.jpg)
អាជ្ញាធរខេត្តព្រះសីហនុជួបជាមួយអាជីវកររកដំណោះស្រាយលើទីតាំងលក់ដូរកាលពីថ្ងៃទី ២៣ មិថុនា។ រូបថត សហការី
ព្រះសីហនុៈ ពលរដ្ឋជាអ្នកប្រកបអាជីវកម្មលក់ដូរតាមចិញ្ចើមផ្លូវសាធារណៈក្នុងក្រុងព្រះសីហនុចំនួន ២១៥ គ្រួសារ បានឯកភាពអនុវត្ដតាមវិធានការ ៦ ចំណុច របស់រដ្ឋបាលក្រុងដោយឈប់បន្តសាងសង់តូបលក់ដូរអចិន្រៃ្តយ៍លើចិញ្ចើមផ្លូវសាធារណៈទៀត និងយល់ព្រមអនុវត្ដការលក់ដូរតាមការណែនាំរបស់រដ្ឋបាលក្រុងវិញ។ មន្ត្រីសិទ្ធិមនុស្សសាទរវិធានការរបស់អាជ្ញាធរដែលពលរដ្ឋព្រមព្រៀង។
អភិបាលក្រុងព្រះសីហនុលោក អ៊ី សុខឡេង ប្រាប់ភ្នំពេញប៉ុស្តិ៍កាលពីថ្ងៃទី ២៤ មិថុនា ថាការព្រមព្រៀងគ្នានេះធ្វើឡើងក្រោយពេលជួបប្រជុំជាមួយប្រជាពលរដ្ឋទាំង ២១៥ គ្រួសារចំនួន ២ លើកក្នុង ១ សប្ដាហ៍នេះ។ វិធានការបែបនេះគឺក្នុងគោលបំណងដើម្បីថែរក្សាសណ្ដាប់ធ្នាប់ និងបរិស្ថានក្នុងទីក្រុងឲ្យបានល្អ។
លោកថ្លែងថា៖ «យើងមិនបិទសិទ្ធិទេ ចំពោះប្រជាពលរដ្ឋរបស់យើងក្នុងការប្រកបរបរលក់ដូរផ្សេងៗ។ ប៉ុន្ដែយើងគ្រាន់តែសំណូមពរថាកុំយកចិញ្ចើមផ្លូវ ដើម្បីចតលក់ដូរ និងស្នាក់នៅ។ ពលរដ្ឋខ្លះទៅលក់ដូរគ្មានសណ្ដាប់ធ្នាប់នៅតាមមាត់ឆ្នេរសមុទ្រដែលយើងបានរៀបចំស្អាតហើយនាំឱ្យបាត់បង់សណ្ដាប់ធ្នាប់ និងសោភណភាពឆ្នេរ»។
លោក សុខឡេង ប្រាប់ថា ចុងក្រោយពួកគាត់ក៏បានឯកភាពតាមវិធានការរបស់រដ្ឋបាលក្រុងព្រះសីហនុ ដែលបានដាក់ឱ្យពួកគាត់ចំនួន ៦ ចំណុច។ វិធានការទាំងនោះមាន ១. ពលរដ្ឋមកពីខេត្ដ ផ្សេងៗត្រូវជួលផ្ទះ ឬកន្លែងលក់ដូរដែលស្របច្បាប់ និងមិនយកផ្លូវសាធារណៈជាកន្លែងផ្ទាល់ខ្លួនឡើយ។ ២. ត្រូវរុះរើរោងដែលសង់លើផ្លូវសាធារណៈចេញវិញ និងមិនត្រូវស្នាក់នៅលើរថយន្តរបស់ខ្លួនដែលចតលើផ្លូវសាធារណៈជាអចិន្រៃ្តយ៍ទៀតទេ។
៣. មិនត្រូវលក់ដូរលើផ្លូវធំដែលមានចរាចរណ៍ឆ្លងកាត់នោះទេ។ ៤. ពលរដ្ឋដែលលក់ដូរនៅតាមឆ្នេរមិនត្រូវយករថយន្ត និងរទេះ រ៉ឺម៉ក រួមជាមួយសម្ភារដាក់នៅលើឆ្នេរនោះទេ។ ៥. ពេលលក់ដូររួចត្រូវប្រមូលសំរាមចេញពីកន្លែងផ្លូវសាធារណៈ និងតាមតំបន់ឆ្នេរនានា។ ៦. ពលរដ្ឋស្ម័គ្រចិត្តធ្វើការតាមការណែនាំរបស់រដ្ឋបាលក្រុង។ ប្រសិនបើធ្វើមិនបានឱ្យចាត់ការតាមនីតិវិធី។
អភិបាលក្រុងរូបនេះបន្ថែមថា ការធ្វើនេះគឺដើម្បីរបៀបរៀបរយ សណ្ដាប់ធ្នាប់ សុវត្ថិភាព និងការពារបរិស្ថាននៅក្នុងក្រុងព្រះសីហនុ។ កន្លងមក ប្រជាពលរដ្ឋមួយចំនួនបានយកដីចំណីផ្លូវ ឬក៏ដីដងផ្លូវធ្វើការសាងសង់តូប រោង ដាក់រទេះ រថយន្តកែច្នៃសម្រាប់លក់ដូរជាអចិន្រៃ្តយ៍។ ចំនួនពលរដ្ឋទាំងនេះបានកើនឡើងពី ១ ថ្ងៃ ទៅ ១ ថ្ងៃ។
លោក អ៊ី សុខឡេង ថ្លែងថា៖ «ពួកគាត់សុទ្ធតែមកពីបណ្ដាខេត្ដផ្សេងៗដើម្បីប្រកបរបរលក់ដូរបែបនេះដោយគ្មានផ្ទះ ឬលំនៅឋានក្នុងខេត្ដព្រះសីហនុសម្រាប់ស្នាក់នៅឱ្យបានត្រឹមត្រូវទេ។ ពលរដ្ឋខ្លះធ្វើតូប រោង ដើម្បីស្នាក់នៅ និងខ្លះទៀតស្នាក់នៅលើរថយន្តកែច្នៃសម្រាប់លក់ដូរនោះតែម្ដង។ ពលរដ្ឋខ្លះទៀត ក្រៅពីរស់នៅលើរថយន្តកែច្នៃរបស់ខ្លួន ពួកគាត់ចាប់ផ្ដើមមើលឃើញដីចិញ្ចើមផ្លូវ ដីសាធារណៈ ឬដីឯកជនដែលមានម្ចាស់កម្មសិទ្ធិ តែម្ចាស់ដីមិនបាននៅមើលថែ ពួកគាត់នាំគ្នាចូលទៅរស់នៅទីតាំងទាំងនោះតែម្ដង»។
អ្នកស្រី ជៀប សុធារី មន្ដ្រីសម្របសម្រួលសមាគមការពារសិទ្ធិមនុស្ស (អាដហុក) ប្រចាំខេត្ដព្រះសីហនុ សាទរចំពោះវិធានការថ្មីរបស់អាជ្ញាធរ ចំពោះប្រជាពលរដ្ឋដែលជាអ្នកប្រកបរបរលក់ដូរបែបនេះ តាមរយៈការកែប្រែពីវិធានការក្ដៅបញ្ឈប់លែងឱ្យលក់ដូរ បែរមកបើកឱ្យលក់ដូរដោយមានវិធានការច្បាស់លាស់ចំពោះពួកគាត់វិញ។
អ្នកស្រីថ្លែងថា៖ «ពេលឃើញវិធានការក្ដៅដំបូងរបស់រដ្ឋបាលក្រុងព្រះសីហនុ ដោយបញ្ឈប់ពលរដ្ឋលែងឱ្យប្រកបរបរលក់ដូរនៅតាមទីសាធារណៈ ខ្ញុំពិតជាអាណិតដល់ពលរដ្ឋណាស់ ព្រោះកាលៈទេសៈនេះពលរដ្ឋគ្មានរបរអ្វីក្រៅពីការលក់ដូរបែបនេះទេដើម្បីចិញ្ចឹមជីវិត។ មូលហេតុដែលពួកគាត់នាំគ្នាមកប្រកបរបរ លក់ដូរកាន់តែច្រើនគឺបណ្ដាលមកពីបញ្ហាជំងឺកូវីដ ១៩ នាំឱ្យពួកគាត់អត់ការងារធ្វើ។ ឃើញរដ្ឋបាលក្រុងបែរមកអនុវត្តវិធានការ ថ្មីបែបនេះយើងក៏សប្បាយចិត្ដដែរ ប៉ុន្ដែបើពលរដ្ឋមិនអនុវត្ដតាមទេ យើងក៏ពិន័យពួកគាត់ទៅ ព្រោះពួកគាត់មិនចូលរួមថែរក្សាបរិស្ថាន រឿងនេះគឺបែបនេះ»៕
