.jpg)
ពលរដ្ឋមានទំនាស់ដីធ្លីនៅខេត្តកំពង់ស្ពឺពេលប្រជុំ នៅថ្ងៃទី ២៦ ខែវិច្ឆិកា នេះ ។ រូបភាព សហការី
កំពង់ស្ពឺ: ប្រជាសហគមន៍អមលាំង ៦៨ នាក់ តំណាង ៣៤៣៦ គ្រួសារមកពីភូមិគោក,ពិសី និងអូរអង្គំ ឃុំអមលាំង ស្រុកថ្ពង ដែលមានទំនាស់ដីធ្លីជាមួយក្រុមហ៊ុនស្ករអំពៅភ្នំពេញ sugar និងកំពង់ស្ពឺ sugar នៅថ្ងៃទី ២៦ ខែវិច្ឆិកានេះ ត្រូវបានអាជ្ញាធរកោះហៅចូលប្រជុំដើម្បីរកដំណោះស្រាយ ប៉ុន្ដែភ្លាមៗនៅមិនទាន់ចេញជាលទ្ធផលនៅឡើយ។
ការប្រជុំគ្នានេះ ប្រព្រឹត្តទៅនៅសាលាស្រុកថ្ពង ដែលមានការចូលរួមពីមន្ត្រីក្រសួងរៀបចំដែនដី នគរូបនីយកម្ម និងសំណង់ មេភូមិ មេឃុំ មន្ត្រីថ្នាក់ស្រុកថ្ពង មន្ត្រីជាន់ខ្ពស់ថ្នាក់ខេត្តកំពង់ស្ពឺ និងប្រជាសហគមន៍សរុបជាង ១០០នាក់ ប៉ុន្ដែមិនមានវត្តមានភាគីក្រុមហ៊ុនចូលរួមក្នុងកិច្ចប្រជុំនោះទេ។
លោក ស៊ូ សំអឿន តំណាងប្រជាសហគមន៍អមលាំងដែលបានចូលរួមក្នុងកិច្ចប្រជុំនោះបានឲ្យដឹងថា អាជ្ញាធរបានកោះហៅពលរដ្ឋ ៦៨ នាក់ ឲ្យចូលរួមប្រជុំ ដើម្បីស្វែងរកដំណោះស្រាយទំនាស់ដីធ្លីជាមួយក្រុមហ៊ុនស្ករអំពៅភ្នំពេញ sugar និង កំពង់ស្ពឺ sugar ប៉ុន្ដែមិនទាន់ចេញជាលទ្ធផលទេ ព្រោះអាជ្ញាធរព្រមផ្ដល់សំណងដល់ពលរដ្ឋក្នុងមួយគ្រួសារតែ ៣០០ ទៅ ៥០០ ដុល្លារអាមេរិកប៉ុណ្ណោះ។
លោកបន្តថា ការដាក់តម្លៃរបស់អាជ្ញាធរនេះ ត្រូវបានពលរដ្ឋប្រកែកមិនព្រមទទួលយក ព្រោះពួកគាត់សុទ្ធតែយល់ថាវាជាសំណងមិនសមរម្យ។ ពលរដ្ឋបានសំណូមពរទៅអាជ្ញាធរសុំថវិកា ៤ ពាន់ដុល្លារ គិតជាតម្លៃដី ក្នុងមួយហិកតា ឬសុំដោះដូរយកដីរបស់ពួកគាត់មកវិញ។
លោកបន្តថា ការទាមទាររបស់ប្រជាពលរដ្ឋនេះ អាជ្ញាធរក៏នៅមិនទាន់ឆ្លើយតបវិញដែរ ដោយតម្រូវឲ្យពលរដ្ឋដាក់ឯកសារបន្ថែមទៀត ដើម្បីរង់ចាំពិនិត្យ និងលើកយកមកដោះស្រាយនៅពេលក្រោយទៀត។
លោក ស៊ូ សំអឿន បញ្ជាក់ថា៖ «សំណើដែលដាក់មក គឺឲ្យពួកខ្ញុំតែ ៣០០ ទៅ៥០០ដុល្លារទេ ហើយពួកខ្ញុំក៏គ្មានអ្នកណាទទួលយកដែរ ព្រោះពួកខ្ញុំគិតថា វាមិនទាន់សមរម្យទេ។ ពួកខ្ញុំព្រមទទួលយកក្នុងមួយហិកតាតម្លៃ៤ពាន់ដុល្លារតែបើមិនបានលុយទេ ខ្ញុំសុំដោះដូរដីខ្ញុំមកវិញ»។
លោក ពៅ រ៉ា ប្រធានភូមិបាលស្រុកថ្ពង បានថ្លែងថា ការជជែកគ្នាពេញមួយព្រឹកនេះ នៅមិនទាន់ចេញជាលទ្ធផលទេ ព្រោះភាគីពលរដ្ឋគិតថា អ្វីដែលអាជ្ញាធរដាក់ឲ្យពួកគាត់ជ្រើសរើសនោះ គឺមិនទាន់សមរម្យ ដោយពួកគាត់នៅបន្តរង់ចាំទទួលការដោះស្រាយនៅពេលក្រោយទៀត។
លោកបន្តថា ពលរដ្ឋ៦៨នាក់ ក្នុងចំណោមពួកគាត់ចំនួន ៣៤៣៦ គ្រួសារមកពីស្រុកឱរ៉ាល់ និងស្រុកថ្ពង ដែលបានដាក់ឯកសារនៅការិយាល័យទទួលបានពាក្យបណ្ដឹង ក្រោយពីមន្ត្រីជំនាញបានពិនិត្យឯកសារពួកគាត់ទាំង៦៨នាក់មកពីស្រុកថ្ពងពិតជាត្រូវតាមច្បាប់ ហើយក៏បានហៅមកជជែកសម្របសម្រួលគ្នាជាក្រុមដំបូង។
លោកបញ្ជាក់ថា៖«យើងពិនិត្យឯកសារគាត់ហើយអ៊ីចឹង យើងក៏បានហៅគាត់មកពិភាក្សា ហើយរឿងគាត់ព្រម ឬមិនព្រមយើងនឹងជជែកគ្នានាពេលក្រោយទៀត»។
លោក គាវ លាងគា អភិបាលស្រុកថ្ពង បានឲ្យដឹងថា លោកបានទទួលព័ត៌មានហើយ ប៉ុន្ដែលោកមិនបានចូលរូលប្រជុំទេ។
លោកថា៖ «ខ្ញុំដឹងថា អាជ្ញាធរយើងបានកោះហៅពួកគាត់មកជជែកគ្នាដែរ ប៉ុន្ដែខ្ញុំរវល់ការងារផ្សេង ខ្ញុំអត់ទាន់ដឹងលទ្ធផលបែបណានៅឡើយទេ»។
លោក អៀង វុទ្ធី ប្រធានអង្គការសមធម៌កម្ពុជា (Equitable Cambodia) បានយល់ឃើញថា លោកមិនចូលរួមក្នុងកិច្ចប្រជុំនោះទេ ប៉ុន្ដែលោកចង់ឲ្យភាគីក្រុមហ៊ុន អាជ្ញាធរ និងពលរដ្ឋជជែកគ្នាដោយសន្ដិវិធី និងធ្វើការបែងចែកសំណងឲ្យមានតម្លាភាព ត្រឹមត្រូវ តាមច្បាប់ និងសមរម្យ ដែលពលរដ្ឋពេញចិត្តទទួលយក។
លោកបញ្ជាក់ថា៖ «យើងឃើញហើយថា កន្លងមកអាជ្ញាធរបានដោះស្រាយទំនាស់ដីធ្លីនៅខេត្តកោះកុងទទួលបានជោគជ័យជាគំរូហើយ ហើយគួរតែយកគំរូតាមហ្នឹងទៅ ព្រោះពលរដ្ឋទំនាស់ដីធ្លីខាងកំពង់ស្ពឺក៏បានដឹងថា អ្នកកោះកុងទទួលជោគជ័យបែបដែរ អ៊ីចឹងអាជ្ញាធរពិនិត្យតាមហ្នឹងទៅ»។
គួររំឭកថា បញ្ហាដីធ្លីនេះកើតឡើងតាំងពីឆ្នាំ២០១០ ប៉ះពាល់លើពលរដ្ឋចំនួន ៣៤៣៦ គ្រួសារ មកពីស្រុកឱរ៉ាល់ និងស្រុកថ្ពង ខេត្តកំពង់ស្ពឺ មានជម្លោះដីធ្លីជាមួយក្រុមហ៊ុនស្ករអំពៅភ្នំពេញ sugar និងកំពង់ស្ពឺ sugar ប៉ុន្ដែរហូតមកទល់បច្ចុប្បន្ននេះ នៅមិនទាន់ត្រូវបានដោះស្រាយបញ្ចប់ទាំងស្រុងនៅឡើយ៕
