កណ្តាល: យោងតាមប្រភពពីប្រជាពលរដ្ឋមួយចំនួនក្នុងចំណោម ២០០ គ្រួសាររស់នៅក្នុងភូមិអន្លង់ និងភូមិបឹងក្រចាប់ជើង ឃុំព្រែកតាមាក់ ស្រុកខ្សាច់កណ្តាល ខេត្តកណ្ដាលបានអះអាងពីការព្រួយបារម្ភចំពោះសកម្មភាពឈូសឆាយក្នុងតំបន់បឹងធម្មជាតិដែលអាចមានការឃុបឃិតគ្នារវាងអាជ្ញាធរមូលដ្ឋាន និងឈ្មួញដើម្បីទន្ទ្រានកាន់កាប់ដីជាលក្ខណៈឯកជន ប៉ុន្ដែអាជ្ញាធរបដិសេធដោយអះអាងថា នេះជាការអភិវឌ្ឍភូមិឃុំ។
ពលរដ្ឋម្នាក់ក្នុងចំណោមអ្នកភូមិរស់នៅភូមិអន្លង់បានថ្លែងដោយសុំមិនបញ្ចេញឈ្មោះបានឲ្យដឹងកាលពីថ្ងៃម្សិលមិញថា លោកមានការសោកស្តាយ និងព្រួយបារម្ភនូវការបាត់បង់បឹងធម្មជាតិមួយទំហំជាង ៤ ហិកតាដែលជាសម្បត្តិរួមក្នុងភូមិនេះ។ អាជ្ញាធរភូមិឃុំបានឃុបឃិតគ្នាជាមួយឈ្មួញផ្សេងទៀតយកត្រាក់ទ័រមកឈូសឆាយដីបឹងនោះព្រមទាំងចាក់ដីលុបប្រមាណជាង ១០ ភាគរយនៃផ្ទៃបឹងហើយ។
លោកបានថ្លែងថា៖ «ខ្ញុំអាយុជិត ៤០ ឆ្នាំហើយកើតមកឃើញបឹងនេះតែម្តង។ បឹងនេះធំណាស់កាលពីមុនតែឥឡូវកាន់តែរួមតូចទៅៗ ដោយសារប្រជាពលរដ្ឋនៅជាប់បឹងនេះចេះតែទន្ទ្រានចូលដីបឹង ហើយបច្ចុប្បន្នកំពុងមានឈ្មួញចាក់ដីលុបយកថែមទៀតដើម្បីធ្វើកម្មសិទ្ធិផ្ទាល់ខ្លួនទៀត»។
លោកបានឲ្យដឹងទៀតថា ឈ្មួញដែលទិញដីបឹងនេះឈ្មោះ ពោច សួរ បានឃុបឃិតគ្នាជាមួយមេភូមិ និងមេឃុំបានលុបបឹងនេះដោយមិនមានការប្រជុំ ឬធ្វើវេទិកាសាធារណៈឲ្យប្រជាជនក្នុងភូមិបានដឹងទេ។
លោកថ្លែងថា៖ «ខ្ញុំសុំជំរុញឲ្យអាជ្ញាធររក្សាបឹងធម្មជាតិនេះវិញដើម្បីទុកទីតាំងស្ដុកទឹកនៅរដូវភ្លៀងកុំឲ្យមានទឹកជន់លិចភូមិ និងផ្ទះពលរដ្ឋ»។
ពលរដ្ឋម្នាក់ទៀតរស់នៅភូមិបឹងក្រចាប់ជើងសុំមិនបញ្ចេញឈ្មោះដែរ បានឲ្យដឹងថាបឹងនេះជាកន្លែងរំដោះទឹកយ៉ាងសំខាន់ក្នុងភូមិនៅរដូវវស្សាស្តុកទឹកសម្រាប់ស្រោចស្រពដំណាំ និងការប្រើប្រាស់ទឹកក្នុងមធ្យោបាយផ្សេងៗទៀតរបស់អ្នកភូមិ និងជាជម្រកត្រី និងសត្វពាហនៈជាដើម។
លោកថ្លែងថា៖ «បើការលុបបឹងនេះក្នុងរូបភាពនៃការដោះដូរ ឬរូបភាពនៃការអភិវឌ្ឍអ្វីមួយ វាមិនសមហេតុផលទេ ព្រោះអាជ្ញាធរគេមានកញ្ចប់ថវិកាសម្រាប់អភិវឌ្ឍន៍ភូមិឃុំស្រាប់ហើយ»។
លោកថ្លែងថា៖ «បើលុបគឺយើងបាត់បង់បឹងទៅឈ្មួញទាំងស្រុង តែបើឈ្មួញស្តារយកដីក៏យើងនៅបឹងសម្បូរទឹក សម្បូរត្រីដែរ។ ពួកខ្ញុំជាពលរដ្ឋគាំទ្រលើការស្តារជាងការលុបបឹងនេះ។ ពួកខ្ញុំចង់ឲ្យរក្សាបឹងនេះដូចដើម ឬក៏ឈ្មួញស្តារយកតែអាចម៍ដីបានធ្វើដូចនេះយើងជាប្រជាពលរដ្ឋបានបឹងមានទឹកច្រើនប្រើប្រាស់ផង និងមិនបាត់បង់ផ្ទៃបឹងផង ចំណែកឈ្មួញគេអាចយកអាចម៍ដីសម្រាប់អាជីវកម្មក៏យកទៅ»។
លោក គ្រុយ ឈាងលីន មេភូមិបឹងក្រចាប់ជើងបានថ្លែងពីម្សិលមិញដោយអះអាងថា អាជ្ញាធរមិនបានអនុញ្ញាតឲ្យមានការលុបបឹងធម្មជាតិមួយនេះទេដោយគ្រាន់តែកាយប្រវែង ៦ ម៉ែត្រដើម្បីធ្វើមុខទឹកសម្រាប់បង្ហូរទឹកនៅពេលជន់លិចខ្លាំងប៉ុណ្ណោះ។ បឹងធម្មជាតិនេះជាសម្បត្តិរួមសម្រាប់ប្រើប្រាស់ក្នុងភូមិដោយមិនមានការទិញ ឬលក់ធ្វើជាកម្មសិទ្ធិផ្ទាល់ខ្លួនទេ។
លោកថ្លែងថា៖ «យើងកាយធ្វើប្រឡាយទឹកទេគ្មានការទិញ ឬលក់អ្វីទេយើងធ្វើនេះដើម្បីអភិវឌ្ឍភូមិឃុំយើង ដើម្បីកុំឲ្យទឹកលិចភូមិនៅពេលមានភ្លៀងមកច្រើននៅរដូវវស្សា។ ខ្ញុំក៏គិតដូចពួកគាត់ដែរបើលុបបឹងនេះប្រហែលជាត្រូវទឹកលិចភូមិហើយអ៊ីចឹងយើងអត់លុបទេ គឺធ្វើប្រឡាយទឹកវិញ»។
លោក ឆាយ សេន មេឃុំព្រែកតាមាក់ដែលរងការចោទប្រកាន់ពីពលរដ្ឋនេះបានថ្លែងថា អាជ្ញាធរគ្រាន់តែយកត្រាក់ទ័រទៅធ្វើផ្លូវទឹក (ប្រឡាយទឹក) ឈូសឆាយដីព្រៃសម្អាតបាតបឹងនោះប៉ុណ្ណោះប៉ុន្ដែគ្មានគោលបំណងលុបបឹងធម្មជាតិនោះទេ។ ការឈូសឆាយសម្អាតបាតបឹងនេះដោយសារបាតបឹងមានព្រៃឈើដុះច្រើនពេកដែលធ្វើឲ្យរាក់បឹង និងស្ដុកទឹកបានតិចទើបអាជ្ញាធរកាយព្រៃតូចៗនោះចេញ។
លោកបញ្ជាក់ថា៖ «ខ្ញុំយល់ថា ដីបឹងនោះយើងមិនបាច់កាយឲ្យជ្រៅថែមទៀតទេព្រោះខ្ញុំបានសម្អាតព្រៃតូចៗបាតបឹងហ្នឹងរួចហើយអាចស្តុកទឹកបានច្រើនហើយក៏មិនបាច់ធ្វើអ្វីទៀតដែរទុកវាចោលអ៊ីចឹងទៅធម្មជាតិអ៊ីចឹងទៅ។ ពលរដ្ឋចោទយើងគឺគាត់មិនទាន់យល់ពីការអភិវឌ្ឍរបស់យើង អ៊ីចឹងគាត់តែចេះចោទយើងផ្ដេសផ្ដាស់»។
លោក ប៊ុន ផេង អភិបាលស្រុកខ្សាច់កណ្តាលបានថ្លែងពីម្សិលមិញថា កន្លងមកប្រជាពលរដ្ឋនៅតំបន់នោះតែងតែនាំគ្នាអះអាងថា ជាដីរបស់ពួកគាត់ ហើយក៏មានអ្នករំលោភដីបឹងយកមួយចំនួន ប៉ុន្ដែអាជ្ញាធរឃាត់ទាន់ពេលវេលា។ សព្វថ្ងៃដីបឹង ៤ ហិកតាដែលនៅសេសសល់នេះមិនអនុញ្ញាតឲ្យមានអ្នករំលោភយកទៀតទេគឺរក្សាទុកជាសម្បត្តិរដ្ឋ។
លោកបន្តថា កាលពីខែមុនពិតជាមានការរំលោភបំពានយកដីបឹង ប៉ុន្ដែលោកបានទៅធ្វើការទប់ស្កាត់មិនឲ្យមានការឈូសឆាយទិញ ឬលក់ដូរទេ ដោយលោកបានដាក់សំណើទៅរដ្ឋបាលខេត្តកណ្ដាលឲ្យចុះបញ្ជីដីនេះជារបស់រដ្ឋ។ លោកបានចាត់ឲ្យមន្ត្រីភូមិឃុំទប់ស្កាត់ ដើម្បីកុំឲ្យមានការចាក់ដីឈូសឆាយដីបឹងនោះបន្តទៀត។
លោកបញ្ជាក់៖ «នៅប៉ុន្មានថ្ងៃនេះខ្ញុំទទួលដំណឹងថា មានគេលួចចាក់ដីថែមទៀតហើយនៅថ្ងៃទី ២៥ ខែមីនានេះខ្ញុំបានចាត់មន្ត្រីជំនាញខ្ញុំចុះទៅឃាត់ម្ដងទៀតហើយយើងបានព្រមាន និងធ្វើកិច្ចសន្យាជាមួយម្ចាស់គ្រឿងចក្រ ប៉ុន្ដែបើគាត់នៅតែរំលោភបំពានដីបឹងទៀតយើងនឹងចាប់ទាំងគ្រឿងចក្រ និងមនុស្សបញ្ជូនទៅតុលាការ។ យើងបានស្គាល់ម្ចាស់គ្រឿងចក្រហ្នឹង ហើយបានហៅមកណែនាំរួចហើយ»។
ទោះជាយ៉ាងណាក៏ដោយលោក ពោច សួរ ដែលរងការចោទប្រកាន់ជាឈ្មួញទិញដីបឹងនោះពីម្សិលមិញមិនទាន់អាចទាក់ទងសុំការបំភ្លឺជុំវិញការចោទប្រកាន់នេះបានទេដោយលោកបានចុចផ្ដាច់ទូរស័ព្ទចោលវិញ៕