ភ្នំពេញ/កណ្ដាលៈ ប្រជាពលរដ្ឋដែលរស់នៅក្នុងតំបន់ឆ្ងាយៗពីដងទន្លេបាននាំគ្នាធ្វើដំណើរមកកាន់រាជធានីភ្នំពេញ និងខេត្តកណ្ដាលដើម្បីទិញត្រីធ្វើប្រហុក និងធ្វើត្រីឆ្អើរដើម្បីទុកស្បៀងបម្រុងប្រចាំគ្រួសារ បន្ទាប់ពីក្រសួងកសិកម្ម រុក្ខាប្រមាញ់ និងនេសាទ បានប្រកាសថា រដូវត្រីធ្វើប្រហុកបានមកដល់ដំបូងនៅថ្ងៃ ៥-៩ ធ្នូ។
ទោះជាបែបណាក្ដីមានប្រជាពលរដ្ឋមួយចំនួនមានការខកចិត្តនឹងតម្លៃត្រីដែលបានឡើងដ៏ខ្ពស់កប់ពពកមិនធ្លាប់មាន ហើយមានអ្នកខ្លះបានសម្រេចវិលត្រឡប់ទៅផ្ទះវិញដើម្បីរង់ចាំវគ្គបន្ទាប់ដែលនឹងមកដល់នៅចុងខែធ្នូឆ្នាំនេះ ឬដើមខែមករាឆ្នាំក្រោយ។ ប៉ុន្តែសម្រាប់អ្នកជំនួញធ្វើប្រហុកទុកលក់យកចំណេញមួយចំនួនបានបន្តស្នាក់នៅក្នុងរាជធានីភ្នំពេញដើម្បីប្រមូលទិញត្រីធ្វើប្រហុកតាមតម្រូវការរបស់ពួកគេដោយមិនខ្វល់អំពីតម្លៃឡើយ។
អ្នកស្រី អ៊ុក ចន្ធី អាយុ ៤៥ ឆ្នាំ មកពីខេត្តកំពង់ស្ពឺបានប្រាប់ភ្នំពេញប៉ុស្តិ៍ថា គាត់បានចំណាយពេល ២ ថ្ងៃ មកសង្កាត់គីឡូម៉ែត្រលេខ ៦ ខណ្ឌឫស្សីកែវ រាជធានីភ្នំពេញដើម្បីទិញត្រីធ្វើប្រហុក ប៉ុន្តែដោយសារតម្លៃត្រីនៅដើមរដូវក្នុងឆ្នាំនេះថ្លៃខ្ពស់ខ្លាំងពេកគាត់ក៏សម្រេចចិត្តវិលត្រឡប់ទៅផ្ទះវិញដើម្បីរង់ចាំវគ្គបន្ទាប់នៃរដូវត្រីត្រូវដែលនឹងមកដល់នាចុងឆ្នាំនេះ ឬដើមខែមករា ឆ្នាំ ២០២០ ខាងមុខនេះ។
អ្នកស្រីបានបញ្ជាក់ថា៖ «ខ្ញុំមានលុយ ២០ ម៉ឺនរៀលថា នឹងទិញត្រីធ្វើប្រហុកឲ្យបាន ២០-៣០ គីឡូ និងធ្វើត្រីឆ្អើរឲ្យបាន ១០០-២០០ ចង្កាក់ទុកសម្រាប់បរិភោគក្នុងគ្រួសារនៅពេលជីវភាពខ្វះខាត។ ប៉ុន្តែឥឡូវនេះត្រីវាថ្លៃពេក ត្រីប្រហុកតូចៗស្ទើរមិនបាន ២ ធ្នាប់ដៃផង ១ គីឡូថ្លៃពី ៣ ០០០ រៀល ទៅ ៣ ៥០០ រៀល ទៅហើយ អ៊ីចឹងទេខ្ញុំមានតែត្រឡប់ទៅផ្ទះវិញសិន ចាំវគ្គក្រោយចាំមកទៀត»។
បើតាមអ្នកស្រី ចន្ធី ត្រីប្រហុកកាលពីឆ្នាំមុននៅតំបន់ដាយត្រីក្នុងសង្កាត់គីឡូម៉ែត្រលេខ ៦ មានតម្លៃត្រឹមតែ ១ ៥០០ រៀលទៅ ១ ៧០០ រៀលប៉ុណ្ណោះ ក្នុង ១ គីឡូគឺទាបជាងឆ្នាំនេះទ្វេដង។
ស្រដៀងគ្នានេះដែរកម្មករនេសាទជនជាតិខ្មែរអ៊ិស្លាមម្នាក់ ដែលធ្វើការនៅបែដាយត្រីក្នុងសង្កាត់គីឡូម៉ែត្រលេខ ៦ លោក ម៉ាត់ សារី ក៏បានទទួលស្គាល់ដែរថា តម្លៃត្រីប្រហុកនៅឆ្នាំនេះពិតជាថ្លៃជាងឆ្នាំមុនៗមែន។
លោក សារី ថ្លែងថា៖ «ប្រសិនបើទៅទិញផ្ទាល់ដល់បែដាយត្រី តម្លៃត្រីក្នុង ១ គីឡូថ្លៃពី ២ ០០០-២ ៥០០ រៀលប៉ុណ្ណោះ ប៉ុន្តែបើទិញតពីឈ្មួញកណ្ដាលដែលគេដឹកតាមទូកយកមកលក់ដល់ទីតាំងរោងធ្វើត្រីប្រហុកគឺមានតម្លៃពី ៣ ០០០-៣ ៥០០ រៀលក្នុង ១ គីឡូ» ។
បើតាមលោក សារី រដូវត្រីប្រហុកនៅឆ្នាំនេះអាចនឹងអូសបន្លាយរហូតដល់ខែដើមខែកុម្ភៈ ឆ្នាំ ២០២០។
ក្នុងដំណើរចុះទៅពិនិត្យការចាប់ត្រីនៅតាមដាយត្រីនីមួយៗតាមដងទន្លេសាបកាលពីថ្ងៃសៅរ៍ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានថ្លែងដោយទទួលស្គាល់ថា ត្រីនៅឆ្នាំនេះរាងខ្សត់ជាងឆ្នាំកន្លងទៅដោយសារនៅរដូវវស្សាឆ្នាំនេះទឹកឡើងយឺត ហើយនៅពេលស្រកវិញលឿន ដែលជាហេតុធ្វើឱ្យត្រីពងកូនមិនបានច្រើន។
លោកបានបញ្ជាក់ថា៖ «ដោយសារការខ្សត់ត្រីនេះហើយដែលជាហេតុនាំឲ្យតម្លៃត្រីប្រហុកឆ្នាំនេះត្រូវឡើងថ្លៃជាងឆ្នាំកន្លងទៅ»។
យោងតាមរបាយការណ៍ស្តីពីសភាពការណ៍កសិកម្ម រុក្ខាប្រមាញ់ និងនេសាទប្រចាំខែតុលា និងទិសដៅអនុវត្តន៍របស់ក្រសួងកសិកម្មគឺសម្រាប់ការនេសាទទឹកសាប ដាយត្រី ឬក៏ទីតាំងប្រមូលផលត្រី អនុវត្តបាន ២ ៥៤០ តោនស្មើនឹង ២១ ភាគរយ នៃផែនការ ១២ ០០០ តោន ហើយបើប្រៀបធៀបនឹងរយៈពេលដូចគ្នាក្នុងឆ្នាំ ២០១៨ គឺមានការថយចុះ ៣៣០ តោន៕