កណ្ដាលៈ យ៉ាងហោចណាស់ប្រជាពលរដ្ឋប្រមាណជា ១០០ នាក់ នៅក្នុងភូមិពាមស្ដី ឃុំព្រែកឫស្សី ស្រុកល្វាឯម ខេត្តកណ្តាលបានស្វែងរកសេវាពិនិត្យសុខភាពចាប់តាំងពីថ្ងៃទី ២៦ ក្រោយពីពួកគេសង្ស័យថា មានបញ្ហាឆ្លងជំងឺគ្រុនឈីកដែលកើតឡើងដោយសារសត្វមូសខ្លាញីខាំ។ យោងតាមលោក គួយ ប៊ុនធឿន ប្រធានមន្ទីរសុខាភិបាលខេត្តកណ្តាលបានអះអាងកាលពីម្សិលមិញ។
លោក គួយ ប៊ុនធឿន បានថ្លែងថា ក្រុមការងារសុខាភិបាលចំនួន ១២ នាក់ ត្រូវបានបញ្ជូនទៅប្រចាំការ និងរង់ចាំពិនិត្យព្យាបាលដល់ប្រជាពលរដ្ឋដែលមកស្វែងរកសេវានៅក្នុងភូមិផ្ទាល់តែម្តង ដោយសារតែភូមិនេះស្ថិតនៅឆ្ងាយពីមណ្ឌលសុខភាព និងមានផ្លូវធ្វើដំណើរលំបាកដោយសារទឹកលិច។ ភូមិនេះជាតំបន់ដាច់ស្រយាលជាប់ព្រំប្រទល់ខេត្តព្រៃវែង ហើយអាជ្ញាធរបានសម្រេចរៀបចំឱ្យអ្នកដែលសង្ស័យថាមានជំងឺគ្រុនឈីកឱ្យសម្រាកក្នុងសាលាឆាន់នៅក្នុងវត្ត។ ខណៈស្ថានភាពរីករាលដាលជំងឺគ្រុនឈីកដែលធ្លាប់កើតមាននៅក្នុងស្រុកមួយចំនួនស្ថិតនៅក្រោមការគ្រប់គ្រងនៃវិធានការការពាររបស់ក្រសួងសុខាភិបាល។
លោក ប៊ុនធឿន ថ្លែងថា៖ «ខ្ញុំចង់បញ្ជាក់ថា នេះជាករណីសង្ស័យថា ឈឺ យើងមិនអាចថាឈីកទេ ព្រោះយើងមិនបានយកសំណាកទៅពិនិត្យរោគសញ្ញា»។ «គិតតាំងពីយប់ថ្ងៃសៅរ៍មកមាន ១៤ នាក់ និងព្រឹកថ្ងៃអាទិត្យនេះមានម្នាក់ទៀត យើងបានតម្រូវឱ្យគាត់សម្រាកព្យាបាលជំងឺ ចំណែកអ្នកផ្សេងៗទៀត គាត់គ្រាន់តែសង្ស័យ ហើយខ្លះក៏ធ្លាប់មានអាការចេញកន្ទួលរមាស់ តែបានជាទៅវិញ»។
លោក ស្រី ឱ វណ្ណឌីន ថ្លែងនៅក្នុងសេចក្ដីប្រកាសព័ត៌មានរបស់ក្រសួងសុខាភិបាលកាលពីម្សិលមិញថា ចាប់តាំងពីជំងឺគ្រុនឈីកកើតមាននៅក្នុងតំបន់មួយចំនួនស្ទើរតែ គ្រប់ខេត្តកាលពីខែសីហា ឆ្នាំ ២០២០ មានករណីសង្ស័យជំងឺគ្រុនឈីកសរុបចំនួន ៥ ៩៩៨ នាក់ ខណៈជំងឺគ្រុនឈីក នៅតែបន្តរាលដាលក្នុងតំបន់មួយចំនួន ចំណែកតំបន់មួយចំនួនដែលធ្លាប់ផ្ទុះជំងឺនេះស្ថិតក្នុងភាពស្ងប់ស្ងាត់អាចគ្រប់គ្រងបាន។
ក្នុងនោះអ្នកជំងឺប្រមាណជា ៩៦ ភាគរយ ក្នុងចំណោមអ្នកជំងឺសរុបទាំងអស់បានជាសះស្បើយហើយ នៅសល់ប្រមាណ ៤ ភាគរយ កំពុងបន្តការព្យាបាលនៅមន្ទីរពេទ្យរដ្ឋ។ រោគសញ្ញាគឺកើតមានឡើងក្នុងរង្វង់ ២ ទៅ ៣ ថ្ងៃ ក្រោយពីមូសខ្លាញីខាំបុគ្គលណាមួយដោយមានអាការ ក្ដៅខ្លួនលើសពី ៣៨ អង្សាសេ ឈឺក្បាល ឈឺខ្លួនប្រាណ សន្លាក់ដៃជើង និងមានចេញកន្ទួលក្រហមនៅលើដងខ្លួន ជាពិសេសតាមចំហៀងខ្លួន៕