.jpg)
ពលរដ្ឋដែលត្រូវបានរារាំងពីការទន្ទ្រានដីព្រៃនៅខេត្តកំពង់ស្ពឺថ្ងៃទី ២៥ សីហា។រូប ជា ហ៊ាន
កំពង់ស្ពឺៈ អាជ្ញាធរខេត្តកំពង់ស្ពឺ និងអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) របស់លោកជា ហ៊ាន កាលពីថ្ងៃទី ២៥ សីហា បានចុះទប់ស្កាត់សកម្មភាពរបស់ប្រជាពលរដ្ឋជិត ១០០ នាក់ទៅចាប់ទន្ទ្រានដីព្រៃខុសច្បាប់ប្រមាណជាង ២០០ ហិកតា នៅភូមិត្រពាំងធ្មៀ ឃុំតាសាល ស្រុកឱរ៉ាល់ ខេត្តកំពង់ស្ពឺ។
លោក ជា ហ៊ាន ប្រធានអង្គការ ACNCIPO ថ្លែងកាលពីថ្ងៃទី ២៥ ខែសីហា ថា ប្រជាពលរដ្ឋប្រមាណជិត ១០០ នាក់ តំណាងឲ្យជាង ១០០ គ្រួសារ ត្រូវបានអាជ្ញាធរ និងមន្ត្រីអង្គការលោករារាំងមិនឲ្យមានសកម្មភាពកាប់រុករានដីដែនជម្រកសត្វព្រៃភ្នំឱរ៉ាល់ដោយខុសច្បាប់ ខណៈពួកគាត់បម្រុងសាងសង់រោង និងឈូសឆាយដីព្រៃ ដើម្បីដាំដំណាំផ្សេងៗក៏ដូចជារំលោភយកធ្វើជាកម្មសិទ្ធិ។
លោកបន្តថា ភ្លាមៗនោះពួកគាត់បាននាំគ្នាតវ៉ា ខណៈដែលអាជ្ញាធរចុះទៅហាមឃាត់ ប៉ុន្ដែក្រោយពីមានការសម្របសម្រួលជាមួយមន្ត្រីជំនាញ ពួកគាត់បានយល់ព្រមស្ដាប់តាមការណែនាំ ហើយនាំគ្នាត្រឡប់ទៅផ្ទះរៀងៗខ្លួន។ ក្នុងនោះពួកគាត់ស្នើឲ្យអាជ្ញាធរចាត់វិធានការតាមផ្លូវច្បាប់ឲ្យមានតម្លាភាព និងយុត្តិធម៌។
លោក ជា ហ៊ាន បញ្ជាក់ថា៖ «យើងបានពន្យល់ពួកគាត់ គឺចុះទប់ស្កាត់ពីគ្រប់រូបភាពចំពោះការរំលោភទន្ទ្រានដីព្រៃនេះ។ បើមានជនណានៅតែបន្តការកាប់រានទន្ទ្រានឈូសឆាយដើម្បីរំលោភយកដីព្រៃរបស់រដ្ឋដោយខុសច្បាប់យើងនឹងសហការជាមួយមន្ត្រីនគរបាលយុត្តិធម៌កសាងសំណុំរឿងទៅតុលាការគឺចាត់ការ តាមនីតិវិធីផ្លូវច្បាប់តែម្ដង»។
អនុប្រធានការិយាល័យដែនជម្រកសត្វព្រៃភ្នំឱរ៉ាល់នៃមន្ទីរបរិស្ថានខេត្តកំពង់ស្ពឺលោក ហ៊ុល ម៉ារ៉ា បដិសេធធ្វើអត្ថាធិប្បាយជុំវិញករណីនេះដោយលោកអះអាងថា កំពុងជាប់រវល់ប្រជុំ។
លោក ហុង វុទ្ធី អាយុ ៣៥ ឆ្នាំ ជាប្រជាពលរដ្ឋរស់នៅភូមិត្រពាំងធ្មៀដែលបានទៅកាន់កាប់ដីនៅតំបន់នោះ និយាយថា ដីដែលពលរដ្ឋបាននាំគ្នាទៅកាន់កាប់នេះត្រូវបានអ្នកភូមិអាស្រ័យផលចាប់តាំងឆ្នាំ ២០១២។ ប៉ុន្ដែមិនមានប្លង់កម្មសិទ្ធិ ឬទទួលស្គាល់ពីអាជ្ញាធរមូលដ្ឋានទេ។ ទោះយ៉ាងណាលោកយល់ព្រមចាកចេញពីដីនេះ ដោយមិននាំគ្នាមករំលោភយកបន្តទៀតទេ។
លោកក៏បានស្នើឲ្យអាជ្ញាធរចាត់វិធានការតាមច្បាប់ចំពោះពលរដ្ឋ និងបុគ្គលមានអំណាច ព្រោះលោកមិនចង់ឃើញការបង្ក្រាបដែលមានភាពលម្អៀង ពោលគឺបង្ក្រាបតែពលរដ្ឋស្លូតត្រង់។ លោកធ្លាប់ទទួលព័ត៌មានពីកន្លែងផ្សេង គឺពលរដ្ឋធម្មតាត្រូវបានអាជ្ញាធរបង្ក្រាប។ ប៉ុន្ដែបុគ្គលមានអំណាច និងមានលុយបែរជាអាជ្ញាធរបណ្ដោយឲ្យគេកាន់កាប់ដីរដ្ឋដោយខុសច្បាប់ទៅវិញ។
ពលរដ្ឋរូបនោះបានបញ្ជាក់ថា៖ «ពួកខ្ញុំយល់ព្រមមិនទៅកាន់កាប់ដីហ្នឹងទៀតទេ ប៉ុន្ដែពួកខ្ញុំសូមស្នើឲ្យអាជ្ញាធរបង្ក្រាបឲ្យមានតម្លាភាព និងយុត្តិធម៌។ ព្រោះខ្ញុំខ្លាចតែអាជ្ញាធរដេញពួកខ្ញុំចេញ តែយកដីពីពួកខ្ញុំទៅលក់ឲ្យអ្នកផ្សេងដូចជា អ្នកមានលុយ មានអំណាចវិញ។ បើមានរឿងនេះមែន ខ្ញុំនឹងនាំគ្នាមកតវ៉ាហើយ។ ខ្ញុំជាពលរដ្ឋក្រីក្រគ្មានដីធ្លីទេ ពួកខ្ញុំគ្រោងសរសេរលិខិតស្នើសុំដីតំបន់នេះពីអាជ្ញាធរ ដើម្បីប្រើប្រាស់សម្រាប់ជីវភាពគ្រួសារ»។
មេឃុំតាសាល លោក ឌុល សុខុម បានប្រាប់ភ្នំពេញប៉ុស្តិ៍ពីម្សិលមិញថា ពលរដ្ឋទាំង ១០០ គ្រួសារនេះពិតជាបាននាំគ្នាទៅរំលោភយកព្រៃរបស់រដ្ឋមែន ដោយអាជ្ញាធរធ្លាប់បានហាមឃាត់ និងផ្សព្វផ្សាយជាច្រើនលើកច្រើនសាមកហើយ។ ប៉ុន្ដែពួកគាត់មិនព្រមស្ដាប់អាជ្ញាធរទេ នៅតែនាំគ្នាទៅសាងសង់រោង និងចាប់ដីធ្វើជាកម្មសិទ្ធិដោយខុសច្បាប់។
លោកបានបន្តថា កាលពីសប្ដាហ៍មុនមានប្រជាពលរដ្ឋ ៥ គ្រួសារបានស្នើ និងយកឯកសារឲ្យលោកចុះហត្ថលេខាទទួលស្គាល់ដី ដែលពួកគាត់កាប់ទន្ទ្រានដីព្រៃរបស់រដ្ឋនេះ។ ប៉ុន្ដែលោកបានបដិសេធ ហើយប្រាប់ឲ្យពួកគាត់បញ្ឈប់ទៅកាប់ទន្ទ្រានលើដីព្រៃនោះបន្តទៀត ព្រោះដីតំបន់នេះការពារដោយព្រះរាជក្រឹត្យគ្មានជនណាប៉ះពាល់បានទេ។
លោកមេឃុំបានថ្លែងថា៖ «ពលរដ្ឋគាត់ឃើញដីតំបន់ហ្នឹងនៅទំនេរៗច្រើន។ អ៊ីចឹងគាត់គិតថា អាចនាំគ្នាទៅចាប់យកដូចជំនាន់ពីមុន។ តែគ្មានទេ យើងមិនអាចធ្វើតាមសំណើគាត់ដូចកាលពីមុនទេ ព្រោះដីនេះការពារដោយព្រះរាជក្រឹត្យ។ អ៊ីចឹងមិនអាចនាំគ្នាទៅរំលោភបំពានបានទេ។ ពលរដ្ឋយើងខ្លះធ្លាប់ទទួលបានដីដែលអាជ្ញាធរកាត់បែងចែកឲ្យហើយ តែគាត់យកទៅលក់ឲ្យអ្នកផ្សេង ហើយគាត់ទៅដើរចាប់ដីនៅកន្លែងផ្សេងទៀត»។
តាមសេចក្ដីជូនដំណឹងរបស់ការិយាល័យដែនជម្រកសត្វព្រៃភ្នំឱរ៉ាល់នៃមន្ទីរបរិស្ថានខេត្តកំពង់ស្ពឺចុះថ្ងៃទី ១៤ ខែ សីហា ឆ្នាំ ២០២០ បានឲ្យដឹងថា ការកាប់ទន្ទ្រានដីព្រៃនៅទីតាំងខាងលើនេះគឺជាអំពើល្មើសច្បាប់ដែលមានចែងក្នុងមាត្រា ៦២ នៃច្បាប់ស្ដីពីតំបន់ការពារធម្មជាតិ ដែលត្រូវបានប្រកាសដាក់ឲ្យប្រើប្រាស់តាមព្រះរាជក្រមចុះថ្ងៃទី ១៥ ខែកុម្ភៈ ឆ្នាំ ២០០៨។
សេចក្ដីជូនដំណឹងដដែលបានបន្តថា ជនទាំងឡាយណាដែលល្មើសមាត្រា ៦២ នេះនឹងត្រូវផ្តន្ទាទោសជាបទល្មើសធនធានធម្មជាតិថ្នាក់ទី ៤ (ទោសដាក់ពន្ធនាគារពី ៥ ឆ្នាំទៅ ១០ ឆ្នាំ និងទោសពិន័យជាប្រាក់ពី ១៥ លានរៀលទៅ ១៥០ លានរៀល។ ករណីបុគ្គលប្រព្រឹត្តល្មើសជានីតិបុគ្គលនោះ ទោសពិន័យជាទឹកប្រាក់ពី ១៥០ លានរៀល ដល់ ២៥០ លានរៀល) និងត្រូវរឹបអូសវត្ថុតាងទុកជាសម្បត្តិរដ្ឋវិញ៕
