.jpg)
រដ្ឋបាលរាជធានីភ្នំពេញ នាំយកអំណោយចែកដល់បងប្អូនប្រជាពលរដ្ឋរស់នៅក្នុងភូមិសាស្រ្តខណ្ឌមានជ័យ រាជធានីភ្នំពេញ កាលពីព្រឹកមិញ។ រដ្ឋបាលរាជធានីភ្នំពេញ
ភ្នំពេញ៖ ប្រជាពលរដ្ឋនៅតំបន់បិទខ្ទប់មួយចំនួន បានត្អូញត្អែរជុំវិញការមិនទទួលបានជំនួយឧបត្ថម្ភ និងស្បៀងបរិភោគ ក្នុងអំឡុងពេលតំបន់របស់ពួកគេ ត្រូវបានបិទខ្ទប់ទាំងស្រុង។ ប៉ុន្តែមន្ត្រីបានអះអាងថា អាជ្ញាធរកំពុងតែធ្វើការដោះស្រាយ និងបានផ្តល់អំណោយជូនពលរដ្ឋដែលមានការខ្វះខាតជាបន្តបន្ទាប់។
រូបថត ២ ទៅ ៣ សន្លឹក បង្ហាញពីស្ត្រីម្នាក់ ដែលទទួលបានអំណោយសម្បុរសធម៌ពីលោកនាយករដ្ឋមន្ត្រី ដោយមានជាអង្ករ ទឹកត្រី និងថវិកា ឈរថតនៅពីមុខផ្ទះដោយមានរបងដ៏ធំស្កឹមស្កៃ ជាមួយនឹងរថយន្តទំនើបនៅពីក្រោយ ត្រូវបានអ្នកលេងបណ្តាញសង្គមចែកចាយតៗគ្នា ជាមួយនឹងសាររិះគន់ផ្សេង។ ក្នុងនោះ ក៏មានអ្នកខ្លះ បានលើកឡើងថា តំបន់របស់ពួកគាត់ ដែលសុទ្ធតែជាកម្មករ ក្រខ្សត់មិនដែលទទួលបានអំណោយទាំងនេះនោះទេ ចាប់តាំងពីតំបន់របស់ពួកគេត្រូវបានបិទខ្ទប់ ប៉ុន្តែអ្នកមានជីវភាពធូរធាខ្លះបែរជាទទួលបានអំណោយទៅវិញ។
ក្រៅពីសារបង្ហោះទាំងនេះ ក៏មានពលរដ្ឋជាច្រើនទៀត បានបង្ហោះជាវីដេអូ ជុំវិញបញ្ហាដែលពួកគេមិនមានស្បៀងហូបគ្រប់គ្រាន់ ក្នុងអំឡុងពេលបិទខ្ទប់តំបន់ដែលពួកគេកំពុងរស់នៅ ដោយពួកគេអំពាវនាវដល់រដ្ឋាភិបាល ជាពិសេសអាជ្ញាធរដែនដី គួរផ្តល់ជាស្បៀងអាហារដល់ពួកគេដែលកំពុងមានការខ្វះខាត ដើម្បីអាចមានលទ្ធភាព ចូលរួមទប់ស្កាត់ការរីករាលដាលជំងឺកូវីដ ១៩ ជាមួយរដ្ឋាភិបាល។
កម្មករសំណង់ រស់នៅក្នុងបន្ទប់ជួលក្នុងភូមិទ្រុងមាន់ សង្កាត់អូរបែកក្អម ខណ្ឌសែនសុខ ដែលត្រូវបានអាជ្ញាធរប្រកាសបិទខ្ទប់តាំងពីថ្ងៃទី ៩ មេសា បានប្រាប់ ភ្នំពេញ ប៉ុស្តិ៍ នៅថ្ងៃទី ១៨ ខែមេសានេះ ដោយសុំមិនបញ្ចេញឈ្មោះថា ភូមិទ្រុងមាន់ នឹងបន្តបិទខ្ទប់បន្តទៀត ជាង ១ សប្តាហ៍ បន្ទាប់ពីត្រូវបានបិទខ្ទប់ជិត ២ សប្តាហ៍រួចមកហើយ។
លោកបន្តថា អំឡុងពេលប្រកាសបិទខ្ទប់ដំបូង លោក និងអ្នកភូមិដែលខ្វះខាតដទៃទៀត មានក្តីសប្បាយរីករាយ បន្ទាប់ពីបានទទួលការប្រកាសរបស់លោកនាយករដ្ឋមន្ត្រីថា នឹងទទួលបានស្បៀង និងថវិកា សម្រាប់ទ្រទ្រង់ជីវភាព ប៉ុន្តែរហូតមកដល់ពេលនេះ គឺមិនដែលទទួលបាននោះទេ។
លោកបានរៀបរាប់ថា៖ «ពួកយើងនៅទីនេះ កំពុងខ្វះខាតច្រើន ព្រោះអ្នកនៅទីនេះ ភាគច្រើនជាកម្មកររោងចក្រ កម្មករសំណង់ ជួលផ្ទះគេនៅ។ យើងខ្វះខាតច្រើនណាស់ ហើយមិនអាចចេញទៅណាបានទេ។ ពេលសម្តេចមានប្រសាសន៍ថា មានអំណោយមានអី យើងសប្បាយណាស់ តែមិនឃើញសោះ។ យើងកំពុងទន្ទឹងរង់ចាំអំណោយពីសម្តេច»។
ចំណែកពលរដ្ឋម្នាក់ទៀត ដែលរស់នៅក្នុងខណ្ឌមានជ័យ ក៏បានប្រាប់ ភ្នំពេញ ប៉ុស្តិ៍ ដែរថា មានពលរដ្ឋក្រីក្រមួយចំនួន ក្នុងភូមិរបស់លោកបានទទួលអំណោយរបស់លោកនាយករដ្ឋមន្ត្រី ស្របពេលដែលមានពលរដ្ឋក្រីក្រមួយចំនួនមិនទាន់ទទួលបាននោះទេ។
រដ្ឋបាលរាជធានីភ្នំពេញ នាំយកអំណោយចែកដល់បងប្អូនប្រជាពលរដ្ឋរស់នៅក្នុងភូមិសាស្រ្តខណ្ឌមានជ័យ រាជធានីភ្នំពេញ កាលពីព្រឹកមិញ។ រដ្ឋបាលរាជធានីភ្នំពេញ
លោកបន្តថា លោកក៏កំពុងទន្ទឹងរង់ចាំអំណោយទាំងនេះ ស្របពេលដែលស្ថានភាពបច្ចុប្បន្ន កំពុងមានការខ្វះខាត។ លោកបារម្ភថា បើស្ថានភាពអូសបន្លាយបន្តទៀត គឺកាន់តែធ្វើឲ្យគ្រួសារលោកយ៉ាប់យឺន។
លោកបញ្ជាក់ថា៖ «ខ្ញុំមិនហ៊ានចេញពីផ្ទះទេ ខ្ញុំកំពុងរង់ចាំអំណោយដែរ។ ក្នុងពេលគេបិទនេះ ខ្ញុំប្រភិតប្រភើយ (ស្បៀង) បើគេអូសបន្លាយទៀត ខ្ញុំដាច់ប៉ិតតែម្តង ម្យ៉ាងលុយទឹក លុយភ្លើង និងលុយជំពាក់ធនាគារ ក៏មកដល់ដែរ»។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ មិនអាចសុំការអត្ថាធិប្បាយជុំវិញករណីនេះបានទេ ដោយលោកមិនបានលើកទូរស័ព្ទ។
លោក ឌីរ័ត្ន ខេមរុន អភិបាលរងខណ្ឌមានជ័យ បានប្រាប់ ភ្នំពេញ ប៉ុស្តិ៍ នៅថ្ងៃទី ១៨ ខែមេសានេះថា អំណោយរបស់លោកនាយករដ្ឋមន្ត្រី ហ៊ុន សែន គឺបានចែកជូនប្រជាពលរដ្ឋជាបន្តបន្ទាប់នៅក្នុងខណ្ឌរបស់លោក។ លោកអះអាងថា ពលរដ្ឋខ្វះខាតមួយចំនួនក្នុងខណ្ឌមានជ័យនឹងទទួលបានបន្តបន្ទាប់ទៀត។
ជាមួយគ្នានេះ លោកក៏សុំការយោគយល់ពីពលរដ្ឋមួយចំនួន ដែលរស់នៅក្នុងតំបន់បិទខ្ទប់ ដែលមិនទទួលបានអំណោយនេះ ព្រោះតែតម្រូវការចំពោះមុខ គឺអាជ្ញាធរត្រូវផ្តល់ជូនគ្រួសារខ្វះខាតដែលត្រូវការជាចាំបាច់ ហើយចំពោះគ្រួសារដែលមានលទ្ធភាព គួរណាស់តែចូលរួមជួយ និងកុំដណ្តើមជំនួយនេះ ពីពលរដ្ឋក្រីក្រ។
លោកបញ្ជាក់ថា៖ «យើងបន្តស្រង់ឈ្មោះបងប្អូនមួយចំនួន ហើយយើងបានផ្អាកការផ្តល់ជំនួយនេះសិន។ ដូច្នេះបងប្អូនមួយចំនួន ដែលបានបង្ហោះហ្វេសប៊ុក ឬខំមិនក្តី មិនមែនថា អាជ្ញាធរព្រងើយកន្តើយនោះទេ សូមមេត្តាយោគយល់។ យើងកំពុងតែផ្តល់អំណោយទៅតាមជីវភាពគ្រួសារ ប៉ុន្តែយើងគិតថា បងប្អូនមួយចំនួនដែលមិនទាន់ទទួលបាន គឺយើងកំពុងស្រង់ឈ្មោះហើយ»។
បើតាមលោក ឌីរ័ត្ន ខេមរុន ក្នុងខណ្ឌមានជ័យ ដែលមានសង្កាត់ចំនួន ៧ គឺមានពលរដ្ឋក្រីក្រជាង ៥ ០០០ គ្រួសារហើយ ដែលទទួលបានអំណោយរបស់លោកនាយករដ្ឋមន្ត្រី ដោយមានជាគ្រឿងបរិភោគមួយចំនួន និងថវិកា ចំនួន ៣០ ម៉ឺនរៀល។
លោក សន ជ័យ ប្រធាន អង្គការសម្ព័ន្ធគណនេយ្យភាពសង្គមកម្ពុជាបានថ្លែងថា បើនិយាយពីគោលការណ៍ថ្នាក់ជាតិ គឺមានហើយ ប៉ុន្តែជាក់ស្តែង អាជ្ញាធរមូលដ្ឋានអនុវត្តនេះ គឺមានចំណុចខ្វះខាត។ លោកបញ្ជាក់ថា៖ «ការបែងចែកជំនួយទៅដល់ពលរដ្ឋដែលត្រូវការក្នុងវិបត្តិកូវីដ ១៩ នេះ ជាពិសេសនៅតំបន់រងការបិទខ្ទប់ គឺត្រូវមានវិធានការណ៍ ៣ យ៉ាង ដោយក្នុងនោះ ទី១ ថ្នាក់ជាតិត្រូវធានាថា សេចក្តីសម្រេចរបស់ខ្លួនដែលមានជាធនធានថវិកា គឺត្រូវបញ្ចេញឲ្យបានឆាប់។
ទី២ ថ្នាក់ក្រោមជាតិត្រូវធានាថា ខ្លួនបានអនុវត្តទៅតាមគោលការណ៍ថ្នាក់ជាតិ ដើម្បីឲ្យអំណោយទាំងនេះ បានទៅដល់ក្រុមគោលដៅពិតប្រាកដ ចៀសវាងច្រឡំដៃឲ្យទៅដល់អ្នកមិនស្ថិតក្នុងក្រុមគោលដៅ។
ចំណែកទី ៣ លោក សន ជ័យ សំដៅទៅលើកត្តារួមផ្សំ ដែលពលរដ្ឋអាចទ្រាំទ្របាន គួរតែកុំទទួលយកអំណោយនេះ ហើយបង្វែរអំណោយនេះ ទៅក្រុមគោលដៅពិតប្រាដក ខណៈអាជ្ញាធរមានសមត្ថកិច្ចផ្សេងៗ គួរចូលរួមបន្ថែមទៀតដល់ពលរដ្ឋ ដើម្បីជាក្តីសង្ឃឹមក្នុងការប្រយុទ្ធប្រឆាំងជំងឺនេះ៕
