The Phnom Penh Post Search

Search form




Logo of Phnom Penh Post newspaper Phnom Penh Post - ពលរដ្ឋ​រងគ្រោះ​រង់ចាំ​ដំណោះ​ស្រាយ​វិវាទ​ដីធ្លី​ពី​រដ្ឋាភិបាល

ពលរដ្ឋ​រងគ្រោះ​រង់ចាំ​ដំណោះ​ស្រាយ​វិវាទ​ដីធ្លី​ពី​រដ្ឋាភិបាល

សន្នីសីទ​ស្តីពី​រឿង​ជម្លោះ​ដីធ្លី​ដែល​ធ្វើ​ឡើង​កាលពី​ម្សិលមិញ​។
សន្នីសីទ​ស្តីពី​រឿង​ជម្លោះ​ដីធ្លី​ដែល​ធ្វើ​ឡើង​កាលពី​ម្សិលមិញ​។ ហេង ជីវ័ន

ពលរដ្ឋ​រងគ្រោះ​រង់ចាំ​ដំណោះ​ស្រាយ​វិវាទ​ដីធ្លី​ពី​រដ្ឋាភិបាល

ភ្នំពេញៈ ក្រុម​អង្គការ​សង្គម​ស៊ីវិល​ធ្វើការ​ពាក់ព័ន្ធ​ដីធ្លី និង​ប្រជាពលរដ្ឋ​ដែល​រង​ផលប៉ះពាល់​ដោយសារ​ជម្លោះ​ដីធ្លី​នៅ​តាម​តំបន់​ឆ្នេរសមុទ្រ​អំពាវនាវ​ដល់​រដ្ឋាភិបាល និង​ស្ថាប័ន​ពាក់ព័ន្ធ​ឲ្យ​​ជួយ​ពន្លឿន​ដោះស្រាយ​បញ្ហា​ដីធ្លី​ជូន​ពួកគេ​ឱ្យ​បាន​ឆាប់​បន្ទាប់ពី​ពួកគេ​បាន​ដាក់​​ពាក្យ​ប្តឹង​ទៅ​គ្រប់​ស្ថាប័ន​ពាក់ព័ន្ធ​អស់​រយៈពេល​ជាច្រើន​​ឆ្នាំ​មក​​ហើយ​​តែ​នៅ​ពុំ​ទាន់​​ឃើញ​មាន​ដំណោះស្រាយ​សមស្រប។

ការ​អំពាវនាវ​នេះ​ធ្វើ​ឡើង​នៅ​ក្នុង​សន្និសីទ​សារព័ត៌មាន​ស្តីពី​បញ្ហា​​ទំនាស់​ដីធ្លី​នៅ​តាម​ខេត្ត​ជាប់​មាត់​សមុទ្រ​កាលពី​ម្សិលមិញ​នៅ​សណ្ឋាគារ​ហ៊ីម៉ាវ៉ារី​ដែល​មាន​តំណាង​សង្គម​ស៊ីវិល​​ធ្វើការ​ពាក់ព័ន្ធ​រឿង​​វិវាទ​ដីធ្លី និង​អ្នក​តំណាង​ប្រជាពលរដ្ឋ​រងគ្រោះ​ប្រមាណ ២០ នាក់​ចូលរួម​ផង​ដែរ​។ ខេត្ត​ជាប់​មាត់​សមុទ្រ​ដែល​មាន​ទំនាស់​ដីធ្លី​ជាមួយ​ក្រុមហ៊ុន​អភិវឌ្ឍន៍​រួមមាន​ខេត្ត​កោះកុង ខេត្ត​កំពត ក្រុង​ព្រះសីហនុ​ និង​​ខេត្ត​កែប។

ប្រធាន​ផ្នែក​ដីធ្លី និង​ធនធាន​ធម្មជាតិ​នៃ​សមាគម​អាដហុក​លោក ឡាត់ គី ដែល​​បាន​ចូលរួម​ក្នុង​សន្និសីទ​កត់សម្គាល់​​ថា​ជម្លោះ​​ដីធ្លី​នៅ​តាម​តំបន់​ឆ្នេរ​កើតឡើង​ដោយសារ​ការ​ផ្តល់​​ដីសម្បទាន​សេដ្ឋកិច្ច​ដោយ​មិន​បាន​សិក្សា​ពី​ផលប៉ះពាល់​ និង​ការ​រស់នៅ​របស់​ប្រជាពលរដ្ឋ។ លោក​ថា៖ ​«ពេល​​វិវាទ​ដីធ្លី​កើតឡើង​តាម​ការ​វិនិយោគ​ក្តី តាម​រូបភាព​បង្កើន​ទេសចរណ៍​ក្តី ការ​វិនិយោគ​បែប​នេះ​ធ្វើ​ឱ្យ​ប៉ះពាល់​ធ្ងន់ធ្ងរ​ទៅលើ​ជីវភាព​ប្រចាំ​ថ្ងៃ​របស់​ពលរដ្ឋ​ និង​ផ្លូវ​ចិត្ត​»​។

តំណាង​​ពលរដ្ឋ​រងគ្រោះ​មកពី​ឃុំ​កោះ​ស្តេច ស្រុក​គិរីសាគរ ខេត្ត​កោះកុង លោក ស៊ឹម គឹម​សាន្ត ថ្លែង​ថា​លោក​មាន​​បញ្ហា​ទំនាស់​ដីធ្លី​ជាមួយ​ក្រុមហ៊ុន Union Development Group Co,LTD តាំង​ពី​ឆ្នាំ ២០០៨ រហូត​មក​ទល់​ពេល​​បច្ចុប្បន្ន​នៅ​តែ​ពុំ​ទាន់​មាន​ដំណោះ​ស្រាយ​បើ​ទោះបី​ជា​​លោក​បាន​ដាក់​ពាក្យ​​ប្តឹង​ទៅ​អាជ្ញាធរ​គ្រប់​ជាន់​ថ្នាក់​ក្តី។

លោក​និយាយ​ថា៖ «យើង​ប្តឹង​អស់​រយៈពេល​បួន​ឆ្នាំ​ហើយ​តាំង​ពី​ថ្នាក់​ភូមិ ឃុំ ស្រុក និង​ខេត្ត តែ​អាជ្ញាធរ​ឆ្លើយ​មក​ថា​គាត់​អត់​មាន​សមត្ថភាព​ដោះស្រាយ​ទេ​ថា​ជា​សមត្ថកិច្ច​របស់​ក្រសួង​បរិស្ថាន​ដល់​ពេល​ខ្ញុំ​ដាក់​មក​ក្រសួង​អស់​ជាង ៣ ខែ​ហើយ​អត់​ទាន់​មាន​ពន្លឺ​​អី​ជូន​ខ្ញុំ​ទេ»។

លោក សេង សេចន្ថា តំណាង​ប្រជាពលរដ្ឋ​នៅ​ស្រុក​ព្រៃនប់ ខេត្ត​ព្រះសីហុន​ដែល​កំពុង​មាន​បញ្ហា​ដីធ្លី​ជាមួយ​នឹង​ក្រុមហ៊ុន Yee Chea បាន​ថ្លែង​ថា​​៖ ​«អាជ្ញាធរ​ខេត្ត​ហាក់​ដូចជា​ព្រងើយ​កន្តើយ​ក្នុង​ការ​ដោះស្រាយ​ដីធ្លី​ជូន​ពួកគាត់​មិន​តែ​ប៉ុណ្ណោះ​ពួក​គាត់​កំពុង​រស់នៅ​ជាមួយ​នឹង​ការ​ភ័យព្រួយ​ខ្លាច​ក្រែង​​ខាង​ក្រុមហ៊ុន​​មក​រុះរើ​ផ្ទះ សម្បែង​ និង​​ធ្វើការ​បណ្តេញ​ពួកយើង​ចេញ»​។

អ្នកស្រី ភោគ រ៉ែន មកពី​សហគមន៍​ព្រែក​ត្របែក ខេត្ត​ព្រះសីហនុ​ដែល​មាន​​ទំនាស់​ជាមួយ​ក្រុមហ៊ុន Yee Chea និយាយ​ថា៖ «ដី​របស់​ខ្ញុំ​មាន​ស្រាប់​គេ​មិន​ឲ្យ​ធ្វើ​ស្រែ មិន​ឱ្យ​សង់​ផ្ទះ​ហើយ​ដេញ​ខ្ញុំ​ចេញ​ដល់​ពេល​ខ្ញុំ​​ធ្វើ​ផ្ទះ​គេ​នាំ​គ្នា​មក​រុះរើ​ផ្ទះ​ពួក​ខ្ញុំ​មិន​ហ៊ាន​ទៅ​រក​ស៊ី​​ឆ្ងាយ​ទេ​ចាំ​តែ​ឃ្លាំ​មើល​ផ្ទះ​ព្រោះ​គេ​មាន​គ្នា​ពី​ ៤ ទៅ ១០ នាក់​ដើរ​ពេញ​ភូមិ​រាល់​ថ្ងៃ»។

អុ្នក​នាំ​ពាក្យ​ក្រសួង​បរិស្ថាន​លោក សៅ សុភាព បាន​ថ្លែង​​ថា​លោក​ទទួល​​ស្គាល់​ថា​ការ​ផ្តល់​ដីសម្បទាន​សេដ្ឋកិច្ច​មួយ​ចំនួន​បាន​ធ្វើ​ឱ្យ​ប៉ះពាល់​ដល់​លំនៅឋាន​របស់​ប្រជាពលរដ្ឋ​ដែល​ទាមទារ​​​ពេលវេលា​ក្នុង​ការ​ដោះស្រាយ​​។ យ៉ាង​ណា​ក៏​ដោយ​លោក​ថា​កន្លង​ទៅ​ខាង​ក្រសួង​បាន​សហការ​ជាមួយ​អាជ្ញាធរ​ដែនដី​ចុះ​ដោះស្រាយ​សំណង​ជូន​ប្រជាពលរដ្ឋ​បាន​​ភាគ​ច្រើន​ហើយ​កំពុង​បន្ត​ដោះស្រាយ​បញ្ហា​ដែល​នៅ​សេស​សល់។

លោក​ថា៖ «ក្រុមហ៊ុន​ដែល​ទទួល​បាន​​ដីសម្បទាន​សេដ្ឋកិច្ច​ត្រូវ​ដោះស្រាយ​តាម​គោលការណ៍​ស្ម័គ្រ​ចិត្ត​ដោយ​ពលរដ្ឋ​ព្រម​ទទួល​សំណង​តែ​បើ​មិន​ស្រុះស្រួល​គ្នា​ត្រូវ​ប្រើ​គោលការណ៍​វៀល​ស្បែក​ខ្លា»​។ តែ​លោក​សង្កត់​ធ្ងន់​ថា​ដោយសារ​ឃើញ​មាន​បញ្ហា​នេះ​ហើយ​បាន​ជា​រដ្ឋាភិបាល​បាន​សម្រេច​ដក​ហូត​ដី​សម្បទាន​ពី​ក្រុមហ៊ុន​មួយ​ចំនួន​មក​វិញ។

យោង​តាម​របាយការណ៍​របស់​អង្គការ​សង្គម​ស៊ីវិល​ដែល​ផ្សព្វផ្សាយ​កាលពី​ម្សិលមិញ​រកឃើញ​ថា​ករណី​ទំនាស់​ដីធ្លី​នៅ​ជាប់​ឆ្នេរសមុទ្រ​មាន​ ៤១ ​ករណី​ដែល​មិន​ទាន់​ដោះស្រាយ​ចប់​សព្វ​គ្រប់​នៅ​ឡើយ។ មូលហេតុ​ដែល​បណ្តាល​ឲ្យ​មាន​ទំនាស់​​ដីធ្លី​នេះ​ដោយសារ​រដ្ឋាភិបាល​ផ្តល់​ដីសម្បទាន​សេដ្ឋកិច្ច និង​ជួល​ទីតាំង​តាម​តំបន់​ឆ្នេរ​ជា​ដី​​របស់​​រដ្ឋ​ទៅ​ឱ្យ​ក្រុមហ៊ុន​ឯកជន​គ្រប់គ្រង​ដែល​បណ្ដាល​​ឲ្យ​ប៉ះពាល់​​​ដល់​ប្រជាពលរដ្ឋ​រងគ្រោះ​ចំនួន​ ៤១១២ គ្រួសារ​៕

អត្ថបទគួរចាប់អារម្មណ៍