.jpg)
លោក ជិន ម៉ាលីន អ្នកនាំពាក្យ CHRC ។ រូបថត CHRC
ភ្នំពេញៈ ចាប់ពីថ្ងៃពុធ ទី ៣ ខែកុម្ភៈ តទៅ ពលរដ្ឋដែលមានចម្ងល់ផ្នែកច្បាប់ ឬត្រូវការប្រឹក្សាយោបល់ផ្នែកច្បាប់អាចទូរស័ព្ទសុំយោបល់ដោយឥតគិតថ្លៃពីក្រុមមេធាវីរបស់គណៈកម្មាធិការសិទ្ធិមនុស្សកម្ពុជា។ នេះបើតាមសេចក្ដីជូនដំណឹងរបស់គណៈកម្មាធិការសិទ្ធិមនុស្សកម្ពុជា (CHRC) ផ្សព្វផ្សាយកាលពីម្សិលមិញ។
CHRC បានជូនដំណឹងដល់សាធារណៈជនថា គណៈកម្មាធិការនេះបានដាក់ដំណើរការ «កម្មវិធីប្រឹក្សាច្បាប់តាមទូរស័ព្ទដោយឥតគិតថ្លៃ» ដោយមានមេធាវីជាច្រើនរូបរង់ចាំទទួលទូរស័ព្ទ និងឆ្លើយសំណួរ បកស្រាយចម្ងល់របស់សាធារណជនពាក់ព័ន្ធនឹងបញ្ហាផ្លូវច្បាប់នានា។
បើតាមតារាងបញ្ជីឈ្មោះមេធាវីប្រចាំការ សេវាប្រឹក្សាផ្លូវច្បាប់នេះផ្ដល់ជូនដល់សាធារណជនសម្រាប់រយៈពេលពេញមួយសប្ដាហ៍ ដោយមានមេធាវីប្រចាំការចំនួនពី ៥ នាក់ ទៅ ៦ នាក់ជារៀងរាល់ថ្ងៃ។ ចំពោះប្រជាពលរដ្ឋដែលមានបំណងចង់ប្រឹក្សាយោបល់ផ្នែកច្បាប់អាចចូលទៅកាន់ផេក CHRC https://www.facebook.com/chrc.gov.kh ដើម្បីយកលេខទូរស័ព្ទរបស់ក្រុមមេធាវីដែលប្រចាំការ។
សេចក្ដីជូនដំណឹងបញ្ជាក់ថា៖ «ក្រុមមេធាវីសិទ្ធិមនុស្សនៃ CHRC រីករាយ និងត្រៀមខ្លួនរួចជាស្រេចក្នុងការផ្ដល់នូវការប្រឹក្សា និងពិគ្រោះយោបល់ផ្នែកច្បាប់ជូនបងប្អូនសាធារណជនដោយឥតគិតថ្លៃ និងគ្រប់ពេលវេលាចាប់ពីថ្ងៃជូនដំណឹងនេះតទៅ»។
លោក ជិន ម៉ាលីន អ្នកនាំពាក្យ CHRC បានថ្លែងពីម្សិលមិញថា កម្មវិធីនេះគឺសម្រាប់ប្រជាពលរដ្ឋទាំងអស់ ដោយមិនមានការបែងចែកក្រុមអាទិភាពនោះទេ។ អ្នកដែលអាចទូរស័ព្ទទៅសុំជំនួយប្រឹក្សាផ្នែកច្បាប់នេះគឺអ្នកដែលមានបញ្ហាក្ដីក្ដាំនៅតុលាការខ្លួនឯងផ្ទាល់ ឬអ្នកដែលមានបងប្អូន មិត្តភក្តិដែលមានបញ្ហាផ្លូវច្បាប់។ ចំណែកសិស្សនិស្សិតក៏អាចទូរស័ព្ទចូលដើម្បីសាកសួរអំពីផ្លូវច្បាប់បានដែរ។
បើតាមលោក ម៉ាលីន ការផ្ដល់សេវាប្រឹក្សាផ្លូវច្បាប់នេះ គឺជាការចូលរួមរបស់ក្រុមមេធាវីស្ម័គ្រចិត្តរបស់គណៈកម្មាធិការសិទ្ធិមនុស្សកម្ពុជាក្នុងការងារសង្គម ដោយសារតែក្រុមមេធាវីទាំងនេះក៏កំពុងតែផ្ដល់ជំនួយផ្នែកច្បាប់ដល់ពលរដ្ឋដែលរងការរំលោភបំពានសិទ្ធិមនុស្សផងដែរ។ ពួកគេផ្ដល់ការប្រឹក្សាច្បាប់ សម្របសម្រួលវិវាទ និងការពារក្ដីនៅតុលាការជាដើម។
លោកថ្លែងដូច្នេះថា៖ «នេះជាការពង្រីកនូវការងាររបស់គាត់ ដើម្បីចូលរួមកាន់តែទូលំទូលាយ នៅក្នុងការងារសង្គមទាំងមូលតែម្ដង»។
លោក អំ សំអាត នាយករងអង្គការសិទ្ធិមនុស្សលីកាដូបានថ្លែងថា ការផ្ដល់សេវាប្រឹក្សាផ្នែកច្បាប់នេះ គឺជាការចូលរួមមួយដល់ការពង្រឹងវិស័យច្បាប់នៅកម្ពុជា ដោយសារតែប្រជាពលរដ្ឋភាគច្រើន មិនសូវមានការយល់ដឹងផ្នែកច្បាប់ច្រើនទេ។ កន្លងមកពួកគាត់មិនដឹងទៅសួរខាងណាទេ នៅពេលមានកង្វល់ផ្នែកច្បាប់កើតឡើង។ ពួកគាត់ធ្លាប់ទៅសុំជំនួយពីអង្គការសង្គមស៊ីវិល ឬអ្នកចេះដឹង។
លោកថ្លែងដូច្នេះថា៖ «នៅពេលគណៈកម្មការបង្កើតក្រុមមេធាវីដើម្បីប្រឹក្សាផ្នែកច្បាប់នេះ គឺជាជំនួយមួយសម្រាប់ពលរដ្ឋ។ ប៉ុន្តែគ្រាន់តែថា យើងដឹងហើយថា ការបង្កើតក្រុមមេធាវីរបស់ CHRC ដូចជាមានចំនួនតិច ហើយប្រជាពលរដ្ឋមានចំនួនច្រើន។ ដូច្នេះការខលចូលសួរប្រហែលជាមិនទាន់បានតាមចិត្តភ្លាមៗទេ បើសិនមានអ្នកទូរស័ព្ទសាកសួរច្រើន»។
លោកបន្តថា អ្វីដែលសំខាន់ដើម្បីឱ្យប្រទេសកម្ពុជាក្លាយជាប្រទេសនីតិរដ្ឋបាន ទាល់តែមានការធ្វើកំណែទម្រង់លើប្រព័ន្ធច្បាប់ និងប្រព័ន្ធយុត្តិធម៌ឱ្យល្អ និងធ្វើឱ្យប្រព័ន្ធតុលាការឯករាជ្យ។ លើសពីនេះទៀត គឺត្រូវរកមធ្យោបាយធ្វើយ៉ាងម៉េចដើម្បីផ្សព្វផ្សាយឱ្យប្រជាពលរដ្ឋបានយល់ដឹងពីច្បាប់នោះគឺជារឿងល្អបំផុត។
លោកថ្លែងដូច្នេះថា៖ «ដូចយើងដឹងហើយ ច្បាប់ស្រុកយើងច្រើន ប៉ុន្តែការផ្សព្វផ្សាយ និងការយល់ដឹងរបស់ពលរដ្ឋលើបញ្ហាផ្លូវច្បាប់ មានតិចតួចណាស់។ នេះជាបញ្ហាដែលយើងត្រូវរកមធ្យោបាយ ដើម្បីឱ្យប្រជាពលរដ្ឋយល់ដឹង។ បើពលរដ្ឋយល់ដឹងពីបញ្ហាផ្លូវច្បាប់ វាជួយកាត់បន្ថយ [ទង្វើខុសច្បាប់] ដោយសារពួកគាត់ដឹងថា ទង្វើរបស់ពួកគាត់ខុសច្បាប់។ បើពួកគាត់មិនយល់ នោះទង្វើរបស់គាត់មួយចំនួនក៏គាត់មិនដឹងថា វាជាបទល្មើសផង»៕
វីដេអូ៖
