.jpg)
អាជ្ញាធរជួយសង្គ្រោះប្រជាពលរដ្ឋនៅខេត្តស្ទឹងត្រែងដែលរងគ្រោះពីទឹកជំនន់នៃការបាក់ទំនប់វារីអគ្គិសនីនៅឡាវពីម្សិលមិញ។ ក្រសួងធនធានទឹក
ស្ទឹងត្រែងៈ អាជ្ញាធរខេត្តស្ទឹងត្រែងកំពុងបន្តជម្លៀសពលរដ្ឋនៅតាមតំបន់ទំនាបនៃដងទន្លេសេកុងក្នុងស្រុកសៀមប៉ាងដែលប្រឈមនឹងទឹកជំនន់ពីឡាវទៅកាន់ទីទួលសុវត្ថិភាព ខណៈមកទល់ពេលនេះមានពលរដ្ឋជាង ១២០០ គ្រួសារហើយត្រូវបានទៅដល់ទីទួលសុវត្ថិភាព។ នេះបើតាមលោក ម៉ែន គុង អ្នកនាំពាក្យសាលាខេត្ដស្ទឹងត្រែងកាលពីរសៀលម្សិលមិញ។
លោកបានថ្លែងថាទឹកជំនន់ដែលហូរចេញពីការបាក់ទំនប់Se-Pian Se Nam Noi ក្នុងខេត្ត Attapeu ប្រទេសឡាវ មកទល់ល្ងាចថ្ងៃទី ២៥ កក្កដា នៅតែបន្ដឡើងដល់កម្រិត ១១,៤០ ម៉ែត្រខណៈកម្រិតប្រកាសអាសន្នមាន ១២ ម៉ែត្រ។
លោក គុង បានបញ្ជាក់ថា៖ «កម្ពស់ទឹកនៅតែបន្ដកើនឡើងដល់កម្ពស់ ១១,៤០ ម៉ែត្រ ហើយត្រឹមម៉ោង ៥ ល្ងាចថ្ងៃទី ២៥ នេះ! តែស្រុកសៀមប៉ាង ១ ទេដែលជន់លិចខ្លាំងជាងគេក្នុងនោះមាន ៤ ឃុំ និង ១៧ ភូមិ»។
បើតាមលោក ម៉ែន គុង អាជ្ញាធរខេត្តស្ទឹងត្រែងបានសហការគ្នាពីគ្រប់កងកម្លាំងក្នុងការចូលរួមជម្លៀសពលរដ្ឋពីទឹកជំនន់នេះ។
លោកបានបញ្ជាក់ថា៖ «យើងមានមធ្យោបាយសរុបដែលគ្រប់មន្ទីរ អង្គភាព កម្លាំងសមត្ថកិច្ច និងកម្លាំងយុវជនសរុបជាង ៧០០ នាក់រួមនឹងរថយន្ដយោធាជាច្រើនទៀតក្នុងការប្រើប្រាស់ជួយជម្លៀសពលរដ្ឋនេះ»។
លោកបានបន្ដទៀតថា ជាមួយគ្នានេះអាជ្ញាធរខេត្តក៏បាននាំយកស្បៀងអាហារ មានអង្ករ ត្រីខ មី ទឹកសុទ្ធ នំចំណី ដែលទទួលបានពីកាកបាទក្រហម មន្ទីរគ្រប់គ្រងគ្រោះមហន្ដរាយ និងក្រុមសប្បុរសជនមួយចំនួនទៅផ្ដល់ជូនដល់ពលរដ្ឋដែលរងគ្រោះផងដែរ។ ប៉ុន្តែលោកបានបញ្ជាក់បន្ថែមថា៖ «មកដល់ល្ងាចថ្ងៃទី ២៥ កក្កដា នេះមិនមានពលរដ្ឋរងគ្រោះថ្នាក់ដោយសារទឹកជំនន់នេះទេ»។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្ដរាយបានឲ្យដឹងដែរថា ទឹកគឺបានលិចតែក្នុងស្រុកសៀមប៉ាងមួយទេ ហើយនៅមិនទាន់ឡើងដល់កម្រិតប្រកាសអាសន្នឡើយ។
សមត្ថកិច្ចនៅស្ទឹងត្រែងក្នុងពេលជួយជម្លៀសពលរដ្ឋពីទឹកជំនន់កាលពីម្សិលមិញ។ រូបថត ក្រសួងធនធានទឹក
លោកថា៖ «ទឹកទើបឡើងដល់ ១,៣០ ម៉ែត្រទេ ទាល់តែឡើងដល់ ១,៥០ ម៉ែត្រទើបដល់កម្រិតប្រុងប្រយ័ត្ន»។
លោក វី បានបន្តថាអាជ្ញាធរខេត្ដបានបង្កើតក្រុមប្រចាំការសម្រាប់ចុះអន្ដរាគមន៍តាំងពីយប់ថ្ងៃទី ២៤ មកម្ល៉េះក្នុងការចុះជួយពលរដ្ឋនៅតំបន់ដែលរងគ្រោះចៀសវាងករណីកើតឡើងផ្សេងទៀត។
អភិបាលខេត្តស្ទឹងត្រែងលោក ម៉ុម សារឿន នៅថ្ងៃម្សិលមិញបាននិងកំពុងបន្តដឹកនាំក្រុមការងារនៅមូលដ្ឋានក្នុងស្រុកសៀមប៉ាងផ្ទាល់ ដើម្បីតាមដានសភាពការណ៍ទឹកជំនន់ដែលកំពុងកើនឡើងជាលំដាប់ដោយសារការហូរចូលទឹកជំនន់ពីការបាក់ទំនប់វារីអគ្គិសនីខាងលើ។
យ៉ាងណាក្ដីក្រសួងធនធានទឹក និងឧតុនិយមទើបបានបញ្ជាក់កាលពីម៉ោងប្រមាណ ៦ ល្ងាចម្សិលមិញថា ទឹកទន្លេសេកុងក្នុងខេត្តស្ទឹងត្រែងបានហក់ឡើងដល់កម្ពស់កម្រិតត្រូវប្រកាសអាសន្នហើយ។
ដោយឡែកនៅថ្ងៃម្សិលមិញនេះដែរលោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានប្រាប់ឲ្យប្រធានមន្ទីរសុខាភិបាលខេត្តបានចុះចែកមុងជ្រលក់ថ្នាំ និងចាក់វ៉ាក់សាំងការពារជំងឺឆ្លងផ្សេងៗ ពិសេសជំងឺគ្រុនចាញ់ជូនដល់កុមារ និងស្ត្រីមានផ្ទៃពោះដែលងាយរងគ្រោះពីទឹកជំនន់នេះ។ នេះបើតាមក្រសួងសុខាភិបាល។
បើតាមក្រសួងនេះបញ្ជាក់បន្ថែមថា ដើម្បីការពារការខ្វះខាតមុងជ្រលក់ថ្នាំ ពេលនេះក្រសួងសុខាភិបាលបាននិងកំពុងបញ្ជូនមុងចំនួន ៤០០០ ថែមទៀតដើម្បីទៅចែកជូនដល់ពលរដ្ឋដែលប្រឈមនឹងបញ្ហាជំងឺផ្សេងៗនៅខេត្តស្ទឹងត្រែង។
ទន្ទឹមនឹងនេះលោក ម៉ម ប៊ុនហេង ក៏បានអំពាវនាវដល់បងប្អូនការពារសុខភាពតាមរយៈការហូបទឹកស្អាត និងកុំឲ្យកូនតូចៗលេងទឹកដោយធ្វេសប្រហែសឱ្យសោះ ព្រោះអាចមានគ្រោះថ្នាក់ជាយថាហេតុ។
តាមព័ត៌មានចុងក្រោយពីមន្ដ្រីរដ្ឋាភិបាលឡាវបានឲ្យដឹងថា អាជ្ញាធរឡាវទើបរកឃើញសាកសពបន្ថែមចំនួន ២៦ នាក់ ខណៈរាប់រយនាក់ទៀតបន្ដបាត់ខ្លួនក្នុងគ្រោះទឹកជំនន់ពីការបាក់ទំនប់នេះ។
ប៉ុន្តែបើតាមការចេញផ្សាយពី BBC នៅព្រឹកថ្ងៃម្សិលមិញថា ក្រុមអ្នកជួយសង្គ្រោះឡាវកំពុងបង្កើនកិច្ចខិតខំប្រឹងប្រែងស្វែងរកអ្នកនៅរស់រានមានជីវិតបន្ទាប់ពីទំនប់វារីអគ្គិសនី Se-Pian Se Nam Noi បានបាក់កាលពីថ្ងៃចន្ទដោយបង្កជាគ្រោះទឹកជំនន់នៅតាមភូមិជាច្រើន និងបានផ្ដាច់យកជីវិតមនុស្សជាង ២០ នាក់៕
