.jpg)
ពលរដ្ឋជាង ១០០ គ្រួសារ ទាមទារឱ្យអាជ្ញាធរថែរក្សាដីព្រៃលិចទឹក ៦៣ ហិកតា ទុកជាសម្បត្តិរដ្ឋ និងឱ្យវែកមុខអ្នកជួលគេឱ្យកាប់ទន្ទ្រាន នៅសាលាស្រុកស្រែអំបិលកាលពីព្រឹកមិញ។ រូបថត សហការី
កោះកុង៖ ពលរដ្ឋជាង ១០០ គ្រួសារ រស់នៅភូមិជ្រោយស្វាយខាងលិច និងភូមិជ្រោយស្វាយខាងកើត ក្នុងឃុំជ្រោយស្វាយ ស្រុកស្រែអំបិល នៅព្រឹកថ្ងៃទី ១១ ខែឧសភានេះ បាននាំគ្នាទៅតវ៉ានៅសាលាស្រុកស្រែអំបិល ដើម្បីឱ្យអាជ្ញាធររក្សាផ្ទៃដីព្រៃលិចទឹកទំហំ ៦៣ ហិកតា ទុកជាសម្បត្តិសាធារណៈរបស់រដ្ឋ និងទាមទារឱ្យស្វែងរកជនដែលកាប់បំផ្លាញព្រៃលិចទឹកមកផ្ដន្ទាទោសតាមច្បាប់។
តំណាងពលរដ្ឋក្នុងសហគមន៍ម្នាក់ក្នុងលក្ខខណ្ឌសុំមិនបញ្ចេញឈ្មោះបានប្រាប់ ភ្នំពេញ ប៉ុស្ដិ៍ថា ពលរដ្ឋទាំងជាង ១០០ គ្រួសារនោះ បានបន្តទាមទារឱ្យអាជ្ញាធរចេញមុខបកស្រាយចំពោះករណីមានជនមិនស្គាល់អត្តសញ្ញាណជួលពលរដ្ឋឱ្យចូលទៅកាប់បំផ្លាញព្រៃលិចទឹករបស់សហគមន៍អស់ជាង ១៣ ហិកតា នៃផ្ទៃលិចទឹក ៦៣ ហិកតានោះ ដែលព្រៃលិចទឹកនេះ គឺជាប្រភពផ្ដល់ជីវចម្រុះដល់ប្រជានេសាទ និងពលរដ្ឋជាច្រើនឆ្នាំមកហើយ។
ប្រភពដដែលនេះបានឱ្យដឹងថា ក្រោយពីមានជនខិលខូចជួលពលរដ្ឋមួយចំនួនឱ្យទៅកាប់បំផ្លាញព្រៃលិចទឹកមក គឺមានពលរដ្ឋក្នុងឃុំជ្រោយស្វាយបានតវ៉ាជាច្រើនលើកនៅក្នុងភូមិ និងឃុំ ប៉ុន្តែមន្រ្ដីមូលដ្ឋានទាំងនេះគ្មានការបកស្រាយអ្វីមកពលរដ្ឋឡើយ។ ហេតុដូច្នេះហើយទើបនៅព្រឹកថ្ងៃទី ១១ ខែឧសភានេះ ពលរដ្ឋទាំង ២ ភូមិ ជាង ១០០ គ្រួសារ បានសម្រេចនាំគ្នាឡើងទៅតវ៉ាដល់សាលាស្រុកតែម្ដង។
តំណាងសហគមន៍រូបនេះបញ្ជាក់ថា៖ «ពលរដ្ឋបន្តទាមទារឱ្យរក្សាដី ៦៣ ហិកតា ដែលជាព្រៃលិចទឹកទុកជាសម្បត្តិសាធារណៈរបស់រដ្ឋរហូតតទៅសម្រាប់សហគមន៍រកផលនេសាទ។ ទាមទារឱ្យមានការឆ្លើយតបពីខាងជំនាញ និងអ្នកពាក់ព័ន្ធឱ្យពលរដ្ឋបានយល់ និងស្វែងរកអ្នកកាប់បំផ្លាញព្រៃលិចទឹកមកផ្ដន្ទាទោសទៅតាមច្បាប់»។
លោក ជា ច័ន្ទកញ្ញា អភិបាលស្រុកស្រែអំបិលបានឱ្យដឹងនៅថ្ងៃនេះថា លោកបានជួបពលរដ្ឋ និងបានពន្យល់អំពីការដោះស្រាយលើបញ្ហានេះហើយ ដោយរដ្ឋបាលស្រុកនឹងចុះទៅសិក្សាស្រាវជ្រាវលើបញ្ហានេះឱ្យបានជាក់លាក់។
លោកបានបញ្ជាក់ថា៖ «កន្លងមកយើងអត់បានទទួលព័ត៌មាននេះពីមន្រ្ដីនៅមូលដ្ឋានទេ ដូច្នេះដើម្បីដោះស្រាយរឿងនេះ គឺយើងត្រូវសិក្សារឿងនេះឱ្យបានល្អិតល្អន់ អ៊ីចឹងយើងកំពុងតែសិក្សាការងារនេះ ជាមួយមន្រ្ដីមូលដ្ឋាន»។
លោកអភិបាលស្រុកបានឱ្យដឹងថា បច្ចុប្បន្នរដ្ឋបាលស្រុកនៅមិនទាន់អាចបញ្ជាក់ចំពោះទីតាំងដីព្រៃលិចទឹកនោះថា ជាដីយ៉ាងម៉េចបានទេ គឺត្រូវការពេលវេលាសិក្សាសិន។ ប៉ុន្ដែតាមការទាមទាររបស់ពលរដ្ឋ គឺបញ្ជាក់ថា ដីនោះជាដីព្រៃលិចទឹករបស់សហគមន៍ ដូច្នេះក្រុមការងារនឹងចុះទៅធ្វើការងារនេះ។
លោក ថោង ច័ន្ទតារា មន្រ្ដីសម្របសម្រួលសមាគមសិទ្ធិមនុស្សអាដហុក នៅខេត្តកោះកុងបានថ្លែងថា នៅដើមឆ្នាំ ២០២១ នេះ ខេត្ដកោះកុងមានករណីរំលោភទន្រ្ទានដីរដ្ឋ ដើម្បីយកធ្វើជាកម្មសិទ្ធិកើតឡើងជាច្រើនលើក ហើយករណីនៅឃុំជ្រោយស្វាយនេះ អាចជាករណីឃុបឃិតគ្នា ដើម្បីយកដីរដ្ឋធ្វើជាកម្មសិទ្ធិផ្ទាល់ខ្លួន។
លោកថា៖ «បើដីនេះជាដីរបស់រដ្ឋ ហើយអាជ្ញាធរឃុបឃិតគ្នាធ្វើឯកសារស្របច្បាប់ទៅឱ្យបុគ្គលឯកជននោះ គឺជារឿងខុសច្បាប់ទាំងស្រុង ព្រោះដីជាកម្មសិទ្ធិរបស់រដ្ឋមុននឹងប្រគល់ឱ្យវិស័យឯកជន ឬបុគ្គលកាន់កាប់ គឺត្រូវមានការធ្វើអនុប្រយោគពីរាជរដ្ឋាភិបាលទើបអាចយកដីនោះប្រើប្រាស់បាន»។
បើតាមតំណាងពលរដ្ឋក្នុងសហគមន៍ផ្ទៃដីទំហំ ៦៣ ហិកតានោះ គឺជាដីព្រៃកោងកាង និងជាជម្រកពពួកពូជជីវៈចម្រុះមានក្តាមខ្យង បន្លែព្រៃជាច្រើនមុខសម្រាប់លើកស្ទួយជីវភាពពលរដ្ឋតាមរយៈការអាស្រ័យផលជាប្រចាំច្រើនជំនាន់មកហើយ។ ប៉ុន្ដែផ្ទៃដីព្រៃសហគមន៍នេះ ត្រូវបានជនខិលខូចជួលពលរដ្ឋទៅកាប់ទន្រ្ទាន បណ្ដាលឱ្យរងការខូចខាតជាង ១៣ ហិកតា នៅដើមឆ្នាំ ២០២១ ថ្មីៗនេះ។
តំណាងសហគមន៍រូបនេះឱ្យដឹងថា ផ្ទៃដីទំហំ ៦៣ ហិកតានេះ កាលពីឆ្នាំ ២០១៤ រដ្ឋាភិបាលបានដកហូតសិទ្ធិកាន់កាប់អភិវឌ្ឍពីក្រុមហ៊ុន ច័ន្ទ រតន៍ គ្រុប ឱ្យមកស្ថិតក្រោមការគ្រប់គ្រងរបស់ក្រសួងបរិស្ថាន។ ការដកហូតមកនេះ គឺរាជរដ្ឋាភិបាលទុកប្រយោជន៍ដល់ប្រជាសហគមន៍ក្នុងឃុំជ្រោយស្វាយ ដើម្បីបានប្រើប្រាស់អាស្រ័យផលវិញ៕
វីដេអូ៖
