.jpg)
ពលរដ្ឋតវ៉ានឹងការឈូសឆាយដីដែលគេថាជាដីសហគមន៍នៅខេត្តមណ្ឌលគិរី ពីថ្ងៃទី ៨ មីនា។ រូប គ្រើង តុលា
មណ្ឌលគិរីៈ ប្រជាសហគមន៍ភូមិអណ្តូងក្រឡឹងក្នុងខេត្តមណ្ឌលគិរីជិត ២០០ នាក់ អំពាវនាវឱ្យអាជ្ញាធរមានវិធានការទប់ស្កាត់ការឈូសឆាយដីរបស់សហគមន៍ពីសំណាក់អ្នកមានអំណាចម្នាក់ ដែលគេស្គាល់ឈ្មោះ ថាំង រិទ្ធី និងមានតួនាទីជាមន្ត្រីប៉ូលិស ខណៈសកម្មភាពនៃការឈូសឆាយនៅតែបន្ត បើទោះសហគមន៍ និងអាជ្ញាធរថ្នាក់ក្រោមបានរារាំងយ៉ាងណាក្តី។
ដីដែលត្រូវបានឈូសឆាយហ៊ុមព័ទ្ធយកគឺមានទំហំ ៥១ ហិកតា ក្នុងនោះប៉ះពាល់ដីសហគមន៍ចំនួន ១២ ហិកតា ខណៈដីជិត ៤០ ហិកតាទៀតដែលពលរដ្ឋស្គាល់ថា ដីគម្របព្រៃនោះបែរជាបុគ្គលរូបនោះអះអាងថា រូបគេមានច្បាប់ត្រឹមត្រូវ ដើម្បីហ៊ុមព័ទ្ធយកដីនោះទៅវិញ។ នេះបើតាមការអះអាងរបស់ប្រធានប្រជាសហគមន៍ភូមិអណ្តូងក្រឡឹង លោក សុខា ថុត។
លោក សុខា ថុត ប្រាប់ ភ្នំពេញ ប៉ុស្តិ៍ ពីម្សិលមិញថា បុគ្គលដែលបានហ៊ុមព័ទ្ធដីទាំង ៥១ ហិកតានេះ គឺឈ្មោះ ថាំង រិទ្ធី ដែលត្រូវបានស្គាល់ថា ជាមន្ត្រីប៉ូលិស មានអំណាចក្នុងខេត្តចំនួន ៣ គឺខេត្តមណ្ឌលគិរី រតនគិរី និងខេត្តស្ទឹងត្រែង។
លោកបន្តថា ដំបូងឡើយបុគ្គលរូបនេះ និងបក្ខពួកបានឈូសឆាយដីដោយធ្វើការហ៊ុមព័ទ្ធព្រំលើផ្ទៃដីប្រមាណ ៥១ ហិកតា នៅឆ្នាំ ២០២០។ ក្រោយពីឃើញសកម្មភាពទាំងនេះ សហគមន៍ក៏បានធ្វើការហាមឃាត់ និងបានដាក់ពាក្យបណ្តឹងទៅតុលាការខេត្តស្នើឱ្យផ្អាកសកម្មភាពឈូសឆាយ ដើម្បីស្វែងរកពីភាពត្រឹមត្រូវនៃការកាន់កាប់ដី និងរំលោភលើដីសហគមន៍នេះ។
លោកបញ្ជាក់ថា៖ «គេឈូសឆាយតាំងពីឆ្នាំ ២០២០ ហើយក្រោយមកកាលពីថ្ងៃទី ២៨ កុម្ភៈ ពួកខ្ញុំបានចុះល្បាតលើដីនេះ ឃើញគេចាប់ផ្តើមឈូសឆាយឡើងវិញណា។ បន្ទាប់មកថ្ងៃទី ៤ មីនា ទៀត ពួកខ្ញុំទៅឃាត់ ហើយអត់ឈប់ទេ ហើយបានមេឃុំថា ឱ្យផ្អាកសិន តែនិយាយអ៊ីចឹងគេអត់ស្តាប់ទេ»។
បើតាមលោក ខា ថុត ដីសហគមន៍ភូមិអណ្តូងក្រឡឹង គឺមានជាង ១ ០០០ ហិកតា ដោយមានការទទួលស្គាល់ពីក្រសួងពាក់ព័ន្ធក្នុងការកំណត់ព្រំសហគមន៍ក្នុងឆ្នាំ ២០១៧ ខណៈដែលសហគមន៍នេះមានសមាជិកជិត ២០០ គ្រួសារ និងត្រូវបានបង្កើតឡើងកាលពីឆ្នាំ ២០០៧។
ភ្នំពេញប៉ុស្តិ៍មិនអាចស្វែងរកប្រភពលោក ថាំង រិទ្ធី ដែលត្រូវបានប្រជាសហគមន៍ចោទប្រកាន់ ដើម្បីបកស្រាយករណីនេះបានទេពីម្សិលមិញ។
លោកស្រី ថ្វាន់ ត្រែល មេឃុំសែនមនោរម្យ ស្រុកអូររាំង ខេត្តមណ្ឌលគិរី ពីម្សិលមិញប្រាប់ថា បន្ទាប់ពីការរាយការណ៍ពីប្រជាសហគមន៍អំពីការបន្តការឈូសឆាយនេះ អាជ្ញាធរក៏ចុះទៅផ្អាកសកម្មភាពភ្លាមៗនៅកន្លែងកើតហេតុ។
ក្នុងករណីដែលបុគ្គលនេះនៅតែបន្តឈូសឆាយ លោកស្រីថា នឹងធ្វើលិខិតស្នើទៅមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត និងមន្ទីរពាក់ព័ន្ធ ដើម្បីចុះមកដោះស្រាយជាបន្ទាន់។ ប៉ុន្តែក៏មិនទាន់មានឯកសារណាច្បាស់លាស់បង្ហាញនោះដែរ ហើយលោកស្រីក៏រង់ចាំការចុះពិនិត្យ និងការវាស់វែងពីសំណាក់មន្ត្រីជំនាញដូចគ្នា។
លោកស្រីបញ្ជាក់ថា៖ «យើងនឹងស្នើទៅ ដើម្បីចុះមកវាស់ និងត្រួតពិនិត្យជាក់ស្តែង ដើម្បីឱ្យដឹងថា ប៉ះដីរបស់សហគមន៍ ឬដីដែនជម្រក។ ខ្ញុំក៏មិនទាន់ដឹងច្បាស់លាស់ដែរ យើងនឹង [ដាក់] លិខិតឆាប់ៗនេះ»។
ក្នុងនាមអាជ្ញាធរដែនដី លោកស្រី ថ្វាន់ ត្រែល អះអាងថា ការកាន់កាប់ និងឈូសឆាយលើដីទាំងនេះមិនទាន់ច្បាស់លាស់ថា បុគ្គលនោះមានសិទ្ធិកាន់កាប់ស្របច្បាប់ឬយ៉ាងណានោះទេ ដោយគ្រាន់តែដឹងថា បុគ្គលរូបនោះ បានធ្លាប់ទិញដីទាំងនេះពីអ្នកភូមិ។
លោកស្រីបញ្ជាក់ថា៖ «ខ្ញុំមិនដឹងច្បាស់ដែរ រឿងដែលបុគ្គល រិទ្ធិ មកឈូសឆាយតែមានពលរដ្ឋយើងបានលក់ឱ្យគេ គឺអ្នកលក់ហ្នឹង បងប្អូនសហគមន៍គាត់ហ្នឹង។ បើមិនអ៊ីចឹង មិនមែនគេចេះតែយកៗឯណា។ ចំពោះការទិញលក់វិញ ខ្ញុំក៏មិនទាន់ឃើញឯកសារអ្វីច្បាស់ដែរ។ ខ្ញុំមិនទាន់ហ៊ានសន្និដ្ឋានអ្វីទេ រង់ចាំគេមកចុះ [វាស់] សិន ព្រោះខ្ញុំក៏មិនដែលបានជួបបុគ្គលឈ្មោះ [ថាំង រិទ្ធី] ហ្នឹងដែរ»។
លោក គ្រើង តុលា អ្នកប្រឹក្សាបណ្ដាញសហគមន៍ជនជាតិដើមភាគតិចខេត្តមណ្ឌលគិរីប្រាប់ ភ្នំពេញ ប៉ុស្តិ៍ ពីម្សិលមិញថា ការរំលោភបំពាននេះគឺជាករណីមួយដែលអាងអំណាច ព្រោះអាជ្ញាធរថ្នាក់ក្រោម គ្មានអ្នកណាម្នាក់ហ៊ានចេញមុខដោះស្រាយ ដើម្បីទាមទារដីដែលកំពុងឈូសឆាយនេះនោះទេ។ លោកថា៖ «នេះជាការអាងអំណាច ជាការអួតអាងដោយបំពានលើច្បាប់»។
អភិបាលរងខេត្ត និងជាអ្នកនាំពាក្យសាលាខេត្តមណ្ឌលគិរី លោក ជាក់ ម៉េងហ៊ាង ប្រាប់ថា លោកមិនទាន់ទទួលបានព័ត៌មានលម្អិត ជុំវិញករណីនេះទេ។ ប៉ុន្តែលោកអះអាងថា នឹងចាត់ឱ្យក្រុមការងារចុះស្រាវជ្រាវក្នុងពេលខាងមុខ៕
