ព្រះសីហនុៈ រដ្ឋបាលខេត្ដព្រះសីហនុកាលពីថ្ងៃទី ១៥ ខែមករា បានរុះរើតូបនៅតាមបណ្ដោយឆ្នេរអូរត្រេះ ១ និងអូរត្រេះ ២ អស់ទាំងស្រុងចំនួន ១៥៦ តូបដើម្បីរក្សាឆ្នេរនេះជាសម្បត្ដិសាធារណៈ និងរៀបចំសោភណភាពឆ្នេរឡើងវិញ ដោយធ្វើឲ្យអាជីវករម្ចាស់តូបទាំងអស់ដែលបើកដំណើរការរយៈពេល ២០ ឆ្នាំមកហើយនោះសម្ដែងការសោកស្ដាយ និងគ្រោងឡើងមកតវ៉ារកដំណោះស្រាយពីលោកនាយករដ្ឋមន្ដ្រី ហ៊ុន សែន ក្នុងពេលឆាប់ៗខាងមុខនេះ។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុប្រាប់ភ្នំពេញប៉ុស្ដិ៍ពីម្សិលមិញថា ការរុះរើតូបទាំងអស់សរុបមាន ២៨២ តូប ទាំងនៅឆ្នេរអូរត្រេះ ១ និងអូរត្រេះ ២ និងឆ្នេរអូរឈើទាល។ អាជ្ញាធរខេត្ដក្រុងព្រះសីហនុបានចុះរុះរើអស់ទាំងស្រុងកាលពីថ្ងៃទី ១៥ ខែមករាហើយបច្ចុប្បន្នក្រុមការងារ រដ្ឋបាលខេត្ដកំពុងបន្ដសម្អាតឆ្នេរ យកកាកសំណល់ផ្សេងៗចេញពីទីតាំង។
លោកថ្លែងថា៖ «ផែនការបន្ទាប់នៅតាមតំបន់ឆ្នេរដែលបានរុះរើតូបចេញនេះ រដ្ឋបាលខេត្ដនឹងរៀបចំសោភណភាពឆ្នេរទាំងឆ្នេរអូរត្រេះនេះ និងឆ្នេរអូរឈើទាល ២ [អតីតអារីស្ដុន] ឡើងវិញឱ្យស័ក្តិសមជាឆ្នេរស្អាតជាប់ចំណាត់ថ្នាក់នៅលើពិភពលោក»។
ទាក់ទងនឹងការរុះរើតូបនេះរដ្ឋបាលខេត្ដព្រះសីហនុបានចេញសេចក្ដីជូនដំណឹងជាបន្តបន្ទាប់ដល់ប្រជាពលរដ្ឋតាំងពីដើមខែធ្នូ ឆ្នាំ ២០១៩ រហូតដល់ថ្ងៃទី ១៣ ខែមករា ដោយបានស្នើពលរដ្ឋអាជីវករដែលមានតូបលក់ដូរនៅតាមបណ្ដោយឆ្នេរអូរត្រេះមួយចំនួនដែលមិនទាន់រុះរើតូបត្រូវសហការរុះរើតូបចេញដោយខ្លួនឯង ខណៈដែលពលរដ្ឋមួយចំនួនធំមានតូបនៅឆ្នេរអូរឈើទាលបានយល់ព្រមរុះរើតាមសន្ដិវិធី។
ប៉ុន្ដែពលរដ្ឋមួយចំនួននៅឆ្នេរអូត្រេះមិនបានសហការ និងបាននាំគ្នាតវ៉ាស្នើឱ្យលោក គួច ចំរើន អភិបាលខេត្ដព្រះសីហនុរកដំណោះស្រាយណាមួយឱ្យពួកគាត់ដោយពួកគាត់អះអាងថា តូបនេះជាឆ្នាំងបាយរបស់ពួកគាត់ និងបានមកប្រកបរបរជិត ២០ ឆ្នាំកន្លងមកហើយ។
លោក ទី អៀន អាជីវករម្នាក់មានតូបលក់ដូរនៅឆ្នេរអូរត្រេះសម្ដែងការសោកស្ដាយក្រោយរដ្ឋបាលខេត្ដប្រកាន់គោលជំហរតម្រូវឱ្យអាជីវករនៅឆ្នេរអូរត្រេះទាំង ៦២ តូបរុះរើចេញទាំងមិនមានសំណង ឬដំណោះស្រាយ។
លោកថ្លែងថា៖ «សម្រាប់ខ្ញុំផ្ទាល់រួមនឹងបងប្អូនអាជីវករដែលរងគ្រោះពីការឈូសឆាយនេះ ពួកខ្ញុំពិតជាមានការរន្ធត់ដែលថ្នាក់ដឹកនាំខេត្ដគាត់ប្រកាន់ជំហរដាច់ខាតត្រូវតែអនុវត្ដការរុះរើតូបលក់ដូរបស់ពលរដ្ឋ»។
លោក អៀន បញ្ជាក់ថា៖ «ប៉ុន្ដែអ្វីដែលអនុវត្ដនោះគឺបានអនុវត្ដតែប្រជាពលរដ្ឋទេសម្រាប់អ្នកមាន អំណាចគឺរដ្ឋបាលខេត្ដអត់ហ៊ានប៉ះតែម្ដង។ ខ្ញុំពិតជាសោកស្ដាយណាស់ក្នុងនាមជាប្រជាពលរដ្ឋស្លូតត្រង់មួយរូបមិនដែលប្រឆាំងទេចំពោះការអនុវត្ដរបស់ប្រទេសជាតិ ហើយក៏ជាពលរដ្ឋដែលគោរពតាមមាគ៌ារបស់សម្ដេចតេជោនាយករដ្ឋមន្ដ្រី»។
លោកបន្ថែមថា ក្នុងការអនុវត្ដរុះរើតូបតាមបណ្ដោយឆ្នេរអូត្រេះមានសំណង់ ២ ទីតាំងដែលបានសាងសង់ឡើងតាមបណ្ដោយឆ្នេរនោះមិនត្រូវបានអាជ្ញាធររុះរើឡើយដោយបញ្ជាក់ថាជាសំណង់មានច្បាប់អនុញ្ញាតត្រឹមត្រូវ។
លោកថា៖ «យើងខ្ញុំទាំងអស់គ្នាអត់បោះបង់ការតស៊ូទេ ពួកយើងទាំងអស់គ្នានឹងប្រមូលផ្ដុំគ្នាទៅតវ៉ានៅភ្នំពេញទៀតទៅក្រសួងមហាផ្ទៃផ្ទះសម្ដេចនាយករដ្ឋមន្ដ្រីក្នុងពេលឆាប់ៗនេះ ព្រោះយើងមិនអាចទុកយូរបានទេរឿងនេះ។ អាជីវករដែលរងការប៉ះពាល់នៅតំបន់ឆ្នេរអូរត្រេះនេះនឹងឡើងទៅតវ៉ាទាំងអស់គ្នា»។
លោកស្រី ជៀប សុធារី មន្ដ្រីសម្របសម្រួលសមាគមសិទ្ធិមនុស្ស (អាដហុក) ប្រចាំខេត្ដព្រះសីហនុស្នើឱ្យអាជ្ញាធរគួរតែផ្ដល់ដំណោះស្រាយដល់ពលរដ្ឋ ក្នុងនោះមានអាជីវករមួយចំនួនខ្ចីលុយពីធនាគាររាប់ម៉ឺនដុល្លារមកកសាងតូបនេះ។
លោកស្រីថ្លែងថា៖ «ពលរដ្ឋជាអាជីវករបានចំណាយថវិកាអស់ច្រើនណាស់ក្នុងការកសាងតូបលក់ដូរនេះឡើង។ ពួកគាត់សុទ្ធតែដឹងថាឆ្នេរនេះ ជាសម្បត្ដិរបស់រដ្ឋ ប៉ុន្ដែពួកគាត់លក់ដូរនេះពួកគាត់បានបំពេញកាតព្វកិច្ចបង់ពន្ធថ្លៃអនាម័យជាដើមទៅដល់រដ្ឋបាលក្រុង»៕
វីដេអូ៖