សៀមរាបៈ តំណាងប្រជាពលរដ្ឋប្រមាណជាង ២០០ នាក់ បានប្រមូលផ្ដុំគ្នានៅមុខសាលាដំបូងខេត្តសៀមរាបកាលពីសប្ដាហ៍មុន សុំឲ្យមានការដោះលែងជនសង្ស័យ ដែលជាប្រធានក្រុមហ៊ុនវិនិយោគម្នាក់ឲ្យចេញមកទទួលខុសត្រូវលើសំណងដល់ពលរដ្ឋប្រមាណ ២ ០០០ នាក់ ដែលបានដាក់លុយវិនិយោគជាមួយក្រុមហ៊ុនមួយនេះ ប៉ុន្តែត្រូវបានតុលាការបដិសេធ។
ទោះជាយ៉ាងណាក៏ដោយការស្នើសុំឲ្យមានការដោះលែងនៅក្រៅឃុំនេះ ធ្វើឡើងក្រោយពីមានលិខិត ១ ច្បាប់ដែលចុះហត្ថលេខាដោយលោក ឌីម សួនណាត កាលពីថ្ងៃទី ១៥ មីនា ឆ្នាំ ២០២០ ដោយបានអះអាងថាលោកនឹងធ្វើការទូទាត់សងទៅតាមទំហំទឹកប្រាក់ដើមរបស់ប្រជាពលរដ្ឋរហូតដល់គ្រប់ចំនួនក្នុងករណីដែលរូបលោកមានសេរីភាព ហើយបានចេញពីការឃុំខ្លួន។
លោក ឌីម សួនណាត អគ្គនាយកក្រុមហ៊ុន Enarita បាននិងកំពុងស្ថិតនៅក្នុងមន្ទីរឃុំឃាំងអស់រយៈពេល ៨ ខែ ដើម្បីរង់ចាំការជំនុំជម្រះក្រោយពីសមត្ថកិច្ចចាប់ខ្លួនពីបទឆបោក និងបទចេញមូលប្បទានបត្រក្លែងក្លាយ។
លោក យិន ស្រាង អ្នកនាំពាក្យសាលាដំបូងខេត្តសៀមរាបបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា សំណើរបស់ប្រជាពលរដ្ឋទាំងនោះគឺមិនអាចត្រឹមត្រូវនោះទេ ហើយតុលាការក៏មិនធ្វើការដោះលែងលោក ឌីម សួនណាត តាមសំណើបាននោះដែរ ព្រោះតុលាការកំពុងបន្តនីតិវិធី។
ក្នុងករណីដែលតុលាការបញ្ចប់ការស៊ើបអង្កេតរួចរាល់នោះ តុលាការនឹងបើកសវនាការ ដូច្នេះសុំឲ្យពលរដ្ឋទាំងអស់រង់ចាំដំណោះស្រាយពីតុលាការ ខណៈដែលលោកក៏មិនទាន់ច្បាស់ថា ករណីនេះអាចនឹងបញ្ចប់ការស៊ើបអង្កេត និងសម្រេចបើកសវនាការ នៅពេលណានៅឡើយនោះទេ។
លោក ស្រាង ថ្លែងថា៖ «នីតិវិធីតុលាការ គេកំពុងតែបន្តសវនាការផង និងស៊ើបអង្កេតបន្តផង ព្រោះរឿងគាត់ច្រើនករណី ហើយការប្រមូលផ្តុំរបស់គាត់ គឺជាសិទ្ធិរបស់គាត់ទេដែលមិនទាក់ទងនឹងនីតិវិធីរបស់តុលាការនោះទេ។ តាមរយៈការតវ៉ានេះព្រះរាជអាជ្ញាបានធ្វើការបកស្រាយរួចរាល់អស់ហើយ និងបានពន្យល់ដល់អ្នកតវ៉ាអស់ហើយ ព្រោះនីតិវិធីតុលាការ គេអនុវត្តទៅតាមសំណុំរឿងនីមួយៗ»។
លោក ស្រាង បានអះអាងថាករណីនេះក្រៅពីស្ថិតក្នុងចំណាត់ការរបស់តុលាការក៏ស្ថិតក្នុងចំណាត់ការរបស់ក្រសួងមហាផ្ទៃដែរ ដែលកំពុងធ្វើការស៊ើបអង្កេតព្រោះដោយសារតែមានដើមបណ្តឹងដែលជាជនរងគ្រោះខ្លះបានប្តឹងទៅក្រសួងមហាផ្ទៃ ហើយនៅពេលនេះតុលាការក៏កំពុងស៊ើបអង្កេតរកទ្រព្យសម្បត្តិរបស់លោក ឌីម សួនណាត ដែលកំពុងមានជាក់ស្តែងជាមុនសិន។
លោក ស្រាង ថ្លែងថា៖ «តែគេបិទបញ្ចប់ការស៊ើបអង្កេត គេនឹងបើកសវនាការជំនុំជម្រះ ហើយបើរឿងនេះមិនទាន់បិទទេគឺបានន័យថា គេកំពុងបន្តនីតិវិធីស៊ើបអង្កេតនៅឡើយ។ ចំពោះចំនួនទឹកប្រាក់ និងពាក្យបណ្តឹង គឺខ្ញុំមិនទាន់បានបូកសរុបទេ ប៉ុន្តែសំណុំរឿងនេះប្រធានតុលាការដំបូង និងព្រះរាជអាជ្ញា គាត់បានប្រមូល និងរាយការណ៍ជូនថ្នាក់ដឹកនាំបន្តទៀតរួចហើយ»។
លោក ឌីម សួនណាត អាយុ ៣៦ ឆ្នាំរស់នៅភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខគឺជាអគ្គនាយកក្រុមហ៊ុន Enarita Development Co.Ltd ដោយក្រុមហ៊ុននេះមានបុត្រសម្ព័ន្ធចំនួន ៧ ទូទាំងប្រទេស និងវិនិយោគលើវិស័យជាច្រើន ដូចជា វិនិយោគលើដី លើហាងកាហ្វេ វិនិយោគលើទឹកសុទ្ធ និងក្នុងវិស័យអប់រំជាដើម ដែលមានសាខាធំនៅរាជធានីភ្នំពេញ និងខេត្តសៀមរាប និងតាមបណ្តាខេត្តមានប្រធានផ្នែកទីផ្សារគ្រប់គ្រងបន្ត។
លោក ឌីម សួនណាត ត្រូវបានសាលាដំបូងខេត្តសៀមរាបសម្រេចឃាត់ខ្លួន និងចោទប្រកាន់ចំនួន ២ ករណីពីបទឆបោក និងបទចេញមូលប្បទានបត្រក្លែងក្លាយកាលពីអំឡុងខែកក្កដា ឆ្នាំ ២០១៩ បន្ទាប់ពីមានពាក្យបណ្តឹងពីពលរដ្ឋមួយចំនួនបានប្តឹងម្ចាស់ក្រុមហ៊ុននេះថា បានឆបោកពួកគេមានទឹកប្រាក់រាប់លានដុល្លារតាមរយៈការដាក់ទុនវិនិយោគ។
ភ្នំពេញប៉ុស្តិ៍មិនអាចស្វែងរកប្រភពដើមបណ្តឹងដែលបានដាក់ពាក្យប្តឹងម្ចាស់ក្រុមហ៊ុននេះបាននោះទេកាលពីថ្ងៃអាទិត្យ ខណៈដែលតុលាការក៏បដិសេធផ្តល់ប្រភពទាក់ទង។
លោក អ៊ឹង សុបញ្ញា ពលរដ្ឋតំណាងឲ្យពលរដ្ឋប្រមាណ ២០០ នាក់ ដែលចូលរួមតវ៉ាឲ្យមានការដោះលែងលោក ឌីម សួនណាត បានប្រាប់ភ្នំពេញ-ប៉ុស្តិ៍កាលពីថ្ងៃអាទិត្យថា ការប្រមូលផ្តុំគ្នានេះ គឺដើម្បីស្នើសុំកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ឲ្យជួយដល់ពួកគេរាប់ពាន់គ្រួសារដែលបានដាក់លុយវិនិយោគជាមួយក្រុមហ៊ុន អ៊ីណារីតា ឯ.ក ដែលមានលោក ឌីម សួនណាត ជាអគ្គនាយកក្រុមហ៊ុន ហើយបច្ចុប្បន្នកំពុងឃុំខ្លួនបណ្តោះអាសន្ននៅឯពន្ធនាគារខេត្តសៀមរាបអស់រយៈពេល ៨ ខែមកហើយ។
លោកបន្តថា៖ «ប្រជាពលរដ្ឋដែលបានដាក់លុយវិនិយោគជាមួយក្រុមហ៊ុនប្រមាណរាប់ពាន់គ្រួសារកំពុងមានការលំបាកយ៉ាងខ្លាំង គ្មានលុយបង់ធនាគារ គ្មានលុយបង់ការប្រាក់ឯកជន ហើយអ្នកខ្លះទៀតក៏មិនហ៊ានទៅស្រុកកំណើត ព្រោះមិនហ៊ានប្រឈមមុខជាមួយម្ចាស់បំណុល។ ប្រជាពលរដ្ឋទាំងអស់កំពុងតែរង់ចាំយ៉ាងអន្ទះអន្ទែងបំផុត និងព្រមទទួលយកដំណោះស្រាយពីលោក ឌីម សួនណាត តាមការសន្យាដូចក្នុងលិខិត»។
សហមេធាវីម្នាក់ក្នុងចំណោមមេធាវីការពារក្តីលោក ឌីម សួនណាត ប្រមាណ ១០ នាក់ ដែលសុំមិនបញ្ចេញឈ្មោះបានលើកឡើងថា ការបន្តឃុំខ្លួនកូនក្តីរបស់លោករយៈពេលយូរហើយមិនព្រមបិទបញ្ចប់ការស៊ើបអង្កេតបែបនេះ បានធ្វើឲ្យប៉ះពាល់ដល់សិទ្ធិរបស់ជនជាប់ចោទដែលមានចែងក្នុងបញ្ញត្តិ។
លោកមេធាវីបានថ្លែងឲ្យដឹងថា៖ «ការឃុំខ្លួនរបស់គាត់មានរយៈពេលយូរមែនទែន ដែលធ្វើឲ្យប៉ះពាល់ដល់សិទ្ធិកូនក្តីខ្ញុំ ហើយការឃុំខ្លួនយូរបែបនេះ មានអ្វីជាផលតបស្នងមកវិញចំពោះកូនក្តីរបស់ខ្ញុំ។ ក្នុងនាមជាសហមេធាវីការពារសិទ្ធិគឺចង់ឲ្យតុលាការពន្លឿននីតិវិធីឲ្យលឿនៗទៅ ដើម្បីឲ្យប្រាកដថា ជនរងគ្រោះមានទោស ឬគ្មានទោសដូចការចោទប្រកាន់»៕