ហើយមន្ត្រីជាន់ខ្ពស់របស់រដ្ឋាភិបាលកម្ពុជាតែងរៀបចំព្រឹត្តិការណ៍ដើម្បីដាក់សម្ពាធដល់សមាជិកសហគមន៍ខ្មែរនៅអូស្ត្រាលីឲ្យមានការគាំទ្ររបបផ្ដាច់ការ។
ក្រុមនេះបានស្នើសាជាថ្មីដោយសុំឲ្យមានការដោះលែងលោក កឹម សុខា និងលោក James Ricketson អនុញ្ញាតឲ្យគណបក្សសង្គ្រោះជាតិដំណើរការឡើងវិញ និងមន្ត្រី ១១៨ រូបមានសិទ្ធិធ្វើនយោបាយឡើងវិញ។
ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជាបានថ្លែងកាលពីម្សិលមិញថា មិនមានអ្វីគួរឲ្យចាប់អារម្មណ៍ទៅលើលោក ហុង លីម ទេ ព្រោះ លោក ហុង លីម បានចូលនិវត្តន៍ហើយ។
លោកថ្លែងថា៖ «វាអត់មានអីចាប់អារម្មណ៍ទេ។ អត់ប្រយោជន៍ទេ ឲ្យគាត់និយាយអីនិយាយទៅ គ្មានអ្នកណាយកចិត្តទុកដាក់ជាមួយគាត់ទេ»។
និយាយពីទ្រព្យសម្បត្តិជាង ២០ លានដុល្លារដែលថាសាច់ញាតិរបស់លោកនាយករដ្ឋមន្ត្រី ឬមន្ត្រីជាន់ខ្ពស់ CPP មាននៅអូស្ត្រាលីលោក សុខ ឥសាន ថ្លែងថា បើសិនវាជារឿងខុសច្បាប់មែននោះរដ្ឋាភិបាលអូស្ត្រាលីចាត់វិធានការបាត់ទៅហើយ។
លោកបានថ្លែងថា៖ «គេមានធ្វើខុសច្បាប់អី បើធ្វើខុសច្បាប់អូស្ត្រាលី គេចាត់វិធានការហើយ បើមិនខុសច្បាប់ទេធ្វើអីគេកើត។ តែប៉ុណ្ណឹងតើ បើខុសច្បាប់ មិនបាច់ ហុង លីម ថាទេ រដ្ឋាភិបាលគេចាត់វិធានការផ្លូវច្បាប់ហើយ អ្នកណារំលោភ អ្នកណាដែលរត់ពន្ធគ្រឿងញៀន ឬអ្នកណាធ្វើអ្វីខុសច្បាប់ អាហ្នឹងគេចាត់វិធានការផ្លូវច្បាប់»៕
