កណ្តាលៈ ប្រជាពលរដ្ឋប្រមាណជាង ៣០០ នាក់តំណាង ៣៥០ គ្រួសារនៅភូមិ ស្ទឹងជ្រៅ សង្កាត់ដើមមៀន ក្រុង តាខ្មៅ បានទៅប្រមូលផ្ដុំគ្នាតវ៉ាបិទទ្វារចូលសាលាខេត្ត កណ្តាល ដើម្បីទាមទារឲ្យអភិបាលខេត្ត និងលោកនាយករដ្ឋមន្ត្រី ហ៊ុន សែន ជួយអន្តរាគមន៍ ទៅក្រុមហ៊ុន ING ដោយពួកគាត់ថា ក្រុមហ៊ុននេះ បានឃុបឃិតគ្នាជាមួយមន្ត្រីមួយចំនួន លួចធ្វើប័ណ្ណកម្មសិទ្ធិរំលោភយកដីបឹងជីភោ ដែលពួកគាត់បានអាស្រ័យផលដោយដាំបន្លែនិងដំណាំផ្សេងៗ ចាប់តាំងពីឆ្នាំ ១៩៧៩ មក។
លោក ហូ សុខហេង តំណាងប្រជាពលរដ្ឋទាំង ៣៥០ គ្រួសារបានលើកឡើងថា ក្រុមប្រជាពលរដ្ឋបានមកតវ៉ានេះ គឺដើម្បីសុំឲ្យលោកអភិបាលខេត្ត ម៉ៅ ភិរុណ ជួយរកដំណោះស្រាយ បញ្ហាជម្លោះដីធ្លីដ៏ចម្រូងចម្រាសជាមួយក្រុមហ៊ុន ING របស់លោកឧកញ៉ា អ៊ឹង ប៊ុនហ៊ូវ ដែលបានធ្វើប្លង់កម្មសិទ្ធិ លើដីសហគមន៍ និងស្នើសុំឲ្យលោកអភិបាលខេត្តដាក់សំណើទៅលោកនាយករដ្ឋមន្ត្រី សូមឲ្យកាត់ដីបឹងនោះឲ្យពលរដ្ឋវិញ។
លោកបន្ថែមថា ដីសហគមន៍ ដែលក្រុមហ៊ុនរំលោភនោះ ជាប្រភេទដីបឹង មានទំហំជាង ៧ ហិកតាស្ថិតក្នុងខេត្ត កណ្តាល ដែលប្រជាពរដ្ឋបានអាស្រ័យផលលើដីបឹងនេះ ដូចជាដាំបន្លែ ត្រកួន កញ្ឆែត នេសាទត្រី និងដាំដំណាំផ្សេងៗទៀត តាំងពីឆ្នាំ ១៩៧៩ មក ហើយរដ្ឋាភិបាល ក៏ប្រគល់ដីនោះមកឲ្យពលរដ្ឋកាន់កាប់ ដើម្បីទុកអាស្រ័យផលកាលឆ្នាំ ១៩៩៩។
ប៉ុន្តែលោកថា ត្រូវក្រុមហ៊ុន ING ឃុបឃិតគ្នាជាមួយមន្ត្រីមួយចំនួនលួចធ្វើប័ណ្ណកម្មសិទ្ធិ ធ្វើជារបស់ផ្ទាល់ខ្លួនទៅវិញ និងបានហាមឃាត់មិនឲ្យប្រជាពលរដ្ឋចូលអាស្រ័យផលបានទៀតឡើយ។
លោកបន្តថា៖ «ពួកខ្ញុំបានទៅស្វែងរកអន្តរាគមន៍ពីក្រសួងរៀបចំដែនដី និងខុទ្ទកាល័យសម្ដេចជាច្រើនលើក នៅតែគ្មានដំណោះស្រាយ ប៉ុន្ដែម្ដងនេះសុំឯកឧត្តមអភិបាលខេត្ត ជួយនិយាយរៀបរាប់ និងជួយដាក់របាយការណ៍ពីបញ្ហាដីធ្លីនេះទៅសម្ដេចតេជោ ហ៊ុន សែន ផង ហើយពួកខ្ញុំរង់ចាំអនុសាសន៍របស់សម្ដេច ហើយបើសម្ដេចសម្រេចប្រគល់ដីបឹងនេះឲ្យក្រុមហ៊ុនផ្ទាល់ ពួកខ្ញុំនឹងមិនជំទាស់ទេ»។
អ្នកស្រី ពេជ្រ ខេន ពលរដ្ឋម្នាក់ ក្នុងចំណោមនោះបានឲ្យដឹងថា ពលរដ្ឋធ្លាប់អាស្រ័យផលលើដីបឹងជីភោនោះ ដោយដាំត្រកួន ស្ពៃ កញ្ឆែត ស្រូវប្រាំង និងដំណាំរួមផ្សំផ្សេងៗទៀត។ ចាប់តាំងពីដីបឹងនេះត្រូវបានក្រុមហ៊ុនហាមមិនឲ្យចូលមក ពលរដ្ឋដែលនៅតំបន់នោះ ចាប់ផ្ដើមជួបការលំបាកក្នុងការប្រកបមុខរបរចិញ្ចឹមជីវិត។ «ដីនេះជាកម្មសិទ្ធិរបស់រដ្ឋ និងរបស់ពលរដ្ឋក្នុងសហគមន៍ ហើយពលរដ្ឋធ្លាប់អាស្រ័យផលជាច្រើនឆ្នាំ។ប៉ុន្ដែក្រុមហ៊ុន បែរជាយកទៅធ្វើជាកម្មសិទ្ធិតែម្នាក់ឯង។ ពួកខ្ញុំមិនអាចទទួលយកបានទេ អ៊ីចឹងក្រុមហ៊ុនត្រូវតែផ្ដល់សំណងណាមួយសមរម្យឲ្យពលរដ្ឋ ...»។
លោកឧកញ៉ា អ៊ឹង ប៊ុនហ៊ូវ អគ្គនាយកក្រុមហ៊ុន អាយ.អិន.ជី (ING Holding) មិនអាចទាក់ទងសុំអធិប្បាយបានទេ កាលពីម្សិលមិញដោយទូរស័ព្ទរបស់លោកមិនមានអ្នកទទួល។
ចំណែកលោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម បានបង្វែរសំនួរទៅលោក មាស ម៉េតភក្ដី អ្នកនាំពាក្យសាលារាជធានីភ្នំពេញរួចក៏បានចុចបិទទូរស័ព្ទ។
យ៉ាងណាក្តី លោក ហ៊ឹម ឆុន មេភូមិស្ទឹងជ្រៅ បានឲ្យដឹងថា ដីដែលកំពុងមានទំនាស់នេះ ជាប្រភេទដីបឹង ដែលអ្នកភូមិតែងតែអាស្រ័យផលជារៀងរាល់ឆ្នាំបើទោះបីជាពួកគាត់មិនមានប័ណ្ណកម្មសិទ្ធិក៏ដោយ ហើយដីបឹងនោះក៏មិនស្ថិតក្នុងគម្រោងទីក្រុងរណបរបស់រដ្ឋាភិបាលដែរ។ ពលរដ្ឋទាំងអស់នេះ មិនពេញចិត្តនឹងទង្វើឃុបឃិតគ្នា ចំពោះមន្ត្រីមួយចំនួនដែលបានចេញប័ណ្ណកម្មសិទ្ធិឲ្យក្រុមហ៊ុន ING នោះទេ។ «ក្នុងនាមខ្ញុំជាអាជ្ញាធរ បានមើលឃើញថា ប័ណ្ណកម្មសិទ្ធិកាន់កាប់ដីធ្លីរបស់ក្រុមហ៊ុនមានភាពមិនប្រក្រតី ព្រោះទីតាំងដីនេះ ស្ថិតនៅខេត្តកណ្ដាល គួរតែអាជ្ញាធរខេត្ត កណ្ដាល ជាអ្នកចេញប័ណ្ណ ប៉ុន្ដែបែរជាអាជ្ញាធរក្រុង ភ្នំពេញ ជាអ្នកចេញប័ណ្ណនោះឲ្យក្រុមហ៊ុនទៅវិញ ហើយក្រុមហ៊ុនមិនដែលអើពើដោះស្រាយជាមួយពលរដ្ឋ និងប្រើសន្ដិសុខយាមមិនឲ្យអ្នកភូមិទៅជិតដីបឹងនោះឡើយ»។
លោក ម៉ៅ ភិរុណ អភិបាលខេត្តកណ្ដាលបានប្រាប់ ភ្នំពេញ ប៉ុស្ដិ៍ កាលពីម្សិលមិញថា ជម្លោះដីធ្លីនេះបានកើតឡើងជាច្រើនឆ្នាំកន្លងមកហើយ។
លោកថា៖«ខ្ញុំបានទទួលព័ត៌មាន សំណូមពរ របស់ពលរដ្ឋ ដើម្បីមកដោះស្រាយ ហើយខ្ញុំនឹងព្យាយាមសម្របសម្រួលជាមួយក្រុមហ៊ុន។ ការពិតយើងដោះស្រាយតាមផ្លូវច្បាប់បានមួយចំនួនហើយ ប៉ុន្ដែពួកគាត់មិនទាន់សប្បាយចិត្តហើយក៏នាំគ្នាមកតវ៉ា តែយ៉ាងណា ក៏ខ្ញុំនៅតែទទួលដោះស្រាយរហូតដល់ចប់»។
កាលពីដើមឆ្នាំ ២០១៥ រាជរដ្ឋាភិបាលធ្លាប់បានសម្រេចផ្តល់សិទ្ធិឲ្យក្រុមហ៊ុនឯកជនឈ្មោះ ING Holding Co.,Ltd. អនុវត្តគម្រោងអភិវឌ្ឍន៍ទីក្រុងរណបនៅតំបន់បឹងទំពុន និងតំបន់ជើងឯក លើផ្ទៃដីទំហំ ២៥៧២ ហិកតា គ្របដណ្តប់ក្នុងភូមិសាស្ត្រខណ្ឌមានជ័យជាង ១០០០ ហិកតា ខណ្ឌដង្កោ ជាង១ ២០០ ហិកតា និងក្រុងតាខ្មៅ ខេត្តកណ្តាល ប្រមាណ ៣៧១ ហិកតា៕