ភ្នំពេញៈ ប្រជាពលរដ្ឋជាង ៦០ នាក់មកពីភូមិចំនួន ៤ ស្ថិតក្នុងសង្កាត់សំរោងក្រោម និងសង្កាត់កាកាប ខណ្ឌពោធិ៍សែនជ័យបានប្រមូលផ្តុំគ្នាតវ៉ាកាលពីថ្ងៃទី ២៩ កក្កដា នៅមុខក្រសួងរៀបចំដែនដី នគរូបនីយកម្ម និងសំណង់ ទាំងមេឃកំពុងធ្លាក់ភ្លៀង ដើម្បីសុំអន្តរាគមន៍ឲ្យស្ថាប័ននេះជួយរកដំណោះស្រាយបញ្ហាដីធ្លី។
ពលរដ្ឋដែលមានគ្នាប្រមាណជាង ៦០ នាក់នេះគឺតំណាងឲ្យប្រជាពលរដ្ឋចំនួន ២៣៧ គ្រួសារដែលរស់នៅក្នុងតំបន់ត្រីកោណរវាងភូមិតិក្ខបញ្ញោ ភូមិសំរោងក្រោម និងភូមិចែងម៉ែងក្នុងសង្កាត់សំរោងក្រោម និងភូមិកាកាប ស្ថិតក្នុងសង្កាត់កាកាបដែលមានផលប៉ះពាល់ពីគម្រោង អភិវឌ្ឍន៍ស្ថានីយរថភ្លើងថ្មីលើផ្ទៃដីទំហំ ១០០ ហិកតា។
លោក ជា វ៉ាង ពលរដ្ឋដែលរងផលប៉ះពាល់ដីប្រមាណ ១០ អាស្ថិតក្នុងភូមិតិក្ខបញ្ញោប្រាប់ភ្នំពេញប៉ុស្តិ៍ពីថ្ងៃទី ២៩ កក្កដាថា ដីរងផលប៉ះពាល់ពីគម្រោងសាងសង់ស្ថានីយរថភ្លើងនេះគឺជាដីដែលពលរដ្ឋបានកាន់កាប់តាំងពីឆ្នាំ ១៩៧៩ និងមានការទទួលស្គាល់តាមរយៈប្លង់ស្លាបមាន់ក្នុងអំឡុងឆ្នាំ ១៩៨៩។
លោកបន្តថា ស្រាប់តែនៅឆ្នាំ ២០០៩ រដ្ឋាភិបាលបានប្រកាសថាដីដែលពលរដ្ឋបានកាន់កាប់ជាដីរបស់រដ្ឋ និងប្រកាសយកដីទាំងនោះ អភិវឌ្ឍធ្វើជាស្ថានីយរថភ្លើងទៅវិញ។
លោក ជា វ៉ាង បន្ថែមថា ពលរដ្ឋមិនជំទាស់នឹងគម្រោងអភិវឌ្ឍន៍របស់រដ្ឋាភិបាលនោះទេ ប៉ុន្តែពលរដ្ឋសុំតែដំណោះស្រាយសមរម្យ និងធ្វើការអភិវឌ្ឍដោយតម្លាភាពតែប៉ុណ្ណោះ។ ព្រោះបើតាមព័ត៌មានដែលលោកទទួលបានគឺគម្រោងសាងសង់ស្ថានីយរថភ្លើងនេះត្រូវការដីប្រមាណ ១៥ ហិកតាប៉ុណ្ណោះ។ ដូច្នេះគួរណាស់ប្រគល់ដីដែលនៅសេសសល់ពីការអភិវឌ្ឍនេះ ជូនប្រជាពលរដ្ឋកាន់កាប់វិញ។
លោកបញ្ជាក់ថា៖ «សុំចេញប្លង់កម្មសិទ្ធិឲ្យពលរដ្ឋមក ហើយប្រសិនបើប៉ះពាល់ធ្វើរ៉ារថភ្លើងប៉ុន្មាន យកតែប៉ុណ្ណឹងទៅ ហើយឆ្វៀលដីឲ្យពលរដ្ឋវិញ ព្រោះព័ត៌មានការប៉ះពាល់គម្រោងនេះប្រមាណ ១៥ ហិកតាទេ។ ដល់ទៅយកជាង ១០០ ហិកតា វានឹងចេញជាអ្វីទៀត? កន្លងមកពលរដ្ឋគោរពបានយ៉ាងល្អ ដោយមិនមានការចូលទៅបង្កបង្កើនផលរយៈពេល ១៤ ឆ្នាំមកហើយ ដូច្នេះល្មមដល់ពេលគិតគូរឲ្យពលរដ្ឋវិញហើយ»។
លោក សេង ឡូត និងលោក ឡោ ដាវុធ អ្នកនាំពាក្យក្រសួងរៀបចំដែនដីនគរូបនីយកម្ម និងសំណង់ម្សិលមិញមិនអាចទាក់ទងសុំអត្ថាធិប្បាយបានទេ។
បើតាមលោក ហេង រដ្ឋា តំណាង ពលរដ្ឋដែលបានចូលជួបជាមួយមន្ត្រីនៃក្រសួងរៀបចំដែនដី នគរូបនីយកម្ម និងសំណង់ឲ្យដឹងថា អំឡុងពេលតវ៉ារបស់ប្រជាពលរដ្ឋគឺក្រសួងរៀបចំដែនដី នគរូបនីយកម្ម និងសំណង់បានឲ្យតំណាងពលរដ្ឋចំនួន ៤ នាក់ចូលទៅដាក់ញត្តិ ដោយមន្ត្រីទទួលញត្តិបានសន្យាជាមួយពលរដ្ឋថានឹងដោះស្រាយពន្លឿនករណីនេះឲ្យបានឆាប់រហ័ស។
លោក ហេង រដ្ឋា ក៏បានថ្លែងដែរថា ប្រជាពលរដ្ឋទាំងអស់នៅតែប្រកាន់ជំហរក្នុងការប្រមូលផ្តុំគ្នាតវ៉ាជាថ្មីទៀត និងបន្តការតវ៉ានៅសាលារាជធានីភ្នំពេញ និងផ្ទះរបស់លោកនាយករដ្ឋមន្ត្រី ហ៊ុន សែន បន្តទៀតក្នុងករណីដែលមិនមានដំណោះស្រាយ។
លោក ប៉ាង លីដា អភិបាលរងខណ្ឌពោធិ៍សែនជ័យប្រាប់ភ្នំពេញប៉ុស្តិ៍ពីថ្ងៃទី ២៩ កក្កដា ថាលោកពិបាកក្នុងការបកស្រាយចំពោះបញ្ហានេះ។ លោកឲ្យដឹងថា ពលរដ្ឋប្រមូលគ្នាតវ៉ា ព្រោះដីទាំងនោះគឺជាដីរបស់ពួកគាត់កាន់កាប់ជាយូរឆ្នាំមកហើយ។ ទោះយ៉ាងណាលោកជំរុញឲ្យពលរដ្ឋដាក់ឯកសារដែលពាក់ព័ន្ធមកសាលាខណ្ឌ ដើម្បីបន្តស្វែងរកដំណោះស្រាយរួមគ្នាក្នុងពេលខាងមុខ។
លោកបញ្ជាក់ថា៖ «គាត់ទៅតវ៉ាហ្នឹងដើម្បីទៅទាមទារដីរបស់ពួកគាត់ឲ្យខ្ញុំធ្វើម៉េច? យើងមិនហ៊ាន និយាយអ្វីទេ រង់ចាំដាក់ពាក្យបណ្តឹងមកដល់សាលាខណ្ឌសិនដើម្បីឲ្យដឹងពីប្រវត្តិនៃដីនេះឲ្យបានច្បាស់ ហើយខ្ញុំមិនទាន់ហ៊ានលម្អិតអ្វីទេ។ យើងចាំឲ្យពលរដ្ឋ បំភ្លឺការតវ៉ាទៅ ហើយចាំឲ្យអភិបាលខណ្ឌ គាត់មានវិធានការយ៉ាងណានោះ អភិបាលខណ្ឌគាត់ជាអ្នកសម្រេច»៕