.jpg)
ជនរងគ្រោះដែលជាន់មីន ដាច់ជើងត្រឹមក្បាលជង្គង់។ សហការី
ព្រះវិហារៈ ប្រជាពលរដ្ឋខ្មែរម្នាក់ ក្នុងចំណោមគ្នា ១០ នាក់ បានជាន់ចំលើគ្រាប់មីនបណ្ដាលឲ្យផ្ទុះរងរបួសដាច់ជើងម្ខាង ខណៈដែលពួកគេកំពុងតែស្ពាយកំណាត់ឈើឆ្លងដែនពីប្រទេសថៃចូលមកក្នុងទឹកដីកម្ពុជាតាមច្រករបៀងមួយ ស្ថិតនៅតាមបណ្ដោយជួរភ្នំដងរែកនៃភូមិសាស្ត្រស្រុកជាំក្សាន្ត ខេត្តព្រះវិហារ។
លោក ឱ សេង អធិការស្រុកជាំក្សាន្ត បានប្រាប់ភ្នំពេញប៉ុស្តិ៍ថា ហេតុការណ៍នេះបានកើតឡើងកាលពីរសៀលថ្ងៃសៅរ៍នៅចំណុចវាលប្រឡង់បេះដូង (តំបន់សជាប់ព្រំដែនកម្ពុជា-ថៃ) ដែលស្ថិតនៅភាគខាងកើតនៃច្រកអានសេះ។ ជនរងគ្រោះ ឈ្មោះ ស្រី ភិន ភេទប្រុស អាយុ ៥២ ឆ្នាំ រស់នៅភូមិវាលពោធិ៍ ឃុំជាំក្សាន្ត ស្រុកជាំក្សាន្ត ខេត្តព្រះវិហារ មានកូនក្នុងបន្ទុកចំនួន ៥ នាក់។
លោក ឱ សេង បានបន្តថា តាមការបំភ្លឺរបស់សាច់ញាតិជនរងគ្រោះ មុនពេលកើតហេតុ ៣ ថ្ងៃ ជនរងគ្រោះ និងសាច់ញាតិ ២ នាក់ រួមទាំងអ្នកភូមិ ៧ នាក់ផ្សេងទៀត បាននាំគ្នាលួចឆ្លងដែនចូលទៅកាប់ឈើនៅក្នុងទឹកដីថៃ ក្រោយពីកាប់បានហើយពួកគេក៏នាំគ្នាស្ពាយឈើត្រឡប់ចូលមកកម្ពុជាវិញ តាមច្រករបៀងមួយស្ថិតនៅភាគខាងកើតច្រកអានសេះ។
បន្ទាប់មកជនរងគ្រោះ បានដើរជាន់ចំគ្រាប់មីន ១ គ្រាប់បណ្ដាលឲ្យផ្ទុះដាច់ជើងខាងស្ដាំត្រឹមក្បាលជង្គង់ ហើយត្រូវបានសាច់ញាតិ និងអ្នករួមដំណើរសែងចេញពីក្នុងព្រៃ និងបញ្ជូនយកទៅកាន់មន្ទីរពេទ្យបង្អែកស្រុកជាំក្សាន្ត។
លោកថ្លែងថា៖ «ដោយសារស្ថានភាពមុខរបួសធ្ងន់ធ្ងរពេក ក្រុមគ្រូពេទ្យនៃមន្ទីរពេទ្យបង្អែកស្រុកជាំក្សាន្ត បានបញ្ជូនបន្តទៅកាន់មន្ទីរពេទ្យបង្អែកខេត្តព្រះវិហារ ដើម្បីធ្វើការវះកាត់មុខរបួស»។
លោក សេង ថ្លែងថា ព្រំដែនកម្ពុជា-ថៃ ជួរភ្នំដងរែកជាតំបន់ដែលមានគ្រាប់មីនច្រើន និងគ្រោះថ្នាក់បំផុត៕
