.jpg)
តំបន់ទំនប់រក្សាទឹកក្នុងខេត្តព្រះវិហារដែលអាជ្ញាធរគ្រោងសង់ទំនប់ទប់ទឹក។ រូបថត សហការី
ព្រះវិហារៈ ពលរដ្ឋប្រមាណជាង ១០០ គ្រួសារ កំពុងធ្វើការទាមទារសំណងពីអាជ្ញាធរ ក្រោយពីការសាងសង់ទំនប់រក្សាដែលជាគម្រោងរបស់រាជរដ្ឋាភិបាលធ្វើសម្រាប់ទប់ទឹកដែលមានទំហំ ៣ ៤០០ ម៉ែត្រស្ថិតនៅក្នុងស្រុកជ័យសែនដែលបានធ្វើឲ្យប៉ះពាល់លើដីស្រែ និងដីលំនៅឋានរបស់ពួកគេ។
លោក រ៉េត សារុំ ពលរដ្ឋម្នាក់ដែលរងផលប៉ះពាល់ពីគម្រោងដែលមានទីតាំងនៅភូមិសំរោង ឃុំរក្សា ស្រុករវៀង បានប្រាប់ភ្នំពេញប៉ុស្តិ៍ពីម្សិលមិញថា កាលពីខែឧសភាឆ្នាំមុន អាជ្ញាធរបានជូនដំណឹងដល់ពលរដ្ឋអំពីគម្រោងសាងសង់ទំនប់រក្សាទឹកហើយបានបង្ហាញពីសំណងដែលបានធ្វើការវាយតម្លៃ។
ក្នុងសេចក្ដីជូនដំណឹងនោះដែរ អាជ្ញាធរបានតម្រូវឲ្យប្រជាពលរដ្ឋដែលរងផលប៉ះពាល់ផ្អាកធ្វើសកម្មភាពលើទីតាំងរបស់ខ្លួនជាបណ្ដោះអាសន្ន ដើម្បីរងចាំដំណោះស្រាយ។
លោក សារុំ បានឲ្យដឹងថា ដំណោះស្រាយដែលអាជ្ញាធរបានផ្តល់ដល់ពលរដ្ឋដែលរងផលប៉ះពាល់ គឺមាន ៣ ដំណាក់កាល ចំពោះដីដែលប៉ះពាល់នៅមាត់ផ្លូវនឹងទទួលសំណង ២ ម៉ឺនដុល្លារក្នុង ១ ហិកតា ហើយដីដែលប៉ះពាល់ក្រោយៗនឹងទទួលបានសំណង ១ ម៉ឺនដុល្លារក្នុង ១ ហិកតា។ ចំណែកដីដែលប៉ះពាល់ត្រង់ចំណុចបាតទំនប់គឺទទួលបានសំណងត្រឹមតែ ៧០០ ដុល្លារ ក្នុង ១ ហិកតា។
លោក សារុំ បានថ្លែងថា៖ «ឲ្យមួយហិកតាត្រឹម ៧០០ ដុល្លារ ពួកយើងម៉េចព្រម យើងចង់បានស្មើគ្នា ឬទៅតាមតម្លៃទីផ្សារទៅ។ ម្យ៉ាងមិនទាន់បានធ្វើអីទេ ១ ឆ្នាំហើយ ហាមយើងមិនឲ្យធ្វើស្រែ ហើយគ្នាបានអីហូប បើមិនបានធ្វើអីនោះ។ ពលរដ្ឋច្រើនគ្រួសារ អត់បាយហូប ទៅស៊ីឈ្នួលគេរាល់ថ្ងៃ បើមិនទាន់ធ្វើអី និងផ្តល់សំណងអីសមរម្យដល់ពួកយើង គួរតែឲ្យពួកយើងធ្វើស្រែចិញ្ចឹមជីវិតសិនទៅ»។
លោក សារុំ បានអះអាងថាប្រជាពលរដ្ឋទាំងអស់មិនអាចទទួលយកបានទេចំពោះសំណងចុងក្រោយដែលផ្តល់ឲ្យពលរដ្ឋ ព្រោះមិនសមស្របនឹងទីផ្សានោះទេម្យ៉ាងទៀតពលរដ្ឋក៏កំពុងប្រឈមនឹងបញ្ហាជីវភាពផងដែរ ព្រោះមិនអាចដាំដុះលើដីរបស់ខ្លួនជិត ១ ឆ្នាំមកហើយ។
លោក ឆាង សាវុធ ពលរដ្ឋម្នាក់ទៀតនៅភូមិបរ ឃុំពុទ្រា ស្រុកជ័យសែន បានថ្លែងដោយមិនជំទាស់ទៅនឹងគម្រោងសាងសង់ទំនប់ទឹករក្សានេះនោះទេ ប៉ុន្តែគ្រាន់តែចង់បានសំណងសមរម្យ ដែលពលរដ្ឋម្នាក់ៗអាចទៅទិញដីនៅកន្លែងផ្សេងបាន។
លោក សាវុធ ថ្លែងថា៖ «យើងបានដាក់ញត្តិជូនអភិបាលខេត្តហើយកាលពីចុងខែមុន ប៉ុន្តែមិនទាន់ដឹងដំណោះស្រាយយ៉ាងណាទេ។ ប្រជាជនយើងមិនមានការប្រកែក ឬក៏មិនចង់ឲ្យធ្វើទំនុបនេះនោះទេ គ្រាន់តែសុំសំណងឲ្យបានសមរម្យទេ ព្រោះបើគាត់ឲ្យតម្លៃប៉ុណ្ណឹង សួរថាតើយើង អាចទៅទិញដីឯណាបាន ព្រោះដីសព្វថ្ងៃនេះឡើងថ្លៃណាស់»។
លោក ប្រាក់ សុវណ្ណ អភិបាលខេត្តព្រះវិហារបានប្រាប់ភ្នំពេញប៉ុស្តិ៍ថា លោកបានដាក់ញត្តិរបស់ប្រជាពលរដ្ឋជូនទៅថ្នាក់ដឹកនាំ ដើម្បីធ្វើការពិចារណាហើយ។ ប៉ុន្តែមិនទាន់ដឹងថាមានការសម្រេចយ៉ាងណាចំពោះលទ្ធផលនោះទេ។ បញ្ហានេះអាជ្ញាធរខេត្តនឹងធ្វើការកោះប្រជុំជាមួយប្រជាពលរដ្ឋក្នុងពេលឆាប់ៗក្រោយមានការសម្រេច ព្រោះសំណើនេះហួសដែនសមត្ថកិច្ចខេត្ត។ លោកបន្តថាគម្រោងនេះជារបស់គណៈកម្មការជាតិស្ថិតក្រោមការគ្រប់គ្រងរបស់ក្រសួងសេដ្ឋកិច្ចដែលជាអ្នកធ្វើការដោះស្រាយផលប៉ះពាល់នេះ។ យើងកំពុងរៀបចំប្រជុំក្នុងខេត្តដើម្បីដាក់ជូនទៅខាងគណៈកម្មការដោះស្រាយផលប៉ះពាល់ហ្នឹង។
លោកឲ្យដឹងទៀតថា៖ «ឆាប់ៗហ្នឹង យើងនឹងមានមន្ត្រីដោះស្រាយផលប៉ះពាល់ចុះមកបង្ហាញបងប្អូនប្រជាពលរដ្ឋដែលពួកគាត់មិនចង់បានសំណងទាំងនេះ។ តាមពិតការផ្តល់សំណងនេះគឺខាងក្រសួងសេដ្ឋកិច្ចបានសិក្សាល្អិតល្អន់ណាស់ ព្រោះមានអ្នកជំនាញឯករាជ្យមកធ្វើការវាយតម្លៃដែរ មិនមែនចេះតែរដ្ឋយើងជាអ្នកធ្វើទេ»។
បើតាមការអះអាងរបស់ប្រជាពលរដ្ឋគម្រោងសាងសងអាងទំនប់ទឹករក្សានេះ ជាគម្រោងរបស់រដ្ឋាភិបាលសាងសង់ឡើងដើម្បីទប់ទឹក សម្រាប់ពលរដ្ឋធ្វើកសិកម្មដែលមានផ្ទៃបាតទំនប់ប្រមាណពី ៣០០ ទៅ ៤០០ ម៉ែត្រ និងមានកម្ពស់ ៣ ម៉ែត្រ។ គម្រោងនេះធ្វើឲ្យប៉ះពាល់លើដីស្រែចម្ការ និងផ្ទះរបស់ពលរដ្ឋមួយចំនួនក្នុងស្រុកចំនួន ៣ និងក្រុង ១ គឺ ស្រុកជ័យសែន ស្រុករវៀង ស្រុកគូលែន និងក្រុងព្រះវិហារ។
លោក រ៉េត សារុំ បានឲ្យដឹងថា បច្ចុប្បន្នក្រុមហ៊ុនចិនកំពុងចាប់ផ្ដើមឈូសឆាយសង់ទំនប់នេះនៅផ្នែកខ្លះ ដែលប្រជាពលរដ្ឋព្រមទទួលយកសំណងចំណែកផ្នែកខ្លះក្នុងឃុំចំនួន ៣ គឺឃុំពុទ្រាឃុំរក្សា និងឃុំស្អាងរបស់ស្រុកជ័យសែន និងឃុំរក្សាក្នុងស្រុករវៀងនៅមិនទាន់បានឈូសឆាយនោះទេដោយសារតែប្រជាពលរដ្ឋមិនទាន់យល់ព្រមទទួលសំណង់ និងកំពុងធ្វើការទាមទារសំណងបន្ថែម៕
