.jpg)
ពលរដ្ឋរាប់រយនាក់តំណាងឲ្យពលរដ្ឋប្រមាណ ២ ០០០ គ្រួសារ ពីម្សិលមិញបានប្រមូលផ្ដុំគ្នាជាថ្មីចូលរួមតវ៉ាលើកទី ២ នៅមុខសាលាដំបូងខេត្តសៀមរាប។ រូបថត ហ្វេសប៊ុក
សៀមរាបៈ ពលរដ្ឋរាប់រយនាក់តំណាងឲ្យពលរដ្ឋប្រមាណ ២ ០០០ គ្រួសារពីម្សិលមិញបានប្រមូលផ្ដុំគ្នាជាថ្មីទៀតនៅមុខសាលាដំបូងខេត្តសៀមរាប ដើម្បីសុំឲ្យដោះលែងជនសង្ស័យជាប្រធានក្រុមហ៊ុន Enarita ឲ្យចេញមកទទួលខុសត្រូវលើសំណង ពួកគេដែលបានដាក់លុយវិនិយោគជាមួយក្រុមហ៊ុននេះ ប៉ុន្តែតុលាការអះអាងថានឹងបើកសវនាការលើសំណុំរឿងនេះនៅចុងខែក្រោយ។
នេះជាការតវ៉ាលើកទី ២ ហើយ បន្ទាប់ពីលោក ឌីម សួនណាត អគ្គនាយកក្រុមហ៊ុន Enarita បានចុះហត្ថលេខាលើលិខិត ១ ច្បាប់កាលពីថ្ងៃទី ១៥ ខែមីនា ខណៈលោកកំពុងស្ថិតក្រោមការចាប់ និងឃុំខ្លួន។ ក្នុងលិខិតនោះលោកអះអាងថា លោកនឹងធ្វើការទូទាត់សងទៅតាមទំហំទឹកប្រាក់ដើមរបស់ពលរដ្ឋរហូតដល់គ្រប់ចំនួនក្នុងករណីដែលរូបលោកមានសេរីភាព ហើយបានចេញពីការឃុំខ្លួន។
អ្នកស្រី បរមី ពលរដ្ឋចូលរួមតវ៉ាលើកទី ២ ជាមួយពលរដ្ឋដទៃទៀតប្រាប់ភ្នំពេញប៉ុស្តិ៍ពីម្សិលមិញថា កាលពីពាក់កណ្តាលខែមីនាកន្លងទៅ ពលរដ្ឋធ្លាប់បានតវ៉ាម្តងរួចមកហើយ ដើម្បីឲ្យដោះលែងប្រធានក្រុមហ៊ុននេះ ដើម្បីបានទូទាត់សំណងដល់ពលរដ្ឋ។
អ្នកស្រីបន្តថា ការតវ៉ាជាលើកទី ២ ព្រោះលោក ឌីម សួនណាត បានជាប់ក្នុងមន្ទីរឃុំឃាំងអស់រយៈពេលជាង ៩ ខែមកហើយ ដោយគ្មានការកាត់ទោស បើទោះជាពលរដ្ឋប្រមាណ ២ ០០០ គ្រួសារបានយល់ព្រមទទួលយកដំណោះស្រាយដែលអគ្គនាយករូបនេះបានអះអាងថា នឹងសងលុយដល់ពួកគាត់វិញ នៅពេលមានសេរីភាពក៏ដោយ។
អ្នកស្រីនិយាយថា៖ «យើងសុំឲ្យគាត់ (តុលាការ) ដោះលែងលោក ឌឹម សួនណាត ព្រោះឃុំខ្លួនមនុស្សលើសពីនីតិវិធីច្បាប់ហើយ ដោយអត់មានធ្វើការអ្វីទាំងអស់។ ខ្ញុំមិនដឹងថា ហេតុអ្វីរឿងនេះពិបាកម៉្លេះ អត់មានមេធាវីការពារក្តីគាត់ អត់មានអ្នកណាហ៊ានលូកតែម្តង»។
លោក សុភ័ក្ត្រ ពលរដ្ឋម្នាក់ទៀតដែលចូលរួមការតវ៉ាដែរនោះលើកឡើងថា ប្រជាពលរដ្ឋដែលបានដាក់លុយវិនិយោគជាមួយក្រុមហ៊ុនប្រមាណរាប់ពាន់គ្រួសារកំពុងមានការលំបាកយ៉ាងខ្លាំង ព្រោះគ្មានលុយបង់ធនាគារ គ្មានលុយបង់ការប្រាក់ឯកជន។ ព្រោះប្រធានក្រុមហ៊ុននេះត្រូវបានជាប់ឃុំឃាំងដោយមិនអាចចេញមុខមកដោះស្រាយ សំណងដល់ពួកខ្លួនបាន។
លោកបញ្ជាក់ថា៖ «សុំអង្វរដល់សម្តេចពុក សម្តេចម៉ែ ក្នុងការទាមទាររកយុត្តិធម៌ពីក្រុមគ្រួសារ អ៊ីណារីតា ចំនួន ២០០០ គ្រួសារ។ ខ្ញុំមានចម្ងល់ដូចអ្នកមកទាំងអស់គ្នាថា ជំពាក់លុយសងលុយ ហើយគិតយូរម្ល៉េះ ពេលបងប្អូនលើកសំណើ (ទទួលយកលក្ខខណ្ឌពីម្ចាស់ក្រុមហ៊ុន) ម៉េចមិនព្រមដោះស្រាយ ហើយថាគេឆបោកអី បើគេព្រមសងទៅហើយហ្នឹង»។
លោក ថេង សំណាង ព្រះរាជអាជ្ញារងខេត្តសៀមរាបពីម្សិលមិញបានអះអាងនៅចំពោះមុខប្រជាពលរដ្ឋដែលតវ៉ានៅតុលាការថា សំណុំរឿងនេះតុលាការនឹងបើកសវនាការកាត់ក្តីនៅទី ២៧ ខែឧសភា ខាងមុខ។ លោកក៏ស្នើឲ្យពលរដ្ឋទាំងអស់រក្សាភាពស្ងៀមស្ងាត់សិន ដើម្បីរង់ចាំលទ្ធផលពីតុលាការ។
លោកបានបញ្ជាក់ថា៖ «សំណុំរឿងនេះ តុលាការមិនទុកចោលទេ។ បងប្អូនដឹងទេថា សំណុំរឿងនេះស្មុគស្មាញប៉ុនណា។ តុលាការបានរៀបចំដំណើរការនីតិវិធី ហើយនឹងជូនដំណឹងកោះហៅបងប្អូនសាច់ញាតិចូលពេលបើកសវនាការ។ ខ្ញុំមកនេះគឺបកស្រាយពីដំណោះស្រាយ»។
លោក ឌីម សួនណាត អាយុ ៣៦ ឆ្នាំរស់នៅភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខគឺជាអគ្គនាយកក្រុមហ៊ុន Enarita Development Co.Ltd។ ក្រុមហ៊ុននេះមានបុត្រសម្ព័ន្ធចំនួន ៧ ទូទាំងប្រទេស និងវិនិយោគលើវិស័យជាច្រើន ដូចជា វិនិយោគលើដីលើហាងកាហ្វេ វិនិយោគលើទឹកសុទ្ធ និងក្នុងវិស័យអប់រំជាដើម។ ក្រុមហ៊ុនមានសាខាធំនៅរាជធានីភ្នំពេញ និងខេត្តសៀមរាប និងតាមបណ្តាខេត្តមានប្រធានផ្នែកទីផ្សារគ្រប់គ្រងបន្ត។
លោក ឌីម សួនណាត ត្រូវបានសាលាដំបូងខេត្តសៀមរាបសម្រេចឃាត់ខ្លួន និងចោទប្រកាន់ចំនួន ២ ករណីគឺក្នុងសំណុំរឿង បទឆបោក និងបទចេញមូលប្បទានបត្រក្លែងក្លាយកាលពីអំឡុងខែកក្កដាឆ្នាំ ២០១៩ បន្ទាប់ពីមានពាក្យបណ្តឹងពីប្រជាពលរដ្ឋមួយចំនួនបានប្តឹងម្ចាស់ក្រុមហ៊ុននេះថា បានឆបោកពួកគេដែលមានទឹកប្រាក់រាប់លានដុល្លារតាមរយៈការដាក់ទុនវិនិយោគ។
ភ្នំពេញប៉ុស្តិ៍នៅមិនអាចស្វែងរកប្រភព ដើម្បីទាក់ទងដើមបណ្តឹងដែលបានដាក់ពាក្យប្តឹងម្ចាស់ក្រុមហ៊ុននេះបាននោះទេពីម្សិលមិញ ខណៈដែលតុលាការក៏បដិសេធផ្តល់ប្រភពទាក់ទង៕
