ក្រចេះ: លោក សុខ យឿន មេភូមិអូរពោរ ឬអូរត្រូននៃខេត្តក្រចេះបានឲ្យដឹងកាលពីម្សិលមិញថា ប្រជាពលរដ្ឋប្រមាណ ១០០ គ្រួសារ ប្រឈមក្នុងបញ្ហាខ្វះទឹកប្រើប្រាស់ ក្រោយពីរកឃើញថា ទឹកដែលប្រើប្រាស់ជាប្រចាំនៅតាមដងអូរត្រូន និងអូរក្លិកក្លក់ ក្នុងឃុំក្បាលដំរី ស្រុកសំបូរ មានការប្រែប្រួលបណ្ដាលឲ្យប្រភេទត្រីមួយចំនួនងាប់អណ្ដែតទឹកដោយមិនដឹងមូលហេតុច្បាស់លាស់។
លោក យឿន បានឲ្យដឹងថា៖ «អាជ្ញាធរភូមិ បានសហការគ្នាចុះទៅកន្លែងកើតហេតុនឹងស្វែងរកប្រភពទឹកកខ្វក់ដែលហូរចូលអូរនេះ ហើយបានដឹងថា ប្រភពទឹកកខ្វក់ដែលហូរចូលអូរនេះ គឺចេញមកពីអាងស្តុកទឹករ៉ែមាសរបស់ក្រុមហ៊ុនចិន ឈ្មោះ ស៊ីង យ័ងគ័ងយិ»។
លោកមេភូមិបានអះអាងថា ការប្រែប្រួលប្រភពទឹកបានកើតឡើងក្រោយមានភ្លៀងខ្លាំងបណ្ដាលឲ្យទឹកជន់ ហើយបានធ្លាយទំនប់ពីក្រុមហ៊ុនចិនធ្លាក់មកតាមដងអូរផ្នែកខាងក្រោមបណ្ដាលឲ្យពលរដ្ឋមានក្ដីបារម្ភ នៅពេលឃើញត្រីងាប់តាមដងអូរខុសប្រក្រតី។
លោក សុខ គីរីរ័ត្ន ប្រធានមន្ទីររ៉ែ និងថាមពលបានប្រាប់ភ្នំពេញ ប៉ុស្តិ៍ ពីម្សិលមិញថា ក្រោយក្រុមជំនាញចុះទៅដល់កន្លែងកើតហេតុ ធ្វើការតាមដានរួចមកក្រុមជំនាញបានដងទឹកពីតំបន់នានានៅចំណុចកើតហេតុ ដើម្បីយកមកពិសោធមើលពីកម្រិតសារធាតុពុលដែលអាចមាននៅក្នុងទឹក។
លោកបញ្ជាក់ថា៖ «ទឹកនៅតាមអូរនៅពេលនេះគឺនៅថ្លានៅឡើយទេ ហើយក៏មិនមានក្លិនដែរ ហើយនៅឆ្ងាយពីនេះរាប់គីឡូក៏យើងយកដែរ ដើម្បីយកទៅពិសោធមើល។ ប៉ុន្តែលទ្ធផលយ៉ាងណាៗ យើងមិនទាន់ដឹងទេ យើងបារម្ភពីសុខភាពរបស់ពលរដ្ឋ ហើយក៏យើងបានឲ្យមេភូមិដើរប្រាប់កុំឲ្យពួកគាត់ហូបទឹក»។
លោក គីរីរ័ត្ន បានថ្លែងថា៖ «(យើង) បានអំពាវនាវឲ្យប្រជាពលរដ្ឋទាំងអស់ផ្អាកបរិភោគទឹកអូរនេះបណ្តោះអាសន្នសិន ដើម្បីចៀសវាងផលប៉ះពាល់ជាយថាហេតុ រហូតលទ្ធផលនៃការធ្វើពិសោធន៍សំណាកទឹកចេញជាផ្លូវការ»។
លោក ជិក បូរ៉ា នាយរងប៉ុស្តិ៍ក្បាលដំរីបានប្រាប់ដែរថា រហូតមកដល់ពេលនេះមិនមានប្រជាពលរដ្ឋ និងគោក្របី ពុលទឹកនៅក្នុងអូរនេះនៅឡើយទេ ប៉ុន្តែបើនៅតែបន្តអូសបន្លាយ ប្រជាពលរដ្ឋប្រមាណ ១០០ គ្រួសារ ដែលកំពុងប្រើប្រាស់ទឹកទាំងនេះនឹងមិនមានទឹកប្រើប្រាស់ និងមានផលលំបាកក្នុងការស្វែងរកប្រភពទឹកដែលនៅឆ្ងាយពីផ្ទះសម្រាប់ផ្គត់ផ្គង់គ្រួសារ។
លោកថ្លែងថា៖ «បើគ្មានការទប់ស្កាត់ ទឹកវាអាចហូរទៅរាលដាលចេញកាន់តែឆ្ងាយទៀត ព្រោះបើមិនបានទប់ និងបិទទំនប់បានត្រឹមត្រូវ ប្រជាពលរដ្ឋនៅក្លិកក្លក់មិនហ៊ានផឹកទឹកទេ គាត់ខ្លាច គាត់រកទិញទឹកសុទ្ធមកហូបជំនួស»៕