.jpg)
កម្លាំងនគរបាលឃ្លាំមើលអ្នកតវ៉ារឿងជម្លោះដីធ្លីមកពីខេត្តកោះកុងម្សិលមិញ។ ស្រេង ម៉េងស្រ៊ុន
ភ្នំពេញៈ តំណាងប្រជាពលរដ្ឋប្រមាណ ៣០០ នាក់ដែលមិនទាន់មានដំណោះស្រាយពីជម្លោះដីធ្លីជាមួយក្រុមហ៊ុនស្ករអំពៅ លី យ៉ុងផាត់ នៅក្នុងខេត្តកោះកុងប្រមាណជា ១០ ឆ្នាំហើយនោះកាលពីម្សិលមិញបានប្រមូលផ្ដុំគ្នាជាថ្មីទៀតបិទផ្លូវនៅមុខក្រសួងរៀបចំដែនដីប្រហែលជា ១ ម៉ោងខណៈពេលដែលគ្មានមន្ត្រីណាម្នាក់ចេញមកជួបពួកគាត់ដើម្បីផ្ដល់ដំណោះស្រាយ។
លោក ទិត្យ ផេង តំណាងពលរដ្ឋរងគ្រោះដីធ្លីជាង ៣០០ គ្រួសាររស់នៅឃុំដងពែង ស្រុកស្រែអំបិល ខេត្តកោះកុង បានអះអាងថាការសម្រេចមកភ្នំពេញនេះគឺបំណងជំរុញមន្ត្រីក្រសួងដែនដី ព្រមទាំងតាមដានញត្តិដែលដាក់កាលពីសប្ដាហ៍មុនដោយមិនទាន់មានការឆ្លើយតបទៅកាន់ពលរដ្ឋវិញនោះ។
លោក ផេង ថ្លែងថា៖ «យើងបាននាំគ្នាសួរនាំភាគីក្រសួង ប៉ុន្ដែមន្ត្រីទាំងអស់មិនបានឆ្លើយព្រមទាំងដេញប្រជាពលរដ្ឋឲ្យត្រឡប់ទៅវិញ ទើបពួកយើងសម្រេចចិត្តបិទផ្លូវនៅខាងមុខក្រសួងជាងមួយម៉ោង ដើម្បីឲ្យមន្ត្រីឆ្លើយតបតាមការស្នើសុំរបស់ប្រជាពលរដ្ឋ។ នៅពេលបិទផ្លូវភាគីក្រសួងបានហៅតំណាងពលរដ្ឋ ១០ នាក់ចូលជួបពិភាក្សា ប៉ុន្ដែមិនបានលទ្ធផលអ្វីទេ ដោយមន្ត្រីបង្គាប់ឲ្យក្រុមពលរដ្ឋត្រឡប់ទៅវិញ ដើម្បីរង់ចាំការដោះស្រាយជាមួយគណៈកម្មការចម្រុះខេត្តកោះកុង»។
លោក ផេង ថ្លែងថា៖ «ភាគីក្រសួងដែនដីបានប្រាប់ថាក្រសួងអស់ដែនសមត្ថកិច្ចដោះស្រាយរឿងនេះហើយ ព្រោះក្រសួងបានបង្កើតគណៈកម្មការចម្រុះនៅខេត្តកោះកុងផ្ទាល់។ ដូច្នេះគេតម្រូវឲ្យពួកខ្ញុំត្រឡប់ទៅវិញដោះស្រាយជាមួយអាជ្ញាធរខេត្តវិញ ប៉ុន្ដែពួកខ្ញុំដូចជាគ្មានជំនឿទេ ព្រោះក្រសួងគ្មានសមត្ថភាពដោះស្រាយផង ចុះទម្រាំអាជ្ញាធរខេត្តរឿងអីអាចដោះស្រាយបាននោះ?»។
លោក សួន វណ្ណាត អាយុ ៥០ ឆ្នាំជាពលរដ្ឋម្នាក់ក្នុងចំណោមអ្នកតវ៉ាបានថ្លែងដោយសម្ដែងការខកចិត្តយ៉ាងខ្លាំងដែលក្រសួងដែនដីមិនបានដោះស្រាយដីធ្លីជូនឲ្យចប់សព្វគ្រប់ដូចពលរដ្ឋមុនៗ។ ទំនាស់ដីធ្លីរ៉ាំរ៉ៃបានអូសបន្លាយពេលជាង ១០ ឆ្នាំមកនេះគឺបានប៉ះពាល់លើប្រជាពលរដ្ឋចំនួន ៥៣៧ គ្រួសារដែលរស់នៅក្នុងភូមិចំនួន ៩ នៃឃុំចំនួន ៤ គឺមានឃុំជីខក្រោម ឃុំជីខលើ ឃុំដងពែង និងឃុំកណ្ដោល ស្ថិតក្នុងស្រុកចំនួន ២ គឺស្រុកស្រែអំបិល និងបទុមសាគរ ខេត្តកោះកុង។
លោកបញ្ជាក់ថា៖ «ពួកខ្ញុំចំនួន ១០ នាក់ចូលទៅជួបហើយជជែកគ្នា ប៉ុន្ដែមិនទាន់ត្រូវរ៉ូវគ្នាទេព្រោះពេលហ្នឹងពួកខ្ញុំបានលើកសំណើ ១ ចំណុច គឺពួកខ្ញុំចង់បានសំណងដូចក្រុមអ្នកស្រី ផាវ ញ៉ើង គឺដី ៣ ហិកតា និងលុយ ២៥០០ ដុល្លារ ប៉ុន្ដែភាគីក្រសួងមិនព្រមទេ ហើយបានប្រាប់ឲ្យពួកខ្ញុំត្រឡប់ទៅខេត្តវិញ»។
ការចេញទាមទាររកដំណោះស្រាយដីធ្លីជាមួយក្រុមហ៊ុនស្ករអំពៅនៅខេត្តកោះកុងនេះ ដោយសារអាជ្ញាធរក្នុងខេត្តកោះកុង និងក្រសួងរៀបចំដែនដី នគរូបនីយកម្ម និងសំណង់មិនបានដោះស្រាយជម្លោះដីធ្លីជូនពួកគាត់ដូចពលរដ្ឋមួយក្រុមទៀតដែលដឹកនាំដោយអ្នកស្រី ផាវ ញ៉ើង ដែលតែងតែចេញតវ៉ាយ៉ាងសកម្មកន្លងមក។ ទំនាស់ដីធ្លីនេះគឺមានវិវាទជាមួយភាគីក្រុមហ៊ុនលោកឧកញ៉ា ហ៊ុយ ហេង និងក្រុមហ៊ុនឈ្មោះ កោះកុង ស៊ូហ្គើរ (Kohkong Sugar) និងក្រុមហ៊ុន កោះកុង ផ្លេនថេសិន (Kohkong Plantation) របស់អ្នកវិនិយោគទុនថៃដែលបានទិញភាគហ៊ុនពីលោកឧកញ៉ា លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា។
ពលរដ្ឋម្នាក់ទៀតគឺលោក ហៀង សុខុម និយាយថាដើមឆ្នាំ ២០១៦ ប្រជាពលរដ្ឋបានបែកគ្នាជា ២ ក្រុម។ ក្រុមទី ២ នេះគឺបានលង់ជឿសម្ដីលួងលោមរបស់អាជ្ញាធរឃុំ-ស្រុក និងអាជ្ញាធរខេត្តថាកុំឲ្យពួកគាត់តវ៉ាសកម្មដូចក្រុមទី ១ ពោលគឺរង់ចាំឲ្យអាជ្ញាធរដោះស្រាយតាមសម្រួល ប៉ុន្តែទីបំផុតវិវាទដីធ្លីរ៉ាំរ៉ៃរបស់ពួកគាត់ក្រុមទី ២ នេះត្រូវបានរដ្ឋាភិបាល និងក្រុមហ៊ុនស្ករអំពៅមើលរំលងមិនបានដោះស្រាយដូចក្រុមទី ១ ដែលតែងតែចេញតវ៉ានោះឡើយ។
លោក សុខុម បន្តថា៖ «ខ្ញុំសំណូមពរទៅថ្នាក់ដឹកនាំទាំងអស់ សុំជួយដោះស្រាយឲ្យពលរដ្ឋបានគ្រប់ៗគ្នាផង។ កន្លងមកដែលពួកយើងមិនបានតវ៉ា ព្រោះស្ដាប់តាមអាជ្ញាធរមិនឲ្យតវ៉ា»។
កាលពីថ្ងៃទី ២២ ខែមីនាក្រសួងរៀបចំដែនដី នគរូបនីយកម្ម និងសំណង់ ក្រុមហ៊ុន និងប្រជាពលរដ្ឋបានព្រមព្រៀងគ្នាបញ្ចប់ករណីវិវាទនេះជាស្ថាពរដោយក្រុមប្រជាពលរដ្ឋ ១៧៥ គ្រួសារក្នុងក្រុមទី ១ យល់ព្រមទទួលយកដំណោះស្រាយជាដីទំហំ ៣ ហិកតានៅលើទីតាំងថ្មី និងថវិកាចំនួន ២៥០០ ដុល្លារក្នុងមួយគ្រួសារ។
ក្រុមប្រជាពលរដ្ឋ ២០០ គ្រួសារផ្សេងទៀតយល់ព្រមទទួលយកដំណោះស្រាយជាដីទំហំ ១,៥ ហិកតាក្នុងមួយគ្រួសារនៅលើទីតាំងចាស់ ប៉ុន្តែមិនទទួលបានលុយទេ។
លោក ទេព ធន អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បាននិយាយប្រាប់ប្រជាពលរដ្ឋក្នុងអំឡុងពេលជួបគ្នានោះថាលោកបានបង្កើតគណៈកម្មការចម្រុះមួយដែលដឹកនាំដោយលោកស្រី ភូថង មិថុនា អភិបាលខេត្តកោះកុង ដើម្បីជំរុញការដោះស្រាយនៅក្នុងចុងខែឧសភាខាងមុខនេះ។ ដូច្នេះលោកស្នើសុំឲ្យប្រជាពលរដ្ឋទាំងអស់ត្រឡប់ទៅផ្ទះវិញ ដើម្បីងាយស្រួលដល់អាជ្ញាធរចុះប្រមូលព័ត៌មាន។
លោកស្រី ភូថង មិថុនា អភិបាលខេត្តកោះកុងអះអាងថាពាក្យបណ្ដឹងរបស់ពលរដ្ឋព្រមទាំងមានពាក្យណែនាំរបស់ក្រសួងដែនដី ដើម្បីបង្កើតគណៈកម្មការចម្រុះជួយជំរុញការដោះស្រាយទំនាស់ដីធ្លីនេះឲ្យចប់នៅចុងខែឧសភា ឆ្នាំ ២០១៨ នេះ។
លោក អំ សំអាត ប្រធានគ្រប់គ្រងផ្នែកអង្កេតនៃអង្គការលីកាដូ (Licadho) ថ្លែងថាមួយរយៈចុងក្រោយនេះគេសង្កេតឃើញថា ក្រសួងបានដោះស្រាយបញ្ហាដីធ្លីនេះជាបន្តបន្ទាប់ដែរ ប៉ុន្ដែក៏នៅសេសសល់ខ្លះដែរ៕
