.jpg)
ទិដ្ឋភាពនៅទីតាំងដីមានទំនាស់ កាលពីថ្ងៃ ១៧ មីនា។ រូបថត សហការី
មណ្ឌលគិរី៖ ពលរដ្ឋរស់នៅភូមិពូលូង សង្កាត់រមនា ក្រុងសែនមនោរម្យ ខេត្តមណ្ឌលគិរី ជាង ២០ នាក់ អះអាងថា ពួកគេបានរងនូវការគំរាមកំហែងពីឈ្នួញលួចលក់ដីសាធារណៈជាង ១០ ហិកតា ក្នុងអំឡុងពេលពួកគេទៅឃាត់ការសាងសង់សំណង់លើដីមានជម្លោះនោះ។
លោក ចែន វណ្ណា ពលរដ្ឋជនជាតិដើមភាគតិចម្នាក់ក្នុងចំណោមជាង ២០ នាក់ បានប្រាប់ ភ្នំពេញ ប៉ុស្តិ៍ ពីម្សិលមិញថា កាលពីថ្ងៃទី ១៧ មីនា ពលរដ្ឋទាំងអស់បាននាំគ្នាទៅឃាត់ការសាងសង់សំណង់លើដីមានជម្លោះពីសំណាក់ក្រុមឈ្នួញ និងម្ចាស់ដីដែលអះអាងថា បានទិញដីនេះ ដោយស្របច្បាប់។ លោកបន្តថា ក្នុងពេលចុះហាមឃាត់ពួកគេក៏បានគំរាមមកលើពលរដ្ឋ ខណៈពលរដ្ឋនៅតែប្រកាន់ជំហរតវ៉ាពីករណីនេះ។
លោកថា៖ «កាលពីថ្ងៃទី ១៧ ហ្នឹង ពួកខ្ញុំបានទៅហាមឃាត់ សួរហេតុផលអ្នកទិញ ហើយគេថា គេបានទិញមានក្រដាសស្នាមទទួលស្គាល់អស់ហើយ។ តែចែ ភានហ្នឹង បានគំរាមពួកខ្ញុំថា ឈប់មកតវ៉ាលើដីនេះតទៀត បើមកទៀត ពួកខ្ញុំដាក់ប៉ូលិស ប៉េអឹមចាប់ហើយ»។
តាមលោក ចែន វណ្ណា បានអះអាងថា ដីជាង ១០ ហិកតានេះ ត្រូវបានលក់ដោយអ្នកស្រីឈ្មោះ ភាន កាលពីឆ្នាំ ២០២០ បន្ទាប់ពីបុគ្គលរូបនោះបានប្រមូលស្នាមមេដៃពីពលរដ្ឋជាថ្នូរនឹងការផ្តល់ប្រាក់ក្នុងម្នាក់ៗ ១ លានរៀល បើទោះជាពួកលោកតវ៉ានឹងការលក់ដីរួមនេះក្ដី។ ក្នុងនាមជាពលរដ្ឋដែលចង់ការពារដីសម្រាប់ប្រើប្រាស់រួមនៅក្នុងភូមិ លោកស្នើឱ្យអាជ្ញាធរផ្តល់ដំណោះស្រាយដកហូតដីនេះ មករក្សាទុកជាទ្រព្យសម្បត្តិរបស់អ្នកភូមិវិញ។
លោកបញ្ជាក់ថា៖ «តាមប្លង់ដែលយើងទទួលបានអ្នកដែលទិញដីនេះ គឺគ្រាន់តែដាក់ឈ្មោះថា ស ថេត តែខ្ញុំមិនដឹងថា គាត់ហ្នឹងជាអ្នកណានោះទេ។ ចំណែកអ្នកលក់ដីនេះ គឺជាឈ្មួញលក់នៅក្នុងស្រុកមានឈ្មោះថា ចែ ភាន ជាអ្នកលួចលក់ឱ្យគេ។ ដំបូងគាត់ឃោសនាឱ្យពលរដ្ឋក្នុងភូមិផ្តិតមេដៃ ដើម្បីគាំទ្រការលក់ដីនេះ ប៉ុន្តែពលរដ្ឋដែលផ្តិតមេដៃភាគច្រើន មិនមែនជាពលរដ្ឋដែលតវ៉ា ដើម្បីការពារដីជាង ១០ ហិកតានេះទេ»។
អ្នកស្រី ភាន ដែលត្រូវបានពលរដ្ឋចោទប្រកាន់ថា បានកៀរគរមនុស្សលក់ដីនេះមិនអាចសុំការបកស្រាយបានទេ កាលពីម្សិលមិញ ព្រោះទូរស័ព្ទចូលតែមិនមានអ្នកទទួល។
ចំណែកលោក ភី ងូក ចៅសង្កាត់រមនា បានប្រាប់ ភ្នំពេញ ប៉ុស្តិ៍ ពីម្សិលមិញថា ករណីនេះលោកបានបញ្ជូនសំណុំរឿងទៅថ្នាក់ខេត្ត ដើម្បីដោះស្រាយបន្តហើយ បន្ទាប់ពីការចរចារកដំណោះស្រាយនៅសង្កាត់មិនត្រូវគ្នា។ លោកបន្តថា ការមិនត្រូវរ៉ូវគ្នា ក៏ព្រោះតែដំបូងឡើយ ដីនេះគឺជាដីរួមរបស់ពលរដ្ឋជនជាតិដើមភាគតិចនៅក្នុងភូមិ ដែលពួកគាត់ច្រើនធ្វើចម្ការវិលជុំ ឬអាស្រ័យផលរួមគ្នា ដោយការលែងគោ ក្របីជាដើម។
លោក ភី ងូក បាននិយាយទៀតថា ក្រោយពីការប្រើប្រាស់រួមគ្នានេះមកក៏មានពលរដ្ឋមួយចំនួនបានមូលមតិគ្នា ចង់លក់ដីទាំងនេះ ដើម្បីយកលុយមកចែកគ្នា ប៉ុន្តែសំណើនេះ ក៏ត្រូវបានពលរដ្ឋក្នុងភូមិមួយចំនួនបដិសេធ ដោយមិនព្រមលក់តាមការញុះញង់។
លោកបញ្ជាក់ថា៖ «ពលរដ្ឋមួយចំនួនក្នុងភូមិ បានឯកភាពគ្នាលក់ ហើយមួយទៀតមិនបានទទួលផល ហើយរឿងវាកើតឡើងដោយសារថវិកាខ្លះ និងពាក់ព័ន្ធនឹងបុគ្គលខ្លះ។ តាមខ្ញុំដឹងគ្មានអ្នកណាមកពីណា គឺជាអ្នកភូមិជាមួយគ្នាហ្នឹង»។
យ៉ាងណា ក្នុងនាមអាជ្ញាធរដែនដីលោកបានធ្វើលិខិតមួយច្បាប់ផ្ញើទៅថ្នាក់ខេត្ត និងអ្នកពាក់ព័ន្ធដោយស្នើឱ្យផ្អាកការសាងសង់ ឬធ្វើអ្វីលើដីជម្លោះនេះបណ្តោះអាសន្នសិន មុននឹងមានសេចក្តីសម្រេច និងការដោះស្រាយជាផ្លូវការ ដើម្បីចៀសវាងមានទំនាស់កើតឡើង៕
