.jpg)
អ្នកមានជម្លោះដីធ្លីជាង ៧០០ នាក់ មកពីតំបន់ផ្សេងគ្នាក្នុងខេត្តចំនួន ៤ កាលពីម្សិលមិញបានប្រមូលផ្តុំគ្នាតវ៉ានៅមុខក្រសួងរៀបចំដែនដី នគរូបនីកម្ម និងសំណង់។ ហេង ជីវ័ន
ភ្នំពេញៈ អ្នកមានជម្លោះដីធ្លីជាង ៧០០ នាក់ មកពីតំបន់ផ្សេងគ្នាក្នុងខេត្តចំនួន ៤ កាលពីម្សិលមិញបានប្រមូលផ្តុំគ្នាតវ៉ានៅមុខក្រសួងរៀបចំដែនដី នគរូបនីកម្ម និងសំណង់ ដើម្បីទាមទារឲ្យមានការពន្លឿនការដោះស្រាយជម្លោះដីធ្លីរបស់ពួកគេ ក្រោយពីក្រសួងនេះបានសម្រេចបង្វែរសំណុំរឿងទាំងនេះទៅឲ្យអាជ្ញាធរថ្នាក់ខេត្តជាអ្នកដោះស្រាយ។
អ្នកស្រី សាំង ពុយ តំណាងពលរដ្ឋមកពីឃុំកោះស្តេច ស្រុកគិរីសាគរ ខេត្តកោះកុងបានប្រាប់ភ្នំពេញប៉ុស្តិ៍កាលពីថ្ងៃចន្ទថា ប្រជាពលរដ្ឋជាង ៧០០ នាក់ មកពីខេត្តកោះកុង ខេត្តកំពង់ស្ពឺ ឧត្តរមានជ័យ និងខេត្តព្រះវិហារដែលសុទ្ធតែមានជម្លោះដីធ្លីរ៉ាំរ៉ៃ ហើយមិនទាន់មានដំណោះស្រាយដល់ពួកគេ។
អ្នកស្រីបានថ្លែងថា៖ «ការរួមគ្នាតវ៉ា ក៏ព្រោះតែបញ្ហាជម្លោះដីធ្លីរបស់ពួកយើង គឺដូចគ្នាបានកើតឡើងជាមួយក្រុមហ៊ុនឯកជន និងអ្នកមានអំណាចជាយូរឆ្នាំមកហើយ ប៉ុន្តែមិនមានដំណោះស្រាយនោះទេ បើទោះជាបានស្វែងរកកិច្ចអន្តរគមន៍ពីស្ថាប័នពាក់ព័ន្ធជាច្រើនក្ដី»។
លោក ម៉ា អ៊ុកជឿន ពលរដ្ឋមានជម្លោះដីធ្លីម្នាក់ទៀតមកពីខេត្តឧត្តរមានជ័យ បានប្រាប់ភ្នំពេញប៉ុស្តិ៍ពីម្សិលមិញដែរថា ជម្លោះដីធ្លីរបស់ពួកគាត់បានអូសបន្លាយរយៈពេល ១០ ឆ្នាំ មកហើយជាមួយក្រុមហ៊ុនស្ករអំពៅដែលមានពលរដ្ឋជាង ៨០០ គ្រួសារ មិនទាន់ទទួលបានដំណោះស្រាយ ហើយការតវ៉ារួមគ្នាពេលនេះ ព្រោះពលរដ្ឋសុទ្ធតែមានបញ្ហាដូចគ្នា។
លោក អ៊ុក ជឿន ដែលបានប្រជុំជាមួយមន្ត្រីនៃក្រសួងរៀបចំដែនដី បន្ទាប់ពីបានជួបជាមួយតំណាងពលរដ្ឋក្នុងខេត្តនីមួយៗថា ក្រសួងបានបង្វែរសំណុំរឿងរបស់ពួកគេទៅឲ្យថ្នាក់ខេត្ត ជាអ្នកដោះស្រាយវិញដោយក្រសួងជាអ្នកបន្តតាមដាន។
លោក សុខ សុទ្ធី អ្នកនាំពាក្យសាលាខេត្តកោះកុងបានថ្លែងពីម្សិលមិញថា ជាទូទៅជម្លោះដីធ្លីរបស់ប្រជាពលរដ្ឋ មិនមែនមិនមានដំណោះស្រាយទេ ប៉ុន្តែពេលខ្លះជម្លោះរបស់ពួកគេខុសគ្នា ខណៈដែលបញ្ហាខ្លះ លុះត្រាតែមានការសម្រេចពីថ្នាក់ជាតិទើបបាន៕
