.jpg)
ចំការដំណាំកញ្ឆាខុសច្បាប់នៅស្រុកគិរីវង់។ រូបថត នគរបាល
តាកែវៈ លោក ហៀម ស្រ៊ីម អធិការរងស្រុកគិរីវង់ទទួលបន្ទុកផ្នែកប្រឆាំងគ្រឿងញៀនបានប្រាប់ភ្នំពេញប៉ុស្តិ៍ថា ជនសង្ស័យឈ្មោះ ផន ម៉ុច អាយុ ៣៥ ឆ្នាំ មានលំនៅភូមិជ្រោយ ឃុំព្រះបាទជាន់ជុំ ស្រុកគិរីវង់ ខេត្តតាកែវ ត្រូវបានកម្លាំងនគរបាលបង្ក្រាបបទល្មើសគ្រឿងញៀនចាប់ឃាត់ខ្លួនកាលពីរសៀលថ្ងៃទី ៣ ខែ កុម្ភៈ ឆ្នាំ ២០២០ ខណៈកំពុងរៀបចំកាត់ស្លឹក និងកញ្ចុំផ្កាកញ្ឆា នៅក្នុងចម្ការកញ្ឆាលួចលាក់មួយកន្លែងដែលមានទីតាំងនៅចំណុចដាជំពុំសេក។
លោក ស្រ៊ីម ថ្លែងថា៖ «ជនសង្ស័យជាមុខសញ្ញាសកម្មក្នុងការលួចដាំដំណាំកញ្ឆាក្នុងតំបន់ជើងភ្នំព្រះបាទជាន់ជុំដែលសមត្ថកិច្ចយើងបានធ្វើការស្រាវជ្រាវ និងតាមដានជាច្រើនឆ្នាំមកហើយ ប៉ុន្តែទើបតែពេលនេះដែលសមត្ថកិច្ចយើងមានភ័ស្ដុតាងដាក់បន្ទុកគ្រប់គ្រាន់គឺចាប់បាននៅនឹងកន្លែង ខណៈកំពុងប្រព្រឹត្តបទល្មើសដាំដំណាំកញ្ឆាខុសច្បាប់»។
លោកបានប្រាប់ថា ក្នុងអំឡុងពេលនៃការចាប់ខ្លួននោះសមត្ថកិច្ចបានធ្វើការដក និងដុតបំផ្លាញចោលនូវដំណាំកញ្ឆាសរុបចំនួន ៧៧៦ ដើម និងស្លឹកកញ្ឆាស្រស់ជាង ១ គីឡូក្រាម ចំណែកជនសង្ស័យត្រូវបានបញ្ជូនទៅកាន់អធិការដ្ឋាននគរបាលស្រុកគិរីវង់ ដើម្បីធ្វើការសាកសួរបន្ថែម និងបានកសាងសំណុំរឿងបញ្ជូនទៅកាន់ការិយាល័យបង្ក្រាបគ្រឿងញៀននៅរសៀលថ្ងៃទី ៤ ខែ កុម្ភៈ ឆ្នាំ ២០២០ ដើម្បីមានចំណាត់ការបន្តតាមនីតិវិធី។
លោក ស្រ៊ីម ថ្លែងថា បើទោះជាមានការចុះស្រាវជ្រាវ និង បង្ក្រាបបានជាបន្តបន្ទាប់ក្ដីក៏ដំណាំកញ្ឆាត្រូវបានគេលួចដាំដោយខុសច្បាប់នៅក្នុងព្រៃតាមមាត់បឹង និងជើងភ្នំ។ ជាក់ស្ដែងក្នុងរយៈពេល ១ ខែដើមឆ្នាំ ២០២០ នេះ កម្លាំងសមត្ថកិច្ចនគរបាលស្រុកគិរីវង់បានចុះបង្ក្រាបទីតាំងដាំដំណាំកញ្ឆាចំនួន ២៤ កន្លែងបានកាប់ និងដុតបំផ្លាញចោលដំណាំកញ្ឆាសរុបជាង ១ ម៉ឺនដើម។
លោក ម៉ាក់ សេរីវឌ្ឍនា នាយការិយាល័យប្រយុទ្ធប្រឆាំងគ្រឿងញៀននៃស្នងការដ្ឋាននគរបាលខេត្តតាកែវបានថ្លែងថា សំណុំរឿងនេះកំពុងបន្តនីតិវិធីស៊ើបសួរបន្ថែម ដើម្បីស្វែងរកជនពាក់ព័ន្ធផ្សេងទៀតដែលនៅពីក្រោយករណីលួចដាំដំណាំកញ្ឆាខុសច្បាប់នេះ។
លោក សេរីវឌ្ឍនា បានបន្តថា៖ «យើងជឿថា ក្រៅពីជនសង្ស័យម្នាក់នេះមានមនុស្សជាច្រើនទៀតដែលពាក់ព័ន្ធលើមុខរបរនេះ»៕
