កំពង់ស្ពឺៈ ក្រុមពលរដ្ឋប្រមាណ ៨០ នាក់មកពីភូមិត្រពាំងស្រទប ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ បានប្រមូលផ្តុំគ្នានៅមុខក្រសួងរៀបចំដែនដីនគរូបនីយកម្ម និងសំណង់ ជាថ្មីទៀតកាលពីថ្ងៃចន្ទ ទី១៤ ខែមករា ដើម្បីស្នើឲ្យក្រសួងពន្លឿនដោះស្រាយវិវាទដីធ្លីរបស់ពួកគាត់ដែលបានកើតឡើងជាង ១០ ឆ្នាំហើយនោះ។
លោក ម៉ៃ ម៉េន តំណាងឲ្យក្រុមអ្នកតវ៉ាបានថ្លែងថា ក្រោយពីបានជួបសាកសួរព័ត៌មានអំពីការតវ៉ាហើយ មន្ត្រីតំណាងឲ្យក្រសួងដែនដីបានសន្យាថា នឹងចុះទៅតំបន់ដីធ្លីដែលមានជម្លោះនៅក្នុងខេត្តនោះនៅថ្ងៃទី ១៧ ខែមករាដើម្បីរកដំណោះស្រាយនៅថ្ងៃដដែលនោះ។
លោក ម៉េន ថ្លែងថា៖ «ក្រសួងបានប្រាប់យើងថា បើដល់ថ្ងៃទី ១៧-១៨ ខែមករា នៅតែមិនមានចំណាត់ការអីទេ គេឲ្យឡើងទៅទៀត។ ក្រសួងប្រាប់យើងថា នឹងដោះស្រាយឲ្យមិនទុកទេ ដឹងតែដោះស្រាយឲ្យហើយ ប៉ុន្ដែគេថាអ៊ីចឹងមិនមែនតែម្ដងទេ គេថារាប់សិបដងមកហើយ»។
ទោះយ៉ាងណាក៏លោក ម៉េន បានអះអាងថានឹងប្រមូលផ្ដុំគ្នាឡើងមកតវ៉ាសុំអន្ដរាគមន៍ពីក្រសួងបន្ដទៀត បើនៅតែគ្មានដំណោះស្រាយ។
លោក សាំង ប៊ុន ជាជនរងគ្រោះម្នាក់ក្នុងចំណោមអ្នកតវ៉ាទាំងនោះបានឲ្យដឹងថា មុននឹងឡើងមកតវ៉ានៅថ្នាក់ជាតិជនរងគ្រោះទាំងអស់បានព្យាយាមរកដំណោះស្រាយនៅថ្នាក់មូលដ្ឋានរួចរាល់ហើយតែគ្មាន
ដំណោះស្រាយនោះឡើយ។
លោក ប៊ុន ថ្លែងថា៖ «ពួកយើងក៏ឡើងមកក្រសួងច្រើនដងហើយរាប់មិនអស់ហើយដែរ តែបានត្រឹមសន្យា មិនឃើញមានដំណោះស្រាយសោះ។ ខ្ញុំអំពាវនាវទៅលោក ជា សុផារ៉ា ជួយពន្លឿនដោះស្រាយបញ្ហាដីធ្លីប្រជាពលរដ្ឋដែលនៅសេសសល់នេះឲ្យពួកខ្ញុំឲ្យឆាប់បានចប់ផង»។
លោក ប៊ុន បានឲ្យដឹងថា ដីដែលប្រជាពលរដ្ឋមានជម្លោះជាមួយក្រុមហ៊ុនជាប្រភេទដីស្រែ និងដីចម្ការដោយមានវិវាទរយៈពេលជិត ១០ ឆ្នាំហើយ ជាមួយក្រុមហ៊ុន អេចអិលអេច (HLH) និង ក្រុមហ៊ុនស្ករអំពៅ របស់លោក លី យ៉ុងផាត់។
លោក ប៊ុន ថ្លែងថា៖ «ចាប់តាំងពីវិវាទមកពួកខ្ញុំគ្មានដីធ្វើស្រែទេ ពួកខ្ញុំធ្លាក់ខ្លួនក្រីក្រ និងជំពាក់បំណុលគេថែមទៀត»។
លោក ជូ ម័យ មេភូមិត្រពាំងស្រទបបានឲ្យដឹងថា ដីវិវាទជាមួយក្រុមហ៊ុននេះ គឺជាដីប្រជាពលរដ្ឋតាំងពីដូនតា ជាប្រភេទដីស្រែចម្ការរបស់ពួកគាត់ កាន់កាប់តាំងពីដើមឡើយនៅឆ្នាំ ១៩៨០។
លោក ម័យ ថ្លែងថា៖ «បើតាមខ្ញុំដឹងប្រវត្ដិដីរបស់ពួកគាត់ ដែលរស់នៅទីនេះគឺជាដីកេរអាកររបស់ពួកគាត់»។
លោកមេភូមិ អះអាងថា ប្រជាពលរដ្ឋទាំងអស់នៅស្រុកឱរ៉ាល់ទាំងអស់គឺពួកគាត់ មិនទាន់មានឯកសារទេកាលនោះ ពួកគាត់មានដីទំហំខុសគ្នា អ្នកខ្លះមាន ២-៣ ហិកតា អ្នកខ្លះ មានដីរហូតដល់ ៥ ហិកតាក៏មាន។
លោក វ៉ី សំណាង អភិបាលខេត្តកំពង់ស្ពឺ បានថ្លែងកាលពីម្សិលមិញថា ការដោះស្រាយបញ្ហាវិវាទដីធ្លីរបស់ប្រជាពលរដ្ឋទាំងអស់នោះបានធ្វើជាជំហានៗហើយ ប៉ុន្ដែការដោះស្រាយនេះ ត្រូវការពេលវេលាសិក្សាស្រាវជ្រាវឲ្យបានច្បាស់លាស់ជាមុនសិនទើបអាចដោះស្រាយបានត្រឹមត្រូវ។
លោកអភិបាលថ្លែងថា៖ «យើងអត់មានអីទៅចង់ទុករឿងគាត់ចោលដើម្បីយកក្រេឌីតអីទេ។ ខ្ញុំចង់តែដោះស្រាយជូនពួកគាត់ភ្លាមៗ បានកាន់តែលឿនកាលណា យើងក៏ធូរទ្រូងកាលហ្នុងដែរ យើងបានប្រឹងប្រែងហើយ ប៉ុន្ដែការងារវាមានជំហានរបស់វា»។
លោកបានបន្ថែមថា៖ «ពួកគាត់ៗចេះតែចង់បានដោះស្រាយបញ្ហាថ្ងៃហ្នឹង ឲ្យចេញថ្ងៃហ្នឹង អ៊ីចឹងយើងដោះវាម៉េចចេញ ព្រោះយើងត្រូវមានស្រាវជ្រាវរកសាវតារ ឲ្យច្បាស់លាស់ ព្រោះប្រជាពលរដ្ឋខ្លះ គាត់ដាក់ឯកសារមកមិនច្បាស់លាស់ ដូច្នេះយើងត្រូវផ្ទៀងផ្ទាត់ជាមួយឯកសារកាន់កាប់ ជាមួយនឹងឯកសារនៃការចូលកាន់កាប់ដីរបស់ពួកគាត់រឿងនេះហើយដែលនាំឲ្យអូសបន្លាយពេលយូរនោះ ប៉ុន្ដែយូរក៏ដើម្បីធ្វើឲ្យច្បាស់លាស់ដែរ»។
ភ្នំពេញប៉ុស្ដិ៍មិនអាចសុំការឆ្លើយតបពីតំណាងក្រុមហ៊ុនណាមួយបានទេជុំវិញរឿងវិវាទដីធ្លីនេះ ខណៈលោក សេង ឡូត អគ្គនាយករដ្ឋបាល និងជាអ្នកនាំពាក្យ ក្រសួងរៀបចំដែនដី នគរូបនីយកម្ម និងសំណង់ ក៏មិនអាចទាក់ទងបានដែរកាលពីម្សិលមិញ។
តាមសេចក្ដីប្រកាសព័ត៌មានចុះថ្ងៃទី២៥ ខែធ្នូ របស់ក្រសួងរៀបចំដែនដីបានបង្ហាញថា ក្រសួងបានដាក់ផែនការជាច្រើនចំណុចក្នុងនោះមានចំណុចសំខាន់ៗដូចជា ពន្លឿនការដោះស្រាយវិវាទដីធ្លីដែលនៅសេសសល់តាមគ្រប់យន្តការ ដោយមានអាជ្ញាធរជាតិដោះស្រាយទំនាស់ដីធ្លី គណៈកម្មការសុរិយោដី ក្រុមដោះស្រាយវិវាទចល័ត និងយន្តការដែលបង្កើតបន្ថែមរបស់ក្រសួង ដើម្បីភាពសុខដុមរមនាក្នុងសង្គម។
តាមរបាយការណ៍បូកសរុបលទ្ធផលនៃការអនុវត្ដការងារឆ្នាំ ២០១៨ និងលើកទិសដៅការងារឆ្នាំ ២០១៩ របស់ក្រសួងរៀបចំដែនដីបានបង្ហាញថា ការដោះស្រាយវិវាទក្នុងតំបន់ដីសម្បទានសេដ្ឋកិច្ចដំណាំអំពៅផលិតស្ករនាំចេញសម្រាប់ខេត្ដកំពង់ស្ពឺ បានដោះស្រាយបញ្ចប់វិវាទចំនួន ៩ ករណី សម្របសម្រួលរួចបាន ១៩៥ ករណី និងកំពុងសិក្សាសលាកបត្រដែលនៅសេសសល់។
លោក George Edgar អគ្គរដ្ឋទូតសហភាពអឺរ៉ុបប្រចាំកម្ពុជាបានឆ្លើយតបចំពោះករណីនេះថា សហភាពអឺរ៉ុបបានធ្វើការជាមួយនឹងរាជរដ្ឋាភិបាលកម្ពុជាទៅលើបញ្ហាជាច្រើនដែលកើតចេញមកពីការទាមទារយកដីធ្លី ដែលទាក់ទងជាមួយដីសម្បទានសេដ្ឋកិច្ច សម្រាប់ការអភិវឌ្ឍរោងចក្រស្ករអំពៅនេះ។ លោកបានថ្លែងតាមរយៈអ៊ីមែលកាលពីថ្ងៃម្សិលមិញថា៖ «យើងសង្ឃឹមថា ក្រោមការដឹកនាំរបស់ក្រសួងរៀបចំដែនដី នគរូបនីយកម្ម និងសំណង់ រាល់ការទាមទារដែលនៅសេសសល់នឹងអាចត្រូវបានដោះស្រាយប្រកបទៅដោយសមធម៌ តម្លាភាព និងបរិយាប័ន្ន»៕