ភ្នំពេញៈ ប្រជាពលរដ្ឋប្រមាណ ៥០ គ្រួសារ នៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ កាលពីថ្ងៃចន្ទ បានផ្ទុះការតវ៉ាទាមទារឲ្យម្ចាស់ក្រុមហ៊ុន OCEANA INTERNATIONAL CO.,LTD ចេញមុខដោះស្រាយជាបន្ទាន់អំពីបញ្ហាដីធ្លីនិងផ្ទះសំបែងរបស់ពួកគេ ខណៈតុលាការសាលាឧទ្ធរណ៍ កាលពីពេលថ្មីៗកន្លងទៅនេះ បានចេញដីកាសម្រេចរក្សាការពារ ដោយរឹបអូសជាបណ្ដោះអាសន្ននូវដីធ្លីទំហំជាង ៨ ៦០០ ម៉ែត្រការ៉េ ស្ថិតនៅលើទីតាំងដីដែលពួកគេកំពុងរស់នៅ ទៅឲ្យម្ចាស់បំណុលមួយផ្សេងទៀត ដែលក្រុមហ៊ុននេះបានចាញ់ក្ដី។
លោក ទួង សីហា ប្រជាពលរដ្ឋម្នាក់ ក្នុងចំណោម ៥០ នាក់ ដែលបានចូលរួមធ្វើការតវ៉ាកាលពីម្សិលមិញ បានប្រាប់ភ្នំពេញប៉ុស្តិ៍ថា កាលពីអំឡុងឆ្នាំ ២០០៨ និង ២០០៩ ប្រជាពលរដ្ឋប្រមាណជិត ១០០ គ្រួសារ បាននាំគ្នាទិញគម្រោងសាងសង់លំនៅឋានរបស់ក្រុមហ៊ុន OCEANA INTERNATIONAL CO.,LTD ដែលគិតមកទល់ពេលនេះ ពួកគាត់ភាគច្រើនបានបង់ប្រាក់ ៩០ ភាគរយ ខណៈមួយចំនួនទៀតបានបង់ប្រាក់ ១០០ ភាគរយ ទៅឲ្យក្រុមហ៊ុនរួចរាល់ហើយ និងទទួលបានការកាត់ប្លង់ ផ្ទេរសិទ្ធិកាន់កាប់ពីក្រុមហ៊ុនវិញផងដែរ។
លោក សីហា បានបញ្ជាក់ថា៖ «យើងខ្ញុំមិនដឹងថាក្រុមហ៊ុនមានបញ្ហាអ្វីកើតឡើងនោះទេ ដល់ថ្ងៃបង់ប្រាក់ ១០ ភាគរយបន្ថែមបង្គ្រប់ ១០០ ភាគរយទៅឲ្យក្រុមហ៊ុន ពួកយើងបាននាំគ្នាយកលុយទៅបង់តាមលក្ខន្តិកៈនៃការទិញលក់ដែលបានកំណត់ ដើម្បីទទួលបានសិទ្ធិក្នុងការកាន់កាប់ដីធ្លី និងផ្ទះសំបែងពីគម្រោងសាងសង់លំនៅឋានរបស់ក្រុមហ៊ុននេះ ប៉ុន្តែបែរជាភាគីខាងក្រុមហ៊ុនបដិសេធប្រាក់ ១០ ភាគរយនោះទៅវិញ»។
លោក សីហា បានបន្តថា ក្រោយមកប្រជាពលរដ្ឋដែលបានបង់ ១០០ ភាគរយ និងទទួលបានការកាត់ប្លង់ និងផ្ទេរសិទ្ធិកាន់កាប់ចំណែកដី និងលំនៅឋានពីក្រុមហ៊ុនហើយនោះ បែរជាពួកគាត់មិនអាចធ្វើការទិញលក់ឬផ្ទេរសិទ្ធិកាន់កាប់ទៅឲ្យអ្នកដទៃឬសាច់ញាតិរបស់ខ្លួនបាន។
លោក បានបន្ថែមថា៖ «ដោយមានការសង្ស័យបងប្អូនប្រជាពលរដ្ឋយើងបាននាំគ្នាស៊ើបសួររកឫសគល់នៃបញ្ហា ទើបដឹងថា ម្ចាស់ក្រុមហ៊ុនខាងលើនេះ គឺលោក ចាន់ វិទូ បានជំពាក់ប្រាក់បុគ្គលម្នាក់ឈ្មោះ គឹម ឈាន មានចំនួនជាង ៣៧ ០០០ ដុល្លារ ហើយត្រូវបានប្ដឹងផ្ដល់គ្នាឡើងតុលាការ។ តុលាការរាជធានីភ្នំពេញ និងសាលាឧទ្ធរណ៍ បានសម្រេចសេចក្ដីឲ្យភាគីលោក គឹម ឈាន ជាម្ចាស់បំណុលឈ្នះក្ដី និងបានចេញដីកាសម្រេចរឹបអូសជាបណ្ដោះអាសន្ន នូវទីតាំងដីរបស់ក្រុមហ៊ុនលោក ចាន់ វិទូ ១ កន្លែង ដែលយើងខ្ញុំកំពុងរស់នៅជាង ១០ ឆ្នាំមកនេះ»។
អ្នកស្រី ម៉ម បូព្រឹក្ស ដែលរងគ្រោះដោយសារការទិញយកផ្ទះល្វែងចំនួន ២ ល្វែងពីគម្រោងរបស់ក្រុមហ៊ុននេះ បាននិយាយថា រឿងក្រុមហ៊ុន OCEANA INTERNATIONAL CO.,LTD ជំពាក់ប្រាក់អ្នកដទៃ មិនគួរក្រុមហ៊ុនឬភាគីនៃជម្លោះអូសទាញយកពួកគាត់ ដែលជាអតិថិជនមកភ្ជាប់បង្កើតឲ្យមានបញ្ហាកាន់តែធ្ងន់ធ្ងរបែបនេះទេ។
អ្នកស្រីបានបន្តថា៖ «យើងខ្ញុំជាប្រជាពលរដ្ឋមិនចង់មានបញ្ហាឬជម្លោះជាមួយភាគីណាមួយនោះទេ តែយើងខ្ញុំក៏មិនចង់បាត់បង់ដីធ្លី និងផ្ទះសំបែង ដោយសារតែជម្លោះរវាងភាគីលោក ចាន់ វិទូ ម្ចាស់ក្រុមហ៊ុន OCEANA INTERNATIONAL CO.,LTD និងលោក គឹម ឈាន ជាម្ចាស់បំណុល អីនោះដែរ។ យើងខ្ញុំសុំឲ្យភាគីក្រុមហ៊ុនចេញមុខដោះស្រាយលើបញ្ហានេះឲ្យបានច្បាស់លាស់និងឲ្យបានឆាប់បំផុត មុនពេលបញ្ហាផ្ទុះកាន់តែធំឡើង »។
ជុំវិញករណីនេះ លោក ចាន់ វិទូ ម្ចាស់ក្រុមហ៊ុន OCEANA INTERNATIONAL CO.,LTD មិនអាចទាក់ទងសុំការបំភ្លឺបានទេកាលពីម្សិលមិញ ប៉ុន្តែលោក ដួង ញ៉ក់ អតីតប្រធានផ្នែកលក់គម្រោងផ្ទះល្វែងនៃក្រុមហ៊ុននេះ បានប្រាប់ភ្នំពេញ ប៉ុស្តិ៍ថា ករណីវិវាទរវាងលោក ចាន់ វិទូ និង លោក គឹម ឈាន ផ្ដើមចេញពីរឿងជំពាក់ប្រាក់ថ្លៃបុកគ្រឹះ សាងសង់អគារផ្ទះល្វែងក្នុងគម្រោងទី ២ និងទី ៣ របស់ក្រុមហ៊ុន ដែលមានទីតាំងនៅចំណុចភូមិព្រៃមូល សង្កាត់ក្រាំងធ្នង់ ខណ្ឌសែនសុខ ដែលតភ្ជាប់ពីគម្រោងទី ១ ដែលមាន ៨២ ល្វែង និងដែលត្រូវបានប្រជាពលរដ្ឋទិញ និងបង់ប្រាក់បាន ៩០ ភាគរយភាគច្រើន និងខ្លះទៀតបាន ១០០ ភាគរយទៅហើយ។
លោក ញ៉ក់ បាននិយាយថា៖ «ខ្ញុំមិនដឹងថាហេតុអ្វីបានជាមានការសម្រេចពីតុលាការ ឲ្យមានការរឹបអូសជាបណ្ដោះអាសន្ននូវទីតាំងដី ក្នុងគម្រោងទី ១ របស់ក្រុមហ៊ុនបែបនេះទេ ខណៈករណីវិវាទនៅលើគម្រោងទី ២ ដែលមានទីតាំងនៅក្នុងភូមិព្រៃមូល ដែលមានព្រំប្រទល់ជាប់គម្រោងទី ១ ក្នុងភូមិសំរោងទាវ ដែលអ្នកភូមិបានទិញ និងកំពុងរស់នៅអស់រយៈពេល ១០ ឆ្នាំមកហើយ។ យ៉ាងណាក៏ដោយ សេចក្ដីសម្រេចនោះ គឺជាឆន្ទានុសិទ្ធិរបស់តុលាការ»។
លោក ញ៉ក់ បានសម្ដែងក្ដីងឿងឆ្ងល់ផងដែរ ចំពោះប្រជាពលរដ្ឋ ដែលទទួលបានការកាត់ប្លង់ផ្ទេរសិទ្ធិពីក្រុមហ៊ុនរួចហើយនោះ ហេតុអ្វីពួកគេមិនអាចលក់ដូរឬផ្ទេរសិទ្ធិទៅឲ្យសាច់ញាតិរបស់ពួកគេ ដើម្បីកាន់កាប់បន្តបាន ព្រោះពួកគេមិនជាប់ពាក់ព័ន្ធនៅក្នុងគម្រោងរបស់ក្រុមហ៊ុនទៀតនោះទេ។
ជុំវិញការលើកឡើងនេះ លោក ទឹម សុធា ដែលជាពលរដ្ឋរងគ្រោះក្នុងការទិញគម្រោងផ្ទះល្វែងពីក្រុមហ៊ុនខាងលើនេះ បាននិយាយថា៖ «ខ្ញុំមិនដឹងថាគូវិវាទទាំង ២ នោះ គេឈ្លោះគ្នាពិតប្រាកដ ឬធ្វើឈ្លោះដើម្បីប្រែក្រឡាស់លើកិច្ចសន្យាទិញលក់ជាមួយយើងខ្ញុំ ដើម្បីផលចំណេញរបស់ពួកគេ ព្រោះលុយត្រឹមជិត ៤០ ០០០ ដុល្លារ ខ្ញុំយល់ថាវាមិនច្រើនទេសម្រាប់ក្រុមហ៊ុនដែលត្រូវបង់សងទៅម្ចាស់បំណុលរបស់ខ្លួននោះ »។
ពាក់ព័ន្ធនឹងបញ្ហាជម្លោះដែលបានកើតឡើងរហូតដល់មានការសម្រេចរបស់តុលាការនេះដែរ លោក គឹម ឈាន ដែលជាម្ចាស់បំណុល លើក្រុមហ៊ុន OCEANA INTERNATIONAL CO.,LTD មិនអាចទាក់ទងសុំការបំភ្លឺបានទេ កាលពីម្សិលមិញ៕