.jpg)
ទិដ្ឋភាពកន្លែងកាយដីធ្វើព្រលានយន្តហោះដែលពលរដ្ឋថាខុសទីតាំងកំណត់។ សហការី
មណ្ឌលគិរីៈ ពលរដ្ឋជាច្រើនគ្រួសារនៅភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី កំពុងបារម្ភអំពីការបាត់បង់ដីចម្ការ និងដីសហគមន៍សម្រាប់កប់សព បន្ទាប់ពីមានគ្រឿងចក្រកាយដីសម្រាប់គម្រោងសង់ព្រលានយន្តហោះធ្វើឡើងខុសពីទីតាំងដែលអាជ្ញាធរបានកំណត់ និងរំលោភចូលដីរបស់ពួកគាត់។
លោក សារឿន ប៉ូរ៉ាត់ អាយុ ៣២ ឆ្នាំ បានប្រាប់ភ្នំពេញប៉ុស្ដិ៍កាលពីម្សិលមិញថា កាលពីរសៀលថ្ងៃទី ២ ខែ មិថុនា មានគ្រឿងចក្រ ១ គ្រឿង បានធ្វើសកម្មភាពកាយដីជម្រៅប្រហែល ១ ម៉ែត្រ ដើម្បីកំណត់ព្រំប្រទល់សម្រាប់គម្រោងសាងសង់ព្រលានយន្តហោះក្នុងខេត្តមណ្ឌលគិរី។ ប៉ុន្តែលោកអះអាងថា ការកាយដីនោះគឺធ្វើឡើងខុសពីទីតាំង ដែលបានបោះបង្គោលទុកសម្រាប់សង់ព្រលានយន្តហោះ ហើយបានរំលោភមកចូលដីពលរដ្ឋប្រវែងជាង ១ គីឡូម៉ែត្រ។
លោកបន្តថា មុនពេលកាយដីនេះ អាជ្ញាធរពុំបានពិភាក្សាជាមួយពលរដ្ឋក្នុងភូមិជាមុនឡើយ។ ប៉ុន្តែលោកថា ក្រោយពីកាយដីបានប្រវែងប្រហែល ២០០ ម៉ែត្រ អ្នកបើកគ្រឿងចក្របានបញ្ឈប់សកម្មភាព និងប្ដូរទៅកាយលើទីតាំងដែលមានការបោះបង្គោលសម្រាប់ធ្វើព្រលានយន្តហោះវិញ បន្ទាប់ពីក្រុមពលរដ្ឋបាននាំគ្នាទៅសួរអ្នកបើកគ្រឿងចក្រនោះដើម្បីសុំមើលឯកសារ និងអ្នកបញ្ជាឱ្យកាយ។
លោកថា៖ «(មូលហេតុនៃការកាយដីហ្នឹង) ខ្ញុំបានសាកសួរទៅអាជ្ញាធរដែរ សួរមេភូមិ និងមេឃុំ គេឆ្លើយថា អត់ដឹងហើយសួរទៅលោកអភិបាលស្រុក គាត់ថា អាហ្នឹងជាកន្លែងគេចតយន្តហោះ ប៉ុន្តែក្នុងគម្រោងដែលបោះបង្គោលហ្នឹង តាមធម្មតា វាមានកន្លែងចត និងកន្លែងស្ដុកសាំងអីក្នុងហ្នឹងអស់ហើយ»។
បើតាមលោក ប៉ូរ៉ាត់ នៅក្នុងដីដែលកាយខុសពីទីតាំងនេះ គឺមួយចំនួនជាដីសហគមន៍សម្រាប់កប់សពរបស់ក្រុមជនជាតិដើមព្នង និងទីតាំងសម្រាប់ឃ្វាលគោក្របីហើយមួយចំនួនទៀតគឺជាចម្ការសម្រាប់ដាំដើមស្វាយចន្ទី និងម្រេចជាដើមដែលពលរដ្ឋសង្ស័យថាអាចប៉ះពាល់ដីពលរដ្ឋជិត ៤០ គ្រួសារ ឬស្មើជិត ១០០ ហិកតា។
លោកបានបញ្ជាក់ថា៖ «កាលពីព្រឹកមិញ [ថ្ងៃចន្ទ] ក្រុមពលរដ្ឋបាននាំគ្នាប្រជុំ និងបានឯកភាពគ្នាលើ ២ ចំណុចដោយទី១ បានស្នើសុំអាជ្ញាធរបកស្រាយឱ្យបានច្បាស់លាស់អំពីការកាយដីខុសពីទីតាំងបង្គោលសម្រាប់ធ្វើព្រលានបែបនេះតើមានបំណងអ្វី? ហើយបើសាងសង់អ្វីមួយមែនគឺត្រូវពិភាក្សាអំពីផលប៉ះពាល់ជាមួយពលរដ្ឋជាមុនសិន និងទី២ ដីសហគមន៍សម្រាប់កប់សពមិនអនុញ្ញាតឱ្យយកទៅអភិវឌ្ឍអ្វីឡើយ និងត្រូវឆ្វៀលទុកដីនោះវិញ»។
លោក សៀក មុន្នី អភិបាលស្រុកអូររាំងបានប្រាប់ភ្នំពេញប៉ុស្ដិ៍កាលពីម្សិលមិញថា ការកាយដីនោះគឺស្ថិតក្នុងទីតាំងត្រូវសាងសង់ហេដ្ឋារចនាសម្ព័ន្ធរបស់គម្រោងបង្កើតព្រលានយន្តហោះ និងមិនខុសទីតាំងដូចមានការលើកឡើងរបស់ពលរដ្ឋឡើយ។
ប៉ុន្តែលោកបានបញ្ជាក់ថា បន្ទាប់ពីមានការតវ៉ា អាជ្ញាធរបានសម្រេចផ្អាកសកម្មភាពកាយដីនោះបណ្ដោះអាសន្នដោយរង់ចាំដោះស្រាយជាមួយពលរដ្ឋជាមុនសិន។
លោកថា៖ «បញ្ហាហ្នឹង ខ្ញុំកំពុងដោះស្រាយជាមួយគាត់ (ពលរដ្ឋ) ហើយខ្ញុំកំពុងប្រជុំជាមួយថ្នាក់ខេត្តដើម្បីដោះស្រាយជូនគាត់»។
ទោះជាយ៉ាងណា ពលរដ្ឋម្នាក់ទៀតឈ្មោះ តែប ខ្វើត អាយុ ៥០ ឆ្នាំ បានលើកឡើងដែរថា ដីរបស់គាត់សរុបទាំងដីកូនៗចំនួន ៥ នាក់ផង គឺមានប្រហែល ១០ ហិកតា ដែលស្ថិតនៅក្បែរកន្លែងបោះបង្គោលគម្រោងបង្កើតព្រលានយន្តហោះ។
លោកបន្តថា ដីទាំងនេះជាដីដែលបន្សល់ទុកតាំងពីដូនតាឱ្យលោកជាអ្នកគ្រប់គ្រងហើយបច្ចុប្បន្នកំពុងដាំដើមស្វាយចន្ទីនិងពោត ប៉ុន្តែត្រូវបានគ្រឿងចក្រចូលកាយរំលោភយកទាំងលោកមិនបានដឹងជាមុន។
លោកថា៖ «ប្រជាពលរដ្ឋឆ្ងល់ ហេតុអីបានជាកាយឆ្ងាយប្រហែល ១ គីឡូដី ខុសពីអាកន្លែងដាក់បង្គោលហ្នឹង »។
មន្ត្រីរដ្ឋាភិបាលធ្លាប់បញ្ជាក់ប្រាប់ភ្នំពេញប៉ុស្ដិ៍ថា ការសិក្សារយៈពេល ៦ ខែ ពីការសាងសង់ព្រលានយន្តហោះថ្មីមួយស្ថិតក្នុងខេត្តមណ្ឌលគិរីនឹងត្រូវចាប់ផ្ដើមនៅឆមាសទី២ ក្នុងឆ្នាំនេះ ហើយការសិក្សាអំពីការបង្កើតព្រលានយន្តហោះនេះ ដើម្បីផ្ដល់ជម្រើសដល់អ្នកទេសចរក្នុងការសន្សំពេលវេលាបានច្រើនក្នុងដំណើរទៅទស្សនាខេត្តមណ្ឌលគិរី ដែលជាតំបន់មានសក្ដានុពលសម្រាប់អេកូទេសចរណ៍។
ជុំវិញបញ្ហានេះ ភ្នំពេញប៉ុស្ដិ៍មិនអាចសុំការអត្ថាធិប្បាយពីលោក អ៊ាង ម៉េងលី មន្ត្រីសម្របសម្រួលសមាគមអាដហុកប្រចាំខេត្តមណ្ឌលគិរីបានទេ កាលពីថ្ងៃម្សិលមិញ ដោយសារទូរស័ព្ទរបស់លោកមិនអាចទាក់ទងបាន៕
