.jpg)
ពលរដ្ឋមកពីកោះរ៉ុងពេលសម្រាកនៅមន្ទីរពេទ្យពីថ្ងៃ ២៧ កក្កដា។ រូប ហ្វេសប៊ុក
ព្រះសីហនុៈ មន្ទីរសុខាភិបាលខេត្តព្រះសីហនុបានឲ្យដឹងថា មានពលរដ្ឋចំនួន ១៤ នាក់ រស់នៅក្នុងភូមិដើមថ្កូវ សង្កាត់កោះរ៉ុងដែលមានអាការក្តៅខ្លួន និងមានចេញកន្តួលក្រហមកំពុងសម្រាកព្យាបាលនៅមន្ទីរពេទ្យបង្អែកខេត្តព្រះសីហនុ ដើម្បីរង់ចាំលទ្ធផលឈាមដែលក្រុមវេជ្ជបណ្ឌិតនឹងវិនិច្ឆ័យថាជាជំងឺអ្វីស្របពេលដែលកម្ពុជាទើបមានផ្ទុះជំងឺឈីក។
កាលពីថ្ងៃទី ២៧ ខែកក្កដា មានការផ្ទុះឡើងនូវអ្នកជំងឺជាច្រើននៅក្នុងសង្កាត់ខាងលើដោយមានអ្នកខ្លះមានអាការក្តៅខ្លួន មានឡើងកន្ទួលក្រហម និងបានស្វែងរកសេវាព្យាបាលនៅមន្ទីរពេទ្យរដ្ឋ និងមានអ្នកខ្លះបានស្វែងរកសេវាព្យាបាលនៅមន្ទីរពេទ្យឯកជន។ នេះបើតាមលោក ហេង គឹមអាន នាយប៉ុស្តិ៍នគរបាលរដ្ឋបាលសង្កាត់កោះរ៉ុងបានប្រាប់ភ្នំពេញប៉ុស្តិ៍កាលពីម្សិលមិញ។
លោកបន្តថា៖ «បាទបង មានការផ្ទុះច្រើនមែនជិត ២០ នាក់ ដំបូងពួកគាត់ក្តៅខ្លួនធម្មតា។ តែខ្ញុំមិនដឹងព័ត៌មានលម្អិតទេ ព្រោះពេលពួកគាត់អត់ស្រួលខ្លួនហ្នឹង ពួកគាត់បានឡើងមកខេត្តរកសេវាព្យាបាលនៅពេទ្យខេត្តដើម្បីពិនិត្យសុខភាព»។
លោកស្រី លឹម សាមាន ប្រធានមន្ទីរសុខាភិបាលខេត្តព្រះសីហនុបានប្រាប់ភ្នំពេញប៉ុស្តិ៍កាលពីម្សិលមិញថា គិតត្រឹមថ្ងៃទី ២៨ កក្កដា គឺមានអ្នកជំងឺដែលមានអាការបែបនេះចំនួន ១៤ នាក់ កំពុងសម្រាកនៅក្នុងមន្ទីរពេទ្យបង្អែកខេត្ត ដើម្បីរង់ចាំលទ្ធផលឈាម។
លោកស្រីបានថ្លែងថា ក្រុមវេជ្ជបណ្ឌិតជំនាញមិនទាន់អាចវិនិច្ឆ័យថាជាជំងឺអ្វីនៅឡើយទេដោយរង់ចាំលទ្ធផលឈាមពីមន្ទីរពេទ្យពិសោធន៍ប៉ាស្ទ័រជាមុនសិន។
លោកស្រីបញ្ជាក់ថា៖ «អ្នកជំងឺហ្នឹងមកពីសង្កាត់កោះរ៉ុង ចំណែកតំបន់ផ្សេង គាត់ឈឺ គាត់ក្តៅខ្លួន គាត់មកមន្ទីរពេទ្យគឺព្យាបាជំងឺធម្មតា។ យើងមិនទាន់ហ៊ានសន្និដ្ឋានថា ដូចករណីនៅខេត្តបន្ទាយមានជ័យទេយើងរង់ចាំលទ្ធផលពិនិត្យឈាមសិន»។
លោកស្រី លឹម សាមាន បានស្នើឲ្យពលរដ្ឋចូលរួមអនុវត្តវិធានការអនាម័យ និងកម្ចាត់ជម្រកមូសខ្លាដែលនាំឲ្យកកើតមូសបង្កជាជំងឺ ហើយត្រូវស្លៀកពាក់ខោអាវវែង និងសម្រាន្តក្នុងមុងជានិច្ច។ លោកស្រីថា ត្រូវស្វែងរកសេវាពិគ្រោះជំងឺឲ្យបានទាន់ពេលនៅតាមមណ្ឌលសុខភាព ឬមន្ទីរពេទ្យបង្អែកដែលនៅជិតបំផុតក្នុងករណីដែលមានរោគសញ្ញាដូចខាងលើ។
ក៏ប៉ុន្តែលោក ឃាង ភារម្យ អ្នកនាំពាក្យសាលាខេត្តព្រះសីហនុបានប្រាប់ពីម្សិលមិញថាករណីខាងលើនេះ បើតាមការសន្និដ្ឋានជំហានដំបូងពីក្រុមគ្រូពេទ្យគឺជាជំងឺឈីក ឬស្អូច។
តែទោះជាយ៉ាងណាអ្នកជំងឺទាំងអស់ត្រូវបានយកសំណាកទៅវិទ្យាស្ថានប៉ាស្ទ័រដើម្បីធ្វើកោសល្យវិច័យបន្ថែម។
កាលពីថ្ងៃទី ២៣ កក្កដា ក្រសួងសុខាភិបាលបានប្រកាសពីករណីផ្ទុះឡើងនៃជំងឺឈីក (Chikunngunya) នៅក្នុងភូមិមួយចំនួននៃសង្កាត់ប៉ោយប៉ែត ខេត្តបន្ទាយមានជ័យដែលបានកើតឡើងលើពលរដ្ឋចំនួន ១៦៨ នាក់ដោយមានចេញរោគសញ្ញាគ្រុនក្តៅ ឡើងកន្តួលក្រហមលើស្បែក និងឈឺសន្លាក់ដៃជើង។
លោក ឡេ ច័ន្ទសង្វាត ប្រធានមន្ទីរសុខាភិបាល ខេត្តបន្ទាយមានជ័យប្រាប់ភ្នំពេញ-ប៉ុស្តិ៍ពីម្សិលមិញថា គិតត្រឹមថ្ងៃទី ២៨ កក្កដា អ្នកជំងឺទាំងអស់ដែលឆ្លងជំងឺឈីកដែលបន្តសម្រាកនៅមន្ទីរពេទ្យ គឺមានអាការធម្មតាដោយមិនមាននរណាម្នាក់ប៉ះពាល់ដល់អាយុជីវិតនោះទេ។
លោកបានបន្តថា ចំពោះស្ថានភាពនៃការផ្ទុះជំងឺនេះក៏ត្រូវបានគ្រប់គ្រងផងដែរ បន្ទាប់ពីក្រុមជំនាញបានចុះបាញ់ថ្នាំសម្លាប់មូស និងបន្តដាក់ថ្នាំអាបែតនៅក្នុងភូមិដែលសង្ស័យមានមូសចម្លងជំងឺទាំងនេះ។
លោកបញ្ជាក់ថា៖ «មកទល់ពេលនេះអ្នកជំងឺមួយចំនួនមិនទាន់ចេញពីមន្ទីរពេទ្យទេ។ ប៉ុន្តែពួកគាត់មិនមានបញ្ហាអីធ្ងន់ធ្ងរដល់សុខភាពទេ»។
តាមសេចក្តីប្រកាសព័ត៌មានរបស់ក្រសួងសុខាភិបាលឲ្យដឹងថា ជំងឺគ្រុនឈីក គឺជាបញ្ហាសុខភាពសាធារណៈមួយដែលប្រឈមនឹងការឆ្លងពីបុគ្គលម្នាក់ទៅបុគ្គលម្នាក់ ពីគ្រួសារ ១ ទៅគ្រួសារ ១ ពីភូមិ ១ ទៅភូមិ ១ ទៀតតាមរយៈមូសខ្លាញីខាំដែលចល័តគ្រប់ទីកន្លែង។
យ៉ាងណាក្ដី ក្រសួងសុខាភិបាលបានបញ្ជាក់ថា ជំងឺគ្រុនឈីកនេះមិនបណ្តាលឲ្យប៉ះពាល់ដល់អាយុជីវិតទេ តែនឹងជាសះស្បើយវិញក្នុងពេល ១ សប្តាហ៍ ឬយូរជាងនេះ ហើយអាចធ្វើឲ្យអ្នកជំងឺឈឺសន្លាក់ដៃជើងយូរឆ្នាំ។ ប៉ុន្តែប្រសិនបើអ្នកកើតជំងឺឈីកក្នុងពេលកំពុងមានជំងឺផ្សេងទៀតដូចជា ជំងឺគ្រុនឈាម គ្រុនចាញ់ ជាដើមគឺអាចប៉ះពាល់អាយុជីវិតបាន។
ជាមួយគ្នានេះក្រសួងសុខាភិបាលបានណែនាំថា ការទប់ស្កាត់ជំងឺឈីកក៏ដូចជា ការទប់ស្កាត់ជំងឺគ្រុនឈាមដែរគឺ ផ្អែកទៅលើការការពារកុំឲ្យមានមូសខ្លាញីខាំតាមរយៈការកម្ចាត់វត្ថុដក់ទឹកដែលជាជម្រកនាំឲ្យកកើតសត្វមូស៕
