ភ្នំពេញៈ អាជ្ញាធរនៅតាមបណ្តាខេត្តមួយចំនួននិយាយថា ពលរដ្ឋនៅតែអាចធ្វើដំណើរឆ្លងកាត់ពីខេត្តមួយទៅខេត្តមួយទៀតបាន ដោយមិនទាន់មានការតម្រូវឱ្យធ្វើចត្តាឡីស័កនៅឡើយទេ ប៉ុន្តែអាជ្ញាធរខេត្តនីមួយៗ ត្រូវធ្វើការត្រួតពិនិត្យ និងណែនាំនូវវិធានសុខាភិបាល ចំពោះអ្នកដំណើរទាំងនោះដើម្បីទប់ស្កាត់ការឆ្លងរាលដាលជំងឺកូវីដ ១៩។
លោក ចាន់ ថា អភិបាលរងខេត្តព្រៃវែង បានប្រាប់ ភ្នំពេញ ប៉ុស្តិ៍ ម្សិលមិញថា ការតម្រូវឱ្យអ្នកដំណើរធ្វើចត្តាឡីស័កពេលពួកគាត់ធ្វើដំណើរចូលទៅក្នុងខេត្តណាមួយ គឺមិនទាន់មានគោលការណ៍ណែនាំពីរាជរដ្ឋាភិបាលឡើយ។
លោកថ្លែងថា៖ «មិនទាន់មានការសម្រេចឱ្យមានការធ្វើចត្តាឡីស័កទេ ពេលឆ្លងកាត់ពីខេត្តមួយទៅខេត្តមួយទៀត គឺយើងមិនទាន់មានគោលការណ៍នេះឡើយ ប៉ុន្តែយើងត្រូវគ្រប់គ្រងនូវអត្តសញ្ញាណរបស់បុគ្គលនោះ និងត្រូវដឹងថា តើគាត់ទៅតំបន់ណា ឬកន្លែងណាក្នុងខេត្តនោះ ព្រមទាំងធ្វើការណែនាំពីវិធានសុខាភិបាលដល់ពួកគាត់ដែរ»។
ប៉ុន្តែសម្រាប់ពលករខ្មែរ ដែលមកពីប្រទេសថៃ គឺត្រូវតម្រូវឱ្យធ្វើចត្តាឡីស័កជាដាច់ខាត ដែលនេះជាគោលការណ៍រួម របស់រាជរដ្ឋាភិបាល និងក្រសួងសុខាភិបាល។ ក្រៅពីនេះ ករណីបើសិនជាមានមនុស្សដែលមកពីតំបន់កំពុងមានការប្រឈមខ្ពស់ដូចជាខេត្តព្រះសីហនុ ក៏ខាងអាជ្ញាធរខេត្តរបស់លោក នឹងធ្វើការពិនិត្យពិចារណា លើវិធានការចាំបាច់ណាមួយដែរ។
ចំណែកអ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានប្រាប់ផងដែរថា ការធ្វើចត្តាឡីស័កលុះត្រាតែមានករណីសង្ស័យឬមានជាប់ពាក់ព័ន្ធជាមួយអ្នកវិជ្ជមានកូវីដ ១៩។
លោកបញ្ជាក់ថា៖ «រដ្ឋបាលខេត្តមិនអនុញ្ញាតឱ្យមានការចល័តចេញ-ចូលខេត្ត ក្នុងករណីមិនចាំបាច់។ ក្រៅពីរថយន្តដឹកទំនិញ អ្នកជំងឺ កម្មករ-កម្មការនី និងករណីចាំបាច់បន្ទាន់ គឺត្រូវដាក់លិខិតស្នើសុំការអនុញ្ញាតមករដ្ឋបាលខេត្ត ដើម្បីពិនិត្យលើលក្ខខណ្ឌចាំបាច់ ដែលត្រូវសម្រេចថាអនុញ្ញាតឬមិនអនុញ្ញាត»។
សម្រាប់ខេត្តកំពតវិញ លោក វិត វឌ្ឍនា នាយករដ្ឋបាលខេត្តនេះថ្លែងថា ខេត្តលោកមិនមានការតម្រូវឱ្យអ្នកដំណើរចូលក្នុងខេត្តនេះ ត្រូវធ្វើចត្តាឡីស័កទេ ប៉ុន្តែត្រូវតម្រូវឱ្យមានការពិនិត្យកម្តៅ សាកសួរព័ត៌មានពីការធ្វើដំណើរ និងស្កេន QR Code។
លោកថា៖ «យើងមានដាក់ប៉ុស្តិ៍សម្រាប់ត្រួតពិនិត្យនៅតាមច្រកព្រំដែនខេត្តរបស់យើង ដើម្បីការពារការរីករាលដាល នៃជំងឺកូវីដ ១៩ ហើយបើមានអ្នកណាសង្ស័យយើងត្រូវនាំពួកគាត់ទៅធ្វើចត្តាឡីស័ក និងពិនិត្យសុខភាពគាត់»។
ខាងរដ្ឋបាលខេត្តស្ទឹងត្រែង ក៏បានចេញសេចក្តីប្រកាសព័ត៌មាននៅថ្ងៃទី ៣១ មីនាផងដែរថា មកទល់នឹងពេលនេះ ការធ្វើដំណើររបស់ប្រជាពលរដ្ឋនៅតែប្រព្រឹត្តទៅជាធម្មតា ប៉ុន្តែត្រូវចូលរួមអនុវត្តវិធានការសុខាភិបាល និងច្បាប់ លិខិតបទដ្ឋានគតិយុត្តជាធរមានឲ្យបានម៉ឺងម៉ាត់។
សេចក្តីប្រកាសនេះបន្តថា៖ «ចំពោះការកំណត់ ឲ្យអ្នកដំណើរណាម្នាក់ ធ្វើចត្តាឡីស័ក នៅមណ្ឌលចត្តាឡីស័ក ឬនៅមូលដ្ឋាន គឺត្រូវស្ថិតក្នុងលក្ខណៈវិនិច្ឆ័យសុខាភិបាល មានការផ្តល់ប្រឹក្សាការយោបល់បច្ចេកទេស ពីមន្ត្រីជំនាញ សុខាភិបាល និងមានគោលការណ៍សម្រេចពីថ្នាក់ដឹកនាំខេត្ត»។
នៅថ្ងៃទី ៣១ មីនា លោកនាយករដ្ឋមន្ត្រី ហ៊ុន សែន ក៏បានចេញនូវសារាចរណែនាំពីវិធានការបង្ការ និងទប់ស្កាត់ការរាតត្បាតនៃជំងឺកូវីដ ១៩ នៅក្នុងឱកាសឈប់សម្រាកនៃពិធីបុណ្យចូលឆ្នាំខ្មែរប្រពៃណីជាតិ ដែលនឹងត្រូវប្រារព្ធធ្វើឡើងរយៈពេល ៣ ថ្ងៃពីថ្ងៃទី ១៤ ដល់ថ្ងៃទី ១៦ ខែ មេសា ឆ្នាំ ២០២១។
លោកនាយករដ្ឋមន្ត្រី បានស្នើឱ្យក្រសួង-ស្ថាប័នមានសមត្ថកិច្ចពាក់ព័ន្ធ និងអាជ្ញាធរដែនដីគ្រប់លំដាប់ថ្នាក់ ត្រូវចាត់វិធានការចាំបាច់នានា ដើម្បីធានាសន្តិសុខ សុវត្ថិភាព និងសណ្តាប់ធ្នាប់សាធារណៈឱ្យបានល្អប្រសើរ។
លោកបញ្ជាក់ថា៖ «ត្រូវធានានូវការគោរព និងអនុវត្តវិធានការសុខាភិបាលបង្ការ និងទប់ស្កាត់ការឆ្លងរាលដាលនៃជំងឺកូវីដ ១៩ ដោយហ្មត់ចត់ និងខ្ជាប់ខ្ជួន ទាំងនៅក្នុងការគ្រប់គ្រងចរាចរណ៍ ការដឹកជញ្ជូនមនុស្ស និងការធ្វើដំណើរឆ្លងកាត់រាជធានី-ខេត្ត និងទាំងនៅតាមទីតាំងសាធារណៈនានា»។
លោកក៏បានស្នើឱ្យប្រជាពលរដ្ឋធ្វើការជួបជុំក្រុមគ្រួសារ តាមគេហដ្ឋានរៀងៗខ្លួន ចៀសវាងការធ្វើដំណើរចេញក្រៅផ្ទះដោយមិនចាំបាច់ និងចៀសវាងរៀបចំពិធីផ្សេងៗ រួមទាំងពិធីសាសនាឬការជួបជុំគ្នាទាំងឡាយណា ដែលមានសភាពអ៊ូអរ និងមានមនុស្សចូលរួមច្រើន និងមិនត្រូវដំឡើងថ្លៃសេវាដឹកជញ្ជូនគ្រប់ប្រភេទ៕
វីដេអូ៖