ភ្នំពេញៈ ជនរងគ្រោះមួយចំនួនបានទទូចទាមទារឲ្យប្រធានក្រុមហ៊ុន «ឋានព្រះឥន្ទ» ចេញមុខដោះស្រាយ និងសងប្រាក់ដែលពួកគេបានដាក់វិនិយោគ និងទិញដីចម្ការ របស់ក្រុមហ៊ុនបន្ទាប់ពីប្រធានក្រុមហ៊ុននេះបានបន្តគេចវេះមិនដោះស្រាយ ក្រោយពីក្រុមហ៊ុនបិទទ្វារ ដោយសារអស់ប្រាក់វិនិយោគ។
អ្នករងគ្រោះដោយសារក្រុមហ៊ុនឋានព្រះឥន្ទបានបង្ហោះសារនៅក្នុងហ្វេសប៊ុក ដោយបានអះអាងថាលោក ឈី ចរិយា ហៅ ហង្ស ព្រីនយ៉ា ជាប្រធានក្រុមហ៊ុនបានឆបោក ប្រមូលលុយ និងបានបិទការិយាល័យគ្រប់ខេត្ត បន្ទាប់មកបានរត់គេចខ្លួនបាត់។
ម្ចាស់គណនីហ្វេសប៊ុកដែលមានឈ្មោះ «អ្នករងគ្រោះដោយសារក្រុមហ៊ុនឋានព្រះឥន្ទ» បានប្រាប់ភ្នំពេញ-ប៉ុស្តិ៍កាលពីម្សិលមិញ ដោយសុំមិនបញ្ចេញឈ្មោះថា លោកបានចាញ់បោកក្រុមហ៊ុននេះសរុបជាទឹកប្រាក់ប្រមាណជាង ៤ ម៉ឺនដុល្លារ បន្ទាប់ពីបានទិញដីពីក្រុមហ៊ុននេះចំនួន ៣ ហិកតានៅក្នុងខេត្តសៀមរាបកាលពីជាង ១ ឆ្នាំមុន ហើយមានជនរងគ្រោះជាច្រើនទៀត។
លោកថា អំឡុងពេលទិញដំបូង ក្រុមហ៊ុនបានអះអាងថាយ៉ាងយូររយៈពេលកន្លះឆ្នាំនឹងចេញប្លង់ជូន ប៉ុន្តែជាង ១ ឆ្នាំមកហើយ ក្រុមហ៊ុននៅតែមិនចេញប្លង់ជូន ហើយបច្ចុប្បន្នក្រុមហ៊ុននេះក៏បានបិទទ្វារនៅគ្រប់សាខាទាំងអស់។
លោកបញ្ជាក់៖ «យើងបង្ហោះនេះគឺចង់ប្រមូលជនរងគ្រោះឲ្យបានជុំគ្នា ព្រោះក្រុមហ៊ុននេះមានសាខាច្រើនខេត្ត និងមានអ្នករងគ្រោះច្រើនរយនាក់ និងមានអ្នកខ្លះនៅតែបន្តចាញ់បោកក្រុមហ៊ុននេះ និងបន្តបង់លុយទិញដីពីក្រុមហ៊ុននេះ។ បន្ទាប់ពីបង្ហោះនៅលើហ្វេសប៊ុកនេះយើងបានប្រមូលជនរងគ្រោះជិត ១០០ នាក់ហើយ»។
ជនរងគ្រោះរូបនេះបានបន្តថា បន្ទាប់ពីប្រមូលជនរងគ្រោះហើយនឹងបន្តធ្វើទៅតាមនីតិវិធីតាមច្បាប់ ដោយនឹងដាក់ពាក្យបណ្តឹងទៅតុលាការនៅសប្តាហ៍ក្រោយ ខណៈដែលកន្លងទៅមានជនរងគ្រោះមួយចំនួនក៏បានដាក់ពាក្យបណ្តឹងទៅតុលាការ ដើម្បីស្វែងរកយុត្តិធម៌ផងដែរ។
ជនរងគ្រោះម្នាក់ទៀតលោក ង៉ោ លីស៊ាង ដែលបានដាក់ពាក្យបណ្តឹងទៅតុលាការខេត្តសៀមរាបកាលពីថ្ងៃទី ២០ ខែមីនា បានប្រាប់ភ្នំពេញប៉ុស្តិ៍ពីម្សិលមិញថា ពួកលោកមួយចំនួនបានយកកម្លាំងញើសឈាមដែលមាន ហើយខំប្រមូលលុយអស់ពីខ្លួនថែមទាំងខ្ចីលុយពីធនាគារយកមកទិញដីចម្ការ ពីក្រុមហ៊ុននេះហើយថែមទាំងបានដាក់ហ៊ុនវិនិយោគជាមួយក្រុមហ៊ុន ដើម្បីទទួលបានការប្រាក់បន្ថែម។ នៅពេលក្រុមហ៊ុនមានបញ្ហាយ៉ាងដូច្នេះ បានធ្វើឲ្យពួកគាត់ជួបប្រទះនូវការខ្វះខាតជីវភាព និងត្រូវបង់សងធនាគារ ដោយគ្មានការលើកលែង។
លោកបញ្ជាក់ថា៖ «ខ្ញុំដាក់ពាក្យបណ្តឹងតែម្នាក់ឯងនេះគឺខ្ញុំចង់បានលុយខ្ញុំមកវិញប្រមាណ ១ ៨៥០០ ដុល្លារដែលខ្ញុំបានទិញដីឡូត៍ និងដីចម្ការ។ ខ្ញុំគ្រាន់តែដឹងថា ការដាក់ពាក្យបណ្តឹងរបស់ខ្ញុំនេះក្នុងនាមជាជនរងគ្រោះម្នាក់ ហើយដើម្បីឲ្យគេដឹងថា ក្រុមហ៊ុននេះជាក្រុមហ៊ុនបោកប្រាស់។ ខ្ញុំក៏កំពុងចូលរួមដាក់ពាក្យប្តឹងជាក្រុមជាមួយជនរងគ្រោះដទៃទៀតដែរ»។
លោក លីស៊ាង រំពឹងថាតុលាការ និងមន្ត្រីក្រសួងពាក់ព័ន្ធជួយអន្តរាគមន៍តាមចាប់អ្នកពាក់ព័ន្ធជាមួយក្រុមហ៊ុនឲ្យសងលុយមកពួកលោកវិញ និងធ្វើយ៉ាងម៉េចឲ្យតែប្រធានក្រុមហ៊ុននេះចេញមុខមកដោះស្រាយ ហើយបញ្ឈប់សកម្មភាពដើរឆបោក។
តាមការបង្ហោះរបស់ទំព័រហ្វេសប៊ុកអ្នករងគ្រោះដោយសារក្រុមហ៊ុនឋានព្រះឥន្ទបានឲ្យដឹងថា ក្រុមហ៊ុននេះមានសាខាច្រើនកន្លែង ដែលមានដីចម្ការទុរេនក្នុងទីតាំងភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត និងដីចម្ការដូងក្រអូប ទីតាំង ភូមិដង្កោ ឃុំស្លែងស្ពាន ស្រុកស្រំស្នំ ខេត្តសៀមរាប រួមទាំងដីចម្ការ ទីតាំង ភូមិពូលូង សង្កាត់រមនា ក្រុងសែនមនោរម្យ ខេត្តមណ្ឌលគិរី ដើម្បីធ្វើការឃោសនាលក់។
លោក ឈី ចរិយា បានបង្ហោះវីដេអូខ្លីមួយប្រមាណ ៩ នាទីនៅលើទំព័រហ្វេសប៊ុករបស់លោកកាលពីម្សិលមិញថា លោកមិនបានគេចវេះពីការទទួលខុសត្រូវក្នុងការទូទាត់សំណងដល់អតិថិជនរបស់លោកនោះទេ។ តែក្នុងពេលនេះក្រុមហ៊ុនរបស់លោកពិតជាបានបិទទ្វារពិតប្រាកដមែន បន្ទាប់ពីបានជួបបញ្ហាផ្នែកហិរញ្ញវត្ថុ ប៉ុន្តែក្រុមហ៊ុនមិនទាន់ប្រកាសក្ស័យធននោះទេ ដោយនៅបន្តដំណើរការដដែល ហើយក៏នៅតែបន្តប្រឈមមុខដោះស្រាយជាមួយអតិថិជនរបស់លោកជានិច្ច។
លោកថ្លែងថា៖ «បច្ចុប្បន្ននេះថ្វីដ្បិតតែបញ្ហារអាក់រអួល ប៉ុន្តែខ្ញុំមិនដែលមានចេតនាណាមួយបោះបង់ភ្ញៀវដែលធ្លាប់ជឿខ្ញុំ ម្ចាស់បំណុលដែលគាត់ធ្លាប់ជួយខ្ញុំម្តងណាឡើយ។ តាំងពី ១០ ខែមុនមកម្ល៉េះ ខ្ញុំបានទទួលយោបល់ថា លក់ក្រុមហ៊ុននេះឲ្យអ្នកដទៃទៅ ប្រកាសក្ស័យធនទៅហើយខ្ញុំបានរួចខ្លួន។ នៅពេលផ្ទេរទ្រព្យសម្បត្តិដែលមានទៅឲ្យអ្នកមានដទៃទៅ ដើម្បីគេប្តឹងមក មានអ្នកជួយការពារ។ ប៉ុន្តែខ្ញុំអត់ទេ ខ្ញុំសុខចិត្តឲ្យគេប្តឹង ព្រោះយើងជំពាក់គេ យើងសងគេមិនទាន់ គេប្តឹងមានអីខុស។ ភ្ញៀវគាត់ទិញដីយើង គាត់មិនទាន់បានប្លង់ គាត់ប្តឹងយើងមានអីខុស ប៉ុន្តែបើយើងរត់ចោល គឺយើងខុស»។
លោក ឈី ចរិយា កាលពីម្សិលមិញមិនអាចទាក់ទងសុំការអត្ថាធិប្បាយបានទេ ព្រោះទូរស័ព្ទរបស់លោកមិនអាចទាក់ទងបាន។
លោក យិន ស្រាង អ្នកនាំពាក្យតុលាការខេត្តសៀមរាបមិនអាចសុំការបញ្ជាក់ជុំវិញពាក្យបណ្ដឹងរបស់ជនរងគ្រោះដែលបានដាក់កាលពីអំឡុងខែមីនាបានទេ ព្រោះតែលោកបានចុចបិទទូរស័ព្ទ៕