.jpg)
ពលរដ្ឋដែលបានបោះបង់មុខរបរពឹងអាស្រ័យលើការកាប់ឈើ និងបរបាញ់សត្វព្រៃមកធ្វើកសិកម្ម ដើរមើលដំណាំសណ្តែកកួររបស់គាត់ កាលពីសប្ដាហ៍មុន។ ហេង ជីវ័ន
កោះកុងៈ ពលរដ្ឋជាង ២០០ គ្រួសារ នៅសហគមន៍ភូមិសុវណ្ណាបៃតងក្នុងខេត្តកោះកុងដែលត្រូវបានបង្កើតឡើងដោយអង្គការសម្ព័ន្ធមិត្តសត្វព្រៃ (wildlife alliance) កាលពីជាង ១០ ឆ្នាំមុន បច្ចុប្បន្នកំពុងផ្ដោតលើមុខរបរថ្មីនៃការធ្វើកសិកម្ម ដាំដំណាំផ្សេងៗក្រោយពីបានបោះបង់មុខរបរពឹងអាស្រ័យលើការកាប់ឈើ និងបរបាញ់សត្វព្រៃ។
លោក នេត្រ ភក្ដ្រា អ្នកនាំពាក្យក្រសួងបរិស្ថានថ្លែងថា ដំបូងឡើយប្រជាពលរដ្ឋជាង ២០០ គ្រួសារនេះ គឺរស់នៅក្នុងតំបន់ព្រៃភ្នំ ដូចជា តំបន់ការពារសត្វព្រៃ និងព្រៃឈើនៅតាមបណ្ដោយដងព្រែកស្ទឹងព្រាត់ និងតំបន់ជីផាត់ ហើយក្រោយមកត្រូវផ្លាស់ទីមករស់នៅក្នុងសហគមន៍ភូមិសុវណ្ណបៃតង ឃុំកណ្ដោល ស្រុកបទុមសាគរកាលពីឆ្នាំ ២០០៤ ស្ថិតក្រោមគម្រោងអភិវឌ្ឍន៍កសិកម្មរបស់អង្គការសម្ព័ន្ធមិត្តសត្វព្រៃ។
លោកបន្តថា ពលរដ្ឋនៅក្នុងសហគមន៍នេះគឺទទួលបានដីសម្បទានសង្គមកិច្ចគឺក្នុង ១ គ្រួសារបានដីទទឹង ២៥ ម៉ែត្រ និងបណ្ដោយ ៦០០ ម៉ែត្រ ដើម្បីធ្វើដីភូមិ ដីចម្ការ និងដីសម្រាប់ដំណាំហូបផ្លែផ្សេងៗដើម្បីកាត់ផ្ដាច់មុខរបររបស់ពួកគាត់ពីមុនមក ដែលធ្លាប់ចូលព្រៃប្រមូលអនុផលព្រៃឈើ កាប់ឈើ និងបរបាញ់សត្វព្រៃ។
លោកថា៖ «នេះគឺជាការអនុវត្តគម្រោងដែលជំរុញឱ្យមានការផ្លាស់ប្ដូរជីវភាព របស់បងប្អូនប្រជាពលរដ្ឋ ហើយដើម្បីឱ្យពួកគាត់មានភាពនឹងនរ ដោយសារទី១ មានដីកម្មសិទ្ធិ ទី២ មានមុខរបរ ទី៣ មានចំណូល និងទី៤ មានសុវត្ថិភាពសម្រាប់ការរស់នៅរបស់ពួកគាត់។
កន្លងទៅ បងប្អូនដែលអញ្ជើញមករស់នៅកន្លែងនេះគឺគាត់រស់នៅជារបៀបមួយដែលតែងធ្វើពីមុនមកគឺការធ្វើស្រែចម្ការ ប៉ុន្តែជាស្រែចម្ការពនេចរគឺទៅកាប់ទន្ទ្រានដីព្រៃដើម្បីដាំស្រូវ ហើយបន្ទាប់មកទៅកាប់ឆ្ការនៅកន្លែងផ្សេង ដែលនេះធ្វើឱ្យប៉ះពាល់ដល់ធនធានធម្មជាតិ និងជីវចម្រុះ សត្វព្រៃផ្សេងៗ»។ ការលើកឡើងរបស់លោក នេត្រ ភក្ដ្រា នេះគឺធ្វើឡើងនៅពេលលោកបានដឹកនាំក្រុមអ្នកសារព័ត៌មានជាង ២០ នាក់ចុះទៅត្រួតពិនិត្យអំពីការការពារធនធានធម្មជាតិនៅក្នុងខេត្តកោះកុងកាលពីចុងសប្ដាហ៍មុន។
ក្រុមមន្ត្រីក្រសួងបរិស្ថានពេលចុះពិនិត្យសហគមន៍សុវណ្ណាបៃតង។ ហេង ជីវ័ន
លោក អាត់ ណុច ប្រធានសហគមន៍អភិវឌ្ឍន៍កសិកម្មសុវណ្ណាបៃតងបានថ្លែងថា គម្រោងអភិវឌ្ឍន៍កសិកម្មរបស់អង្គការសម្ព័ន្ធមិត្តសត្វព្រៃនេះគឺបានធ្វើឱ្យពលរដ្ឋក្នុងសហគមន៍សប្បាយរីករាយយ៉ាងខ្លាំងដោយសារពួកគាត់ទទួលបានដីកាន់កាប់អចិន្រៃ្តយ៍ និងស្របច្បាប់ ហើយទទួលបានការបណ្ដុះបណ្ដាលអំពីបច្ចេកទេសធ្វើកសិកម្ម ដើម្បីដាំដំណាំជាយុទ្ធសាស្ដ្រនៅក្នុងដីឡូត៍នីមួយៗរហូតទទួលបានជោគជ័យ។
លោកបន្តទៀតថា ការមករស់នៅក្នុងសហគមន៍គឺមានភាពងាយស្រួលជាងមុន ដោយសារតែមានសាលារៀន មន្ទីរពេទ្យ និងផ្សារនៅជិតផ្ទះដែលកូនៗអាចមានឱកាសបានរៀនចប់វិទ្យាល័យ ហើយខ្លះរហូតអាចបន្តការសិក្សានៅសាកលវិទ្យាល័យនៅភ្នំពេញថែមទៀត។
លោកថា៖ «ការដាំដំណាំជាយុទ្ធសាស្ដ្រនេះ គឺពួកគាត់ទទួលបានផលគ្រប់មុខដំណាំ ហើយដើម្បីឱ្យសហគមន៍មាននិរន្តរភាពយូរអង្វែង គឺសហគមន៍ក៏ទើបបានបង្កើតចម្ការរួមមួយដែលមានផ្ទៃដី ២០ ហិកតា ដើម្បីដាំដំណាំហូបផ្លែមានចំនួន ៣ មុខក្នុងនោះទុរេន ១ ៦៨៧ ដើម សាវម៉ាវ ៣៥៣ ដើម តាង៉ែន ១ ៤៩៣ ដើម ហើយឥឡូវទទួលបានផលខ្លះហើយ ដើម្បីយកមកប្រើប្រាស់ដោះស្រាយបញ្ហាហេដ្ឋារចនាសម្ព័ន្ធនៅក្នុងសហគមន៍ទាំងមូល ដូចជា ជួសជុលផ្លូវ ម៉ាស៊ីនបូមទឹក អណ្តូងទឹក ត្រាក់ទ័រ និងជួសជុលឡានសម្រាប់ដឹកជញ្ជូនផលដំណាំ។ នៅពេលចម្ការរួមនេះកាន់តែទទួលជោគជ័យ គឺសហគមន៍នឹងជួយទៅដល់ជនចាស់ជរាគ្មានទីពឹង និងក្មេងកំព្រាអត់ទីពឹងដើម្បីឱ្យបានរៀនសូត្រនាពេលខាងមុខ»។
ប្រធានសហគមន៍រូបនេះបន្តថា ពលរដ្ឋទាំងអស់នៅក្នុងភូមិសុវណ្ណាបៃតង នឹងមិនវិលត្រឡប់ទៅរស់នៅតាមរបៀបចាស់ ដែលពឹងផ្អែកលើការកាប់ព្រៃឈើ និងបរបាញ់សត្វព្រៃវិញទៀតឡើយដោយសារពួកគាត់យល់ដឹងច្បាស់អំពីសារៈសំខាន់នៃព្រៃឈើ និងសត្វព្រៃ ព្រោះអាចទាក់ទាញភ្ញៀវទេសចរ និងអាចផ្ដល់ផលប្រយោជន៍សម្រាប់ពួកគាត់បានយូរអង្វែង។
ជាមួយគ្នានេះលោក នេត្រ ភក្ត្រា ក៏ឲ្យដឹងដែរថា ក្នុងរយៈពេលជាង ១០ ឆ្នាំនេះ តំបន់ជីផាត់គឺបានក្លាយជាជម្រកសត្វព្រៃ ដ៏មានសុវត្ថិភាព និងជាតំបន់មានព្រៃឈើគ្របដណ្ដប់ដ៏ស្រស់ស្អាត ដែលកំពុងទាក់ទាញអ្នកទេសចរ។
លោកបន្ថែមថា ការបង្កើតសហគមន៍សុវណ្ណាបៃតងរបស់អង្គការសម្ព័ន្ធមិត្តសត្វព្រៃតាមរយៈការគិតគូរអំពីជីវភាពរបស់ពលរដ្ឋនេះ គឺជាវិធានការមួយដ៏មានប្រសិទ្ធភាពក្នុងការពង្រឹង ការពារ និងអភិរក្សធនធានធម្មជាតិ ខណៈក្រសួងក៏កំពុងពង្រឹងតួនាទីរបស់ប្រជាពលរដ្ឋនៅតាមតំបន់ការពារ និងអភិរក្សធនធានធម្មជាតិជាតិផ្សេងទៀតដែរ ឱ្យចុះល្បាតរួមជាមួយមន្ត្រីឧទ្យានុរក្ស និងបង្កើនឱ្យមានមុខរបរថ្មីជាដើម។
នៅខេត្តកោះកុងមានសហគមន៍ការពារធម្មជាតិដែលត្រូវបានក្រសួងបរិស្ថានបង្កើតឡើងចំនួន ១៥ ខណៈសហគមន៍ចំនួន ៦ ទៀត កំពុងដំណើរការរៀបចំឡើង។ យោងតាមមន្ទីរបរិស្ថានខេត្តកោះកុងបញ្ជាក់ថា ខេត្តនេះមានតំបន់ការពារធនធានធម្មជាតិចំនួន ១០ គឺតំបន់ឧទ្យានជាតិចំនួន ៤ តំបន់ដែនជម្រកសត្វព្រៃចំនួន ៣ ក្រៅពីនេះគឺតំបន់ប្រើប្រាស់ច្រើនយ៉ាង និងរបៀងអភិរក្សជីវចម្រុះ៕
