ព្រៃវែងៈ អាជ្ញាធរឃុំឫស្សី ស្រុកនៃស្រុកពាមជរ ខេត្តព្រៃវែងយកប្រឡាយទឹករបស់រដ្ឋ ៣ ខ្សែ ដែលមានប្រវែងពី ៤-៦ គីឡូម៉ែត្រទៅគ្រប់គ្រងផ្ទាល់ ដើម្បីលក់ទឹកប្រឡាយឲ្យពលរដ្ឋក្នុងឃុំទាំងឡាយណា ដែលចង់បូមទឹកដាក់ស្រែ ឬចង់ស្រោចស្រពដំណាំគឺត្រូវតែទិញទឹកពីអាជ្ញាធរក្នុងតម្លៃ ៤៥ ម៉ឺនរៀល ក្នុង ១ ហិកតា។ នេះបើតាមការអះអាងរបស់តំណាងពលរដ្ឋចំនួន ៣ ពាន់គ្រួសារ។
លោក ដាំ មៀន តំណាងពលរដ្ឋចំនួន ៣ ពាន់គ្រួសារ នៅភូមិឈើទាលនៃឃុំ ស្រុកខាងលើនិយាយកាលពីសប្តាហ៍មុនថាប្រឡាយទឹកទាំង ៣ ខ្សែ ដែលអាជ្ញាធរយកមកគ្រប់គ្រងសម្រាប់លក់ទឹកឲ្យពលរដ្ឋនេះជាជំនួយរបស់លោកឧកញ៉ា ប៉ែន នួន ទីប្រឹក្សាលោក ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ។ ប្រឡាយទាំង ៣ ខ្សែត្រូវបានជីក និងសាងសង់តាំងពីឆ្នាំ ២០១៤ ប៉ុន្តែអាជ្ញាធរបានកំណត់យកប្រឡាយនេះដោយតម្រូវឲ្យពលរដ្ឋបង់លុយ ២០ ម៉ឺនរៀល បើចង់បូមទឹក ដាក់ស្រែ ឬស្រោចស្រពដំណាំ។
លោកថា កាលពីឆ្នាំ ២០១៧ អាជ្ញាធរបានដំឡើងតម្លៃ ៣០ ម៉ឺនរៀល ហើយរហូតមកដល់ឆ្នាំ ២០១៩ និងឆ្នាំ ២០២០ នេះស្រាប់តែអាជ្ញាធរដំឡើងតម្លៃ ដល់ទៅ ៤៥ ម៉ឺនរៀល។
លោកបញ្ជាក់ថា៖ «ខ្ញុំគ្រាន់តែឆ្ងល់ថា ដីប្រឡាយរបស់រដ្ឋ ប៉ុន្ដែលោកមេឃុំ និងបក្ខពួកគាត់បែរជាយកធ្វើជាប្រយោជន៍ផ្ទាល់ខ្លួនគាត់ទៅវិញគឺលក់ទឹកប្រឡាយនោះ ប្រសិនមានពលរដ្ឋណាចង់បូមទឹកដាក់ស្រែ ឬស្រោចដំណាំ ត្រូវចំណាយ ៤៥ ម៉ឺនរៀល។ បើគ្មានលុយឲ្យស្រូវទៅអាជ្ញាធរ ១៨០ គីឡូក្រាម។ ប្រសិនគ្មានលុយ ឬគ្មានស្រូវឲ្យអាជ្ញាធរទេ ពលរដ្ឋគ្មានសិទ្ធិបូមទឹកនេះទេ»។
អ្នកស្រី ឡេង សាមៀ ពលរដ្ឋម្នាក់ក្នុងចំណោមអ្នកផ្សេងទៀតរស់នៅភូមិឈើទាល ឃុំឫស្សីស្រុកថ្លែងថា អ្នកស្រីបានបូមទឹកពីប្រឡាយដែលអាជ្ញាធរគ្រប់គ្រងដាក់ស្រែទំហំ ១ ហិកតា ហើយចំណាយលុយអស់ ៤៥ ម៉ឺនរៀលឲ្យទៅអាជ្ញាធរ។ អ្នកភូមិក្នុងឃុំឫស្សីស្រុកតែងតែធ្វើស្រែចំនួន ៣ ដងក្នុង ១ ឆ្នាំ ក្រោយពីលោកឧកញ៉ា ប៉ែន នួន ជួយជីកប្រឡាយនេះកាលពីឆ្នាំ ២០១៤។
អ្នកស្រីនិយាយថា៖ «ចាប់ពីឆ្នាំ ២០១៤ មកពួកខ្ញុំត្រូវចំណាយលុយរហូត ប្រសិនចង់បូមទឹកដាក់ស្រែ ហើយតម្លៃតែងកើនឡើងពី ១ ឆ្នាំទៅ ១ ឆ្នាំ។ ដូច្នេះឆ្នាំនេះពួកខ្ញុំជាពលរដ្ឋអំពាវនាវឲ្យអាជ្ញាធរទម្លាក់តម្លៃ ឬដាក់ប្រឡាយនេះប្រើប្រាស់រួមគ្នាដោយគ្មានបង់លុយតែម្ដង។ ព្រោះបើបង់លុយដូចនេះ ពួកខ្ញុំជួបបញ្ហាជីវភាពច្រើន ដោយសារដំណាំស្រូវនៅឆ្នាំខ្លះមិនបានទទួលផលល្អទេ ហើយឆ្នាំខ្លះបានត្រឹមតែចំណាយឲ្យថ្លៃទឹក និងថ្លៃជីប៉ុណ្ណោះ»។
លោក នួន ម៉េង មេឃុំឫស្សី ស្រុកច្រានចោលការចោទប្រកាន់នេះដោយអះអាងថា ការលើកឡើងរបស់ពលរដ្ឋ និងជនខិលខូចមួយចំនួននេះគឺជាការមួលបង្កាច់ អាជ្ញាធរមូលដ្ឋានទាំងស្រុង។ លោកថាទឹកក្នុងប្រឡាយនេះ ពិតជាមានការគ្រប់គ្រងដោយអាជ្ញាធរមែន ប៉ុន្ដែបង់លុយត្រឹម ២០ ម៉ឺនរៀលប៉ុណ្ណោះ សម្រាប់ស្រែ ១ ហិកតា ហើយតម្លៃគ្មានការប្រែប្រួលអ្វីទេពោលគឺចាប់តាំងពីឆ្នាំ ២០១៤ មកម្ល៉េះ។
លោកមេឃុំបញ្ជាក់ថា៖ «រឿងហ្នឹងមានឧកញ៉ា ប៉ែន នួន នៅពីក្រោយខ្នងចាំញុះញង់ឲ្យពលរដ្ឋតវ៉ាជាមួយអាជ្ញាធរឃុំ ព្រោះឧកញ៉ាហ្នឹងក៏ចង់បានដីប្រឡាយទាំង ៣ ខ្សែហ្នឹងដែរ។ គាត់ឲ្យខ្ញុំស៊ីញ៉េកាត់ដីប្រឡាយឲ្យគាត់ គាត់យកទៅគ្រប់គ្រងដើម្បីងាយស្រួល គាត់បង្កើតក្រុមហ៊ុននៅក្នុងឃុំខ្ញុំហ្នឹង ហើយប្រើប្រាស់ទឹកប្រឡាយហ្នឹង។ អ៊ីចឹងបានជាគាត់តែងតែមកញុះញង់ឲ្យពលរដ្ឋស្អប់អាជ្ញាធរ។ ពលរដ្ឋភាគច្រើននៅក្នុងឃុំគ្មានអ្នកតវ៉ាទេ គឺគាត់ពេញចិត្តតម្លៃ ២០ ម៉ឺនរៀលហ្នឹងគឺមានតែបក្ខពួកឧកញ៉ាប៉ុន្មាននាក់ទេដែលនាំគ្នាតវ៉ាហ្នឹង»។
លោក សេង ធា អភិបាលស្រុកពាមជរបញ្ជាក់ដែរថា ទំនាស់ផលប្រយោជន៍ទឹកប្រឡាយនេះភាគីទាំងសងខាងបានដាក់ពាក្យបណ្ដឹងទៅតុលាការ និងរដ្ឋបាលខេត្តព្រៃវែងជួយដោះស្រាយ។ ប៉ុន្ដែលោកមិនទាន់ទទួលដំណឹងអ្វីពីដំណោះស្រាយទេ។
លោកបានបន្ថែមថា លោកក៏ធ្លាប់បានចុះទៅសម្របសម្រួលជាច្រើនលើកហើយដែរ ប៉ុន្ដែភាគីទាំង ២ មិនយល់ព្រមតាមដំណោះស្រាយលោកទេ។
លោកថ្លែងថា៖ «នៅពេលដល់ដៃតុលាការ វាផុតដៃខ្ញុំហើយ។ ខ្ញុំមិនអាចដោះស្រាយបានទេ លុះត្រាតែមានបញ្ជាអ្វីពីតុលាការ។ ប៉ុន្ដែបើគ្មានការសម្រេចណាមួយពីតុលាការគឺខ្ញុំបានត្រឹមការពារសន្ដិសុខ កុំឲ្យភាគីទាំង ២ បង្កហិង្សាដាក់គ្នា ហើយខ្ញុំចង់ឲ្យភាគីទាំង ២ សម្របសម្រួលគ្នា»។
អភិបាលខេត្តព្រៃវែងលោក ជា សុមេធី ពីម្សិលមិញមិនទាន់អាចទាក់ទងសុំការបញ្ជាក់ជុំវិញករណីនេះបានទេ ដោយទូរស័ព្ទលោកគ្មានអ្នកទទួល។
លោកឧកញ៉ា ប៉ែន នួន ដែលជាអគ្គនាយកក្រុមហ៊ុន ស៊ី ខេ អេ (CKA) ផងនោះថ្លែងថាកាលពីឆ្នាំ ២០១៤ លោកបានបើកការដ្ឋានកាយដីប្រឡាយចំនួន ៣ ខ្សែតាមការស្នើសុំរបស់លោកមេភូមិ និងមេឃុំ។ ប្រឡាយនីមួយៗមានប្រវែងចន្លោះពី ៤ ទៅ ៦ គីឡូម៉ែត្រ ដើម្បីបម្រើផលប្រយោជន៍រួមឲ្យពលរដ្ឋក្នុងឃុំឫស្សីស្រុក។
លោកឧកញ៉ាបានបន្តថា បន្ទាប់ពីប្រឡាយនេះត្រូវបានសាងសង់រួច អាជ្ញាធរមូលដ្ឋានបានតម្រូវឲ្យប្រជាពលរដ្ឋបង់លុយ ប្រសិនបើមានអ្នកចង់បូមទឹកពីក្នុងប្រឡាយដាក់ស្រែ ឬដំណាំរបស់ខ្លួនដែលនៅក្បែរប្រឡាយទាំង ៣ ខ្សែនោះដោយក្នុង ១ ហិកតាត្រូវបង់លុយ ៤៥ ម៉ឺនរៀល ឬស្រូវចំនួន ១៨០ គីឡូក្រាម។ បន្ទាប់មកប្រជាពលរដ្ឋធ្វើស្រូវលែងបានផលល្អ គ្មានលុយបង់ឲ្យអាជ្ញាធរ ពួកគាត់បានមកប្ដឹងលោកឲ្យជួយដោះស្រាយ។
លោកឧកញ៉ា ប៉ែន នួន បានបញ្ជាក់ថា៖ «ខ្ញុំគ្មានបំណងអាក្រក់ដូចមេឃុំនិយាយបង្ខូចកិត្តិយសខ្ញុំទេ គឺខ្ញុំគ្រាន់តែចង់ឲ្យអាជ្ញាធរឈប់យកលុយពីប្រជាពលរដ្ឋដែលបានបូមទឹកប្រឡាយនេះ។ ព្រោះបើនៅតែបន្តយកលុយពីពួកគាត់ទៀត គាត់គ្មានលុយបង់ឲ្យទេ។ មួយរយៈចុងក្រោយនេះផលដំណាំស្រូវពួកគាត់ក៏មិនសូវបានល្អ លក់បានតម្លៃថោក និងគាត់ត្រូវការទូទាត់ថ្លៃចំណាយផ្សេងៗទៀត។ អ៊ីចឹងពួកគាត់ពិតជាជួបការលំបាកហើយ»៕