The Phnom Penh Post Search

Search form




Logo of Phnom Penh Post newspaper Phnom Penh Post - ពលរដ្ឋ​ជាង​ ៣ ពាន់​គ្រួសារ​បាន​ទទួល​ដី​សង្គម​កិច្ច

ពលរដ្ឋ​ជាង​ ៣ ពាន់​គ្រួសារ​បាន​ទទួល​ដី​សង្គម​កិច្ច

ពល​រដ្ឋ​រង​គ្រោះ​ដោយ​សារ​​ជម្លោះ​ដី​ធ្លី​នៅ​ស្រុក​ស្នួល​មក​តវ៉ា​នៅ​ភ្នំពេញ​កន្លង​មក​។
ពល​រដ្ឋ​រង​គ្រោះ​ដោយ​សារ​​ជម្លោះ​ដី​ធ្លី​នៅ​ស្រុក​ស្នួល​មក​តវ៉ា​នៅ​ភ្នំពេញ​កន្លង​មក​។ ហេង ជីវ័ន

ពលរដ្ឋ​ជាង​ ៣ ពាន់​គ្រួសារ​បាន​ទទួល​ដី​សង្គម​កិច្ច

ភ្នំពេញៈ គណៈកម្មការ​សម្បទាន​ដី​សង្គម​កិច្ច​ថ្នាក់​ជាតិ​នៃ​ក្រសួង​រៀបចំ​ដែនដី នគ​រូប​នីយ​កម្ម​ និង​សំណង់​ បានអះ​អាង​ថា ខ្លួន​បាន​​ចុះ​បញ្ជី​ជា​ដី​ឯកជន​របស់​រដ្ឋ​ សម្រាប់​សម្បទាន​ដី​សង្គម​កិច្ច​ចំនួន​ជាង​ ១ ​ម៉ឺន ៤ ពាន់ ហិកតា​និង​បាន​ផ្តល់​ដី​ទៅ​ឲ្យ​​ពលរដ្ឋ​ជាង​ ៣៦០០ គ្រួសារ ក្នុង​ខេត្ត​ចំនួន ៦ តាម​រយៈ​គម្រោង​បែង​ចែក​ដី​ដើម្បី​សង្គម​កិច្ច និង​ការ​អភិវឌ្ឍ​សេដ្ឋកិច្ច​ រយៈពេល​៥ ​ឆ្នាំ។

តាម​របាយ​ការណ៍​សង្ខេប​ចុះ​ថ្ងៃ​ទី ​៩​ ខែ​កុម្ភៈ ​ដែល​ត្រូវ​បាន​ចែក​ចាយ​ក្នុង​សិក្ខា​សាលា​ស្តី​ពី​ការ​ចាប់​ផ្តើម​អនុវត្ត​និង​ការ​ធ្វើ​ផែន​ការ​សកម្ម​ភាព គម្រោង​លើក​កម្ពស់​ជីវភាព​រស់​នៅ​និង​សុវត្ថិភាព​ស្បៀង​សម្រាប់​គ្រួសារ​ទទួល​សម្បទាន​ដី​សង្គមកិច្ច ពី​គម្រោង​បែង​ចែក​ដី​សង្គម​កិច្ច និង​ការ​អភិវឌ្ឍសេដ្ឋ​កិច្ច កាល​ពី​ថ្ងៃ​ពុធ​ម្សិល​មិញ បាន​បង្ហាញ​ថា​ តាម​រយៈ​គម្រោង​បែង​ចែក​ដី​ដើម្បី​សង្គម​កិច្ច និង​ការ​អភិវឌ្ឍ​សេដ្ឋកិច្ច (LASED) ទាំង​ក្នុង​គម្រោង និង​ក្នុង​ក្របខ័ណ្ឌ​គម្រោង​ដី​ដែល​បាន​ចុះ​ប​ញ្ជី​ជា​ដី​ឯកជន​របស់​រដ្ឋ​សរុប​ទំហំ ១៤១២៧ ហិកតា មាន​នៅ​ក្នុង​ខេត្ត​ ក្រចេះ កំពង់​ចាម (ត្បូងឃ្មុំ) កំពង់​ធំ កំពង់​ឆ្នាំង កំពង់​ស្ពឺ និង​ខេត្ត​បាត់ដំបង ដែល​មាន ១៣ ឃុំ និង ១៤ ទី​តាំង​ ដែល​​បាន​ចាប់​ផ្តើម​តាំង​ពី​ឆ្នាំ ២០០៨ ​មក។

ក្នុង​របាយ​ការណ៍​នេះ ប្រជាពលរដ្ឋ​ដែល​ទទួល​បាន​ដី សរុប​ចំនួន ៤៦៩៧​ គ្រួសារ ស្មើ​នឹង​ ២១៥២៧ នាក់ ក្នុង​​នោះ​ស្រី​មាន ១០៩៨៣ នាក់ ហើយ​ក្នុង​គម្រោង​នេះ បាន​អភិវឌ្ឍន៍​ទី​តាំង​សម្ប​ទាន​ដី​សង្គម​​កិច្ច​ រួម​មាន​សាលា​រៀន​ ប៉ុស្តិ៍​សុខភាព​ស្រះ​ទឹក​និង​អណ្តូង​ទឹក​ជាដើម។

អគ្គ​លេខា​ធិការ​រង​អចិន្រៃ្តយ៍ នៃ​អគ្គ​លេខា​ធិការ​ដ្ឋាន​គណៈ​កម្មា​ធិការ​សម្បទាន​ដី​សង្គមកិច្ច​ និង​ជា​នាយក​គម្រោង LASED លោក សារេត បូរាមី បាន​ឲ្យ​ដឹង​ថា បច្ចុប្បន្ន​នេះ ប្រជា​ពល​រដ្ឋ​ទទួល​ដី​បាន​មាន​ចំនួន ៣១៦០ គ្រួសារ ស្មើ​នឹង ៨១ % បាន​ទៅ​​រស់​នៅ​លើ​ដី​ដែល​ទទួល​បាន និង ​២៩៨៧ គ្រួសារ ស្មើ​នឹង៦៨ % បានបង្ក​បង្កើន​ផល​លើ​ដី​កសិកម្ម​ ដែល​​ពួក​គាត់​​ទទួល​បាន។

លោកបញ្ជាក់ថា៖ «គ្រួសារ​អ្នក​ទទួល​ផល​ពី​គម្រោង​ភាគ​ច្រើន បាន​ផ្លាស់​ប្តូរ​មុខ​របរ​ពី​លក់​កម្លាំង​ពលកម្ម មក​ខិត​ខំ​បង្ក​បង្កើន​ផល​ដាំ​ដុះ​លើ​ដី​របស់​ខ្លួន ហើយ​ប្រាក់​ចំណូល​បាន​កើន​ឡើង ដោយ​ជា​មធ្យម​គ្រួសារ​ទទួល​បាន​ដី មាន​ប្រាក់​ចំណូល ១៩០១ ដុល្លារ ក្នុង​ ១ ឆ្នាំ ហើយ​ប្រាក់​ចំណូ​ល​នេះ បាន​ជួយ​ឲ្យ​គ្រួសារ​ទាំង​នោះ​មាន​​លទ្ធ​ភាព​សង​បំណុល​ដែល​ជំពាក់​មុន​ពេល​ទទួល​បាន​ដី​សម្ប-​ទាន​នេះ»។

ភ្នំពេញ​ប៉ុស្តិ៍​ មិន​អាច​ស្វែង​រក​ប្រជា​ពលរដ្ឋ ដែល​ទទួល​បាន​ដី​សម្បទាន​សង្គម​កិច្ច ដើម្បី​សុំ​ធ្វើ​ការ​បញ្ជាក់​បន្ថែម​លើ​បញ្ហា​នេះ​បាន​ទេ​៕

អត្ថបទគួរចាប់អារម្មណ៍